Sekaraia 7:11 - Nobonob Baibel

¹¹ Yawe Nug anam atte, amge ag mamelkad aɗi ag nuhig nai dabmettaglagnu uuppig. Ag ahilag dabmak ɠagattag eppe, ag Yawe dimettan, ag danab nug nai doomanu nug daug eppeg doɗoppa itutte, amubia ag Yawenu nai doyaknu uuppig.

Sekaraia 7:11 ပူးပေါင်းရင်းမြစ်များ

2 Stori 33:10

Manase nug anam heehe, Yawe Nug Manase, nuhikkud danab ah ele ag nau aomnanu nai ag mattom, amge ag dab-ii-meppig.

Nehemaia 9:17

Ag nahip nai dooglagnu uuppig. Ag hak kuɗum laa, danab hekkunu elele iitta, hak amu na ag noolagppa heme anidppig ele, ag hak amu daulag atiom. Ag na oɗen dim lamidmananu dabmak ahilag ɠagattag eppe henan, ag nahip nai tappaeg neene, ag danab laa nug ag noolag awa diieb, ag eɗun, Isip wanppa gona, eɗun ahilkad begbeg maɗi nid daaglagnu tituanppig. Ag amu oh heppig, amge na Kayak, ⌊na am kayak laa bia iitta. Iitta!⌋ Na danab hipunin hette ele, ⌊nug oo eɗueb,⌋ na hipunin amu uhuqna medattem. Na oo bodoette enanag maɗoɗ ele hak kobol dim lamidttem. Na danab ah dilagnu oot bodoetta, le mette. Na oot paha ii nauhtte. Nahip oo mauhaknab kobol am amba, leta nette. Na anam daattem amunu, na ig mamenkad aɗi amu, na ag ii uuadme.

Nehemaia 9:26

Na ahilagnu enanag anam heme, amge ag na oɗen ii dim lamidna, nahip nai tappaeg ne, ag nahip ɗo ag dimulagppa meppig. Ag nahipad propet danab, danab amu ag ag eɗun, na waatppa daaglagnu ag amelagppa madippig amu, ag ag aqaeg mauhppig. Ag dabittak nai nau ele madippig.

Nehemaia 9:29

Na ag nau aomnanu dabmettak nai mattana, ag eɗun nahip ɗo waappa daaglagnu ag amelagppa ame, amge ag beɗuppa tak danab dilag kobol dim lamidna, ag nahip haknunab nai ii dim lamidppig. Ɗo nahip, danab nug dim lamidtte ele nug bau daakku amu, ag ɗo amu tippaladna, ii dim lamidna, hipunin heppig. Ag na oɗen dim lamidmananu dabmak ahilag ɠagattag eppe, ag na dimettana, ag dabmak eɗukkunu uun autna aona, ag nahip nai dooglagnu uun, ii dooppig.

Eksodas 10:3

Yawe Nug anam a, Moses, Aron ele aa Paro gumidya goya, aa nug amegppa inam apiɗ. “Yawe, Nug ig Hibru, ihinig Kayak, Nug atte. ‘Na nai dahil tappae neene, da waalppa ele ii daanna, anam henan daattem; amu na haen gane laa ele ukkeb, na kobol amu uukkut? Da attem! Na danab ah dahilad amu paɗadppe, ag gona, da noolppa dup nona binal meig!’ ” awa aum.

Aisaia 28:12

Kayak Nug matu wan imu ag mattowa, Nug ag amelagppa inam aum. “Imuam hik awa, oo maɗoɗ ele dayaknu aben laa. Danab ah ag uug dootteb ele, ag uɗin, ippa hik aweg! Imuam oo maɗoɗ ele dayaknu aben.” Nug anam aum, amge Israel danab ah ag nai amu doon dabmekkulagnu uuppig.

Aisaia 46:12

Da anam hettem amunu, ag danab ah ahilag dabmak ɠagattag eppom, ag genab tutukku hak kobol ii dim lamidtteb ele amu, ag dahil nai doyeg!

Aisaia 6:10

Naɗi Nug anam ana, Nug da amelppa nai tuɗitta aum. “Heppe, danab ah imu ag oolag ɠagattag eppaɗ! Heppe, ag daulag nai dookkunu elele iitta dayaɗ! Heppe, ag amelag amuhak dayaɗ! Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag,” awa aum.

Aisaia 65:12

Da ag hettebnu dabmein, da heppi, laa ag uɗin qep elabppa aqadppeg mauhkkulag. Ao, ag gomelppeg, laa qep elabppa aqadppeg mauhkkulag. Aɗinu? Da ag onilagppa emi, amge ag da baal dooglagnu uuppig. Da ag amelagppa nai mattimi, amge ag dooglagnu uuppig. Ag da amelppa kobol nau heppig. Ao, keeke digdig da ag amu hekkulagnu ool ii daatte ele, ag hekkulagnu dabmenan heppig.” Yawe Nug anam atte.

