Sekaraia 11:5 - Nobonob Baibel

⁵ Danab ag sipsip amu ⌊sipsip mamelkad dilagppanu, enub danab laanu men doɗoppa, nuhig daakkunu⌋ daden metteb ele ag daden mewona, ag ⌊laa⌋ baalag otaɗadna ⌊latteb⌋, amge ag bu ii aotteb. ⌊Enub⌋ danab ag sipsip amu ⌊ahilag men doɗoppa aoppig amu,⌋ ag aon meeg, laa daden meeg, enub danab ag men doɗo okkai aon, ag anen anen, ‘Ig Yawe onig humatu. Da enub danab bemi daattem!’ atteb. Sipsip amunu gumak danab ele ag ena ii atognoadtteb; ag ele aqadna ⌊latteb⌋. ⌊Aakku ib ewam amuppa sipsip ameg amuppa daatteb, ag nauhak aotteb.⌋

Sekaraia 11:5 ပူးပေါင်းရင်းမြစ်များ

2 King 4:1

Amu ah laa, gamu nug propet huu ameg laa, nug amuppa daya mauhom, danab amu qappu amu, nug Elisa gumitta uɗia, nug inam amegppa aum. “Danab okkai, danab dahil nug am nahip maɗi nid, nug mauhom. Na doottem, nug haen oh Yawenu ebehi oh bodoetta le mettom. Amge gemu danab nug lon mekke, eɗut ii mettamut ele aokkunu hette, amge da men doɗo iitta. Nug nid dahilaɗ aɗit amu diiata ukka heeb, nuhig begbeg maɗi nid daaglahnu uɗiom,” awa aum.

Nehemaia 5:8

da anuqak danab, Juda dilag ehanittak anuqak danab ele amelagppa ami. “Ig lainkad laa, ag am Juda danab ah, ag daɗeknab daaeg, laa heeg, iitta aɗi laa ag ahilkad maɗi nid daaglagnu daden maadppig amu, ig ahilagppan eɗut diignignu ahilkad okkai men doɗo mattaut heeg, ig maɗi nid maɗi ah ele amu ag aɗualadppig ele laala aakku eɗut diimut. Ig men doɗo amu haknu elele aɗat anidmut amu, ig anam hemut. Amge ag anuqak danab, ag Juda dilag ehanittak anuqak danab okkai ele, ag eheɗ henana, ag ig uɗat okkai amu eɗuta hekkunignu hetteb. Ag heeg, maɗi nid daaglagnu gotteb, ig laa men doɗo epput, ag eɗun uɗiglagnu daatte,” awe ami. Da nai amuppa yaalatti, ag oɗelag qamutna daappig. Ag nai laa iitta.

Jeremaia 2:3

Ag Israel ag dahilnu tituanak daappig. Ag ee tatam oɗutte dahilnab daatte, ag amubia daappig. Laa mana mettak danab iitta, nug baekkudppa ele iitta, nug ee bau dahilnab amu latte dayeb, nug beɗuppa aab ele daatte, amubia aun nug Israel eheɗ hattom, nug beɗuppa aab ele dayeye, uug naunab nuhigppa te, padal meum.’ Da Yawe, da anam aakku attem,” awa aum.

Jeremaia 50:7

Ahilag kekeɗ ag anadna, ag doɗ nau sipsip qa latte, amubia ag eheɗ hadappig. Kekeɗ ag amu henana, ag appig. ‘Israel ag Yawe, ahilag ehanittak genab, Israel mamelkad aɗi dilag keeke ena bekkunu dabmak aɗa oiyaknu diig ele, ag nuhigppa hipunin heppig amunu, “Ig Israel eheɗ hadattem amu, ig beɗunigppa amunu aab laa iitta,” ’ ” aon appig.

Esekiel 34:10

Naɗi Yawe Nug inam atte. “Da dahilad sipsip gumak danab dilagnu, da ahilag hak amunu da eheɗ doyeye ool ii madattem. Ag eheɗ hetteb, eheɗ hak amu ag beɗulagppa daatte amunu, da ag bu madakkul. Da heppi, ag sipsip gumak danab ag sipsip dilagppa keeke aon, beɗulag ehanidtteb amu, ag amu tuɗidna hemananu ag baula dahilad sipsip gumak danab ii daamna. Da sipsip dahilad ehanatten heppi, sipsip ag danab nau amu eppelagppa ii daamna. Gumak danab nau amu ag baula dahilad sipsip dilag ag, ‘Ihinig ee,’ dabmenana, ii aqan lattamna,” awa atte.

