Taitus 2:14 - Nobonob Baibel

¹⁴ Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.

Taitus 2:14 ပူးပေါင်းရင်းမြစ်များ

Genesis 48:16

Kayak, Nug uug ohnu qagaiettakppanu uhuqiɗom amu; Kayak amunu amu, da Nug nid aɗit imu itittak ena matakkunu ool daatte. Ahilahnu amu, aa da alal Abraham, da mamel Aisak amu da ele, aa ig buɗunig ooppa daaglahnu ool daatte, amu aa appatpeɗ, buɗultippa danab kuɗum bekkulagnu ele ool daatte,” awa aum.

Sam 130:8

Yawe Nug nukka, Nug Israel danab ah, ahilkad hipuninnu qagaiettakppanu eɗua uhuqak ha madakku.

Sam 135:4

Ag Yawe binag mekkulagnu diig am, Nug Jakop buɗub nuhikkud daaglagnu tituanattom. Ao, Nug Israel danab ah ag nuhikkud danab ah, nuhig en okkainab bia daaglagnu tituanattom.

Eksodas 15:16

Ao, baɗak eheɗ nau okkainab ag tonatta daakku. O Yawe, ag nahip ɠagattag anidna, ag toettan daaglag. Ge, ag keeke laa hekkulagnu elele iitta. Ag anam daappeg, nahipad danab ah ig, ig ag qe-eɗadta gokkunignu gottemppa gokkunig. Ao, ag anam daappeg, ig danab ah na Isipnu eɗun awigme amu, ag anam daabppeg, ig qe-eɗadta gokkunig.

Esekiel 36:25

Ag wan ahilagppanab daappeg, da le oppiaawak ele awen, ahilagppa tauɗppi ag oppiaawak daaglag. Da heppi, dubuttid, da noolppa daakkun elele iitta ahilagppa laa ii daama; ag baula kayak hambuppuak dottolkad noolagppa dup nona binalag ii memana.

Esekiel 37:23

Ag anam daappeg, da ehanadppi, ag tatam kayak hambuppuak dottolkad, amu oh am uɗig wak ele, ag ag noolagppa dup nona binalag meppig, kobol nau digdig laa ele heppig amu, ag baula anam ii hemana. Da ehanadppi, ag baula hipunin ii henana, da ii dimeɗamna. Da heppi, ag oppiaawak daaglag. Ag dahilad danab ah daappeg, da ahilag Kayak daakkul.

Lewitikas 25:41

Haen amuppa nug bekkod ele ag nahipad maɗi nid maɗi ah ele ii daan, ag eɗun, ahilkad aab ikki, amu mamelkad aɗi aulag wanppa gokkulag.

Malakai 3:3

Laa nug silwa babaitta epeɗia awak uɗat hette, Nug amubia hekku. Ao, Nug heeb, laa ag gol, silwa ele babaitta epeɗia awak uɗat hetteb, amubia Nug heeb, Lewi buɗub ag oppiak ele daaglag. Nug anam heeb, ag genab tutukku hak danab Yawe eppegppa daan, ag doɗ manadna Yawe mettaglag.

Namba 25:13

amu tituanak amuam iikku. Nug danab ah ag da, Kayak, da diilnu eheɗ doomnanu yag-nab-bak doya heum amu, nug anam heumppa nug Israel danab ah dilag eheɗ haknu nob nau iitta mekkunu he elele mettom amunu, nug, amu nug buɗub ele, ag geha hanhan mana mettak danab daaglagib,” awa aum.

Matyu 1:21

Nug geha nid danab aokku, amu na Nug onig Jesus ataɗkkut. Aɗinu? Nug nuhikkud danab ah, ag ahilag hipuninnu padal ii memananu ehanadkku,” awa aum.

Matyu 20:28

Yo, nug Danab Bekkalag da, da hettem amubia haɗ! Am inam. Danab Bekkalag da, da wan imuppanu danab ah ag da ehaniɗkkulagnu ii uɗimi. Iitta. Da ag ehanadkkulnu uɗimi, amu da dahil mauhakppa danab ah kuɗum eɗue diiadkkulnu ele uɗimi,” awa aum.

Matyu 3:12

Nug ee aeg mumuɗaknu abenppa ulah ee aeg dappunkkeg iwale ukkaknu uɗat hekkunu daatte. Nug uɗat amu ha, elelenab mewowa, Nug wit meu oh ee aeg mumuɗaknu abenppanu awa ukka, ee maknu lakka mekku. Mewowa, Nug ee aeg dappunkkeg aab aɗu ii qauhtte eleppa maneb eweb, ee aeg mumuɗaknu aben amuam keeke iitta, oppiaawak daakku,” awa aum.

