Matyu 5:7 - Nobonob Baibel

⁷ Danab aun aɗi ag danab laa dilagnu oo gai-iitta doon oolag mattan ehanadtteb ele amu, ag itittak ena aoppig daatteb. Aɗinu? Dimppa ag eheɗppa daaglag amu, Kayak Nug oo gai-iitta doya oo matta ehanadkku.

Matyu 5:7 ပူးပေါင်းရင်းမြစ်များ

2 Samuel 17:28

Ag uɗin, ag heɗig, tappiɗ, waa keeke, aon uɗippig. Ag keeke amu aon uɗin, ag wit aeg, bali aeg, wit ganuɗak ele, ee aeg manik ele, bin, am bin diig laa onig lentil, uppuh leppu, huh ɠagattag eppom, sipsip, amu sis makau huhppa hak ele aon uɗippig. Am Dawit aɗi ag atu taɗakppa oiyegeg, beɗulag bodoette, enug aqe, le baalag ele diiom dooppig amunu, ag ee amu Dawit aɗi ag lakkulagnu aon uɗippig.

2 Samuel 22:26

O Yawe, danab ag oo metta ii uuak kobol dim lamidtteb amu, na amu dilag, na oo metta ii uuak kobol dim lamidttem ag ippunadttem. Ao, danab ag oolagppa nahip neekkakppa, kaliak iitta ele daatteb amu, na amu dilag, na ootppa kaliak laa iitta daattem ag ippunadttem.

Sam 112:4

Haen genab tutukku hak danab ag gatatuppa daatteb amu, amahlak ahilagppa amahaltte. Yo, kobol amuam oo bodoette enanag maɗoɗ ele hak danab, oo bodoetta le mak danab, amu genab tutukku hak danab ele, ahilagppa bette.

Sam 112:9

Genab tutukku hak danab nug daɗek danab huana ehanadtte. Ao, nuhig genab tutukku hak kobol am hanhan alet daatte. Ge, nug danab laa noolagppa binag okkai ele daakku.

Sam 18:25

O Yawe, danab ag oo metta ii uuak kobol dim lamidtteb amu, na amu dilag, na oo metta ii uuak kobol dim lamidttem ag ippunadttem. Ao, danab ag oolagppa nahip neekkakppa kaliak laa iitta ele daatteb amu, na amu dilag, na ootppa kaliak laa iitta ele daattem ag ippunadttem.

Sam 37:26

Genab tutukku hak danab, ag haen oh keeke mettaknu oolag qak iitta henana, ag ele lon ena, eɗua mettaknu uug iitta laa dilagppa hetteb; Ag ahilkad nid ele, ag itittak ena laa madatteb.

Prowerb 11:17

Danab nug oo bodoettak danab daatte amu, nug nukka, nug ehanidtte; amge danab nug laa guittak madakkunu uug laa ii dootte amu, nug nukka nug uug he, beɗuppa bette.

Prowerb 11:25

Keeke mettaknu oo qak iitta danab, nug am keekenu elelenab daakku. Ao, danab nug laa ehanadtte, nug geha ehanittak aokku.

Prowerb 14:21

Danab nug mudippan laippunu ena iinab dootte amu, nug aakku hipunin hette; amge danab nug daɗek ehanadtte, nug itittak ena awom daatte.

Prowerb 19:17

Aun nug daɗek ehanadtte, amuppa nug Yawe keeke lon mettom bia hette; Yawe Nug nug heumnu nob ena eɗua medakku.

Aisaia 57:1

Genab tutukku hak danab ag mauhegeg, laa ag amu diignu ii dabmetteb. Ao, laa ag Yawenu oo metta ii uuak kobol dim lamidtteb ele amu, laa ag diia ugekke, danab ah laa ag amu anidna, ag amu diignu doyak tutukku ii aotteb. Kobol amunu diig am, Yawe Nug genab tutukku hak danab amu, ag uug naunab ahilag haenppa bekku, ag uug amu anidmananu Nug ag diia gotte.

