1 Pit 2:9 - BAEBOLO ANZƐƐ BULUKU NWUANZANWUANZA

⁹ Bɛmɛ a bɛle menli mɔɔ Nyamenle ɛkpa nu ɛye bɛ a. Bɛle Belemgbunli ne sɛlɛvolɛma, maanle nwuanzanwuanza, Nyamenle ɔdaye ye menli mɔɔ yeboɔboa yekpondɛ bɛ bo zo na yevɛlɛ bɛ kɛ bɛvi awozinli nu bɛrɛla ye wienyi ne anu na bɛbɔ ye nwanwane gyima ne nolo a.

1 Pit 2:9 ပူးပေါင်းရင်းမြစ်များ

Edwɛndolɛ Buluku ne 106:5

amaa meanwu wɔ menli ne mɔɔ wɔkpa nu wɔye bɛ la ɛkpazilɛ; amaa me nye alie wɔ maanle ne fɛlɛkolilɛ nu, na me nee wɔ menli ne ali fɛlɛko.

Edwɛndolɛ Buluku ne 118:27

Ɛdɛnkɛma le Nyamenle, yɛɛ yemaa yɛ wienyi. Bɛva mbaka ngane bɛdo ɛlɔnwɔne bɛbɔ ɛvoyialilɛ ne abo, na bɛbɔ azukponle ne mgbɔlɔka.

Edwɛndolɛ Buluku ne 135:4

Ɔluakɛ Ɛdɛnkɛma ɛkpa nu ɛye Gyekɔbo ɛmaa ɔ nwo, yeva Yizilayɛ yeyɛ ye ɛdeɛ.

Edwɛndolɛ Buluku ne 22:30

Amozi amra bazonle ye; menli baha Awulae anwo edwɛkɛ ahile awolɛndoazo mɔɔ bara la,

Edwɛndolɛ Buluku ne 33:12

Nyilalɛ ɛha maanle ne mɔɔ Ɛdɛnkɛma le ye Nyamenle la, nyilalɛ ɛha menli ne mɔɔ yeye bɛ yeyɛ bɛ ye menli la.

Edwɛndolɛ Buluku ne 73:15

Saa menganle kɛ, “Mebaha ye zɛhae” a, anrɛɛ meanga nɔhalɛ meangile ɛ mra awolɛndoazo ye.

Ayezaya Buluku ne 26:2

Bɛbukebuke nlenkɛ mgbole ne mɔ, amaa maanle tenlene ne mɔɔ di nɔhalɛ la awolo nu.

Ayezaya Buluku ne 41:8

“Na bɛmɛ Yizilayɛma, me sonvolɛ Gyekɔbo abo zo amra mɔɔ mekpa nu meye bɛ, me gɔnwo Ebileham nlɔnra,

Ayezaya Buluku ne 42:16

“Mebahile anyenzinliravolɛma adenle, wɔ adenle mɔɔ bɛdabɛ bɛnze la anu, adenle mɔɔ bɛtɛfale zolɛ ɛlɛ la azo yɛɛ mebava bɛ mealua a. Mebamaa awozinli ne mɔɔ wɔ bɛ nyunlu la ayɛ wienyi, na ɛleka ahuhunduu ne mɔ ayɛ azɛlɛ sɛsɛ. Ninyɛne mɔɔ mebayɛ la ɛne, yɛɛ menrɛkpo bɛ.

Ayezaya Buluku ne 44:1

Ɛdɛnkɛma se, “Yizilayɛma, me sonvolɛma, bɛdie, Gyekɔbo abo zo amra mɔɔ mekpa nu meye bɛ a!

Ayezaya Buluku ne 61:6

Na bɛmɛ, bɛbavɛlɛ bɛ Ɛdɛnkɛma sɛlɛvolɛma, Menli bavɛlɛ bɛ Nyamenle sonvolɛma. Maanle maanle bava bɛ anwonyia arɛlɛ bɛ, Na bɛali fɛlɛko kɛ anwonyia ne mɔ le bɛ ɛdeɛ.

Ayezaya Buluku ne 62:12

Bɛbavɛlɛ bɛ “Menli Nwuanzanwuanza,” “Menli mɔɔ Ɛdɛnkɛma Ɛkpɔne Bɛ;” Na bɛbavɛlɛ bɛ, “ Nyamenle ɛkpondɛ bɛ ɛnwu bɛ;” “Suakpole Mɔɔ Nyamenle Amkpo Ye Ɛlɛ.”

Ayezaya Buluku ne 66:21

Mebaye bie mɔ meayɛ bɛ Sɛlɛvolɛma nee Livaema, medame Ɛdɛnkɛma a mese a.

Ayezaya Buluku ne 9:2

Menli ne mɔɔ luale awozinli nu la ɛnwu wienyi kpole bie; bɛdabɛ mɔɔ bɛdɛnlanle awozinli kabii azɛlɛ zo la, wienyi ɛda bɛ nwo zo.

