1 Tɛs 1:6 - BAEBOLO ANZƐƐ BULUKU NWUANZANWUANZA

⁶ Bɛzukoale yɛ nee Awulae; yemɔti bɛnwunle amaneɛ dɔɔnwo, na bɛvale anyelielɛ ne mɔɔ vi Sunsum Nwuanzanwuanza ne anu ba la bɛliele nrɛlaleɛ ne.

1 Tɛs 1:6 ပူးပေါင်းရင်းမြစ်များ

Hozia Buluku ne 2:14

Yemɔti nea, mebali ye adwenle na meava ye meahɔ fienemgbole ne anu, na meadendɛ kɛnlɛma meahile ye.

Edwɛkpa ne kɛmɔ Mateyu hɛlɛle la 16:24

Akee Gyisɛse zele ye ɛdoavolɛma ne kɛ, “Saa awie biala kpondɛ kɛ ɔ nee me dua a, ɛnee ɔkpo ɔ nwo, ɔva ye (amaneɛnwunlɛ) meanubaka ne ɔdo ɔ kɔme zo na ɔdoa me.

Dw 8:12

Gyisɛse dendɛle hilele Falasiima ne bieko kɛ, “Mame a mele ewiade wienyi ne a. Awie biala mɔɔ kɛdoa me bo zo la kɛnyia ngoane nu wienyi ne, ɔnrɛlua awozinli nu ɛlɛ.”

Ɛzoanvolɛma Gyima ne 13:52

Na diedima mɔɔ wɔ Anteɔko la lile fɛlɛko kpole na Sunsum Nwuanzanwuanza ne yile bɛ tɛkɛɛ.

Ɛzoanvolɛma Gyima ne 5:41

Ɛzoanvolɛma ne vale fɛlɛkolilɛ vile ayia sua ne anu hɔle, kɛ bɛdabɛ bɔbɔ Nyamenle ɛbu bɛ bie, na ɔlua Gyisɛse duma ne ati bɛnwu amaneɛ a.

Ɛzoanvolɛma Gyima ne 9:31

Ɔlua Sɔɔlo ɛhakyilɛ zo akee Asɔne ne mɔɔ wɔ Dwudiya, Galeli, yɛɛ Samɛlea la nyianle anzonudwolɛ na ɔnyinle. Na ɔlua Sunsum Nwuanzanwuanza ne moalɛ zo Asɔne ne nyianle anwosesebɛ, menli dɔɔnwo rale nu na bɛvale Nyamenlezulolɛ bɛluale.

Wulo 15:13

Nyamenle mɔɔ le yɛ nzuzuguazo la ɛmaa bɛ anyelielɛ nee anzonudwolɛ wɔ bɛ diedi mɔɔ wɔ ye nu la ati, amaa bɛalua Sunsum Nwuanzanwuanza ne tumi zo bɛ anyelazo anyi.

1 Kɔl 11:1

Ɛhye ati, bɛva me gyakɛ, kɛmɔ meva Kelaese agyakɛ la.

1 Kɔl 11:2

Mekanvo bɛ, ɔluakɛ dahuu bɛkakye me na bɛdi me ngilehilelɛ zo.

1 Kɔl 4:16

Yemɔti mesɛlɛ bɛ, bɛva me gyakɛ.

2 Kɔl 6:10

Saa bɛbɔ yɛ rɛle a, yɛ nye die yɛ nwo dahuu; ɔzɔho kɛ yɛle ehyianvolɛma, noko yɛyɛ menli dɔɔnwo sukoavolɛma; ɔzɔho kɛ yɛnlɛ bie, noko nɔhalɛ, yɛlɛ debie biala.

2 Kɔl 8:5

Yɛ nye anla fee. Bɛlumuale bɛvale bɛ nwo bɛmanle Awulae, na akee ɔlua Nyamenle ɛhulolɛ zo bɛava bɛ nwo bɛamaa yɛdayɛ noko.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 5:22

Nyamenle Sunsum ne ma a le ɛhye mɔ: ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ,

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:1

Bɛle Nyamenle amra mɔɔ ɔkulo bɛ a, yemɔti bɛbɔ mɔdenle kɛ bɛkɛyɛ kɛ ɔdaye ala la.

Pɔɔlo Kɛlata mɔɔ ɔhɛlɛle ɔhɔmanle Felepaema la 3:17

Me mediema, bɛ muala bɛva me gyakɛ. Yɛmaa bɛ ndonwo kpalɛ, yemɔti bɛnlea bɛdabɛ mɔɔ bɛdi zolɛ la boɛ.

2 Tɛs 1:4

Zɔhane ati yɛfa bɛ yɛpɛ Nyamenle menli mɔɔ ɛha la anye zo. Yɛfa bɛ diedi nu kpundii mɔɔ bɛgyi wɔ nyanenwunlɛ nee abodelɛ mɔɔ bɛlɛnwu ye la anu la yɛtu yɛ nloa anu kpole.

2 Tɛs 3:7

Bɛdabɛ bɛze kɛ ɔwɔ kɛ bɛyɛ kɛ mɔɔ yɛyɛle la. Yɛanyɛ mgbovonle wɔ mekɛ mɔɔ yɛ nee bɛ de la.

2 Tɛs 3:9

Tɛ kɛ asɛɛ yɛnlɛ adenle kɛ yɛbiza awie debie ɔ, na yɛyɛle ye zɔhane amaa bɛdabɛ noko bɛanlea zolɛ bɛayɛ bie.

2 Tem 4:2

Bɔ edwɛkɛ ne nolo na si zolɛ mɔɔ ɛndwenle mɔɔ kɛzi ɔ nzi a, kpalɛ o, ɛtane o! Di menli ne adwenle maa bɛlie Edwɛkpa ne bɛdo nu, twi bɛ nyunlu, tu bɛ folɛ na fa abotane kilehile bɛ.

Kɛlata mɔɔ bɛhɛlɛle bɛhɔmanle Hibuluma la 10:34

Bɛ nee menli mɔɔ bɛguale bɛ efiade la lile nyane, yɛɛ mɔɔ bɛzale bɛ bɛliele bɛ nwo ninyɛne bɔbɔ la, yeanvane bɛ nwo fee, ɔboalekɛ ɛnee bɛze kɛ bɛlɛ ninyɛne kpalɛ mɔɔ ɛnzɛkye ɛlɛ la wɔ ɛkɛ.

1 Pit 1:6

Ɛhye ati saa yera kɛ ɔwɔ kɛ bɛdi nyane wɔ mekɛ ekyi ye anu wɔ sɔnea nee amaneɛnwunlɛ ngakyile nu a, ɔwɔ kɛ bɛdi fɛlɛko wɔ ɛhye anwo.

1 Pit 1:8

Bɛtɛnwunle Gyisɛse ɛlɛ, noko bɛkulo ye. Kɛkala bɔbɔ bɛnnwu ye, noko bɛdie ye bɛdi, na ɔlua zo bɛ nye die na bɛdi fɛlɛko kpole mɔɔ ɛnloanlɛ ɛngola ɛnga a,

1 Pit 3:13

Saa bɛpele bɛdi boɛ a, nwane yɛɛ kɛhola kɛyɛ bɛ debie a?

3 Dw 1:11

Ayi, mmasukoa ɛyɛ mɔɔ le ɛtane la, sukoa yɛ mɔɔ le kpalɛ la. Awie biala mɔɔ yɛ mɔɔ le kpalɛ la le Nyamenle ɛdeɛ, yɛɛ awie biala mɔɔ di ɛtane la ɛtɛnwunle Nyamenle.