Matyu 3:7 - Nobonob Baibel

⁷ Layattette amu, ɗo gumak danab-Parasia, ɗo gumak danab-Sadyusi ele ag layattak aoglagnu kuɗum ukkaeg, Jon nug ag anatta, nug ag amelagppa inam aum. “Ag am danab nau, mat nau bia. Aun nug nau aomnanu nai ag amelagppa mattie, ag Kayaknu oppoɗi bak uɗitte ele ii aqamanu uɗippig?

Matyu 3:7 ပူးပေါင်းရင်းမြစ်များ

Genesis 3:15

Amu da heppi, na ah ele gamalahppa hanhan kekeɗ daakku. Ele amu, ah buɗub, amu na buɗun ele gamagppa kekeɗ daakku. Amu ah buɗub laa aha, na ikkin tappeb toɗeb, na danab amu baeg bittub heppe hinqekku,” awa aum.

Prowerb 28:4

Laa ag Kayaknu ɗo dim lamittaknu uutteb, ag nau hak danab onilag okkai madatteb; amge aun aɗi ag Kayaknu ɗo dabmettan dim lamidtteb ele, ag nau hak danab eheɗ hemanu wagai metteb.

Aisaia 59:5

Mat nau oppalkad makkuleg, mat nau betteb, amubia Israel danab ag heeg, kobol eheɗ kuɗum betteb. Danab laa nug mat nau amu oppa laa lakkunu haaha, oppa oppate, mat nau ba emale mauhtte. Ge, laa nug oppa amu oppate, mat nau aakku bette. Danab amu ag goɗim nug nuhig teɗ bappaidtte, amubia danab amu ag hambuppuak nai maditteb.

Jeremaia 51:6

Ag wan laappan danab Babilon daatteb ag, ag Babilon uun ooleg! Ag mauhmananu ag Babilon uun, oolna laih ukkeg! Babilon hipunin heppig, diig amunu ag nauhkkulag. Ag nauhkkulag amunu, ag laa ag appa daappeg, Babilon ag ahilag hipuninnu nob amu aoppeg, ag laa ag ele Babilon beɗulagppa ag nob amu aon nauhmananu, ag appa aib daappig. Babilon danab ah ag hipunin heegeg uɗie, gemu ele heegeg, Yawe Nug eheɗ hak amunu nob tutukku madakkunu haen uɗiom daatte amunu, kekeɗ ag heppeg, Babilon nauhkku.

Jeremaia 6:10

Yawe Nug anam a, da, Jeremaia, da ami. “Da aun amegppa Kayaknu nau aomnanu dabmettak nai appi dookku? Aun nug daug huma dookku. Ag nai dooglagnu uuppig amunu, ag dooglagnu elele iitta. Yawenu nainu amu, ag oolagppa uuaknab dootteb. Ag Yawe nainu gamag ahak nakok laa ii dootteb.

Matyu 12:24

Amge haen ɗo gumak danab-Parasia ag amu doon, ag inam appig. “Umu Nug ouɗi nau ikkilag Belsebub, Nug nuhig ɠagattagppa aakkuib ouɗi nau lamadtte,” aon appig.

Matyu 12:34

Ag danab nau, ag am mat nau bia. Danab ooppa aɗi dabmak ambak niitte, amuib amu oɗeppa ele maditte amunu, ag nau daatteb, ag attemun ag kobol enanu mattiglag?

Matyu 15:12

Haen amuppa nuhikkud ippunittak awak danab ag Jesus gumidna dona appig. “Ɗo gumak danab-Parasia ag nai amu doon, oolag nauhom amu na doottemte?” aon appig.

Matyu 16:1

Deɗ laa ɗo gumak danab-Parasia amu ɗo gumak danab-Sadyusi ele ag Jesus gumidna gona, ag Jesus ma anttak mettanna, Nug Kayak dabmettaknu kobol danab haknu elele iitta laa heeb anidkkulagnu oɗ medappig,

Matyu 16:6

Ag anam gona tewona amu, Jesus Nug ag amelagppa aum. “Ag ɗo gumak danab-Parasia amu ɗo gumak danab-Sadyusi ele dilag yisnu dabmeig!” awa aum.

