1 Pit 4:11 - BAEBOLO ANZƐƐ BULUKU NWUANZANWUANZA

¹¹ Sonla ne mɔɔ ka Nyamenle edwɛkɛ la ɛnlea ɛha Nyamenle edwɛkɛ ne; mɔɔ sonle noko la ɛva ye anwosesebɛ mɔɔ Nyamenle ɛva ɛmaa ye la amuala ɛzonle, amaa debie biala mɔɔ bɛyɛ la anu menli ava ayɛlɛyelɛ alua Gyisɛse Kelaese anwo zo amaa Nyamenle. Yemɔ yɛɛ anyunlunyia nee tumi le ye ɛdeɛ dahuu a. Amen.

1 Pit 4:11 ပူးပေါင်းရင်းမြစ်များ

Edwɛndolɛ Buluku ne 145:13

Wɔ belemgbunlililɛ ne ɛmbɔ aze ɛlɛ, yɛɛ ɛle belemgbunli dahuu wɔ awolɛndoazo kɔsɔɔti anu. Ɛdɛnkɛma le nɔhalɛ wɔ ye edwɛkɛ kɔsɔɔti anu, yɛɛ ɔle dovolɛ wɔ ye nyɛleɛ kɔsɔɔti anu.

Ayezaya Buluku ne 8:20

Bɛdie mɔɔ Ɛdɛnkɛma ɛlɛka la na bɛli ye ngilehilelɛ zo! Nɔhalɛ, edwɛkɛ ɛhye mɔɔ bɛka la aleɛ ɛnrɛhye zo.

Gyɛlɛmaya Buluku ne 23:22

Saa bɛ nee me dule agyinla a, anrɛɛ bɛhanle me nrɛlaleɛ ne bɛhilele me menli ne; anrɛɛ bɛmanle bɛvile ndenle ɛtane ne mɔ azo na bɛhwenle bɛ nwo bɛvile bɛ nyɛleɛ ɛtane ne mɔ anwo.

Daneɛle Buluku ne 4:3

“Ye sɛkɛlɛneɛ ne mɔ le mgbole! Ye nwanwane ninyɛne ne mɔ yɛ ɛzulolɛ! Ye belemgbunlililɛ ɛnlɛ awieleɛ, ye belemgbunlililɛ vi awolɛndoazo dwu awolɛndoazo.

Daneɛle Buluku ne 4:34

“Ɛvolɛ nsuu ne dwule la, medame Nɛbukadenɛza, mendole me nye anwomanyunlu, na me nye rale me nwo zo. Menyele Anwuma Anwumanli ne ayɛlɛ na menyeyɛle teasenli ne menlile ye eni kɛ: “Ye belemgbunlililɛ ɛnrɛbɔ aze ɛlɛ, ye belemgbunlililɛ vi awolɛndoazo dwu awolɛndoazo.

Daneɛle Buluku ne 7:14

Bɛmanle ye ebialilɛ tumi, anyunlunyia, yɛɛ enililɛ, amaa aleɛabo maanle maanle mɔɔ ka aneɛ ngakyile la azonle ye. Ye belemgbunlililɛ ne ɛnlɛ awieleɛ, ɔnrɛpɛ nu ɔnrɛze ɛlɛ yɛɛ awie ɛnrɛhola ye sɛkye.

Edwɛkpa ne kɛmɔ Mateyu hɛlɛle la 6:13

Mmamaa yɛkɔ ngyegyelɛ nu, Ye yɛ fi munzule nu.’

Dw 13:31

Dwudase vindele la, Gyisɛse hanle kɛ, “Akee bɔ zo mɔɔ medame Sonla Ra, me anyunlunyia ne ɛla ali a; bɛbalua me nwo zo bɛaye Nyamenle anyunlunyia ne bɛahile.

Ɛzoanvolɛma Gyima ne 7:38

Yemɔ yɛɛ mekɛ mɔɔ bɛyiale ɛsɛlɛ ne azo la ɔ nee Nyamenle soanvolɛ ne dendɛle wɔ Boka Saenae azo, na ɔliele Nyamenle nrɛlaleɛ ne mɔɔ ɛnɛ ɛradwu yɛ nwo zo la ɔrɛlɛle yɛ nlenya mɔ a.

Wulo 11:36

Ɔdaye a ɔbɔle ninyɛne kɔsɔɔti a, debie biala lua ɔ nwo zo, yɛɛ bɛwɔ ɛkɛ ne bɛmaa ye. Anyunlunyia ɛha Nyamenle dahuu! Amen.

Wulo 12:3

Melua Nyamenle ɛlolɛ ahyɛlɛdeɛ ne mɔɔ yeva yemaa me la azo mese bɛ muala kɛ bɛmmamemaa bɛ nwo zo. Bɛdwenle kpalɛ na bɛbua bɛ nwo ndɛne ngoko wɔ diedi dodo mɔɔ Nyamenle ɛva ɛmaa bɛ la anu.