Jon 10:15

amubia Mame Nug da dooiɗeɗe, da Mame doottem. Laa ele, da dahilad sipsip, ag ena daaglagnu dabmein dayeye, dahil bau dayak heppi iitta mekku.

Jon 6:51

Bret bauklel ele hab aabppanu uɗiom am da. Am laa nug bret imu latte amu, nug bauklel hanhan daakku. Amu ele bret da wanppan danab ah bauklel daaglagnu madakkul ele imuam, da beɗul,” awa aum.

Aposel 15:14

Saimon nug ig amenigppa a, ig aakku doomut. Amuam digmakppa Kayak Nug iitta aɗi ehanadkkunu dabmaama, nug ahilagppa na, Nug danab ah amu oolagppanu danab ah nuhikkud diiattom.

Aposel 15:9

Nug ihinigppa kobol laa haaha, ahilagppa kobol laa ii heum. Iitta. Ag oolagppa genab doyeg, ahilag ooppa genab doyak amuppa Nug he, ag oolag oppiak dayom.

Aposel 20:28

Amunu ag akka ahilagnu dabmenan daanna, amu Kayaknu danab ah, Kayak Ouɗi Nug ag gumak ikki danab ahilag daaglagnu otiattom ele amu, ag amu dilag ele oh dabmenan dayeg! Ag Kristen tamaniak, Kayak Nug nukka Nug tiigppa nuhig tamaniak amu daden meum ele amu, ag nuhig tamaniak amu tutukku gumatteg!

Aposel 9:36

Aria aab laa onig Jopa, appa amu ah laa Jesusnu ooppa genab doyaya dayom, nug onig Tabita, Grik naippa amu ag Dorkas atteb. Nug hanhan kobol ena haaha, nug danab ah keeke iitta ele amu ehanattatta, keeke madattom.

Galesia 1:4

Kristus Nug Kayak, ig Mamenig, Nug oo dayom amu dim lamitta, Nug ihinig hipunin uhuqa megakkunu, Nug nukka bau dayak nuhig uua, ad emaitakppa mauhom. Nug anam heumnu diig am, Nug ig kobol nau, gemu wannu haen imuppa daatte, amu waappa ii daamtanu heum.

Galesia 2:20

Da Kristus ele oh ad emaitakppa aihlop bia mauhmi amunu da gemu bau ii daattem. Iitta. Kristus Nug da oolppa bau daatte. Anam daatte amunu, dahil oiyak wan imuppa oh amu da Kayak Bekkanu oolppa genab doyeye oittem. Nug dahilnu oo mauhe amu dahilnu ele mauhom.

Galesia 3:13

Ɗo ig eheɗ laa awaknu anak waappa daattemnu atte, amge Kristus Nug Kayak naippa yaak, “Danab oh ag ad attan aihadtteb ele, danab amu ag eheɗ laa awaknu anak waappa daatteb,” Nug nai amu attenu qagaiettak awa, amuppa Nug qagaiettak amuppanu eɗua uhuqak ha megakka, nob nau amu awa ehanikkom.

Epesus 1:11

Ig Kristusnu uɗat okkaippa Kayak bekkod daattem. Kayak Nug keeke oh attem bekkunu dabmette amu, anamib bette amunu, Nug ig nuhikkudnab daagnignu dabmaama meikkom daatta, ig Nug bekkod daattem.

Epesus 2:10

Amu Kayak Nug nuhig doyakppa he, ig bemut. Ge, Kayak Nug he, ig Kristus Jesusnu daatta, ig kobol ena hekkunignu daattem amunu, ig ig oninig humagnignu elele iitta. Kayak Nug ig amuppa oignignu anukka babaitta mekkom.

Epesus 5:2

Ag nug oo mauhakppa, Kristus Nug ihinignu oo mauhe, Nug nukka Nug bau dayak nuhig ig ehanigkkunu uua, ihinignu mauhom bia oiyeg! Kristus Nug danab ag doɗ main Kayak muttuɗig ena dookkunu medatteb bia, nukka nuhigppa anam heum.

