1 Sam 14:6 - BAEBOLO ANZƐƐ BULUKU NWUANZANWUANZA

⁶ Dwɔnatan zele kpavolɛ ne mɔɔ soa ye konle ninyɛne ne la kɛ, “Maa yɛhɔ menli ne mɔɔ ɛnze Nyamenle la azokoɛleɛ lɔ; ɔkɛyɛ kɛ Ɛdɛnkɛma bayɛ gyima ne amaa yɛ, ɔluakɛ kanzɛ yɛanzo bɔbɔ a, debie biala ɛnle ɛkɛ mɔɔ kola tua Ɛdɛnkɛma adenle mɔɔ ɔnrɛmaa ɔnrɛlie yɛ a.”

1 Sam 14:6 ပူးပေါင်းရင်းမြစ်များ

2 Sam 1:20

Bɛmmabɔ ye nolo wɔ Gate, anzɛɛ Ahyekɛlɔn mgbata ne mɔ azo. Anrɛɛ Filisitia mraalɛ kɛli fɛlɛko, anrɛɛ mraalɛ mɔɔ ɛnze Nyamenle la anye kɛlie.

2 Sam 16:12

Bie a ɛnee Ɛdɛnkɛma banwu kɛ mezi meyɛ anwunvɔne la na yeamaa me nyilalɛ yeazie sasa ye mɔɔ ɛnɛ bɛlɛbɔ me la abo zo.”

2 Arl 19:4

Aselea belemgbunli ne ɛzoa ye safohyenlema kpanyinli ne yemaa yerabɔ tease Nyamenle ne aholoba. Medie medi kɛ Ɛdɛnkɛma Nyamenle dele mɔɔ ɔhanle la. Yemɔti sɛlɛ Ɛdɛnkɛma wɔ Nyamenle ne kɛ ɔdie zɛhae aholobabɔlɛ ne na ɔdua menli mɔɔ bɔle aholoba ne la kakɛ, na sɛlɛ Nyamenle maa ye menli ekyi ne mɔɔ ɛha la.”

2 Edk 14:10

Belemgbunli Esa hɔyiale bɛ, na bɛvale konle ne bɛbɔle zo wɔ Zɛfata bɔnza ne mɔɔ wɔ Malihyaa la anu.

2 Edk 14:11

Na Belemgbunli Esa zɛlɛle Ɛdɛnkɛma ye Nyamenle ne kɛ, “O Ɛdɛnkɛma, awie biala ɛnle ɛkɛ mɔɔ kola boa, kɛ ɛdawɔ ala yɛɛ ɛkɛgyinla tumima nee koahweabanema avinli a. Boa yɛ, O Ɛdɛnkɛma yɛ Nyamenle, ɔluakɛ wɔmɔ yɛɛ yɛ rɛle wɔ wɔ nu a, yɛɛ wɔ duma nu a yɛra yɛbadoa menli pemgbenleamgbe ɛhye mɔ yɛ nee bɛ aho a. O Ɛdɛnkɛma, wɔmɔ a ɛle yɛ Nyamenle a. Mmamaa dasanli di ɛ nwo zo konim.”

Edwɛndolɛ Buluku ne 135:6

Debie biala mɔɔ Ɛdɛnkɛma kulo la yɛɛ ɔyɛ a, wɔ anwuma nee aze, nyevile nu nee buma kɔsɔɔti anu.

Gyɛlɛmaya Buluku ne 9:23

Ɛdɛnkɛma se, “Nrɛlɛbɛvolɛma mmafa bɛ nrɛlɛbɛ ne tu bɛ nwo, anwosesebɛma mmafa bɛ anwosesebɛ ne tu bɛ nwo, yɛɛ sukoavolɛma mmafa bɛ anwonyia ne tu bɛ nwo.