Wulo 3:2

Nɔhalɛ bɔkɔɔ, wɔ adenle biala azo! Ɔboalekɛ alumua ne, bɛmɛ yɛɛ Nyamenle vale ye ngilehilelɛ ne wulale bɛ sa nu a.

1 Kɔl 10:31

Bɛdie ɛ. Debie biala mɔɔ bɛyɛ la, saa aleɛ a bɛdi o, saa nzule a bɛno o, bɛyɛ bɛde Nyamenle anyunlu.

1 Kɔl 12:4

Sunsum nu ahyɛlɛdeɛ ne mɔ le ngakyile dɔɔnwo, noko Nyamenle Sunsum ko ne ala a fa maa a.

1 Kɔl 3:10

Menvale ahyɛlɛdeɛ ne mɔɔ Nyamenle ɛva ɛlo me la mendole sua ne abo kɛ suasivolɛ kpalɛ, yɛɛ awie ɛlɛto zolɛ a. Na ɔwɔ kɛ awie biala nea kɛ ɔsi ɔto zolɛ la boɛ.

1 Kɔl 6:20

Ɔdɔle bɛ bolɛ ɛsesebɛ. Yemɔti, bɛva bɛ sonlabaka ne bɛde Nyamenle anyunlu.

2 Kɔl 2:17

Yɛmɛ, yɛnle kɛ menli mɔɔ fa Nyamenle edwɛkɛ ne si kongo la, ɔboalekɛ Nyamenle a ɛzoa yɛ a, yɛɛ yɛgyinla ɔ nyunlu yɛtendɛ kɛ Kelaese sonvolɛma.

2 Kɔl 9:13

Bɛ ɛzonlenlɛ gyima ɛhye kile bɛ diedi mɔɔ bɛlɛ la. Ɔlua zo menli dɔɔnwo ye Nyamenle ayɛlɛ kɛ bɛdi Kelaese anwo Edwɛkpa ne mɔɔ bɛlie bɛdo bɛ nwo zo la azo, na bɛ nee awie biala kyɛ nyilalɛ mɔɔ bɛnyia ye la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:19

nee kɛ ye tumi ne kpole si de la. Tumi ɛhye mɔɔ ɛlɛdi gyima wɔ yɛmɛ mɔɔ yɛdie ye yɛdi la anu la, yemɔ ala a le anwosesebɛ bedevinli ne

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:29

Bɛmmamaa edwɛkɛ ɛtane fi bɛ nloa anu finde; bɛdendɛ kɛnlɛma mɔɔ maa sonla nyia ngɔzo na ɔnyia mɔɔ ɔkpondɛ la, amaa mɔɔ bɛkɛha la biala azo ara nvasoɛ amaa bɛdabɛ mɔɔ bɛtie la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:20

Bɛlua yɛ Awulae Gyisɛse Kelaese duma nu bɛyɛ Nyamenle Selɛ ne mo dahuu wɔ debie biala anu.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 6:10

Awieleɛ ne, bɛlua Awulae tumi bedevinli ne azo bɛmaa bɛ nwo ɛyɛ se.

Pɔɔlo Kɛlata mɔɔ ɔhɛlɛle ɔhɔmanle Felepaema la 1:11

Bɛzo nɔhalɛ ma kpalɛ ne mɔɔ Gyisɛse Kelaese ala a fa maa la na bɛmaa anyunlunyia nee ayɛlɛyelɛ ɛha Nyamenle.

Pɔɔlo Kɛlata mɔɔ ɔhɛlɛle ɔhɔmanle Felepaema la 2:11

na awie biala aha ye baguase kɛ, Gyisɛse Kelaese le Awulae, bɛava bɛawula Nyamenle Selɛ ne anyunlunyia.

Kɔlɔ 4:6

Bɛmaa bɛ nloa edwɛkɛ ɛyɛ fɛ na ɔyɛ anyelielɛ, na bɛnwu nyelebɛnloa kpalɛ mɔɔ ɔwɔ kɛ bɛfa bɛye awie biala edwɛkɛ nloa la.

1 Tɛs 2:4

Mɔɔ yɛyɛle la a le kɛ dahuu yɛtendɛ, kɛmɔ Nyamenle kpondɛ kɛ yɛtendɛ la, ɔboalekɛ yemaa yɛzɔ ɔ nye na yeva ye Edwɛkpa ne yewula yɛ sa nu. Ɛhye ati yɛmbɔ mɔdenle kɛ yɛsɔ menli nye. Nyamenle mɔɔ ze yɛ ahonle nu la yɛɛ yɛkulo kɛ yɛsɔ ɔ nye a.