Malakae Buluku ne 3:17

Tumivolɛ Ɛdɛnkɛma se, “Bɛbayɛ me ɛdeɛ. Bɛbayɛ me agyadeɛ mɔɔ anwo hyia a, wɔ kenle mɔɔ menwɔha me nwo la. Mebanwu bɛ anwunvɔne, kɛmɔ sonla nwu ɔ ra mɔɔ sonle ye la anwunvɔne la.

Edwɛkpa ne kɛmɔ Mateyu hɛlɛle la 4:16

Bɛmɛ mɔɔ bɛde awozinli nu la, bɛbanwu wienyi kpole bie! Bɛmɛ mɔɔ bɛde ewule alubo nu la, wienyi bada bɛ nwo zo.”

Edwɛkpa ne kɛmɔ Mateyu hɛlɛle la 5:16

Zɔhane ala yɛɛ bɛmaa bɛ ɛbɛla kpalɛ ne ɛyɛ kɛ kɛnlaneɛ na ɔda wɔ menli nu a, amaa bɛanwu bɛ gyima kpalɛ ne mɔɔ bɛyɛ la na bɛaye bɛ Ze mɔɔ wɔ anwuma la ayɛlɛ.

Edwɛkpa ne kɛmɔ Luku hɛlɛle la 1:79

ye wienyi ne bada bɛdabɛ mɔɔ bɛde awozinli nu nee bɛdabɛ mɔɔ bɛlɛkɔ ewule nu la anwo zo, na yealie yɛ yeava anzonudwolɛ adenle ne azo.”

Dw 17:19

yɛɛ ɔlua bɛ ti medu me nwo memaa wɔ, amaa bɛdabɛ noko bɛadu bɛ nwo nɔhalɛ nu bɛamaa wɔ.

Ɛzoanvolɛma Gyima ne 20:28

Bɛnlea bɛ nwo boɛ na bɛnlea mboane ne mɔ mɔɔ Sunsum Nwuanzanwuanza ne ɛva bɛ ɛwula bɛ sa nu la boɛ. Bɛnlea Nyamenle asɔne ne mɔɔ yeva ɔ Ra ne mogya a yekpondɛ la azo boɛ.

Ɛzoanvolɛma Gyima ne 26:18

Mesoa wɔ, amaa wɔahɔbuke bɛ nye na wɔahwe bɛ wɔavi awozinli nu nee Seetan tumi ne abo wɔara wienyi nu nee Nyamenle ɛkɛ, amaa ɔlua bɛ diedi mɔɔ wɔ me nu la azo bɛanyia ɛtanefakyɛ na bɛanyia ɛleka wɔ Nyamenle menli ne mɔɔ yekpa nu yeye bɛ la avinli.’

Ɛzoanvolɛma Gyima ne 26:28

Agelepa bizale Pɔɔlo kɛ, “Ɛnee ɛdwenle kɛ mekɛ ekyi ɛhye ala anu ɛmaa meayɛ Keleseɛnenli ɔ?”

Wulo 9:24

Ɔluakɛ yɛmɛ yɛɛ yevɛlɛ yɛ yevi Dwuuma nee bɛdabɛ mɔɔ bɛnle Dwuuma la avinli a.

1 Kɔl 3:17

Saa awie sɛkye Nyamenle Ɛzonlenlɛ Sua ne a, Nyamenle bazɛkye ɔdaye noko, ɔluakɛ Nyamenle Ɛzonlenlɛ Sua ne anwo te, na sua zɔhane, yemɔ a le ɛdawɔ.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:14

Sunsum ne di agyinlanu kɛ yɛbanyia mɔɔ Nyamenle ɛva ɛbɔ ye menli ɛwɔkɛ la; eza ɔmaa yɛsi pi kɛ Nyamenle bamaa menli mɔɔ le ye ɛdeɛ la anyia bɛ ti bɔkɔɔ. Bɛmaa yɛye ye anyunlunyia ne ayɛlɛ!

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:6

Bɛmaa yɛye Nyamenle ayɛlɛ wɔ ye nwanwane ɛlolɛ kpole nee ye ahyɛlɛdeɛ ne mɔɔ yelua ɔ Ra ne mɔɔ ɔkulo ye la anwo zo yeva yemaa yɛ la ati.

Mɛla 10:15

Noko Ɛdɛnkɛma vale ye ahonle hulole bɛ ze mɔ na ɔkpale nu ɔyele bɛ bo zo amra, mɔɔ le bɛdabɛ, ɔvile menli kɔsɔɔti anu, kɛmɔ kɛkala ɔde la.

Mɛla 14:2

Ɔluakɛ bɛle Ɛdɛnkɛma bɛ Nyamenle ne menli mɔɔ anwo te a. Ɛdɛnkɛma ɛkpa nu ɛye bɛ wɔ menli kɔsɔɔti mɔɔ wɔ ewiade la avinli kɛ ɔdaye ye menli a le bɛ.

Mɛla 18:2

Ɔnle kɛ bɛnyia agyadeɛ mɔɔ le kɛ azɛlɛ la biala kɛ bɛ mediema mbusua ekpunli ekpunli ɛhendeɛ ne mɔ anu amra la. Bɛ afoa nu ɛdeɛ a le Ɛdɛnkɛma, kɛmɔ ɔdaye ɔvale ɔbɔle bɛ ɛwɔkɛ la.

