2 Kɔl 6:4 - BAEBOLO ANZƐƐ BULUKU NWUANZANWUANZA

⁴ Wɔ yɛ nyɛleɛ biala anu yɛfa abotane yɛgyinla ngyegyelɛ, anwongyelelɛ nee abodelɛ biala anloa, yɛkile kɛ yɛle Nyamenle sonvolɛma.

2 Kɔl 6:4 ပူးပေါင်းရင်းမြစ်များ

Ayezaya Buluku ne 61:6

Na bɛmɛ, bɛbavɛlɛ bɛ Ɛdɛnkɛma sɛlɛvolɛma, Menli bavɛlɛ bɛ Nyamenle sonvolɛma. Maanle maanle bava bɛ anwonyia arɛlɛ bɛ, Na bɛali fɛlɛko kɛ anwonyia ne mɔ le bɛ ɛdeɛ.

Dwowɛle Buluku ne 1:9

Ma azubɔdeɛ nee nza azubɔdeɛ ɛwie Ɛdɛnkɛma Ɛzonlenlɛ Sua ne anu. Sɛlɛvolɛma, Ɛdɛnkɛma sonvolɛma ne su di nyane, (ɔboalekɛ bɛnnyia azubɔdeɛ bɛmmaa Ɛdɛnkɛma).

Dwowɛle Buluku ne 2:17

Bɛmaa sɛlɛvolɛma mɔɔ ɛlɛsonle Nyamenle wɔ Ɛdɛnkɛma Ɛzonlenlɛ Sua ne anuhɔlɛ ne nee azukponle ne avinli la ɛzu ɛzɛlɛ kɛ, “O Ɛdɛnkɛma, nwu wɔ menli ne anwunvɔne. Mmamaa maanle maanle ne mɔ kpo yɛ, bɛsi yɛ amgbu bɛka kɛ, ‘Bɛ Nyamenle ne wɔ nienwu?’ ”

Edwɛkpa ne kɛmɔ Luku hɛlɛle la 21:19

Bɛgyinla kpundii, na bɛkɛnyia ngoane.”

Dw 16:33

Meha ɛhye mehile bɛ amaa saa bɛmeta me nwo a bɛanyia anzonudwolɛ. Ɛtane ewiade ɛhye bamaa bɛali nyane, noko bɛgyinla kpundii. Meli ɛtane ewiade ɛhye anwo zo konim!”

Ɛzoanvolɛma Gyima ne 2:22

“Yizilayɛma, bɛdie! Gyisɛse mɔɔ vi Nazalɛte la le sonla mɔɔ Nyamenle yele ye manle bɛ a; ɔluale ɔ nwo zo ɔlile gyima mgbole, ɔyɛle nwanwane ninyɛne nee sɛkɛlɛneɛ wɔ bɛdabɛ bɛ nye zo, mɔɔ bɛdabɛ bɛze a.

Ɛzoanvolɛma Gyima ne 20:34

Bɛdabɛ bɛze kɛ medame me sa anloa gyima mɔɔ meyɛ la yɛɛ meva menlea me nwo nee me gɔnwo mɔ a.

Ɛzoanvolɛma Gyima ne 9:16

Na medame mebahile ye amaneɛ mɔɔ ɔbanwu ye wɔ me duma nu la.”

Wulo 14:18

Awie biala mɔɔ sonle Kelaese wɔ zɛhae adenle zo la yɛɛ Nyamenle anye die ɔ nwo na ɔsɔ menli nye a.

Wulo 16:10

Mebiza Apɛlizi. Ye nɔhalɛlilɛ sɔ Kelaese anye. Mebiza bɛdabɛ mɔɔ bɛwɔ Alesetobulɛse abusua nu la amuala ahye.

Wulo 3:5

Saa yɛ nyɛleɛ ɛtane ɛtane ne mɔ maa yɛnwu Nyamenle pɛlepɛlelilɛ ne wienyi a, ɛnee kɛ yɛse ɛ? Saa yɛyɛ ɛtane na Nyamenle tea yɛ a, ɛnee Nyamenle ɔdaye yeyɛ ɛtane ɔ? (Melɛtendɛ kɛ sonla ala la.)

Wulo 5:8

noko Nyamenle ɛhile kɛ ɔsi ɔkulo yɛ la, na yemɔ a le kɛ, mɔɔ ɛnee yɛtɛda nwo yɛtɛde ɛtaneyɛlɛma la, Kelaese wule manle yɛ!

1 Kɔl 3:5

Na Apɔlɔso bɔbɔ a le nwane? Pɔɔlo noko a le nwane? Yɛle Nyamenle sonvolɛma ala mɔɔ bɛluale yɛ nwo zo bɛliele Edwɛkpa ne bɛlile a. Yɛ nuhua ko biala yɛ ye gyima mɔɔ Awulae vale manle ye kɛ ɔyɛ la.