Jeremaia 11:10

Ag mamelkad aɗi dahil nai dooglagnu uuppig, ag hipunin heppig, gemu danab ah imu ag hipunin amuib hetteb. Ag kayak hambuppuak dim lamadna, ag noolagppa dup nona, ag binalag metteb. Israel danab ah, Juda danab ah ele ag nug tituana nai qakkak nai da hei, da ag mamelkad aɗi ele bappaidta, ag nai amu waappa daan oinna, ag nai amu tippalna, ii dim lamidppig amu, laa gemu daatteb, ag ele anamib.” Yawe Nug anam awa aum.

Jeremaia 13:10

Jerusalem danab ah, Juda danab ah laa oh ele, ag nau hetteb, da ag nau aomnanu dabmettak nai mattami, amge ag dahil nai dooglagnu uutteb. Ag da oɗel dim lamidmananu dabmak ahilag ɠagattag eppe, ag akka ag ahilag dabmak eheɗ haknu dim lamidnana, ag kayak hambuppuak waappa daan, ag noobppa dup nona binag metteb. Ag anam henan daatteb amunu, matagiɗ imu nauhak daatte, laa nug uɗat aɗi laa medakkunu elele iitta bia, ag anambia aakku daaglag.

Jeremaia 17:23

Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

Jeremaia 17:27

Ag da oɗel dim lamidkkulag dayeb amu, anam daakku, amge ag oɗel ii dim lamidkkulag dayeb, ag Sabat deɗ am dahilnu tituanak daakkunu ii dabmekkulag dayeb, ag Sabat deɗppa keeke maon uɗin, Jerusalem aab aɗnu od laalappa uɗin, aab ooppa gokkulag dayeb, da heppi, aab ewak, laa qauhkkunu elele iitta aɗnu odppa digma ewawa, appanu ewebeb ukkeb, aab oh, nuhig aab aɗ ɠagattagnab ele oh eokku.” ’ ” Yawe Nug anam awa atte.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 35:15

Da haen kuɗum dahilad maɗi nid, ag propet amu, da ag maatti, ag gona, ag Israel, ag amelagppa inam appig. ‘Ag anen anen ag nau hak ahilag uun, ii henana, ag ena hak henana, ag kayak laa dim lamadna, waappa daan, ag oɗelag dim lamidkkulagnu aib heppig. Ag amu hekkulag dayeb amu, ag haen elab wan imuppa, da wan imu ag mamelkad aɗi mattami amu, ag wan imuppa haen elab daaglag.’ Da propet oɗelagppa haen kuɗum anam ami, amge ag daulag human, nai dahil ii dabmedappig. Ag dahil nai ii dooppig.

Jeremaia 36:31

Da nug, nug bekkod amu nuhikkud ehanittak danab laa, ag nau heppig amunu, nau hak amunu da ag bu madakkul. Da Jehoiakim aɗi dilagppa, danab ah Jerusalem daatteb, amu Juda danab ah ele, da uug naunab digdig ahilagppa hekkulnu ami amu, uug amu oh, da heppi, ag aakku bekkulag. Ag dahil nai dooglagnu uun ii dooppig amunu, da anam aakku hekkul.’ ” Yawe Nug anam aum.

Jeremaia 42:21

Ag anam aeg, da hei, Yawe Nug ag aɗi hekkulagnu aum, da amu oh ag amelagppa ami, amge ⌊da iikku anidttem⌋ ag Yawe, ahilag Kayak, Nug ag aɗi hekkulagnu ab, da appi, ag dooglagnu da amelppa aum amu, ag amu dim lamidkkulagnu uuppig. Ag ii hemana.

Jeremaia 44:16

“Na, ‘Da Yawe oɗe awen, iikku ag amelagppa madittem,’ ana, nai ig amenigppa mattie doomut amu, ig daunig humat, nai amu ii doomta.

Jeremaia 5:21

‘O Juda danab ah, ag dabmak tutukku iittappa oitteb. Ag kaaka oitteb. Ag amelag ele, amge ag aɗi keeke ii anidtteb. Ag daulag ele, amge ag nai ii dootteb,’ ” awa aum.

Jeremaia 5:3

Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

Jeremaia 7:24

Da anam ag amelagppa ami, amge ag dahil nai ii dooppig; ag daulag human nai doon, elele ii dabmedappig. Iitta. Ag da oɗel dim lamidmananu dabmak ahilag ɠagattag eppe, ag oolagppa ahilag dabmak nau atten dayom amu, ag amu dim lamidppig. Ag da ii dim lamiɗppig. Iitta. Ag gomelag da meɗan goppig.

