1 Edk 10:4 - BAEBOLO ANZƐƐ BULUKU NWUANZANWUANZA

⁴ Yemɔti Sɔɔlo zele ye sonvolɛ ne mɔɔ soa ye konle ninyɛne ne la kɛ, “Twe wɔ dadeɛ ne wɔ me maa menwu, anrɛɛ menli ɛhye mɔ mɔɔ ɛnze Nyamenle la kɛragolo me nwo.” Na ye sonvolɛ ne anyɛ, ɔluakɛ ɛnee ɔsulo kpole. Yemɔti Sɔɔlo vale ɔdaye ye dadeɛ ne wɔle ɔ nwo.

1 Edk 10:4 ပူးပေါင်းရင်းမြစ်များ

2 Sam 1:20

Bɛmmabɔ ye nolo wɔ Gate, anzɛɛ Ahyekɛlɔn mgbata ne mɔ azo. Anrɛɛ Filisitia mraalɛ kɛli fɛlɛko, anrɛɛ mraalɛ mɔɔ ɛnze Nyamenle la anye kɛlie.

2 Sam 1:6

Kpavolɛ ne buale kɛ, “Ɔrale ye kɛ ɛnee mewɔ Gelebowa Boka, na menwunle kɛ Sɔɔlo hisa ye atwɛ ne na kpɔvolɛma ne konle ehwili ne mɔ nee menli mɔɔ ka mgbɔnwɔ la ɛkpumgbu ye kpalɛ.

2 Sam 17:23

Mɔɔ Ahetɔfɛle nwunle kɛ bɛanva ye folɛdulɛ ne la, ɔvole ye asoaso ne azo na ɔhɔle ɔdaye ye sua zo. Ɔtotole ninyɛne boɛ na ɔbɔle ɔ nwo akɔnvo. Bɛziele ye wɔ ɔ ze nla ne anu.

1 Arl 16:18

Zemelae nwunle kɛ ɛlɔne ɛva bɛ aze la, ɔhɔveale belemgbunli sua ne anu akunlu nehane na ɔdole senle sua ne anu ɔyelale ye ɔguale ɔ ti zo ɔhunle ɔ nwo.

1 Edk 10:3

Konle ne akee telele Sɔɔlo asa azo, na ɛda hanle ye manle ɔbodale kpole bie.

1 Edk 10:5

Mɔɔ ye sonvolɛ ne nwunle kɛ Sɔɔlo ɛwu la, ɔdaye noko ɔvale ye dadeɛ ne ɔwɔle ɔ nwo na ɔwule.

Ɛzoanvolɛma Gyima ne 1:18

(Ezukoa ne mɔɔ Dwudase luale ye ninyɛndane zo liele la, ɔvale ɔdɔle azɛlɛ, na ɛkɛ ne a ɔvuandinle ɔ nwo ɔdele, ɔ ko kpukele na ɔ kunlu anyalɛ muala tulule guale na ɔwule a.

Ɛzoanvolɛma Gyima ne 16:27

Mɔɔ pilizama sinzavolɛ ne vi nafelɛ nu dunwuele na ɔnwunle kɛ efiade ne nlenkɛ ne mɔ deda nwolɛ la, ɔdwenlenle kɛ menli mɔɔ bɛguale bɛ efiade ne la ɛwie nriandi kɔ, ɛhye ati ɔhwenle ye dadeɛ ne kɛ ɔku ɔ nwo.

Maanlebuvolɛma Buluku ne 15:18

Akee nzuhɔne hunle ye kpole kpalɛ, na ɔzɛlɛle Ɛdɛnkɛma kɛ, “Wɔlua wɔ sonvolɛ nwo zo wɔlie wɔ menli ye ngoane. Na nzuhɔne ɛlɛku me yeamaa meadɔ donvula wɔ menli mɔɔ ɛnze Nyamenle la asa anu ɔ?”

Maanlebuvolɛma Buluku ne 16:21

Filisitiama ne hyele ye dudule ɔ nye na bɛ nee ye hɔle Gaza. Bɛvale kɔbele nwɔnzɔnwɔnzɔ bɛguale ye na bɛmanle ɔhyibale abɛlɛ melahyinli, ɔdinle abɛlɛ wɔ efiade ɛkɛ ne.

Maanlebuvolɛma Buluku ne 9:54

Abemɛlɛke vɛlɛle ye sonvolɛ ne mɔɔ soa ye konle ninyɛne ne la kɛ, “Ka ɛ nwo, twe wɔ dadeɛ ne ku me ndɛndɛ, anrɛɛ menli kɛze kɛ, ‘Raalɛzinli a hunle ye a.’ ” Amgba noko kpavolɛ ne wɔle Abemɛlɛke dadeɛ hunle ye.

1 Sam 14:6

Dwɔnatan zele kpavolɛ ne mɔɔ soa ye konle ninyɛne ne la kɛ, “Maa yɛhɔ menli ne mɔɔ ɛnze Nyamenle la azokoɛleɛ lɔ; ɔkɛyɛ kɛ Ɛdɛnkɛma bayɛ gyima ne amaa yɛ, ɔluakɛ kanzɛ yɛanzo bɔbɔ a, debie biala ɛnle ɛkɛ mɔɔ kola tua Ɛdɛnkɛma adenle mɔɔ ɔnrɛmaa ɔnrɛlie yɛ a.”

1 Sam 17:26

Devidi bizale menli mɔɔ gyigyi ɔ nwo ɛkɛ ne la kɛ, “Duzu ahyɛlɛdeɛ a sonla mɔɔ kɛhu Filisitianli ye na ɔkɛlie Yizilayɛma ɔkɛvi anyiemgba ɛhye anu la banyia a? Ɔluakɛ, Filisitianli ɛhye mɔɔ ɛnze Nyamenle la a le nwane, mɔɔ ɔdaye bɔbɔ ɔwɔ kɛ ɔko ɔtia tease Nyamenle ne ɛlɔnema a?”

1 Sam 17:36

Wɔ sonvolɛ ɛhu awenade nee bedi mɔ, na Filisitianli ɛhye mɔɔ ɛnze Nyamenle la bawu kɛ awenade anzɛɛ bedi ne mɔ ko ala la, ɔluakɛ yeanli tease Nyamenle ne ɛlɔnema ne eni.

1 Sam 31:4

Yemɔti ɔzele kpavolɛ ne mɔɔ soa ye konle ninyɛne ne la kɛ, “Twe wɔ dadeɛ ne ku me, amaa Filisitiama mɔɔ ɛnze Nyamenle la ambangolo me nwo, angu me.” Ɛzulolɛ hanle kpavolɛ ne, yemɔti yeangola ye ku. Sɔɔlo yele ye dadeɛ ne na ɔdaye ɔ ngome ɔdɔle zolɛ ɔhunle ɔ nwo.