Nehemaia 13:14 - Nobonob Baibel

¹⁴ O Kayak dahil, da uɗat amu aakku anam hemi amunu, na dahilnu dabmekkutnu oɗ medattem. Da na laut ena daakkunu, appa uɗat na haknu ɗo meme amu, laa ag uɗat nahip amu pehettak, elele hekkulagnu elele daaglagnu ele uɗat heinne daami amu, na amu obippe, ii hemibia daamanu oɗ medattem.

Nehemaia 13:14 ပူးပေါင်းရင်းမြစ်များ

2 King 20:3

“O Yawe, na dahil hak imu dabmekkutnu oɗ medattem. Da na noomppa oo metta ii uuak kobol dim lamitte oiyeye, da meul ohppa na dim lamidkkulnu heine oiyeye, da amenppa kobol aɗi aɗi am ena, da amu dim lamidmi.” Hesekaia nug anam unuqittowa, nug huana gayom.

1 Stori 29:3

Amge da amu aakkuib Kayak ii medapa. Iitta. Ig Kayak, Nug dahil Kayak, ig nuhig mettid lag hekkunignu ool huanaknab daatte amunu, da dahilnab gol, silwa laa ele danab uɗat amu hekkulag, ag amuppa Kayaknu mettid lag nuhignu tituanak daakku, ag lag amu hekkulagnu Kayak medattem.

2 Stori 24:16

Jehoiada nug Israel dilagppa kobol ena ena ha, Nug Kayak tutukku dim lamitta, nug Kayaknu mettid lag ele dabmetta auta autanab awom amunu, nug mauhe, ag nug Dawitnu Aab, ag appa kingnu boumak abenppa nug boumppig.

Esra 7:20

Amu aɗi keeke laala na Juda dilag mana mettak danab ag amu nahip Kayaknu mettid lagppa uɗat mettaglagnunab anidna, na madakkutnu, na men doɗo da, king, dahil enppanu aon, daden mena madakkutnu elele.

Esra 7:24

Laa ele amu, ag le Yupretis heqo laihnu gumak danab ag doyeg! Ag heppeg, Juda dilag Lewi buɗubppan mana mettak danab, Lewi buɗubppan mana mettak danab iitta, ahiettak danab ah, od gumak danab, Kayak laugppan maɗi nid ele amu, ag heppeg, danab ah amu ag takis, am en takis bia ele ag ii mattamna. Ag am ahilag takis ag mattaglagnu akkulagnu elele iitta.

Esra 7:27

Yawe, ig mamenkad aɗi dilag Kayak, Nug he, king nug Yawe laug Jerusalem appa daatte, nug lag amu binag mekkunu anam dabmeum amunu, ig Kayak binag metu.

Nehemaia 13:22

Da amu hewoya, da Lewi buɗubppan mana mettak danab iitta, ag Kayak ele ouqa dayaknu elele daaglagnu beɗulag, oolag ele bappaidna gona, od gumak uɗat hekkulagnunab ag amelagppa ami. Ag amu heppeg, Sabat deɗ, deɗ amuam Kayaknu tituanak daatte, deɗ amu anam daakkunu anam hemi. O Kayak dahil, uɗat dahil amunu ele na dahilnu dabmekkutnu oɗ medattem. Na oo mauhaknab kobol nahip dim lamidna, dahilnu oot gai-iitta doon oot meɗan ehaniɗkkutnu oɗ medattem.

Nehemaia 13:31

Laa ele amu, da danab ah ag deɗ deɗppa aab aon meppeg, mana mettak danab ag aab amuppa qaɗabppa doɗ manadna, Kayak mettaglagnu ib bappaidmi. Laa amu, da danab ah ag dattanu ee tatam oɗutte ele aon uɗin, Kayaknu mettid lakka mekkulagnu ele ib bappaidmi. O Kayak dahil, na dahilnu dabmena, ehaniɗkkutnu oɗ medattem.

Nehemaia 5:19

O Kayak dahil, da danab ah imu ib anamppa ehanadkkulnu aakku hemi amunu, na dahilnu dabmenana, ena aniɗkkutnu oɗ medattem.

Aisaia 38:3

“O Yawe, na dahil hak imu dabmekkutnu oɗ medattem. Da na noomppa oo metta ii uuak kobol dim lamitte oiyeye, da meul ohppa na dim lamidkkulnu heine oiyeye, da amenppa kobol aɗi aɗi am ena, da amu dim lamidmi.” Hesekaia nug anam unuqittowa, nug huana gayom.

Hibru 6:10

Kayak Nug epeɗiak eheɗ laa ii hette amunu, ag uɗat nuhig heppig, ag nuhignu oolag mauhtte dabmenana, nuhikkud danab ah oppiaawak ele ehanattegeg uɗie gemu ele anam hetteb amu, Nug amu oh daug ii atima.

Revelesen 3:5

Aun laa nug ban eɗidkku amu, nug danab ag lamen hakkab tagappig ele, nug ag oolagppa ele daya, lamen hakkab ele tagakku. Da nug onig buk laa, amuam buk onig Bauklel Awe Onig Yaaknu Buk, buk amuppanu ii obipa. Iitta! Da nug da Mamel noobppa, amu engel noolagppa ele nug onig miag akkul.