Duteronomi 14:2

Aɗinu? Ag Israel, ag am danab ah, Yawe, ahilag Kayak, Nug ahilagnu, nuhignu tituanak daatteb anadtte. Wanppan danab ah oh oolagppa, Yawe, ahilag Kayak, Nug ag danab ah nuhignab daaglagnu tituanattom. Ag am keeke enanagnab laa bia nuhignu daatteb.

Duteronomi 26:18

Yawe Nug gemu, ag am nuhig danab ah, ag nuhikkudnab danab ah daattebnu atte. Nug anam hekkununab nai anan qakkom, amu Nug ag nuhig haknunab anak nai oh dim lamidkkulagoittenu ag amelagppa aum.

Duteronomi 4:20

Ahilagnu amu, Yawe Nug ag ehanatte, ag Isip wanppa ii daatteb! Isip amu aab dittiak naɗi bia he, ag guittak okkainab ele doonna daaeg, Yawe Nug ag Isipnu diia, omalatte uɗippig. Ag nuhig danab ah daaglagnu, Yawe Nug ehanatta diie, ag gemu nuhignab aakku daatteb.

Duteronomi 7:6

Aɗinu? Ag Israel, ag am danab ah, Yawe, ahilag Kayak, Nug ahilagnu, nuhignu tituanak daatteb anadtte. Wanppan danab ah oh oolagppa, Yawe, ahilag Kayak, Nug ag danab ah nuhignab daaglagnu tituanattom. Ag am keeke enanagnab laa bia nuhignu daatteb.

1 Timoti 1:15

Nai imuam genab, meu ele amunu ag aona, oolagppa genab dooglagnu ele elele. Nai am inam. Jesus Kristus Nug wan imuppanu hipunin danab ah eɗua diiadkkunu uɗiom. Hipunin hak danab ah oh eɗattak am daib.

1 Timoti 2:10

Ah ag keeke digdig amubia ii memana. Iitta. Ag ah Kayak dim lamidnana, aɗi aɗi kobol hekkulagnu elele doon henan oitteb ele amu, ag hak ena amu lamen bia takkaglagnu ool daatte.

1 Timoti 2:6

Nug danab ah oh dilagnu Nug nukka Nug bau dayak nuhig uua, amuppa Nug haenppanab Kayak Nug danab oh eɗua diikkun hette ippunikkom.

1 Timoti 6:18

Laa amu, na danab ah enulag ele ag ena, ao ag kobol ena okkai hena, ag danab ah oo qak iitta ele ehanadna, ag enulag laih oppatna, danab laa ɗo mattaglagnu babaittak daaglagnu haknunab nai ag matteg!

Taitus 2:7

Na amu, na aɗi hettemppa na ag ippulag enaib ippunadnana, tutukku he! Amu laa ag nahip nai tabappeg nekkunu hetteb ele, ag ihinignu nai eheɗ laa mattiglagnu ib iitta anidkkulag amunu, ag ⌊anam heppignu⌋ uɗa nak dooglagnu na ippunattak nai nahip-ppa na danab dabmak oiyak nuhig ele am tutukkuib, na danab nug nuhig uɗatnu am keeke meu ele, hamu iitta dootte, amu na danab nug nai genab ena ele, danab ag nai amunu nai nau anaknu elele iitta maditte, na danab anam daan ippunadna, ippunittak nai nahip mattie!

Taitus 3:8

Nai amuam genabnab. Amu danab ag Kayaknu oolagppa genab dooppig ele, ag ena henan daaglagnu tutukku dabmekkulagnu, da na ippunittak nai da iikku medattem, na danab ah ippuanadkkutnunab ool daatte. Keeke amu oh am danab ah ele ehanadtte.

Hibru 1:3

Aam lettod ye, amahlak amia ukke, danab ah anidtteb, amubia Kayak Bekka Nug Kayak binag amahlak oppiaawak ele he, danab ah anidtteb, amu Nug Mameg daatte, amubianab daatte. Nug keeke oh nuhig naippa ɠagattag aqadtte. Nug nuhig mauhakppa Nug danab dilag hipunin uhuqa mattaknu ib ooɗom. Nug ib amu ooɗowa, Nug eɗua hab aabppa ta, Nug Kayak, Nug dagom onig ɠagattag ele, Nug Nug eppeg naɗiap-ppa daatte.

Hibru 10:24

Amu ig lainkad dilag, ag danab laa dilagnu oolag mauhkkunu, kobol ena ele hekkulagnu maɗattagnignu, ig amu ele dabmetu!

