Sam 4:1 - Nobonob Baibel

¹ O dahil Kayak, na am genab tutukku hak kobol aakkuib hettem. Anam amu, haen da na oninppa ettem, na nob meɗakkutnu ool daatte. Haen uug nau iutte amu, na dahilnu oot gai-iitta doon, oot meɗan ehaniɗna heppe, uug iitta mekkunu da oɗelppa aokkutnu oɗ medattem.

Sam 4:1 ပူးပေါင်းရင်းမြစ်များ

Job 36:16

Anam amunu, Kayak Nug na uug nau daattemppanu gemu ehanidkkunu hette. Ao, Nug ehanitteb, na enanag, uug iitta daakkutnu hette. Am genab, Nug ehanitteb, na eɗun ena daan, na nahip balalppa daan, ee digdig enanag amuppa aon lakkutnu hette.

Sam 11:7

Aɗinu? Yawe Nug genab tutukku hak kobolib hette. Ao, Nug genab tutukku hak kobolnu oo mauhtte. Ge, aun aɗi ag kobol tutukku hetteb, ag geha Nug iɗu anidkkulag.

Sam 116:16

O Yawe, imuam genabnab, da am nahip maɗi nid laa. Ao, da am nahip maɗi nid. Da am ah laa nahip uɗat heum ele amu, da nug bekka. Na da keeke nau hippaliɗeg daami, na amuppan uhuqiɗe, ena daattem.

Sam 116:6

Yawe Nug laa ag gai-iitta daatteb ehanadtte. Haen da uug kuɗum kukuatte daaiyi amu, Yawe Nug da ehaniɗe, da padal ii memi.

Sam 119:132

Na laa ag nahipnu oolag mauhe, na oot ag madattem, amubia na dahilnu dabmena, dahilnu oot gai-iitta doon oot meɗan ehaniɗkkutnu oɗ medattem.

Sam 143:2

Auntai laa na noomppa hibaitta, “Da genab tutukku hak danab daattem,” akkunu elele? Iitta amunu, na da, nahip maɗi nid, na da nahip hettoɗiakppa ii meiɗmananu oɗ medattem.

Sam 17:6

O Kayak, na da oɗelppa aon ehaniɗttem amunu, da na unuqidttem. Anam amu, da unuqidppippi, na daut human dookkutnu oɗ medattem.

Sam 22:1

O dahil Kayak, O dahil Kayak, na aɗinu da uuiɗmenu diig appe dookkulnu, na dahilppanu uma wana qagaiettakppa daapanu ii ehaniɗttemnu diig appe dookkulnu, amu na dahil gayak ii doottemnu diig ele appe dookkulnu oɗ medattem.

Sam 24:5

Aun aɗi ag anam hetteb ele amu, ag geha Yawenu itittak ena aoglag. Ao, Kayak, Nug ag padal memananu ehanittak ahilag daatte amu, Nug ahilagnu, “Ag am genab tutukku hak danab,” dookku.

Sam 25:16

O Yawe, da bael laippu dayeye, uug okkai doottem amunu, na neekkiɗna, dahilnu oot bodoetteb enanag maɗoɗ ele hekkutnu oɗ medattem.

Sam 31:8

Na da uuiɗe, da dahil kekeɗ eppegppa ii wami. Iitta. Na awiɗna, aben okkai enanagppa meiɗe daami.

Sam 41:12

Dahil dabmak oiyak ele am tutukkuib amunu, na hee, da bau daye, nagattoppa hanhan wain daakkulnu elele.

Sam 42:1

Dia laa nug lenu baag diie, baag qaɗaietta auta awe, nug le antta lakkunu lenag mattia auta autanab aotte amu, O Kayak, anamib, da na anidkkulnu ool daya auta autanab aotte.

Sam 45:1

Da dabmak enanagnab awewe, da ool huananab gamag ahatte! Ao, da kingnu nai ena ena madikkul. Ge, da lemaɗul am danab laanu pen, nai ena ena yaaladtte, amubia daatte. Da yaakkulnu iitta, amge da oɗelppa madikkul.

Sam 56:1

O Kayak, na dahilnu oot gai-iitta doon oot meɗan ehaniɗkkutnu unuqidttem. Aɗinu? Kekeɗ daup ag da huana lamiɗtteb. Yo, kekeɗ dahil ag deɗ oh amun tuqan ele banel uɗina, iuglagnu hetteb.