1 Kɔl 4:1

Ɔwɔ kɛ bɛbu yɛ kɛ Kelaese sonvolɛma mɔɔ nea Nyamenle gyima ne mɔɔ vea la azo a.

1 Kɔl 9:11

Yɛlua sunsum nu ma wɔ bɛ nu, na saa yɛnyia nvasoɛ wɔ ninyɛne nu yɛfi bɛ ɛkɛ ne a, ɛnee ɔnle ɛtane.

2 Kɔl 11:23

Saa bɛle Kelaese sonvolɛma a, ɛnee ɔkɛyɛ kɛ mezɛ bɔbɔ ɛdeɛ, noko mele sonvolɛ kpalɛ metɛla bɛ. Meyɛ gyima ɛsesebɛ kpalɛ, mela efiade fane dɔɔnwo medɛla bɛ, bɛbila me empele fane kɛyɛ nyɛ, yɛɛ mekɛ dɔɔnwo ne ala, ɔhale me nee ewule.

2 Kɔl 11:27

Meli gyima nee mgbelera dɔɔnwo; aleɛ dwo a nafelɛ ɛngɔ me nye zo; ɛhɔne nee nzuhɔne ku me; mekye ɛhɔne, ɛyɛlɛ ku me yɛɛ melɛ me nwo zɔ ɛlɛ.

2 Kɔl 11:9

Mekɛ mɔɔ me nee bɛ de la, saa mekyia a mengyegye bɛ kɛ bɛboa me; mediema mɔɔ vi Masidonea rale la a rɛlɛle me debie biala mɔɔ mengyianle nwolɛ la a. Na kɛmɔ meanyɛ ye dɛba la, zɔhane ala yɛɛ menrɛva kpomgbolo biala menrɛkpolo bɛ kɔme a.

2 Kɔl 12:10

Kelaese ati, me kunlu dwo me nwo wɔ me bɛtɛɛyɛlɛ, aholoba ɛbɔlɛ, ngyegyelɛ, kpɔdekpɔdeyɛlɛ, yɛɛ munzule nu, ɔluakɛ mɔɔ menwɔyɛ bɛtɛɛ la ɛnee me nwo ɛyɛ se kpalɛ.

2 Kɔl 12:12

Menvale abotane kpole a menyɛle ninyɛne mɔɔ kile kɛ mele ɛzoanvolɛ la wɔ bɛ nu a; bɛnwunle sɛkɛlɛneɛ nee nwanwane ninyɛne nee gyima mɔɔ kile Nyamenle tumi ne la amuala.

2 Kɔl 2:17

Yɛmɛ, yɛnle kɛ menli mɔɔ fa Nyamenle edwɛkɛ ne si kongo la, ɔboalekɛ Nyamenle a ɛzoa yɛ a, yɛɛ yɛgyinla ɔ nyunlu yɛtendɛ kɛ Kelaese sonvolɛma.

2 Kɔl 3:6

yemɔ yɛɛ yeyɛ yɛ Ngyekyeleɛ Fofolɛ ne sonvolɛma a. Ngyekyeleɛ Fofolɛ ɛhye ɛnle mɛla mɔɔ bɛhɛlɛle a, ɔle Nyamenle Sunsum. Mɛla ne mɔɔ bɛhɛlɛle la fa ewule ba, na Nyamenle Sunsum ne maa ngoane mɔɔ ɛnlɛ awieleɛ.

2 Kɔl 4:17

Nyane sikalɛ ekyi ɛhye mɔɔ yɛlɛnwu ye la bava anyunlunyia mɔɔ ɛnlɛ awieleɛ na ɔle kpole kpalɛ ɔtɛla nyane ɛhye la arɛlɛ yɛ.

2 Kɔl 4:2

Yɛkpo awozinli nu nee anyiemgba nyɛleɛ muala; yɛmbɔ alane ɛbɛla, yɛɛ yɛmbɔ adalɛ wɔ Nyamenle edwɛkɛ ne ɛhanlɛ nu yɛngakyi ye. Yɛlua nɔhalɛ wienyi ne anu yɛbɔ yɛ ɛbɛla wɔ Nyamenle anyunlu kɛ awie biala kɛnyia yɛ nwo adwenle kpalɛ.

2 Kɔl 4:8

Ndenle dɔɔnwo anu bɛgyegye yɛ, na bɛngola bɛnzɛkye yɛ; bɛmaa yɛ adwenle nu yɛ kpomgbondee, noko yɛ agbɔkɛ nu ɛntuto;

2 Kɔl 7:11

Bɛnlea gyima mɔɔ Nyamenle vale bɛ rɛle ne mɔɔ bɔle la lile a: bɛ nye bolole edwɛkɛ ne anwo manle bɛhilele kɛ bɛ nwo ɛnle nu! Nea bɛ ɛya mɔɔ bɛvale, ɛzulolɛ mɔɔ bɛnyianle ye bɛ nu, bɛ nwo mɔɔ dɔ me kɛ bɛ kunlu a anrɛɛ mewɔ lɔ, bɛ nwo mɔɔ bɛyelele kɛ bɛkɛbɔ ɛbɛla kpalɛ, nee kɛ bɛzile bɛdeanle bɛdabɛ mɔɔ bɛlile ɛtane la. Adenle biala anu bɛyɛle bɛhilele kɛ bɛnli fɔlɛ fee wɔ edwɛkɛ ne anwo.

