1 Sam 2:2 - BAEBOLO ANZƐƐ BULUKU NWUANZANWUANZA

² “Awie ɛnle nwuanzanwuanza kɛ wɔmɔ Ɛdɛnkɛma angome ala, awie ɛnle ɛkɛ kɛ ɛ ngomekye ala; boavolɛ biala ɛnle ɛkɛ kɛ wɔmɔ yɛ Nyamenle ne ala.

1 Sam 2:2 ပူးပေါင်းရင်းမြစ်များ

2 Sam 22:3

Me Nyamenle, me bodane mɔɔ mefea nu a, ɔpepɛ ɔdie me na ɔfa me ɔsie gyɛlɛɛnye. Ɔle me aranemgbole nee me ɛvealeka, ɔle me dievolɛ, ɔdie me ɔfi konle nu.

2 Sam 22:32

Nyamenle a le nwane? Ɛdɛnkɛma ɔ. Nwane a le bodane a? Kyesɛ yɛ Nyamenle ne.

2 Sam 7:22

O Ɛdɛnkɛma Nyamenle, ɛle kpole; nyamenle bieko ɛnle ɛkɛ mɔɔ le kɛ ɛdawɔ a, yɛɛ nyamenle bieko ɛnle ɛkɛ mɔɔ yɛdayɛ yɛde ye yɛ nzo nu kɛ ɛ ngome ala.

1 Arl 8:23

ɔzele kɛ, “O Ɛdɛnkɛma, Yizilayɛ Nyamenle, wɔmɔ, nyamenle biala nee wɔ ɛnzɛ wɔ anwuma anzɛɛ azɛlɛ ye azo; wɔmɔ, ɛdi wɔ ɛwɔkɛ zo, na ɛkile ɛhulolɛ kpole ɛmaa wɔ ngɛkɛlɛ mɔɔ fa bɛ ahonle kpokpoti yɛ tieyɛ maa wɔ la.

Edwɛndolɛ Buluku ne 111:9

Ɛdɛnkɛma liele ye menli ne, na ɔ nee bɛ yɛle ngyekyeleɛ mɔɔ bɛntulu ye ɛlɛ a. Ye duma ne le kpole, ɔle nwuanzanwuanza.

Edwɛndolɛ Buluku ne 18:2

Ɛdɛnkɛma le me bodane, me aranemgbole nee me dievolɛ, me Nyamenle, me bodane mɔɔ menriandi mefea nu a, me enyinlike, me ngoanedievolɛ nee me ɛvealeka kpundii.

Edwɛndolɛ Buluku ne 18:31

Nyamenle a le nwane? Ɛdɛnkɛma ɔ. Nwane a le bodane a? Kyesɛ yɛ Nyamenle ne.

Edwɛndolɛ Buluku ne 71:19

O Nyamenle, wɔ tumi nee wɔ kpalɛyɛlɛ dwu anwuma lɔ. Wɔyɛ ninyɛne mgbole, O Nyamenle, nwane a le kɛ ɛdawɔ a?

Edwɛndolɛ Buluku ne 71:3

Yɛ me ɛvealeka bodane, me aranemgbole ɛsesebɛ, na die me. Ɔluakɛ ɛle me bodane nee me aranemgbole.

Edwɛndolɛ Buluku ne 73:25

Menlɛ awie wɔ anwuma kɛ ɛdawɔ, yɛɛ memkpondɛ ɛhwee wɔ ewiade kɛ wɔmɔ.

Edwɛndolɛ Buluku ne 86:8

O Awulae, nyamenle biala nee wɔ ɛnzɛ, yɛɛ gyima biala ɛndɛla wɔ gyima ne mɔ.

Edwɛndolɛ Buluku ne 89:6

Nwane a wɔ anwuma lɔ mɔɔ nee Ɛdɛnkɛma sɛ a? Nwane a wɔ anwuma amra anu mɔɔ nee Ɛdɛnkɛma sɛ a?

Edwɛndolɛ Buluku ne 89:8

O Tumivolɛ Ɛdɛnkɛma Nyamenle, O Ɛdɛnkɛma, nwane a le tumivolɛ kɛ ɛdawɔ, mɔɔ nɔhalɛlilɛ ɛbɔ ɛyia wɔ a?

Edwɛndolɛ Buluku ne 99:3

Maa bɛye wɔ duma ne kpole nee ye ɛzulolɛ ayɛlɛ! Nyamenle le nwuanzanwuanza.

Edwɛndolɛ Buluku ne 99:5

Bɛhanvo Ɛdɛnkɛma yɛ Nyamenle ne; bɛzonle ye wɔ ɔ gyakɛ abo! Ɔle nwuanzanwuanza.

Edwɛndolɛ Buluku ne 99:9

Bɛhanvo Ɛdɛnkɛma yɛ Nyamenle ne, bɛzonle ye wɔ ye boka nwuanzanwuanza ne azo; ɔluakɛ Ɛdɛnkɛma yɛ Nyamenle ne le nwuanzanwuanza.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 15:11

“O Ɛdɛnkɛma, nwane a le kɛ ɛdawɔ wɔ awozonle avinli a? Nwane a le kɛ wɔmɔ, mɔɔ le kpole wɔ nwuanzanwuanzayɛlɛ nu, ye ayɛlɛyelɛ le kpole na ɔyɛ nwanwane ninyɛne a?

Ayezaya Buluku ne 40:18

Nwane anwo a bɛfa Nyamenle bɛto a, anzɛɛ duzu debie a zɔho ye a?

