Prowerb 4:16 - Nobonob Baibel

¹⁶ Aɗinu? Nau hak danab ag eheɗ laa ii heppig dayeb amu, ag niiglagnu elele iitta daaeg ukke, ag eheɗ hewona niitteb. Ao, danab amu ag eheɗ ii heeg, danab laa ii na qeum dayeb amu, ag paha ii niimna.

Prowerb 4:16 ပူးပေါင်းရင်းမြစ်များ

Sam 36:3

Nau hak danab ag hanhan nai nau, hambuppuak ele maditteb. Ag doyak dabmak ena ele, am kobol ena ele ii dim lamidtteb.

Sam 36:4

Tuqan niiak haenppa, ag kobol nau attemnab hekkulagnu dabmak aonna, niiak elele ii niitteb. Ag hak ena laa iinab hetteb. Ag kobol nau aakkuib hetteb.

Prowerb 1:16

Na ag ele oh ii gomananu diig am inam. Ag pahaettak hipunin hekkulagnu hetteb. Ao, ag laa qeppeg mauhkkunu oolag huana hette.

Prowerb 2:14

Danab amu ag eheɗ hekkulagnu enanagnab dootteb. Ao, ag eheɗ haknu tiigppa dayak kobol dim lamidna, eheɗ haknu gamag ahak dootteb.

Prowerb 4:15

Na ib amu oɗeppa aib wame. Na aib danab amu ippulag mattan gome. Ao, na ib amu dimettan, ib laa aon, mattan ukke!

Aisaia 57:20

Amu nau hak danab ⌊ag maɗoɗ amubia ele ii daatteb. Iitta.⌋ Ag yu toedakkunu elele iitta, ag amubia daatteb. Ag yu heehe, lekkoh nau, dubuttid ele wanppa bette, ag amubia hetteb.

Jeremaia 9:4

Yawe Nug atte. “Juda ag lailkad dilagnu dabmeig! Ao, ag baelkadppa dilagnu oolagppa genab aib dooppig! Aɗinu ag anam hekkulag? Ag ohnab ag hambuppuak danab ah daatteb. Ge, ag lailkad oh ag nug onilkad nauhkkunu nai nau atteb.

Maika 2:1

Danab ag hipunin hekkulagnu maittak aotteb, ahilagnu am gadonnab gadon. Ao, ag abenppa niina, ag eheɗ hekkulagnu dabmakppa ib maditteb, ahilagnu am gadonnab gadon. Ag keeke hekkulagnu ɠagattag ele amunu, ag tuqan eheɗ hekkulagnu dabmenana, wagɗe buttua ag ahan, eheɗ amu hetteb.

Maika 7:3

Wan imuppan danab ag eppelag laih laih ohppa eheɗ hekkulagnu doon autna aotteb. Danab okkai ag laa ag ag lokkumakppa eheɗ haknu ehanittak madappeg, ib amuppaib ag ehanadkkulagnu atteb. Ao, epeɗiak danab ag lokkumakppa eheɗ haknu ehanittak aon, ag laa ehanittak amu mettom amegppa, “Na am tutukku heme; na eheɗ laa ii heme,” hambuppun atteb. Genab, danab ag ɠagattag okkai ele ag aɗi keeke aoglagnu oolag hette, ag aoglagnu anan heeg ukke, aakku aotteb. Danab okkai amu oh ag eheɗ anam hekkulagnu nai qakkan oitteb.

Luk 22:66

Anam amu, aam beebe, Juda dilag hettoɗiak okkai onig Sanhidrennu danab, mana mettak danab okkai amu ɗo mehuqak danab ele ag uɗin qagmeeg, ag Jesus aon gona, ag noolagppa meeg dayom.

Jon 18:28

Matuk gaye amu buttuanab ag Jesus Kaiapas toppanu aona, gawananu lag enanagnabppa goppig, amge ag akka ag gawana laug ooppa ii noppig. Iitta. Ag Pasowanu Hobulnu ee lakkulagnu oolag he, ag oolagppa, “Gawana imu nug Juda iitta, ihinig ɗoppa ig nug laug ooppa gokkunig dayeb, ig Kayak ele ouqa dayaknu elele iitta daagnig. Ig anam daatta amu, ig Pasowanu Hobulnu ee ele lakkunignu elele iitta daagnig amunu, ig lag ooppa ii gomata,” anana, lag ooppa ii goppig.

Aposel 24:7

amge ban daup ikki anuqak Lisias, nug aha wagai ma, nug danab imu ig eppenigppanu awom.

2 Pita 2:14

Hambuppuak ippunittak danab amu ag ewau pakkua gappai hak kobol hekkulagnu ah oh neekkadnana daatteb, ag hipunin hekkulagnu oolag ahakib daatte. Ag kobol amu henana, laa ag kobol tutukku dim lamittaknu bodoettak amu eeɗatteh, ag hipunin hetteb. Ag baubau awaknu hik aqeeqe men doɗo awaknu kobol amu, ag amu doon autna aotteb. Ag eheɗ laa awaknu anak waappa daanna oitteb.