Kɔlɔ 1:11

Yɛsɛlɛ kɛ Nyamenle ɛva ye anyunlunyia tumi ne ɛwula bɛ anwosesebɛ, amaa bɛava abotane nee anyelielɛ bɛagyinla debie biala anloa,

Kɔlɔ 1:24

Kɛkala, bɛdabɛ bɛ ti ɔyɛ me fɛ kɛ melɛnwu amaneɛ a, ɔluakɛ melua me nwonane nu amaneɛnwunlɛ ye azo melɛboa meamaa Kelaese amaneɛnwunlɛ wɔ ye Asɔne ne ati ali munli.

1 Tɛs 3:7

Yemɔti, mediema, wɔ yɛ anwongyelelɛ nee amaneɛnwunlɛ ne mɔ anu, bɛmɛ a bɛzi yɛ ahonle a. Bɛ diedi yɛɛ ɛmaa yɛ anwosesebɛ a,

1 Tɛs 5:14

Yɛkakye bɛ, bɛbɔ mɔɔ le mgbovonle la kɔkɔ, bɛzi mɔɔ le foanvoanle la ahonle, bɛboa mɔɔ ɛnlɛ anwosesebɛ la, na bɛnyia biala anwo abotane.

1 Tem 2:15

Noko saa raalɛ ka ɔ nwo aze, ɔbɔ mɔdenle ɔtɛnla diedi, ɛhulolɛ nee anwondelɛ nu a, ɔlua mralɛ ɛwolɛ ti bɛkɛlie ye ngoane.

1 Tem 4:6

Saa ɛfa ngilehilelɛ ɛhye mɔ ɛkilehile mediema ne mɔ a, ɛbayɛ Kelaese Gyisɛse sonvolɛ kpalɛ, na diedi nu ngilehilelɛ ne nee ngilehilelɛ kpalɛ ne mɔɔ dahuu ɛli ɔ nzi la aboa amaa wɔanyi sunsum nu.

1 Tem 6:11

Na wɔmɔ, Nyamenle sonla, twe ɛ nwo fi ninyɛne ɛhye mɔ anwo, na pele kpondɛ pɛlepɛlelilɛ, anwondelɛ, diedi, ɛhulolɛ, abotane yɛɛ bɛtɛɛyɛlɛ bo zo.

2 Tem 1:8

Mmamaa Awulae anwo daselɛlilɛ yɛ wɔ nyiane; yɛɛ mmamaa medame noko mɔɔ Kelaese ati mela efiade la me nwo yɛ wɔ nyiane. Ɛdawɔ dua anwosesebɛ ne mɔɔ Nyamenle ɛva ɛmaa wɔ la azo nwu Edwɛkpa ne anwo amaneɛ ne bie.

2 Tem 2:24

Ɔnle kɛ Awulae sonvolɛ biala di butule. Ɔwɔ kɛ ɔyɛ atiakunlukɛnlɛma ɔmaa awie biala, na ɔyɛ kilehilevolɛ kpalɛ mɔɔ lɛ abotane a.

2 Tem 4:5

Na wɔmɔ, sie ɛ ti koonwu, mia ɛ nye te nyane, kpɔsa bɔ Edwɛkpa ne nolo, na yɛ Nyamenle gyima ne kɛ ɛle sonvolɛ.

Kɛlata mɔɔ bɛhɛlɛle bɛhɔmanle Hibuluma la 12:1

Zɔhane ati, kɛmɔ yɛlɛ dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la, bɛmaa yɛye debie biala mɔɔ si yɛ aze, nee ɛtane mɔɔ ɛgya yɛ la ali, na yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.

Yekile 1:9

Mame a mele bɛ diema Dwɔn. Kelaese ati yɛ muala yɛle ko na yɛlɛ abotane yɛlɛnwu amaneɛ mɔɔ kile kɛ yɛ nwo fɛta ye Belemgbunlililɛ ne a. Bɛvale me bɛradole bɔra ye mɔɔ bɛfɛlɛ ye Patemɔso la azo, ɔluakɛ membɔle Nyamenle edwɛkɛ ne nee nɔhalɛ ne mɔɔ Gyisɛse yele hilele la nolo.

Yekile 3:10

Kɛmɔ wɔli me edwɛkɛ zo, wɔnyia abotane la, ngyegyelɛ kpole ne mɔɔ ɛlɛba ewiade arazɔ menli kɔsɔɔti mɔɔ wɔ azɛlɛ ye azo anlea la, mebaye wɔ meavi nu.