Matyu 5:29 - Nobonob Baibel

²⁹ Amunu na amen naɗiap he, na hipunin hettem dayeb amu, na amen kehan, maoppe ukkaɗ! Na beɗun laih iitta ele dayebeb, ag na padal mak abenppa ii meidppeg am ena. Na beɗun oh ena dayebeb, padal mak abenppa gokkut am ena iitta.

Matyu 5:29 ပူးပေါင်းရင်းမြစ်များ

Job 20:13

Danab ee ubuhi ele paha lae nekkunu dabmak nakok laa iinab aotte, nug ee oɗeppa aɗe daatte amu, amubia nau hak danab nug eheɗ hekkunu anam bia doya hette.

Matyu 10:28

Laa ag beɗulag aakkuib qekkulagnu elele, ag dottolag qekkulagnu elele iitta amu, ag amu dilag aib baɗappig. Iitta. Laa nug beɗulag, dottolag ele oh heeb, padal mak abenppa padal mekkulahnu elele amu, ag nuhignu baɗeg!

Matyu 11:6

Amu danab aun nug nuhig ooppa genab doyak dahilnu ii paɗe nette amu, nug itittak ena awom daatte,” awa aum.

Matyu 16:26

Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku? Nug amuppa bauklel hanhannu daden mekku? Iittanab!

Matyu 17:27

amge ag oolag nauhmanu, Pita na gona, le amegppa huk ena, kakai tatam aokkut amu oɗe haqana, na men doɗo anidkkut. Anidna aon, ihinih takis amuppa hekkut,” awa aum.

Matyu 19:12

Am genab, danab laala ag beɗulagppa kobol laala daatte amunu, ag ah ii diitteb. Laala ag anilkad oolagppa dona mattoi daatteb. Laa danab ag heeg mattoi daatteb. Laa ag Kayaknu ɗo maɗoɗnu uɗatnu hena, beɗulag hagakka aona, ah ii aotteb. Anam daatte amunu, amu laa nug nai amu dim lamidkkunu elele dootte am nug dim lamidkku,” awa aum.

Matyu 23:15

O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Wan laappanu danab nug Juda kobol aokkunu ag uɗat okkainab, hik aqeeqe hetteb. Heegeg, danab amu nug Juda kobol awa, nug ahilag kobol nau kuɗum ag hetteb, amu eɗittak haaha, ag padal maknu ibppa daatteb, amge nug am padal maknu ibppanab daatte.

Matyu 23:33

Ag danab nau, mat nau bia! Kayak Nug ag hettoɗiakppa maatteb, ag padal mekkulag. Ag attem hena amu ii anidmana?

Matyu 5:22

Amge da ag amelagppa attem. Danab laa nug layagnu oo nauhkku dayeb, nug hettoɗiakppa daakku. Danab laa nug layag amegppa, ‘Na am genabnab danab kaaka,’ akku amu, nug hettoɗiak okkai onig Sanhidren, appa daakku. Amge laa nug layag amegppa, ‘Na am genabnab genab danab nau,’ akku amu, nug mua laa oh eɗattak, padal mak abenppa gokkunu hette.

Matyu 5:30

O na eppen naɗiap he, na hipunin hettem dayeb amu, na okkulna, maoppe ukkaɗ! Na beɗun laih iitta ele dayebeb, na padal mak abenppa ii meidppeg am ena. Na beɗun oh ena dayebeb, padal mak abenppa gokkut am ena iitta.

Mak 8:36

Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku?

Luk 12:5

Amge ag aun baɗidkkulagnu amu, da ag ippunadkkul. Laa nug danab qeeb mauheb, buɗieb padal mak abenppa gokkunu ɠagattag ele amu, ag nuhignu baɗeg! Ao, da ag amelagppa attem, ag nuhignu baɗeg!

Rom 6:6

Amu ig doottem, ig oonig alag, ihinig oiyak alag amuppa beum ele, nuhig ɠagattag ig duttunigmanu, ig ele hipuninnu begbeg maɗi nid ii daamtanu, Kristus ad emaitakppa mauhom, haen amuppa ihinig oiyak alag am ele appa Nug ele mauhom.

Rom 8:13

Aɗinu? Ag oolag alag dim lamidkkulag amu, ag mauhkkulag, amge ag Kayak Ouɗinu ɠagattagppa beɗunu kobol dimettan, ii dim lamidkkulag dayeb, ag bau daaglag.

1 Korint 9:27

Genab, da Nai Ena danab laaib dooglagnu mehuqen, dimppa da hipunin hein nein qepanu, da dakka da beɗul qei ne, dabmak da ool unuqagppa daatte aakkuib da beɗul dim lamidtte.

Galesia 5:24

Kristus Jesusnu danab oh ag oolag alag, nuhig beɗunu kobol amu oo ahak nau kobol ele oh ad emaitakppa atulppig daatteb.

Kolosi 3:5

Amunu ag wan imunu kobol, kobol amu ag oolagppa uɗat henana daatteb ele amu, ag kobol amu oh aqappeg iitta meig! Amu da kobol imunu attem; gappai kobol, kobol dubuttid ele, kobol naunu oo ahe ittag doyak, amu baubau awaknu hik qak kobol, amuam kayak hambuppuak binag mak kobol laa aakku, kobol amu ele.