Matyu 22:15

Jesus Nug nai amu mattia male, ɗo gumak danab-Parasia ag ahan, laih gona, ag attem heppeg, Jesus Nug nai eheɗ laa ab, ib anidna heppeg, ɗo danab Nug aɗaglagnu nai madippig.

Matyu 22:23

Deɗ amuppaib ɗo gumak danab-Sadyusi ag Jesus toppa uɗippig. Danab amu ag, “Danab mauhtteb amu ag eɗun ii hippaidmana,” aon adappig amunu, ag Jesus inam oɗ mettan appig.

Matyu 22:34

Aria, Jesus Nug nai amuppa ɗo gumak danab-Sadyusi oɗelag qamute, ɗo gumak danab-Parasia ag amu doona, ag ⌊Jesus aɗaglagnu ib anidkkulagnu⌋ qagmeppig.

Matyu 23:33

Ag danab nau, mat nau bia! Kayak Nug ag hettoɗiakppa maatteb, ag padal mekkulag. Ag attem hena amu ii anidmana?

Matyu 5:20

Da tutukku ag amelagppa attem. Ahilag genab tutukku hak am ɗo mehuqak danab, ɗo gumak danab-Parasia ele dilag ii eɗadkku dayeb, ag Kayaknu ɗo maɗoɗppa nokkulagnu elele iittanab.

Mak 12:13

Anam amu dimppa ag ɗo gumak danab-Parasia laala, amu Herotnu ehanittak danab oolagppanu ele laala ele maatteg gona, ag Jesus takisnu oɗ medappeg, Nug eheɗ ab, ag Nug aɗaglagnu goppig.

Mak 12:18

Aria, ɗo gumak danab-Sadyusi ag Jesus toppa uɗippig. Danab amu ag, “Danab mauhtteb amu ag eɗun ii hippaidmana,” aon adappig amunu, ag Jesus oɗ mettan appig.

Mak 8:15

Amu Jesus Nug ag amelagppa nau aomanu nai imu aum. “Ag ɗo gumak danab-Parasia amu Herot ele dilag yisnu dabmeig!” awa aum.

Luk 16:14

Amu ɗo gumak danab-Parasia, ag am men doɗonu oolag mauhom amunu, Jesus Nug nai amu oh mattie doona, ag ahan, nuhignu guhuɗittak nai madippig,

Luk 18:11

Amu ɗo gumak danab-Parasia nug hibaitta, attan neekka dayaya, nukka nuhignu unuqitta aum. ‘Kayak, da am danab laala oh bia iitta. Ag am yab danab, eheɗ hak danab, am ewau pakkua gappai hak danab ele. Da am anam iitta, takis awak danab imu hette bia ele iitta amunu, da na amenppa, “Ena heme,” attem.

Luk 7:30

Amge Juda dilag ɗo mehuqak danab amu ɗo gumak danab-Parasia ele ag amu, ag Kayak Nug ib ena ippuanattom amu ag uun dimettan, Jonnu layattak ii aoppig.

Jon 1:24

Anam daye amu, maatteg uɗippig ele ag oolagppanu laala ag ɗo gumak danab-Parasia daappig amu, ag Jon oɗ mettan appig. “Na Kristus iitta, Elaiya iitta, amu propet uɗikkunu daatte ele iitta daattem dayeb amu, na aɗinu danab ah layadttem?” oɗ mettan appig.

Jon 8:44

Ag mamelag am Satan; ag nug bekkod daatteb amunu, ag mamelag oo niitte amu, ag dim lamidkkulagnu wagai metteb. Nug wannu digmak haenppanu danab aqe mauhtteb. Ag mamelag nug doyak diig genabib ii dim lamidtte. Aɗinu? Doyak diig genabib amu nuhigppa ii daatte. Nug hambuppuak nai mattiaya amu, nug nuhig diig aakkuib dim lamidtte. Aɗinu? Nug nai hambuppuak maditte, nug nai hambuppuak mamegnab ele daatte.

Jon 9:40

Ɗo gumak danab-Parasia laa appa Nug gukkuidna daappig ele amu, ag amunu appig. “Ig elete danab amenig gaɗuak?” aon appig.