Esekiel 34:21

Ag sipsip ɠagattag ele ag laa ɠagattag elele iitta duttunadna ehalattegeg laih watteb, qeqeɗilagppa ele laa gai-iitta yaalattegeg, uma gona daatteb.

Esekiel 34:6

Anam daye, dahilad sipsip ag qauko okkaippa, qauko nakok okkaippa ele mauhnoak oippig. Ag matatun wan ohppa gona daaegeg, laa nug anatta, eɗua diiadkkunu ii mattialattom.’ ” Yawe Nug anam awa atte.

Hosea 12:8

Israel ag enaen mena, akka binalag mena, ag atteb. “Ig am enunig okkai ele, ig keeke kuɗumnab aomut! Ig enunig naɗi ele, amge laa nug ig hipunin aɗitai hetat aomut akkunu elele iitta,” aon atteb. ⌊Amge amuam genab iitta.⌋

Hosea 12:9

Yawe atte. “Da am Yawe, da ag Israel, da ahilag Kayak. Da ag Isipnu diien, omalatti beppig, amge da geha heppi, ag eɗun, anukka ag daadppig bia, ag pehppa baula daaglag.

Amos 2:6

Yawe Nug inam atte. “Israel danab ag hipunin kuɗum heppig amunu, da ool nauhtte. Da ool nauhtte amunu, da bu madakkul. Da oppoɗi bak dahil heppi, iitta ii mema. Hipunin laa ag hetteb am, ag genab tutukku hak danab aɗualadna, genab tutukku hak danab ag laa dilag maɗi nid daaglagnu maatteg, laa ag silwa men doɗoppa daden metteb. Ao, Israel ag daɗek danab aɗualadna, daɗek danab ag laa dilag maɗi nid daaglagnu maatteg, laa ag baeg gaɗappa, men doɗo iittappa, baeg gaɗappaib daden metteb.

Matyu 23:13

O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag Kayaknu ɗo maɗoɗnu od danab ah amelagppa maitteb. Ag akka amu ag amuppa ii notteb. Am danab ah ag amuppa nokkulagnu hetteb amu, ag ippulag oo netteb.

Jon 10:1

Jesus Nug nai amu mattia mala, Nug nai imu ele mattiom. “Da genabnab genab ag amelagppa attem. Danab laa nug sipsipnu aɗ odppa ii notte, nug aɗ leta notte ele, danab amu nug am yab danab, amu yab danab naunab ele.

Jon 16:2

Danab ag Juda dilag nai doyak lag ooppanu lamadkkulag. Ge, dimppa haen beeb, ag ag aqappeg mauhppeppeg, ‘Ig Kayaknu uɗat ena hettem,’ aon akkulag.

2 Pita 2:3

Ippunittak danab hambuppuak amu ag men doɗo baubau awaknu hik aqebeb, ag geha ippunittak kobol genab iitta, ahilag dabmakppanu aakkuib ag ippunadnana, men doɗo aoglagnu hekkulag, amge Kayak Nug ameg ii amuhe niitte. Iitta. Nug ag nob nau madakkunu meum daatte; ag ii eɗidmana.

Revelesen 18:13

Aria, laa sinamon, spais, kalu danab ile muttuɗig enanag bette, mir, prankinsens, wain, olip goɗen, wit, wit kalu enanag, amu makau, sipsip, hos karis ele, begbeg maɗi nid ele. Keeke amu oh amu aab okkai amunu danab ag baula daden ii memana.

Revelesen 3:17

Na nai inam madittem. ‘Da enul ele. Da keeke kuɗum ele daattem. Da keeke laanu tutu mak iitta.’ Amge iitta. Na uug naunabppa daattem; na danab ag nahipnu oolag dookkunu elelenab daattem; na daɗek daattem; na amen gaɗuak daattem; amu na bam iitta ele daattem. Na nakka na anam daattem, amge na amu ii doottem,