Daniel 4:27

Anam aakku amunu, O king, da ulum nai laa medappi, na nai amu aon dim lamidkkutnu oɗ medattem. Na hipunin baula aib heme, amu na aɗi hettem amu, na hanhan kobol genab tutukkuib he! Ao, na eheɗ laa aib heme, amu na danab ah, ag laa eppelagppa daaeg, eheɗ hadatteb ele, na amu dilagnu oo gai-iitta doya, oo metta, ehanattak kobol he! Na amu hekkut dayeb amu, Kayak Nug ehanitteb, na tuɗidna, maɗoɗ ele daakkuttai.” Daniel nug King Nebukatnesar amegppa anam aum.

Hosea 1:6

Amu Gomer nug baula oo ele daya, nid ah laa menuom. Menue amu, Yawe Nug Hosea amegppa aum. “Na nug onig Lo Ruhamah ataɗe! Aɗinu? Da geha Israel danab ah dilagnu oo bodoetta le mak kobol ii dim lamidpa; da genab heppi, ag bu naunab aoglag.

Hosea 2:1

Anam beeb, deɗ amuppa amu, ag Israel ag anen anen ag geha, ag Israel laa oh anen anen dilagnu, “Da awal,” o “Da amal,” o “Da apal,” o “Da appinal,” o “Da makkel,” anana, ag anen anen, “Da amu oh dilagnu da ool mauhtte,” akkulag.

Hosea 2:23

Geha da dahilad danab ah ag ahilag wanppa dahilnu bappalatten maadkkul. Geha da laa da amelagppa, ‘Da ahilagnu oo bodoetta le mak kobol ii dim lamidpa,’ ami amu, da ahilagnu oo bodoetta le mak kobol hein ippuanattette, laa da ag amelagppa ‘Ag am danab ah dahilad iitta,’ ami amu, da ag amelagppa, ‘Ag am dahilad danab ah,’ appi, ag da amelppa dahilnu, ‘Na am ihinig Kayak,’ akkulag.” Kayak Nug anam aakku atte.

Maika 6:8

Amu oh am iitta. Yawe Nug na aun daattem, Nug na kobol ena oh ippunitta malom. Nug na attem hekkutnu ippunittom? Amu inam; na nai doya mala hettoɗia epeɗia elele mettak kobol tutukku dim lamidna, na laa dilagnu oo gai-iitta doya oo metta ehanittak kobol ele hena, na nakka na onin qeppe neeb, na nahip Kayak, na Nug ele oiyeɗ! Nug na amu hekkutnu oo daatte.

Mak 11:25

Laa ele amu, haen ag ⌊anen anen, ag⌋ unuqidnana, ag Mamelag, hab aabppa daatte, Nug ahilag hipunin uhuqa madakkunu amu, danab laa nug ahilagnu eheɗ heum dayeb, ag hipunin amu uhuqna metteg!

Luk 6:35

Amge ag kekeɗ ahilkadnu ag oolag mauhaɗ! Amu ele ag ahilagppa kobol ena heig! Danab ag ahilagnu lon aoglagnu appeg amu matteg! Mattona, dimppa ag ahilagppa keeke amu eɗun aoglagnu aib dabmeppig. Ag anam heppeg amu, nob ena ahilag am okkai daakku. Ag Kayak Attannab Laa Oh Eɗattak, ag Nug bekkod daaglag. Aɗinu? Nug nuhig oo doyakppa danab laala, ag danab nau, danab nuhignu dab-ii-metteb ele, ag akka ahilagib dabmetteb ele, Nug amu dilag ele keeke ena madatte.

Rom 11:30

Anukka ag iitta aɗi ag Kayak oɗe tappaeg neum, amu gemu Israel ag Kayak oɗe tappaeg nette, amuppa Kayak Nug ag iitta aɗi, Israel iitta, ag iitta aɗi Nug ahilagnu oo gai-iitta doya oo matta ehanadtte.

1 Korint 7:25

Aria, oɗmak ahilag laanu amu, danab ah ag ewau matulak ii aoppig ele, ahilagnu amu Naɗi Nug ɗo laa da akkulnu ii ippuniɗom. Da dahil dabmak madittem, amge Naɗi Nug dahilnu oo gai-iitta doya oo meɗa ehaniɗa, Nug da tituaniɗom amunu, nai da attem imu ag amunu oolagppa genab dooglagnu am elele.