Gyɛlɛmaya Buluku ne 9:25

Ɛdɛnkɛma se, “Mekɛ ne ɛlɛba mɔɔ mebadea Yigyibitima, Dwudama, Yidɔmma, Amɔnoma, Mowabema, yɛɛ ɛsɛlɛ zo amra mɔɔ kpa bɛ nwoma azo enrinli la. Menli ɛhye mɔ amuala ɛyɛ bɛ mrenyanu nzonlɛ, noko bɛnli ngyekyeleɛ ne mɔɔ kile kɛ bɛyɛ bɛ mrenyanu nzonlɛ la azo. Maanle maanle ɛhye mɔ nee Yizilayɛma biala ɛnli me ngyekyeleɛ ne azo.”

Emɔzo Buluku ne 5:15

Kyi mɔɔ le ɛtane la, na kulo mɔɔ le kpalɛ la, na nea maa nɔhalɛlilɛ ɛrɛla edwɛkɛlilɛ ɛleka ne mɔ; wɔannea a Ɛdɛnkɛma, Tumivolɛ Nyamenle ne kɛnwu Dwosefi abo zo amra ne mɔɔ ɛha la anwunvɔne.

Zɛfanaya Buluku ne 2:3

Bɛdabɛ mɔɔ bɛbɛlɛ bɛ nwo aze wɔ azɛlɛ ne azo, na bɛyɛ mɔɔ Ɛdɛnkɛma kɛze bɛ la, bɛkpondɛ Ɛdɛnkɛma. Bɛyɛ mɔɔ le tenlene na bɛbɛlɛ bɛ nwo aze kɛ wɔannea a bɛkɛheda bɛ nwo zo wɔ Ɛdɛnkɛma ɛya kenle ne anu.

Zɛkalaya Buluku ne 4:6

Na ɔzele me kɛ, “Edwɛkɛ mɔɔ Ɛdɛnkɛma ɛlɛka ahile Zɛlubabɛle la ɛne: Tɛ anwosesebɛ anzɛɛ tumi, na me Sunsum ne yɛɛ ɛbava wɔali konim a, medame Tumivolɛ Ɛdɛnkɛma a mese a.

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 10:32

Saa ɛmaa yɛkɔ a, boɛ biala mɔɔ Ɛdɛnkɛma kɛyɛ kɛmaa yɛ la, zɔhane ala yɛɛ yɛdayɛ noko yɛbayɛ yɛamaa wɔ a.”

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 31:4

Bɛye menli apenle ko bɛvi abusua ekpunli biala anu.”

Edwɛkpa ne kɛmɔ Mateyu hɛlɛle la 19:26

Gyisɛse nleanle bɛ koonwu na ɔbuale bɛ kɛ, “Ɛhye yɛ se maa sonla, noko Nyamenle ɛdeɛ, debie biala ɛnyɛ se ɛmmaa ye.”

Wulo 8:31

Saa ɔle zɛhae ɛdeɛ a, ɛnee akee kɛ yɛzi yɛha ye ɛ? Saa Nyamenle gyi yɛ nzi a nwane a kɛhola yɛ a?

Mɛla 32:30

Kɛ ɔkɛyɛ na baholɛ avoa apenle, na menli nwiɔ aha apenle bulu agua ɛbɔ nu ɛ? Kyesɛ Ɛdɛnkɛma bɛ Bodane ne ɛdɔne bɛ ɛmaa, na Ɛdɛnkɛma ɛye bɛ ɛmaa.

Pɔɔlo Kɛlata mɔɔ ɔhɛlɛle ɔhɔmanle Felepaema la 3:3

Yɛmɛ a yɛnyia nɔhalɛ mrenyanu nzonlɛyɛlɛ ne a, na tɛ bɛmɛ ɔ, ɔluakɛ yɛdua Nyamenle Sunsum ne azo a yɛsonle a, na yɛdi fɛlɛko kɛ yɛnyia Kelaese Gyisɛse wɔ yɛ ɛbɛla nu. Yɛnva yɛ rɛle yɛnwula ewiade amaamuo nu.