Ayezaya Buluku ne 44:6

Ɛdɛnkɛma, Yizilayɛ Belemgbunli nee Kpɔnevolɛ, Tumivolɛ Ɛdɛnkɛma se, “Medame a mele mɔlebɛbo ne, yɛɛ medame a mele awieleɛ ne; ɛye me a nyamenle bieko ɛnle ɛkɛ.

Ayezaya Buluku ne 44:8

Bɛmmasulo yɛɛ bɛmmamaa ɛzulolɛ ka bɛ; meha mehile bɛ dɛba yɛɛ meva medo gua. Bɛmɛ a bɛle me alasevolɛ a! Asoo ɛye me a nyamenle bieko wɔ ɛkɛ ɔ? Pepɛdievolɛ biala ɛnle ɛkɛ kɛ medame; menze bie memboka me nwo.”

Ayezaya Buluku ne 57:15

Ɔluakɛ anwuma nee Nwuanzanwuanza Ko ne mɔɔ de ɛkɛ mekɛ mɔɔ ɛnlɛ awieleɛ, mɔɔ ye duma a le Nwuanzanwuanza la se, “Mede anwuma lɔ nee ɛleka nwuanzanwuanza, yɛɛ eza me nee mɔɔ nu ɔ nwo na ɔle bɛlɛvo la tɛnla, kɛ memaa mɔɔ ɛnlu ɔ nwo la anyia anyelazo.

Ayezaya Buluku ne 6:3

Na ko vɛlɛle ko na ɔhanle kɛ: “Nwuanzanwuanza, nwuanzanwuanza! Tumivolɛ Ɛdɛnkɛma le nwuanzanwuanza! Ye anyunlunyia ɛyi ewiade amuala tɛkɛɛ!”

Gyɛlɛmaya Buluku ne 10:6

O Ɛdɛnkɛma, awie nee wɔ ɛnzɛ; ɛle bedevinli, wɔ duma ne le kpole, tumi wɔ nu.

Sɛlɛ 11:44

Ɔluakɛ medame a mele Ɛdɛnkɛma bɛ Nyamenle ne a. Bɛmaa bɛ nwo ɛde nwuanzaanwu, ɔluakɛ mele nwuanzanwuanza. Ɔnle kɛ bɛfa debie biala mɔɔ kola fo anwuma na eza ɔtwenle ɔ nwo aze wɔ azɛlɛ ye azo la bɛgua bɛ nwo evinli.

Sɛlɛ 11:45

Ɔluakɛ medame a mele Ɛdɛnkɛma mɔɔ menyele bɛ menvile Yigyibiti azɛlɛ zo a, amaa meayɛ bɛ Nyamenle. Yemɔti bɛmaa bɛ nwo ɛde nwuanzaanwu, ɔluakɛ mele nwuanzanwuanza.”

Sɛlɛ 19:2

“Ka kile Yizilayɛma amuala kɛ: Ɔwɔ kɛ bɛmaa bɛ nwo te, ɔluakɛ Medame, Ɛdɛnkɛma bɛ Nyamenle, mele nwuanzanwuanza.

Wulo 15:4

Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ, amaa yɛagyinla kpundii, yɛazi yɛ ahonle yɛalua mɔɔ Nyamenle Edwɛkɛ ne fa maa yɛ la azo yɛanyia anyelazo.

Wulo 4:8

Nyilalɛ ɛha sonla ne mɔɔ Awulae ɛmbu ye ɛtane nwo mgbonda la!”

Mɛla 3:24

‘O Awulae Nyamenle, bɔ zo mɔɔ wɔbɔ ɔ bo ɛlɛkile wɔ sonvolɛ wɔ kpoleyɛlɛ nee wɔ tumi a. Ɔluakɛ nyamenle biala ɛnle anwuma anzɛɛ aze mɔɔ kola yɛ ninyɛne mgbole nee nwanwane gyima kɛ wɔmɔ ala.

Mɛla 32:20

Na ɔzele kɛ, ‘Meye me nye meado ɛbɔ nu, na meanlea kɛ bɛ awieleɛ kɛzi kɛwie bɛ la. Ɔluakɛ bɛle awolɛndoazo mɔɔ ɛzɛkye a, menli mɔɔ nɔhalɛ ɛnle bɛ nu.

Mɛla 32:39

“Kɛkala, bɛnwu ye kɛ medame ala a mele Nyamenle a, nyamenle bieko ɛnle ɛkɛ kɛ me ngome. Medame a meku, memaa ngoane a, meboda eza meyɛ ayile a. Awie ɛngola ɛnlie debie wɔ me sa nu.

Mɛla 32:4

“Bodane ne, ye gyima di munli, ɔluakɛ ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, ɔdi pɛlepɛle, ye edwɛkɛ le fɔɔnwo.

Mɛla 4:35

Bɛyɛle ɛhye bɛmanle bɛnwunle ye, amaa bɛanwu kɛ Ɛdɛnkɛma a le Nyamenle a; nyamenle bieko ɛnle ɛkɛ.

Mɛla 4:39

Zɔhane ati bɛnwu ye ɛnɛ na bɛva bɛzie bɛ ti anu kɛ Ɛdɛnkɛma a le Nyamenle wɔ anwuma nee azɛlɛ ti anu a; nyamenle bieko ɛnle ɛkɛ.

1 Pit 1:16

Nyamenle Edwɛkɛ ne se, “Ɔwɔ kɛ bɛmaa bɛ nwo te, ɔboalekɛ mele nwuanzanwuanza.”