Sam 57:1

O Kayak, da nahip-ppanu padal mak eɗitteb ena dayaknu ehanittak aottem amunu, na dahilnu oot gai-iitta doon oot meɗan ehaniɗkkutnu oɗ medattem. Ao, na dahilnu oot gai-iitta doon oot meɗan ehaniɗkkutnu unuqidttem. Da padal mepanu, matuk nag anig haug waappa daatte bia, da na guguitten daakkul. Ao, da anam hebippi ukkeb ukkeb, uug naunab amu oh qe-eɗilkkulag.

Sam 6:1

O Yawe, na oot nauhebeb, daul ii batamnanu unuqidttem. Ao, na oppoɗin beeb, na toliɗna, bu ii meɗamnanu oɗ medattem.

Sam 67:1

O Kayak, wan imuppan wan anen anen oh dilag danab ah oh ag na oot attem daatte dooglagnu, ag nahip ehanitte, padal ii mak kobol ele anidkkulagnu amu, na ihinignu oot bodoette enanag maɗoɗ ele hena, itigkkutnu ool daatte. Ao, na ig ele daagnignu, na oot ihinignu ena daakkunu ool hette. Sila.

Sam 76:1

Juda danab ah ag Kayak dootteb. Yo, Nug onig am Israel ippa okkai daatte.

Aisaia 45:24

‘Yawe Nugib genab tutukku hak kobol diig daatte. Nugib am ɠagattag ele,’ ” aon akkulag. Amu laa oh ag Yawenu oo nauhak okkai dootteb, ag amu uɗalag nekku.

Jeremaia 23:6

Haen nug king dayebeb amu, Juda ag geha padal memananu ehanittak aon daaglag. Ao, Israel danab ah ag baɗak iittappa daaglag. Geha ag king amu onig am inam ataɗkkulag. ‘Yawe Nug Kobol Genab Tutukku, Nug Amunu Diig Daatte.’ ” Yawe Nug anam atte.

Habakuk 3:19

Naɗi Yawe Nug da ɠagattag meɗatte. Ao, Nug ehaniɗe, da dia qaietta gotte bia oittem. Nug he, da qaukoppa elele oikkulnu elele daattem. Unuqittak imuam danab nug danab ah noolagppa daya, ahi edatte ehanidkkunu. Laa ag musik haknu keeke muɗi ele qeegeg, danab ah ag ahi ettaglagnu daatte.

1 Korint 1:30

Kayak Nug aakku he, ag Kristus Jesusnu daatteb. Kristus Nug am doyak dabmak ena, ig Kayaknu aottemnu diig. Gemu ig genab tutukku hak danab daattem, ig oppiaawak ele daattem, amu ig gemu qagaiettakppanu eɗua uhuqak aomut daattem, amu oh Kristus, nuhigppaib beppig daatteb.

2 Korint 1:10

Ig mauhkkunignab doomut, amge Kayak Nug ig eɗua awikkom; butti ele anamib hekku. Ag ahilag unuqittakppa ehanigppeppeg, Kayak Nug geha ig eɗua awikkeb, ig ena daagnignu nuhignu oonigppa genab doottem. Anam heppeg amu, geha danab ah kuɗum laa ag ele unuqidppeg, Kayak Nug ig ehanikkeb, aria geha danab ah kuɗum ag ihinignu dabmenana, Kayak Nug keeke hette amunu Nug amegppa, “Ena heme,” aon akkulag.

2 Korint 1:8

O lailad, ag imu dooglagnu oonig daatte. Asia taliliakppa ihinigppa uug beppig amu, uug amu okkainab, ig tonikka, ɠagattag ihinig oh eɗittom. Ig anam anidta, dabmak ihinigppa amu ig, “Geha ig mauhkkunig,” anam doomut.

1 Samuel 17:37

Yawe Nug da ehaniɗe, laion, bea ele da ii iupiɗ, amubia nug da ehaniɗkku amunu, Pilistia amu nug da ii iuma,” awa aum. Dawit nug anam a, Saul nug nob ma aum. “Amu ena. Na goppe, Yawe Nug na ele goya, Nug na ehanidkkunu ool naɗi daatte,” awa aum.