Dwɔhyua Buluku ne 14:12

Yemɔti fa azɛlɛ ne mɔɔ wɔ awoka ne mɔ azo lɔ la maa me. Ɛdɛnkɛma vale bɔle me ɛwɔkɛ wɔ mekɛ mɔɔ me nee me menli ne yɛrale la. Yɛhanle yɛhilele wɔ kɛ menli kakanyinli bie mɔɔ bɛfɛlɛ bɛ ‘Anakema’ la wɔ maanle ne anu, na bɛdede azuamgbole mɔɔ bɛlie nwolɛ bane la azo. Ɛdɛnkɛma baboa me yeamaa meavoa bɛ, kɛmɔ ɔdaye yeha la.”

Maanlebuvolɛma Buluku ne 15:18

Akee nzuhɔne hunle ye kpole kpalɛ, na ɔzɛlɛle Ɛdɛnkɛma kɛ, “Wɔlua wɔ sonvolɛ nwo zo wɔlie wɔ menli ye ngoane. Na nzuhɔne ɛlɛku me yeamaa meadɔ donvula wɔ menli mɔɔ ɛnze Nyamenle la asa anu ɔ?”

1 Sam 14:5

Ko wɔ adenle ne sɔlɔ mɔɔ di kɔ Mekemahye la, yɛɛ ko ne noko wɔ nyiakɛ mɔɔ di kɔ Giba la.

1 Sam 14:7

Kpavolɛ ne buale ye kɛ, “Debie biala mɔɔ wɔ adwenle se wɔ la, yɛ; megyi ɛ nzi. Wɔ adenle biala anu, menrɛgyakyi ɛ nzi ɛlilɛ.”

1 Sam 17:26

Devidi bizale menli mɔɔ gyigyi ɔ nwo ɛkɛ ne la kɛ, “Duzu ahyɛlɛdeɛ a sonla mɔɔ kɛhu Filisitianli ye na ɔkɛlie Yizilayɛma ɔkɛvi anyiemgba ɛhye anu la banyia a? Ɔluakɛ, Filisitianli ɛhye mɔɔ ɛnze Nyamenle la a le nwane, mɔɔ ɔdaye bɔbɔ ɔwɔ kɛ ɔko ɔtia tease Nyamenle ne ɛlɔnema a?”

1 Sam 17:36

Wɔ sonvolɛ ɛhu awenade nee bedi mɔ, na Filisitianli ɛhye mɔɔ ɛnze Nyamenle la bawu kɛ awenade anzɛɛ bedi ne mɔ ko ala la, ɔluakɛ yeanli tease Nyamenle ne ɛlɔnema ne eni.

1 Sam 17:46

Ɛnɛ kenle ye, Ɛdɛnkɛma baye wɔ awula me sa nu, mebabɔ wɔ meado aze na meapɛ ɛ ti. Mebava Filisitia ɛlɔnema ne avunli meamaa anwomanyunlu nloma nee ɛbɔkunlu nanemgbole ali, amaa aleɛabo amra kɔsɔɔti anwu kɛ Yizilayɛma lɛ Nyamenle,

1 Sam 17:47

na menli mɔɔ ɛyia ɛke la kɔsɔɔti anwu kɛ Ɛdɛnkɛma ɛnva dadeɛ nee atwɛ a die ye menli a, ɔluakɛ konle ne le ye ɛdeɛ, na Ɛdɛnkɛma baye bɛ kɔsɔɔti amaa yɛ.”

1 Sam 31:4

Yemɔti ɔzele kpavolɛ ne mɔɔ soa ye konle ninyɛne ne la kɛ, “Twe wɔ dadeɛ ne ku me, amaa Filisitiama mɔɔ ɛnze Nyamenle la ambangolo me nwo, angu me.” Ɛzulolɛ hanle kpavolɛ ne, yemɔti yeangola ye ku. Sɔɔlo yele ye dadeɛ ne na ɔdaye ɔ ngome ɔdɔle zolɛ ɔhunle ɔ nwo.