Aposel 15:5

Aa amu mattieheh, ɗo gumak danab-Parasia dilag huuppan, ag Jesusnu oolagppa genab dooppig ele ag ahan appig. “Kayak anukka gaɗa otaɗaknu ɗo meum niitte amunu, iitta aɗi danab ag Kristen daaglagnu oolag dayeb, ag ele gaɗalkad otaɗkkulagnab. Ele amu ig apput, ag Mosesnu ɗo oh ele dim lamidkkulag,” aon appig.

Aposel 20:31

Amunu ag ⌊nena qemananu⌋ dabmenan dayeg! Ag da maɗ ewam, tuqan, amun ele ag laib laib ag amelagppa hanhan nau aomanu maɗettaknu nai amel leb nak ele matti dooppig amu, ag amu dabmakppa aɗan dayeg!

Aposel 26:5

Ag haen elabnab da aakku dooiɗtteb amunu, ag oolag dayeb, ag da ihinig mettid haknu huu laa, huu amuam gun kuɗumnab, laa oh eɗattak, amuam ɗo gumak danab-Parasia, da huu amunu laa daami akkulagnu elele daatteb.

Aposel 5:17

Ag anam heeg ukke amu, mana mettak ikki danab, nuhikkud ehanittak danab oh, ag am ɗo gumak danab-Sadyusi oolagppanu amu, ag ele, ag totol dilagnu, ihinigppa anam daalon dabmak aɗan daappig.

Rom 1:18

Danab ag hipunin digdig, eheɗ hak digdig ele henana, ag amuppa doyak diig genabib heeg miag atiak ii dayeye, Kayak Nug hab aabppanu heehe, nuhig oppoɗi bak aakku miag atiak daatte.

Rom 5:9

Kristus ig ounig mauha, Nug tiig gokkaɗom amunu, ig ib amuppa genab tutukku hak danab bemut daattem. Aria, ig nau daautut, Kristus ehanikkom dayeb amu, gemu Nug Kayaknu oppoɗi bak, Nug ig amuppanu genabnab genab iite eɗua awigkku? Yo, Nug eɗua awigkku.

1 Tesalonaika 1:10

ag Kayak Bekka Nug hab aabppanu eɗua uɗikkunu haen ameg mettebnu ele maditteb. Nug anukka mauhe, Kayak Nug he, Nug mauhakppanu eɗua hibaittom. Amuam Jesus, Nug dimppanu hipuninnu bu aqak, Kayak eppegppanu uɗitte amu, ig amu aomtanu eɗua awikkom.

Hibru 11:7

Noa nug Kayaknu ooppa genab doyom, amu Kayak Nug keeke laa, Noa nug deɗ laa ii anttom bekkunu nug amegppa nau aomanu nai mattie, Noa nug ebehi oh Kayaknu bodoetta le meum ele amu, nug nuhig nai amu doya, nug baekkudppa ele ena daaglagnu nug uub itom. Ooppa genab doyak nuhig amuppa amu nug danab laa oh, ag oolagppa genab ii dooppig ele, ag eheɗ heppig aakku ippuanatta, ooppa genab doyak amuppa ele nug am genab tutukku hak danab beum.

Hibru 6:18

Aria, gemu keeke aɗit amu aakku daattep; laa am Kayak Nug keeke genab hekkunu nai qakka aum, laa am Nug nuhig nai Nug Nug onigppa ɠagattag qettom. Keeke aɗit amu aa baolikkulahnu elele iitta. Kayak ele hambubukkunu elele iitta. Aria, ig laa, ig Kayak Nug ig gog tak haenppa bauklel mekkeb aognignu dabmak aɗat daat, ameg mettem ele amu, keeke aɗit amu aa ig oonig ɠagattag qedattep.

1 Jon 3:10

Anam amunu, ig kobol imuppa aun nug am Kayak Bekka, aun nug am Kayak Bekka iitta, nug Satan bekka daatte, amu ele doottem. Am inam. Aun nug kobol tutukkuppa ii oitte amu, nug Kayak Bekka iitta. Am laa nug layagnu oo ii mauhtte, nug ele Kayaknu iitta.