1 Sam 11:6 - BAEBOLO ANZƐƐ BULUKU NWUANZANWUANZA

⁶ Mɔɔ Sɔɔlo dele amaneɛ ne la, ɛkɛ ne ala Nyamenle Sunsum ne dwule ɔ nwo zo, na ye ahonle futule mɔɔ ɔyɛ ɔ nwo ɛhwee a ɔnyɛ boɛ a.

1 Sam 11:6 ပူးပေါင်းရင်းမြစ်များ

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 32:19

Mɔɔ Mosisi bikyele azokoɛleɛ ne na ɔnwunle ɛnlankɛ nyinli ananze ne nee nwolɛ agolezilɛ ne la, ye ahonle futule kpole kpalɛ. Ye ɛya ne bole ɔ nwo zo manle ɔvuandinle awolɛ ndɛbandɛba ne mɔ mɔɔ Mɛla Bulu ne wɔ zolɛ la ɔguale boka ne abo aze ɔbubule bɛ.

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 12:3

(Nɔhalɛ nu, Mosisi le bɛlɛvolɛ. Ɔle bɛlɛvolɛ ɔtɛla dasanli biala mɔɔ wɔ aleɛabo la.)

Edwɛkpa ne kɛmɔ Maake hɛlɛle la 3:5

Gyisɛse vale ɛya na ɔnleanle bɛ nyunlu ɔyiale, noko eza ɔlile bɛ nwo nyane, ɔluakɛ bɛle menli mɔɔ ɛzua anyetele na bɛ ti yɛ se a. Yemɔti ɔzele nrenya ne kɛ, “Tenrɛ ɛ sa ne anu.” Nrenya ne denrɛle ɔ sa ne mɔɔ ɛdwe la anu, na ɔyɛle kpalɛ bieko.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:26

Saa ɛfa ɛya a, mmamaa ɔfa wɔ ɔkɔ ɛtane nu; eza mmamaa sɛnzɛne ne tɔ wɔ ɛya zo.

Maanlebuvolɛma Buluku ne 11:29

Akee Ɛdɛnkɛma Sunsum ne dwule Gyɛfeta anwo zo. Ɔluale Geleade nee Manasɛ, na ɔtelele zolɛ ɔhɔle Mezepa mɔɔ wɔ Geleade la. Ɔvi Mezepa la ɔhɔvole Amɔnoma akɔme zo.

Maanlebuvolɛma Buluku ne 13:25

Na Ɛdɛnkɛma Sunsum ne manle ye anwosesebɛ. Mekɛ ne anu ɛnee ɔde Dan abusua ekpunli ne azokoɛleɛ ne, wɔ Zɔla nee Yehyeteɔlo avinli.

Maanlebuvolɛma Buluku ne 14:6

Ɛkɛ ne ala Ɛdɛnkɛma Sunsum ne dwule ɔ nwo zo. Ɔvale ɔ sa mgbane ɔtetele awenade ne kɛ asɛɛ abɔnkye ralɛ bie la. Noko ɛhye mɔɔ ɔyɛle la yeanga yeangile ɔ ze nee ɔ nli.

Maanlebuvolɛma Buluku ne 15:14

Mɔɔ bɛ nee ye radwule Lihae la, Filisitiama vale ɛwudolɛ nriandile rayiale ye. Na Ɛdɛnkɛma Sunsum ne dwule ɔ nwo zo kpole kpalɛ, na ɔtetele samgbe nyɛma amolɛ nwiɔ ne mɔɔ bɛvale bɛkyekyele ɔ sa la kɛ asɛɛ dwɛsɛ mɔɔ senle ɛdɔ nu la.

Maanlebuvolɛma Buluku ne 3:10

Ɛdɛnkɛma Sunsum ne dwule Ɔteneɛle anwo zo, na ɔholale ɔziele Yizilayɛma. Ɔvale konle ɔdoale Kuhyan Relehyateeyem, na Ɛdɛnkɛma yele Kuhyan Relehyateeyem, mɔɔ le Mɛsɔpɔteemea belemgbunli ne manle ye na ɔlile ɔ nwo zo konim.

Maanlebuvolɛma Buluku ne 6:34

Na Ɛdɛnkɛma Sunsum ne dwule Gedɛyɔn anwo zo. Ɔwule aweɛne nu na Ebayizɛma kɔsɔɔti dwazole doale ye.

1 Sam 10:10

Mɔɔ Sɔɔlo nee ye sonvolɛ ne dwule Gebɛya la, bɛ nee Nyamenle kpɔmanvolɛma ekpunli bie yiale. Arɛlevilɛ nu Nyamenle Sunsum ne dwule Sɔɔlo anwo zo kpole bie, na ɔ nee bɛ zile agole na bɛhanle Nyamenle nrɛlaleɛ ne.

1 Sam 10:6

Na arɛlevilɛ nu ala, Ɛdɛnkɛma Sunsum ne badwu ɛ nwo zo kpole bie na ɛ nee bɛ aha Nyamenle nrɛlaleɛ ne na wɔayɛ sonla ngakyile.

1 Sam 16:13

Samoɛle vale ɔlivi nwole ɛweɛne ko ne na ɔwolale ɔguale ɔ ti zo wɔ ɔ mediema ne mɔ anyunlu ɛkɛ. Ɛkɛ ne ala Ɛdɛnkɛma Sunsum ne dwule Devidi anwo zo na ɔvi mekɛ ne anu ɔhale ɔ nwo bɔkɔɔ. Na Samoɛle ziale hɔle Releema.

1 Sam 16:14

Ɛdɛnkɛma Sunsum ne vile Sɔɔlo anwo; ɔmanle sunsum ɛtane rawolole ye na ɔyɛle ye kɛ sɛnvolɛ bie la.