Hibru 9:14

amge gemu, ig Kayak bauklel ele waappa daat Nug oɗe dim lamidkkunignu ig Kristus tiigppa genab oppiaawak daagnignu elelenab. Aɗinu? Kristus Nug beɗuppa eheɗ laa iittanab, Nug Kayak Ouɗi hanhan daatte ele, nuhig ɠagattagppa, Nug nukka Nug beɗu, mana mettak bia, Kayak mettom amunu, Nug tiig ig beɗunigib ii ihom. Iitta! Ig Kayak bauklel waappa daat, nuhig uɗat hekkunignu Nug tiigppa ihinig hak nau, hak amuam danab mauhakppa omaladna gotteb amu, am hak nau amu oh uhuqa mekkak daatteb.

Jems 4:8

Ag Kayak gumidna wappeg amu, Nug ele ag gumatta dokku. Danab nug eppeg leppa ihe, dubuttid iitta daatte bia amu, ag hipunin danab ag heppeg, ag ahilag oiyak am dubuttid iitta ele dayaɗ! Ag danab ag dabmak laippu iitta, ag heppeg, ag oolag oppiak dayaɗ!

1 Pita 1:18

Ag dootteb, ag mamelkad aɗi ib uug ele, nuhig meu am keeke hamu, ag ib amu dim lamitteg neum amu, Kayak Nug ag ib amunu qagaiettakppanu eɗua uhuqak ha mattom, amge Nug keeke nauhtte ele, gol, silwa bia, Nug amuppa ag qagaiettak amuppanu ii uhuqattom. Iitta!

1 Pita 1:22

Ag gemu ag doyak diig genabib dim lamidtteb, amuppa ag danab oolag ihan oppiak daatteb amunu, ag oo mauhak kobol genabppa ag lailkad dilagnu oolag mauhtte. Ag anam daatteb, amge ag tuɗidna, ag lailkad dilagnu oolkad unuqagppanu oo mauhaknab doyeg!

1 Pita 2:12

Amu ag danab laa Kayak baekkudppa ii daatteb ele amu, ag ag oolagppa daanna, kobol ena tutukkuib heig! Ag anam hebeppeg, danab amu ag ahilagnu nai nau akkulagtai, ge ag ahilag kobol ena amu anidna, haen Naɗi Nug ig danab ig ehanigkkunu uɗikku amu, ag ele Nug binag mekkulag.

1 Pita 2:9

Amge ag Kristen danab ah amu, ag gatatuppa daaegeg, Kayak Nug diia amahlak enappa maattom, ag Nug ahilagppa ena heum, ag amu miag atiglagnu Nug ag tituanatte daanna, ag am mana mettak danab, king ele daatteb, ag am danab ah Kayaknu ɗo maɗoɗppa daatteb, ag danab ah nuhikkudnab ele daatteb.

1 Pita 3:18

Kristus Nug hipunin uhuqa mettaknu haen laippu aakku mauhom. Nug baula ii mauhma. Nug beɗuppa aab laa iitta, amge Nug ig danab, ig beɗunigppa aab ele, Nug ig omaikka, Kayak toppa wakkunu Nug mauhom. Ag heeg, Nug beɗu mauhom, amge Kayak Ouɗi Nug he, Nug eɗua hibaitta, bauklel daatte.

1 Jon 1:7

Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

1 Jon 1:9

Ig ihinig hipunin Kayak amegppa miagib mattignig dayeb, Nug oo metta ii uuak kobol, aria nai doya mala hettoɗia epeɗia elele mettak kobol ele dim lamittatta, Nug ihinig eheɗ hak oh uhuqa mekka heeb, ig oppiak daagnig.

1 Jon 3:2

O gamalad, gemu ig aakku Kayak bekkod daattem, amge ig geha attem daagnig am miag ii atiom. Amge ig doottem, haen Kristus Nug miag atia beeb, ig Nug bia daagnig. Aɗinu? Ig Nug attemnab daatte anidkkunig.

Revelesen 5:9

Ikki danab 24 ag anam hena, ag ahi bau laa inam edappig. “Na buk itoɗiak amu aona, qataqak oh tolakkutnu ehah ele. Aɗinu? Ag heeg, na mauhme, amu na danab ah huu ohppanu, nai ohppanu, beɗulag iɗu iɗu ohppanu, wanppan wan ohppanu ele na tiinppa hipuninnu qagaiettakppanu eɗua uhuqak hena, Kayak mettame.