Sam 53:6 - Nobonob Baibel

⁶ Da Kayak, Nug Sion Qaukoppa daatte amu, da Nug nuhikkud danab ah, Israel, Nug ag ehanatteb, ag padal ii memananu ool naɗi daatte! Ao, Kayak Nug nuhikkud danab ah, Jakop buɗuppud, Nug ag ehanatteb, ag eɗun ena daanna, ag gamag ahak doyeg! Ge, Israel danab ah ag gamag aheg!

Sam 53:6 ပူးပေါင်းရင်းမြစ်များ

Esra 3:11

Ag tena daan, ag Yawenu binag maknu ahi laa ettanna, ahi amunu eɗua ettaknu nai-kores imu baubau edappig. “Yawe Nug enaib dayaya, enaib hette. Israelnu amu, nuhig oo mauhaknab kobol hanhan alet daatte.” Lewi buɗubppan mana mettak danab, Lewi buɗubppan mana mettak danab iitta ele, ag anam heeg, Israel danab ah laa oh ag Yawe laug ukkunu men meeg ukke, mena malappig anidppig amunu, ag Yawe binag mekkulagnu ewak baag okkai, huanak laippu heppig.

Nehemaia 12:43

Kayak Nug he, ag gamag ahak huanaknab dooppig amunu, ag doɗ kuɗum manadna Kayak medappig. Danab ag gamag ahak okkainab doyeg, ah, nid naunau ele, ag ele oolag gamag ahom. Ag oh oolag gamag ahe, Jerusalem appa daanna, heegeg oqotti amuam uma ukke dooppig.

Job 42:10

Amu Job nug laikkud ewam dilagnu unuqitta male, Yawe Nug Job ehanitte, nug eɗua, keekenu elelenab baula dayom. Yawe he, Job tatam doɗ keeke, gane dayom amu, gemu nug amu eɗittak, kuɗumnab ele dayom. Anukka aɗi doɗ keeke, laippu dayom amu, gemu aɗit daapiɗ.

Sam 14:7

Da Yawe, Nug Sion Qaukoppa daatte amu, da Nug nuhikkud danab ah, Israel, Nug ag ehanatteb, ag padal ii memananu ool naɗi daatte! Ao, Yawe Nug nuhikkud danab ah, Jakop buɗuppud, Nug ag ehanatteb, ag eɗun ena daanna, ag gamalag ahaɗ! Ge, Israel danab ah ag gamag aheg!

Sam 50:2

Sion, nuhig neekkak am qa oppiaawak ele. Kayak Nug Sion appa dayeye, nuhig amahlak appanu aha, aben ohppa ukka amahaltte.

Sam 85:1

O Yawe, na nahip wannu hena autna aome. Ao, na hee, Israel danab ah ig eɗut ena daattem.

Prowerb 28:1

Nau hak danab ag auntai laa ii lamattegeg, haen amuppa ele ag baɗan, oolna gotteb; amge genab tutukku hak danab ag laion bau bia, ag ɠagattag daatteb.

Aisaia 12:6

O danab ah Sion daatteb, Israel dilag Kayak Oppiaawak Ele, Nug nuhig ɠagattag okkaippa ag ehanatta, atognoadtte amu, Nug ag oolagppa daatte amunu, ag baalag okkaippa enan, ag gamag ahakppa ele ahi etteg!

Aisaia 14:32

Amu haen Pilistia dilag nai awa ukkak danab ag uɗin, amunu ig oɗ megappeg, ig aɗi amelagppa akkunig? Ig geha ahilag oɗmak inam nob mekkunig, “Yawe Nug he, Sion nug eɗua ɠagattag daatte amunu, danab o ah nuhig aun nug uug maokku, nug ukka, Sion ta, nug padal mak eɗitteb ena dayaknu aben amuppa ena daakku.” Ig anam akkunig.

Jeremaia 30:18

Amu Yawe Nug inam atte. “Da Jakop buɗub, da ahilagnu ool doyeb, ool matten ehanadppi, ag eɗun, ag wanelagppa ag laulkad eɗun bappaladna daaglag. Aab okkai Jerusalem am nauhakib daakku, amge ag eɗun, nuhig kinipan ameg hume takppa, appa ag aab eɗun bappaidkkulag. Ag aab bappaidna, ag kingnu lag enanagnab nuhig abenppa eɗun bappaidppeg daakku.

Jeremaia 31:23

Yawe Nukka Ɠagattag Oh Ele, Israel dilag Kayak, Nug inam atte. “Da heppi, Juda danab ah ag eɗun, ahilag wanppa uɗiona, ag Juda wanppa, aab laala eleppa daanna, ag Yawenu mettid lag Jerusalem ooppa qaukoppa daattenu amu, ag inam akkulag. ‘Yawe Nug qauko nuhignu tituanak daatte, Nug laug genab tutukku hak kobol inak ele qauko amuppa daatte, Nug qauko, lag amu ele itatteb, anam dayeɗ!’ aon akkulag.

Joel 3:1

Yawe Nug atte. “Anam amunu, doyeg! Haen amuppa da heppi, Juda danab ah ag eɗun uɗin Jerusalem, amu Juda wanppa laih laih ele daaglag.

Lewitikas 26:17

Da ag dimadappi, ahilag kekeɗ ag eɗadkkulag. Geha laa ag Israel, ag ahilagnu nau ninig ele dootteb amu, ag ag gumadppeg, laa nug ag ii lamadkku, me ag qaiettan oolkkulag.

Lewitikas 26:36

Am aun aɗi ag ii mauhkkulag, ag bau daan, ag gona ahilkad kekeɗ dilag wanppa daaglag amu, da heppi, ag baɗak okkai dooglag. Ag am appa daappeg, ulah ad uɗug duttunebeb, oqotti obob dooglag bia doon, ag oolna gokkulag. Ag am ban danab laa, ag qep elabppa lamatte oolna goppig bia oolkkulag. Auntai laa ag ii lamadkku, me ag oolna gona, nena qekkulag.

Amos 9:14

Da heppi, dahilad danab ah ag wan laalappa gona, diia ukka laih me dayak danab ah daaglag amu, ag eɗun, ahilag wanppa uɗin daaglag. Ag aab okkai kekeɗ loppaɗppeg nauhak daaglag bappaidna, aguppa daaglag. Ag grep dad eppan, ag wain aon lakkulag. Ag dad eppan, ee appanu aon lakkulag.