Prowerb 22:4 - Nobonob Baibel

⁴ Danab nug nukka onig qe nette, nug Yawenu ebehi oh bodoetta le mak ele dootte amu; nug en, binag, bau dayak ele aokkunu ib aakku matultte.

Prowerb 22:4 ပူးပေါင်းရင်းမြစ်များ

Prowerb 19:23

Yawenu ebehi oh bodoetta le mak am omaitteb bauklel daakkut; aun nug Yawenu ebehi oh bodoetta le mak dootte, nug maɗoɗppa daatte, nug Kayak eppegppan bu mettakppa ii daama.

Prowerb 21:20

Danab doyak dabmak ena ele, ag ee ena keeke ag laulagppa meeg daatte; amge danab nug Kayak dab-ii-maama ii dim lamidtte ele, nug ee keeke nug aotte ele, nug paha he iitta mette.

Prowerb 21:21

Aun laa nug genab tutukku hak kobol, oo mauhaknab kobol ele dim lamidtte; nug bau dayak, keekenu elelenab dayak, aria binag okkai ele aɗalatta oitte.

Prowerb 22:3

Eheɗ bemanu dabmak awa dabmak amu dim lamittak danab nug uug bette antta, nug dekkaɗa, aben uug ii bekku ele, nug appa gotte; amge danab ag doyak ii awak ele, ag hettebib tuɗidna gonana, guittak aotteb.

Prowerb 22:5

Ib laa, nau hak danab nug dim lamitta oitte amu, ib amuam ib uud keeke qaun ele, o ib laa pelem mak ele, am ib amubia daatte; amge laa nug nukka, nug nuhig oiyaknu dabmetta atognotte amu, nug nau hak danab dilag awaitta, uma daatte.

Prowerb 29:23

Danab nug dada hette, nuhig hak amu he, nug na qette; amge danab nug oo bodoettakppa daatte amu, nug binag aotte.

Prowerb 3:16

Doyak dabmak ena ele am ah laa nug keeke laa paniattaknu eppegppa aɗatte bia. Nug eppeg naɗiap-ppa amu, nug maɗ kuɗumnu bau dayak aɗatte; Ao, nug eppeg nanehppa amu, nug enub, binag ele aɗatte.

Prowerb 31:30

Laa noolagppaib oo bodoette, enanag, maɗoɗ ele hak, amuam keeke genab iitta; iɗu tuqak ele am haen oh ii daama; amge ah aun nug Yawenu ebehi oh bodoetta le mette amu, nug binag aokkuoitte.

Aisaia 33:6

Nugib ig ena daagnignu ukkunab daatte. Doyak dabmak ena ele, doyak, amu padal mematanu ehanittak ele Nug eppegppa huanak, ig aognignu daatte. Danab nug amu aokkun amu, nug Yawenu ebehi oh bodoetta le meeb oiyaɗ! Nug amu hekku amu, nug amu oh aokku.

Aisaia 57:15

Aɗinu? Yawe, Nug attannab dayaya, keeke laa ohnab eɗadtte, Nug hanhan daatte, nug onig am oppiaawak ele amu, Nug atte. “Da aben attan, aben oppiaawak ele, da amuppa daattem, amge da danab aun laa, nug nukka nuhignu, ‘Da am danab ena, onil okkai ele,’ ii dabmette, nug nukka nug onig qe nette amu, da danab amu ele daattep. Da danab nug nukka nug onig qe nette amu, da nug ooppa ɠagattag qedakkulnu, da anam hettem. Ao, da danab nug nukka nuhignu, ‘Da am danab ena, onil okkai ele,’ ii dabmette amu, da nug nuhig ouɗippa ɠagattag qedakkulnu, da anam hettem.

Daniel 4:36

Kayak he, dahil dabmak eɗua, danab dilag dabmak, kaaka iitta, baula aakku dayom, haen amu dimppa Babilon eɗua, binag amahlak oppiaawak ele daakkunu, Nug he, da binal am ɠagattag okkai naɗi dahil ele eɗuya, dahilppa daapiɗ. Laa tatam ulum meɗappig, Babilon dilag okkai ele ag eɗun uɗin, da eɗuen ahilag king daakkulnu aeg, da sia kingppa eɗuen tein dayeye, da anukka binal okkai ele daami, amge dimppa da binal okkainab ele daami.

Matyu 6:33

Amge tatam ag Kayaknu ɗo maɗoɗnu, amu genab tutukku kobol ele hekkulagnu anuqak dooppeg, geha Nug keeke amu oh ele ag madakku.

1 Timoti 4:8

Aɗinu? Beɗunig ehanittaknu kobol hak amu nakok ehanigtte, amge genab tutukku hak danab dayaknu ehanittaknu kobol hak, am keeke ohnu ehanigtte. Amuam ig gemu bau daattem amunu ehanigtte, amu bauklel dimppa aognig, amunu ele ehanigtte.

Jems 4:10

Ag akka ag Naɗi noobppa ag onilag qeppeg neeb oiyeg! Ag anam daanna oiglag amu, Naɗi Nug ag humatta attan maadkku.

Jems 4:6

Anam daatte amunu, Kayak Nug ehanittak okkai hamu mettak, Nug amu megatte. Diig amunu Kayak naippa, nai inam daatte. “Kayak Nug dada danab ippulag oo nette, amge danab ag akka onilag qeeg nette ele, Nug ahilagnu ii helo bia me, Nug ag ehanadtte.”