2 Korint 4:1

Kayak Nug ihinignu oo gai-iitta doya oo mekka ehanikka, uɗat imu ig mekkom amunu, ig oo bai noak ii doottem.

Epesus 4:32

Ag lailkad dilagppa oo bodoettak kobol henana, ag oo bodoetta le mak kobol ahilagppa heig! Kayak Nug Kristusnu uɗatppa ahilag hipunin uhuqa mattom, amubia ag nug hipunin uhuqa mettak heig!

Kolosi 3:12

Amu ag am Kayaknu danab, Nug ahilagnu oo mauhe, ag tituanattom daatteb amunu, ag kobol imu dim lamitteg! Ag laa dilagnu oo bodoetta le meeb, ahilagnu oo bodoettak kobol dim lamidna, ag akka ag onilag qeppeg neeb, ag lailkad dilagppa oo bodoetta wagai ii mak kobol dim lamidna, ahilagnu ele oo maɗoɗ kobol heig!

1 Timoti 1:13

Anukka da Kayaknu dabittak nai mattimi. Da danab nuhikkud eheɗ hadattami; da ele beɗuppa tak danab daami, amge Kayak Nug dahilnu oo gai-iitta doya oo meɗa ehaniɗom. Aɗinu? Da Jesusnu oolppa genab ii doyeye, da ool ele ii maittette, da eheɗ hemi.

1 Timoti 1:16

Amge diig imunu Kayak Nug dahilnu oo gai-iitta doya oo meɗa ehaniɗom. Da am hipunin hak danab laa oh eɗattak amunu, Kristus Jesus Nug nuhig dagom kobol oppiaawak ele dahilppa heeb, miag atieb, danab ah ag amu anidna, ag oolag maitteb, ag ele nuhignu oolagppa genab doona, ag bauklel hanhannu aoglagnu dooglag.

Hibru 4:16

Amunu uug haenppa Kayak Nug ihinignu oo gai-iitta doya oo mekka ehanikkunu, Nug ig ehanittak okkai hamu megakkunu amu, ig ii baɗatta, Kayak gumitta gotu!

Hibru 6:10

Kayak Nug epeɗiak eheɗ laa ii hette amunu, ag uɗat nuhig heppig, ag nuhignu oolag mauhtte dabmenana, nuhikkud danab ah oppiaawak ele ehanattegeg uɗie gemu ele anam hetteb amu, Nug amu oh daug ii atima.

Jems 2:13

Aɗinu? Danab laa nug layagnu oo gai-iitta doya oo metta ehanittak kobol ii dim lamidtte, nug layag eheɗ heumnu nob nau medatte, nug nob nau amu medakkunu ii uutte amu, Kayak Nug danab amu hettoɗiakppa nob nau medakku. Amge danab laa nug layagnu oo gai-iitta doya oo metta ehanidtte, nug hipuninnu nob nau ii medatte amu, nug geha hettoɗiakppa nob nau ii aoma. Oo gai-iitta doya oo metta ehanittak kobol am nob mettak kobol eɗidtte!

Jems 3:17

Amge Kayaknu doyak dabmak ena ele amu, doyak dabmak ena ele amuam Kristen danab ag inam oiglagnu ippunigtte. Anuqak amu, ag oppiak ele daan oiglag. Amu dim lamittak ag maɗoɗ ikki daan, ag lailkad dilagnu oo bodoettak doon, dagom danab daan, lailkad dilagnu oolag gai-iitta doon oolag mattan ehanadna autnanab aona, ag ena hak kobol ambak hena, ag danab oh dilagppa kobol laippuib dim lamidna, ag aɗi hetteb amu, ag kobol genabppaib hekkulagnu daatteb.

1 Pita 2:10

Anukka amu, ag Kayaknu danab ah ii daappig, amge gemu ag nuhignab danab ah daatteb. Anukka ag ⌊Jesusnu oolagppa genab ii doon,⌋ ag Kayaknu oo gai-iitta doya oo metta ehanittak kobol waappa ii daan, ⌊ag hipuninnu nob nau aoglagnu daappig,⌋ amge gemu amu, ⌊ag Jesusnu oolagppa genab doon,⌋ ag Kayaknu oo gai-iitta doya oo metta ehanittak kobol waappa daan, ⌊ag nob nau amu aoglagnu ii daatteb⌋.