2 Kɔl 5:11 - BAEBOLO ANZƐƐ BULUKU NWUANZANWUANZA

¹¹ Kɛmɔ yɛze kɛ Nyamenlezulolɛ si de la ati, yɛbɔ mɔdenle kɛ yɛkɛmaa menli kɛzulo Nyamenle; na kɛ yɛmɛ yɛde la, Nyamenle ɔdaye ɔze, yɛɛ meze kɛ bɛdabɛ bɛze ye wɔ bɛ adwenle nu.

2 Kɔl 5:11 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 35:5

Bɛzile nu mɔɔ bɛkɔ la, ɛzulolɛ kpole dɔle azuamgbole mɔɔ zuozua Hyikɛm la amra anwo zo, yemɔti bɛ biala anga ɛlalɛ kɛ ɔkɛkpo Gyekɔbo amra ne mɔ.

Dwobu Buluku ne 18:11

“Ɛzulolɛ bɔ ye mgbɔlɔka, na ɔfoa ye ndinlizo.

Dwobu Buluku ne 31:23

Ɔluakɛ ɛnee mesulo Nyamenle ndeanlɛ ne, yɛɛ eza anrɛɛ menrɛhola ɔ nyunlu gyinla.

Dwobu Buluku ne 6:4

Tumivolɛ Nyamenle ne ɛda mbaka ne ɛwowɔ me, na ye bɔlɔ ɛwie me wolowolo, yɛɛ Nyamenle ɛya mgbole ne mɔ ɛra me nwo zo.

Edwɛndolɛ Buluku ne 73:19

Ndɛndɛ ne ala ɛnee bɛ bo zo ɛbɔ, bɛ bo zo ɛminli ɛzulolɛ ɛzulolɛ bie.

Edwɛndolɛ Buluku ne 76:7

Na wɔmɔ, ɛ nwo yɛ ɛzulolɛ kpole! Saa ɛfa ɛya a nwane a kɛhola kɛgyinla ɛ nyunlu a?

Edwɛndolɛ Buluku ne 90:11

Nwane a kɛnwu wɔ ɛya ne kpole, anzɛɛ wɔ ahonle futu a ɔnrɛzulo wɔ a?

Ayezaya Buluku ne 19:16

Mekɛ ne anu Yigyibitima bayɛ kɛ mralɛ. Sulosulo bamaa bɛ nwo awozo bɛ wɔ tumi ne mɔɔ Tumivolɛ Ɛdɛnkɛma bamaa yeara bɛ nwo zo la abo.

Ayezaya Buluku ne 33:14

Ɛtanevolɛma mɔɔ wɔ Zayɔn la ahonle ɛdu, ɛzulolɛ kpole ɛha bɛdabɛ mɔɔ bɛnze Nyamenle la, bɛ nwo ɛlɛwozo bɛ. Bɛse, “Nwane bɔbɔ yɛɛ wɔ yɛ avinli mɔɔ kɛhola senle gbolamgbolam nu tɛnla a? Nwane a wɔ yɛ avinli mɔɔ kɛhola senle mɔɔ ɛnnu ɛlɛ la anu tɛnla a?”

Nahum Buluku ne 1:6

Ɔfa ɛya a, nwane a kɛhola ɔ nyunlu gyinla a? Nwane a kɛhola ye ɛya kpole ne anloa gyinla a? Ye ɛya sɔ kɛ senle; ɔka bodane a ɔkpukekpuke.

Edwɛkpa ne kɛmɔ Mateyu hɛlɛle la 10:28

Bɛmmasulo bɛdabɛ mɔɔ bɛkola bɛku nwonane ne na bɛngola ɛkɛla ne ku la; bɛzulo Nyamenle mɔɔ kola nwonane ne nee ɛkɛla ne amuala ku, na ɔsɛkye bɛ wɔ ɛbolɔ senle nu la.

Edwɛkpa ne kɛmɔ Mateyu hɛlɛle la 25:46

Na bɛkɛdea ɛhye mɔ ndeanlɛ mɔɔ ɛnlɛ awieleɛ a, na bɛava menli kpalɛ ne mɔ bɛahɔ ngoane mɔɔ ɛnlɛ awieleɛ la anu.”

Edwɛkpa ne kɛmɔ Luku hɛlɛle la 12:5

Mekile bɛ mɔɔ ɔwɔ kɛ bɛsulo ye la; bɛzulo Nyamenle, yemɔ yɛɛ ɔku sonla a ɔlɛ tumi ɔfuandi ye ɛkɛla ɔto senle ne mɔɔ ɛnnu ɛlɛ la anu a. Nɔhalɛ, meka meahile bɛ kɛ bɛzulo yemɔ.

Edwɛkpa ne kɛmɔ Luku hɛlɛle la 16:31

Na Ebileham zele kɛ, ‘Saa bɛnrɛdie menli mɔɔ ɛlɛkilehile bɛ Mosisi mɛla ne nee mɔɔ Nyamenle kpɔmanvolɛma ne hanle la a, ɛnee saa awie vi mɔwuamra anu dwazo kɔ bɔbɔ a, bɛnrɛdie ye.’ ”

Ɛzoanvolɛma Gyima ne 13:43

Nzinlii mɔɔ bɛkpɔnenle la, Dwuuma nee bɛdabɛ mɔɔ bɛnle Dwuuma mɔɔ boka Dwuuma Nyamenlezonlenlɛ ne anwo la dɔɔnwo doale Pɔɔlo nee Baanabase, na ɛzoanvolɛma ne zile bɛ ahonle kɛ bɛzɔ Nyamenle ɛlolɛ ne anu kpundii.