1 Tem 1:17

Na tete Belemgbunli ne, Damɛnlangoate Nyamenle kokye ne, mɔɔ ɛnyelɛ ɛnnwu ye la, yemɔ yɛɛ enililɛ nee anyunlunyia ɛha ye dahuu a. Amen

1 Tem 6:16

Ɔdaye ala a ɔle damɛnlangoate na ɔde wienyi ne mɔɔ awie ɛngola ɛmbikye ye la anu a. Awie biala ɛtɛnwunle ye ɛlɛ, yɛɛ awie ɛnrɛhola ɛnrɛnwu ye ɛlɛ. Enililɛ nee belemgbunlililɛ mɔɔ ɛmbɔ aze ɛlɛ la le ye ɛdeɛ dahuu! Amen.

Pɔɔlo Kɛlata mɔɔ ɔhɛlɛle ɔhɔmanle Taetɛse la 2:1

Na wɔmɔ, ɔwɔ kɛ ɛkilehile diedi ne mɔɔ le saanwu la.

Pɔɔlo Kɛlata mɔɔ ɔhɛlɛle ɔhɔmanle Taetɛse la 2:15

Kilehile ɛhye mɔ amuala na fa wɔ tumi ne kpokpoti wula wɔ ngilehilelɛ nee bɛ nyunlu ɛhwilɛ nu. Mmamaa awie biala fa ɛ nyunlu kyikyi aze.

Kɛlata mɔɔ bɛhɛlɛle bɛhɔmanle Hibuluma la 13:7

Bɛhakye bɛ mgbanyima ne mɔ, mɔɔ hanle Nyamenle edwɛkɛ ne hilele bɛ la. Bɛdwenle bɛnwu kɛ bɛzile bɛbɔle bɛ ɛbɛla ne la, nee bɛ ewule nu, na bɛzukoa bɛ diedi ne mɔɔ ɛnee bɛlɛ la.

Kɛlata mɔɔ bɛhɛlɛle bɛhɔmanle Hibuluma la 5:12

Ɔluakɛ mekɛ ɛdwu mɔɔ saa bɛle kilehilevolɛma bɔbɔ a anrɛɛ ɔmbɔ nzonle a, noko kɛkala bɛtɛkpondɛ awie mɔɔ bɔ ɔ bo yeahilehile bɛ Nyamenle Edwɛkɛ ne ɛzukoalɛdeɛ ne mɔ mɔɔ lumua la. Bɛngola aleɛ mɔɔ anu yɛ se la di. Ɛhye ati bɛkpondɛ nyɛfonzule bɛanlo.

Gyemise Kɛlata ne 1:19

Mediema kulovolɛma, bɛhakye ɛhye. Ɔwɔ kɛ awie biala tie ɔ nzo anwo, ɔmmatendɛ dɔɔnwo yɛɛ ɔmmafa ɛya.

Gyemise Kɛlata ne 1:26

Saa awie dwenle kɛ ɔsonle Nyamenle na ɔmmua ɔ nloa azo a, ye Nyamenlezonlenlɛ ne le mgbane, na ɔbɛlɛbɛla ɔdaye ye ɛkɛla.

1 Pit 2:12

Ɔwɔ kɛ bɛmaa bɛ nyɛleɛ wɔ maanlema avinli yɛ kɛnlɛma, amaa saa bɛsi bɛ amgbu kɛ bɛnle kpalɛ bɔbɔ a, ɛnee kɛmɔ bɛnwu bɛ nyɛleɛ kpalɛ ne la ati bɛaye Nyamenle ayɛlɛ wɔ Kenle ne mɔɔ Awulae bara la.

1 Pit 2:5

Bɛrɛla kɛ bɛle tease awolɛ na bɛmaa bɛva bɛ bɛzi sunsum nu ɛzonlenlɛ sua mɔɔ bɛsonle nu, kɛ bɛle sɛlɛvolɛma nwuanzanwuanza na bɛlua Gyisɛse Kelaese anwo zo bɛbɔ sunsum nu azu mɔɔ sɔ ɛnyelɛ la bɛmaa Nyamenle.

1 Pit 4:10

Kɛmɔ bɛ muala bɛnea bɛ Nyamenle ahyɛlɛdeɛ ngakyile ne mɔ boɛ la, ko biala ɛva ye ɛdeɛ mɔɔ yenyia ye la ɛkpondɛ ɔ gɔnwo mɔ kpalɛ ɛyɛlɛ.

1 Pit 4:16

Na saa awie le Kelaese ɛdoavolɛ la ati ɔnwu amaneɛ a, ɔmmamaa ɔyɛ ye nyiane, na ɔyɛ Nyamenle mo kɛ ɔlɛ Kelaese duma ne anu a.

1 Pit 5:11

Nyamenle ɛhye yɛɛ tumi ne le ye ɛdeɛ dahuu a! Amen.

Dwuudu Kɛlata ne 1:25

Nyamenle kokye ne mɔɔ le yɛ Ngoanedievolɛ ne, yemɔ yɛɛ anyunlunyia, belemgbunlililɛ, kpoleyɛlɛ, nee tumi ɛlua yɛ Awulae Gyisɛse Kelaese anwo zo ɛyɛ ye ɛdeɛ wɔ ɛnɛ nee mekɛ mɔɔ ɛnlɛ awieleɛ la a! Amen.