Mɛla 4:20

Na bɛmɛ, Ɛdɛnkɛma ɛva bɛ na yeye bɛ yevi Yigyibiti bulalɛ fonlomo gɔhyee ne anu kɛ bɛrayɛ ɔdaye ye menli, kɛmɔ bɛde ɛnɛ la.

Mɛla 7:6

Ɔluakɛ bɛmɛ, bɛle menli mɔɔ Ɛdɛnkɛma bɛ Nyamenle ne ɛde bɛ nwo a. Ɛdɛnkɛma bɛ Nyamenle ne ɛkpa nu ɛye bɛ ɛvi menli mɔɔ wɔ ewiade la amuala anu, kɛ ye menli a le bɛ.

Pɔɔlo Kɛlata mɔɔ ɔhɛlɛle ɔhɔmanle Felepaema la 3:14

Yemɔti memia me nwo kɛ menriandi meahɔ awieleɛ, amaa me sa aha ahyɛlɛdeɛ ne mɔɔ le anwuma ngoane ne mɔɔ Nyamenle lua Kelaese anwo zo ɛlɛfɛlɛ yɛ ahɔ nu la.

Kɔlɔ 1:13

Nyamenle ɛlie yɛ ɛvi awozinli nu tumi ne mɔ abo, yeva yɛ yera ɔ Ra kulovolɛ ne belemgbunlililɛ ne abo,

2 Tem 1:9

Ɔliele yɛ ngoane na ɔvɛlɛle yɛ kɛ yɛrayɛ ye menli, tɛ yɛ gyima mɔɔ yɛyɛ la ati ɔ, na ɔlua ɔdaye ye bodane nee ye ɛlolɛ ti. Ɔluale Kelaese Gyisɛse anwo zo ɔvale ɛlolɛ ɛhye ɔmanle yɛ ɔvi aloamɔleɛ,

Pɔɔlo Kɛlata mɔɔ ɔhɛlɛle ɔhɔmanle Taetɛse la 2:14

Gyisɛse Kelaese vale ɔ nwo manle wɔ yɛ ti kɛ ɔbaye yɛ yeavi amumuyɛ muala anu, na yeayɛ yɛ ye menli mɔɔ anwo te na yɛle ɔ ngomekye ye ɛdeɛ la, amaa yɛ nye abolo kɛ yɛkɛyɛ kpalɛ.

1 Pit 1:2

Nyamenle Selɛ ne luale ye bodane ne azo kpale nu yele bɛ na ɔluale ye Sunsum ne azo ɔyɛle bɛ menli mɔɔ anwo te la, kɛ bɛyɛ tieyɛ bɛmaa Gyisɛse Kelaese na ye mogya ne ade bɛ nwo. Nyamenle ɛlo bɛ na ɔmaa bɛ anzonudwolɛ molozo.

1 Pit 2:5

Bɛrɛla kɛ bɛle tease awolɛ na bɛmaa bɛva bɛ bɛzi sunsum nu ɛzonlenlɛ sua mɔɔ bɛsonle nu, kɛ bɛle sɛlɛvolɛma nwuanzanwuanza na bɛlua Gyisɛse Kelaese anwo zo bɛbɔ sunsum nu azu mɔɔ sɔ ɛnyelɛ la bɛmaa Nyamenle.

1 Pit 4:11

Sonla ne mɔɔ ka Nyamenle edwɛkɛ la ɛnlea ɛha Nyamenle edwɛkɛ ne; mɔɔ sonle noko la ɛva ye anwosesebɛ mɔɔ Nyamenle ɛva ɛmaa ye la amuala ɛzonle, amaa debie biala mɔɔ bɛyɛ la anu menli ava ayɛlɛyelɛ alua Gyisɛse Kelaese anwo zo amaa Nyamenle. Yemɔ yɛɛ anyunlunyia nee tumi le ye ɛdeɛ dahuu a. Amen.

Yekile 1:6

na yeyɛ yɛ arelemgbunli nee sɛlɛvolɛma kɛ yɛzonle ye Nyamenle Selɛ ne. Anyunlunyia nee tumi ɛyɛ ye ɛdeɛ dahuu! Amen.

Yekile 20:6

Nyilalɛ nee anyunlunyia ɛha bɛdabɛ mɔɔ bɛboka alumua ewudwazo ne anwo la. Ewule ne mɔɔ tɔ zolɛ nwiɔ la ɛnlɛ bɛ nwo zo tumi; bɛbayɛ Nyamenle nee Kelaese sɛlɛvolɛma na bɛ nee Kelaese ali belemgbunli ɛvolɛ apenle.

Yekile 5:10

Wɔmaa bɛyɛ arelemgbunli nee Nyamenle sɛlɛvolɛma na bɛbali arelemgbunli wɔ azɛlɛ ye azo.”

1 Sam 12:22

Ɔlua ye duma kpole ne ati, Ɛdɛnkɛma ɛnrɛkpo ye menli, ɔboalekɛ ɔdaye ye ɛhulolɛ zo yɛɛ yeva bɛ yeyɛ ye menli a.