Jeremaia 7:26

Amge Israel ag dahil nai ii dooppig; ag daulag human, nai doon, elele ii dabmedappig. Ag da oɗel dim lamidmananu dabmak ahilag ɠagattag eppe, ag mamelkad aɗi dilag eheɗ hak eɗidna, eheɗ huan heegeg uɗie, gemu ele hetteb.” Yawe Nug da amelppa Israel dilagnu anam aum.

Jeremaia 8:5

Anam amunu aɗinu Juda danab ah ag ib eheɗ aon gonana, ag eɗun, dahilppa uɗiglagnu uutteb? Ao, aɗinu Jerusalem danab ah ag hanhan da dimeɗona kayak hambuppuak laala dim lamadna, ag eɗun, dahilppa uɗiglagnu uun, ii uɗitteb? Ag hambuppuak kayak aɗualadna, uuattak uun autna aotteb. Ag eɗun, dahilppa uɗiaknu uun, ii uɗitteb.

Esekiel 14:5

Da Israel danab ah oh, ag da uuiɗna, kayak hambuppuak dim lamadtteb amu, ag dabmak amu uun, eɗun daib dim lamiɗkkulagnu, da anam hekkul,’ awa atte.

Esekiel 3:7

Da Israel danab ah, da na ahilagppa meitti gottem, amge ag dahil nai dooglagnu uutteb amunu, ag nahip nai ii doomna. Aɗinu? Israel danab ah oh ⌊bia⌋ ag dabmak ahilag am ɠagattag eppom daatte. Ag hib guitta qak danab ah.

Esekiel 5:6

Amge Jerusalem danab ah ag nau henana, ag dahil ɗo iɗu iɗunu nai tappaeg neum. Wan laappan danab ah ag ele dahil ɗo iɗu iɗu tappaeg nette, amge Jerusalem danab ah ag amu huana, laa oh eɗattak hetteb. Aɗinu? Jerusalem danab ah ag dahil ɗo iɗu iɗu uun, dim ii lamittegeg uɗie, gemu ele anamib hetteb,” awa atte.

Daniel 9:5

Na anam hettem, amge ig, Israel, ig hipunin hemut. Ig kobol kaliak hemut. Ig nau hetata, ig nahip nai tappaut ne, ig nahip ɗo, nahip haknunab anak ele dimettamut.

Hosea 4:16

Israel danab ah ag oɗe dim lamidmananu dabmak ahilag ɠagattag eppom daatte. Ag makau balat laa oɗe dim lamittaknu uua, nuhig dabmak ɠagattag eppe daatte bia daatteb amunu, Yawe Nug ag aɗi keeke ag bau ena daaglagnu madakkunu elele iitta. O gadon, danab nug sipsip gaiɗ hibguitta ii hette ee medette, ena daakkunu elele, amge Yawe Nug amubia Israel dilag anambia hekkunu elele iitta.

Sepanaia 3:2

Jerusalem danab ah ag ulum nai laa oɗeppa aoglagnu uun autna aotteb. Ao, laa nug daulag batebeb, ag nai nuhig ii doomna; uuglag. Jerusalemnu danab ah ag Yawenu oolagppa genab ii dootteb. Ag ahilag Kayak ii dim lamidtteb.

Sekaraia 1:4

Ag mamelkad aɗi heppig bia aib heppig. Haen amuppan propet ag appig. Yawe Nukka Ɠagattag Oh Ele Nug inam atte. ‘Ag ahilag eheɗ hak digdig uun dimettan, aib baula heppig, aon appig, amge ag mamelkad aɗi ag dahil nai amu dooglagnu uuppig; ag ii dabmedappig,’ ” awa atte.

Matyu 13:15

Aɗinu? Danab ah imu ag oolag ɠagattag eppom. Ag daulagppa dooglagnu nakokib elele. Ag amelag heeg amuhak daatte. Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag.” Aisaia nug anam yom.

Aposel 7:51

Aria, Israel ag am tappe nak danab, ag oolag, daulag ele am ituak, iitta aɗi danab bia amunu, ag mamelkad aɗi heppig amubia, ag hanhan Kayak Ouɗi dimedatteb.

Aposel 7:57

Nug anam a, ag doona, ag huanaknab enana, daulag itun, ag oh ahan qaiqaɗ wana, Stiven aɗappig.

Hibru 12:25

Amunu ag dabmeig! Ag aib daulag itun, Kayak nai maditte qeppeg neum. Anukka wan imuppa Sinai appa amu, Kayak Nug nai ɠagattag danab amelagppa aum, amge ag nuhig nai tappaeg neum. Ag tappaeg neum amunu, ag ahilag hipuninnu nob nau qe-eɗidna gokkulagnu elele iitta daappig. Gemu Kayak Nug hab aabppa dayaya, nai ɠagattag ig megatte amunu, ig Nug dimettata, ig oolta hipunin ihinignu nob nau qe-eɗidkkunignu elelete? Iittanab!