Nehemaia 9:31 - Nobonob Baibel

³¹ Amge O Kayak, na oo bodoette enanag maɗoɗ ele hak kobol dim lamidna, na danab ah dilagnu oo gai-iitta doya oo matta ehanittak kobol ele dim lamidttem amunu, na ig mamenkad aɗi dilagnu oot gai-iitta doon oot mattan ehanadna, na hee, ag ii padal meppig; na ag ii uuatte hamu daappig.

Nehemaia 9:31 ပူးပေါင်းရင်းမြစ်များ

2 King 13:23

Amge Yawe Nug Israel dilagnu oo bodoette enanag maɗoɗ ele hak kobol dim lamitta, Nug ahilagnu ele oo bodoetta le meum. Nug nug tituana nai qakkak anukka Abraham, Aisak, Jakop ele heppig amu, Nug amu dabmeum amunu, Nug Israel ehanatta, Nug ag eheɗ ii hatta, Israel Nug noobppa daatteb amu lamatteb, laih gokkulagnu Nug oo ii dayom. Iitta. Tatam, gemu ⌊nai imu yaak haenppa⌋ ele, anamib.

2 Stori 30:9

Aɗinu? Ag eɗun, Yawe waappa daaglag dayeb, Nug heeb, kekeɗ ag Juda danab ah laa diin goppig ele amu, ag ahilagnu oo bodoetta le mak doon, ag heppeg, laa amu ag eɗun, wan imuppa uɗiglag. Yawe, ahilag Kayak, Nug oo bodoette enanag maɗoɗ ele hak kobol dim lamitta, Nug oo gai-iitta, oo metta, ehanittak kobol ele hanhan hette amunu, Nug anam hekku. Ag eɗun, Nug dim lamidkkulag dayeb amu, Nug ag ii geɗadma.” Pasppa yaak anam dayom.

Nehemaia 9:17

Ag nahip nai dooglagnu uuppig. Ag hak kuɗum laa, danab hekkunu elele iitta, hak amu na ag noolagppa heme anidppig ele, ag hak amu daulag atiom. Ag na oɗen dim lamidmananu dabmak ahilag ɠagattag eppe henan, ag nahip nai tappaeg neene, ag danab laa nug ag noolag awa diieb, ag eɗun, Isip wanppa gona, eɗun ahilkad begbeg maɗi nid daaglagnu tituanppig. Ag amu oh heppig, amge na Kayak, ⌊na am kayak laa bia iitta. Iitta!⌋ Na danab hipunin hette ele, ⌊nug oo eɗueb,⌋ na hipunin amu uhuqna medattem. Na oo bodoette enanag maɗoɗ ele hak kobol dim lamidttem. Na danab ah dilagnu oot bodoetta, le mette. Na oot paha ii nauhtte. Nahip oo mauhaknab kobol am amba, leta nette. Na anam daattem amunu, na ig mamenkad aɗi amu, na ag ii uuadme.

Nehemaia 9:19

Kayak, na nahipad danab ah dilagnu oo bodoetta le mak kobol dim lamidna, atu taɗakppa danab ah amu uuatte, hamu ii oippig. Amunppa na hee, lombig teppu ele attan takppa ag ib ippuanattette, tuqan aab ewak okkai attan tak ib atten aon gokkulagnu ippuanattom.

Aisaia 48:9

Ag Juda ag eheɗ amu hetteb, amge da, da onilnu dabmak anuqak awewe, da ag Juda, da ag paha eheɗ ii hadattem. Ao, danab ah ag dahil hak pehettak doon, ag hak amu binag mekkulag amu, ag binag mak amu hekkulagnu da dabmak anuqak awewe, da bu elele paha ii madattem. Da ahilag haknu nob elele mattalom amu da hadappi, ag iitta melob, amge da amu bemanu da paha nob anam ii madattem.

Jeremaia 4:27

Keeke anam bekku. Aɗinu? Yawe Nug inam awa atte. “Dahil oo nauhak huanaknab am heeb, wan oh nauhkku, amge da heppi, wan am nauha auta autanab ii aoma.

Jeremaia 5:10

Da bu madakkul. Da ahilag kekeɗ amelagppa ahilagnu inam akkul. ‘Juda danab ah imu ag da, Yawe, ag dahiladnab ii daatteb. Ag am dahil grep dad bia, amu danab ag grep dad heeg nauhtte bia, ag Juda danab ah dilag kekeɗ, ag Juda aqeg! Ao, danab ag muɗi grep ebekkud elabnab meppig qiin diitteb, amubia ag kekeɗ ag Juda danab ah aqeg! Amge ag heppeg, aib iitta meum,’ awe akkul.

Jeremaia 5:18

Dahilad danab ah, ahilagppa anam bekku, amge da heppi, haen amuppa kekeɗ ag ag ohnab aqappeg ii mauhmana.

Gayak Nai 3:22

Keeke ena bekkunu dabmak aɗa oiyak amu, amuam Yawe Nug ihinignu oo mauhaknab dootte amunu, ig padal meta autta ii aottem. Ge, oo gai-iitta doya oo metta ehanittak kobol nuhig ii iitta mette, diig amunu ig padal meta, autta ii aottem.

Daniel 9:9

Ig na dimettat, nahip nai tappaut neum. Ig na, Yawe, na ihinig Kayak, ig na oɗen ii dim lamidmut. Ig nahip ɗo, na nahip propet, ag nahip maɗi nid amu, na ag oɗelagppa ɗo amu ig mekkaeg, ig amu dabmetata, ii dim lamidmut, amge O Naɗi, na ihinig Kayak, na danab dilagnu oot gai-iitta doon oot mattan ehanadttem. Na danab ah dilag hipunin uhuqna madattem.

Duteronomi 4:31

Yawe, ahilag Kayak, Nug ag ehanadkku diig am, Nug am danab ah dilagnu oo gai-iitta doya oo matta ehanadtte. Nug ag ii uuadma; Nug ag ii hatteb nauhmana; Nug he, Nug ag mamelkad aɗi ele nug tituana nai qakkak heppig, Nug nug tituana nai qakkak amunu nai genab bekkunu nai ɠagattag qetta aum amu, Nug amu daug ii atima.