Ɛzoanvolɛma Gyima ne 18:13

Bɛ ɛzonle mɔɔ bɛdonle ye la a le kɛ, “Sonla ɛhye ɛlɛbɔ mɔdenle yeamaa menli azonle Nyamenle wɔ adenle bie mɔɔ tia yɛ Dwuuma mɛla ne la azo.”

Ɛzoanvolɛma Gyima ne 18:4

Ɛnwomenlelielɛ Kenle biala ɔkɔ nyianu sua ne anu ɔ nee bɛ kɔtendɛ, kɛ ɔbɔ mɔdenle yeali Dwuuma nee Gilikima ne mɔ adwenle.

Ɛzoanvolɛma Gyima ne 19:26

Na bɛdabɛ bɛnwu ye yɛɛ eza bɛde nyɛleɛ mɔɔ Pɔɔlo ye ɛlɛyɛ la; asɛɛ yehakyi bɛdabɛ mɔɔ bɛwɔ Ɛfɛsɛse ɛke, nee Ehyea maanzinli ye anu la amuala adwenle kɛ ananze mɔɔ sonla ɛva ɔ sa ɛyɛ la ɛnle nyamenle fee.

Ɛzoanvolɛma Gyima ne 26:26

Belemgbunli Agelepa, mekpa edwɛkɛ ne anwo ɛdanlɛ mɔɔ menzulo ɔ nzi a, ɔluakɛ ɛdawɔ ɛze ɛhye mɔ amuala. Meze noko kɛ ɛyɛle bɛ nzonlɛ kpalɛ kpalɛ, ɔluakɛ ɛhye mɔ biala anzi fealera nu.

Ɛzoanvolɛma Gyima ne 28:23

Na bɛ nee Pɔɔlo hilele kenle. Kenle ne dwule la, menli dɔɔnwo rayiale ɛleka mɔɔ Pɔɔlo de la. Na ɔhanle Nyamenle Belemgbunlililɛ ne anwo edwɛkɛ ɔhilehilele nu ɔhilele bɛ, na ɔbɔle mɔdenle kɛ ɔmaa bɛalie Gyisɛse anwo edwɛkɛ ne mɔɔ Nyamenle kpɔmanvolɛma nee Mosisi mɛla ne ka la bɛali. Ɔdendɛle ɛhye anwo ɔvi nwonlomɔ mangyee ne toonwo aledwolɛ.

2 Kɔl 2:17

Yɛmɛ, yɛnle kɛ menli mɔɔ fa Nyamenle edwɛkɛ ne si kongo la, ɔboalekɛ Nyamenle a ɛzoa yɛ a, yɛɛ yɛgyinla ɔ nyunlu yɛtendɛ kɛ Kelaese sonvolɛma.

2 Kɔl 5:20

Yɛle Kelaese agyakɛ anu gyinlavolɛma, na ɔlua yɛ nwo zo Nyamenle ɛlɛtu folɛ. Zɔhane ati yɛgyi Kelaese agyakɛ anu yɛbodo yɛsɛlɛ bɛ kɛ bɛmaa Nyamenle adenle bɛmaa ɔhakyi bɛ kɛ bɛnle agbɔvolɛ na bɛle ɔ gɔnwo mɔ.

2 Kɔl 6:1

Kɛmɔ yɛ nee Kelaese bɔ nu yɛ gyima la, yɛbodo yɛsɛlɛ bɛ kɛ bɛmmamaa Nyamenle ɛlolɛ ne mɔɔ bɛ sa ɛha ye la yɛ mgbane.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 1:10

Ɛnee ɔyɛ bɛ kɛ kɛkala akee mekpondɛ menli nganvolɛ, anzɛɛ Nyamenle nganvolɛ ɔ? Anzɛɛ mekpondɛ me nyunlu wɔ menli nu ɔ? Kyɛkyɛ! Saa mekpondɛ me nyunlu wɔ menli nu a, ɛnee menle Kelaese akɛlɛ.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:21

Kɛmɔ bɛdi Kelaese eni la, bɛha bɛ nwo aze bɛmaa bɛ nwo ngoko ngoko.

Kɛlata mɔɔ bɛhɛlɛle bɛhɔmanle Hibuluma la 10:31

Ɔkɛyɛ ɛzulolɛ ɛdeɛ, kɛ ɛkɛdɔ tease Nyamenle ne ɛhane nu a!

Kɛlata mɔɔ bɛhɛlɛle bɛhɔmanle Hibuluma la 12:29

ɔluakɛ yɛ Nyamenle ne le sendɔlɔra.

Dwuudu Kɛlata ne 1:23

Bɛhwe bie mɔ bɛvi sendɔlɔra ne anu, bɛlie bɛ ngoane. Bɛva ɛzulolɛ bɛze bie mɔ anwunvɔne, na bɛhyi bɛ adɛladeɛ ne mɔ mɔɔ bɛ ɛtane atiakunluwɔzo ɛheha nu la.

Yekile 20:15

Awie biala mɔɔ bɛangɛlɛ ye duma wɔ teasema buluku ne anu la, bɛvuandinle ye bɛdole senle tandane ne anu.