Matyu 25:1 - Nobonob Baibel

¹ Haen amuppa Kayaknu ɗo maɗoɗ amu ah makkun eblaih tanig ele, ahilag hak bia daakku. Amu ah makkun amu ag ahilkad lam aon, danab laa ah aokkun heum ele amu, nug ameg meegeg, nug ibppa uɗieye, ag ahan gona, ibppa uɗa tena anidna omalppeg, ah nuhig laugppa gokkulagnu daappig.

Matyu 25:1 ပူးပေါင်းရင်းမြစ်များ

Sam 45:14

Nug nuhig bala enanagnab me dayeye, ag nug omalna, na king, ag nahip-ppa uɗitteb. Nug dimugppa ehanittak ah nuhikkud, ag nug omaleg uɗitteb.

Solomonnu Ahi 1:3

Leppu muttuɗig ena ele na laidttem am muttuɗig enanagnab ele. Ao, laa nug leppu muttuɗig ena ele amu gokkaɗeb, muttuɗig huana okku, am na onin am amubia. Ge, am anam, am diig amunu ah bau na waatad daatteb ele, ag nahipnu oolag mauhtte!

Solomonnu Ahi 5:16

Danab laa nug ee ubuhinab ele lakkunu oo huan hette, amubia da dahil danab ootuqitte, da anamnab doottem; nug iɗu tuqak aakkuib daatte, aɗitai laa nuhignu am nakok nau laa iitta, enanagib. O Jerusalem ah, amuam laa, nug dahilnu oo mauhtte ele, nug da layal.

Solomonnu Ahi 5:8

O Jerusalem ah, da ag laa, nug dahilnu oo mauhtte ele, ag nug anidna, ag nug amegppa dahilnu, “Nug nahipnu oo mauhak huanak doyeye, beɗu gai-iitta meum daatte,” appeg dookkunu wan yaan meɗan, da amelppa ɠagattag akkulagnu ag amelagppa attem.

Aisaia 54:5

Aɗinu ag amu hekkulagnu elele daaglag? Laa Nug ag hattom ele, Nug ag gamulag daatte. Nug onig am Yawe Nukka Ɠagattag Oh Ele. Ao, aɗinu ag amu hekkulagnu elele daaglag? Am, Israel dilag Kayak Oppiaawak Ele, Nug ag Juda, ag laa eppelagppa dayaknu qagaiettakppanu eɗua uhuqak ha madatte. Nug wan oh dilag Kayak daatte.

Daniel 2:44

Baeg wan tabatte, wan aab aɗuppa ewom, aen ele qataqak am king laala ag laippu daaglagnu hekkulag, amge laippunab ii daamna ippunigtte, haen ag amu henan daappeg, haen amuppa Kayak hab attan daatte, Nug ɗo maɗoɗ laa daakkunu heeb, ɗo maɗoɗ amuam hanhan daakku. Ɗo maɗoɗ laa wan atu gumaglagnu ahan, ɗo maɗoɗ amu eɗidna ii aomna. Ɗo maɗoɗ amuam ɗo maɗoɗ oh heeb, iitta mekkulag, amge ɗo maɗoɗ amuam hanhan daakku.

Matyu 13:24

Jesus baula ele keeke danab ag dootteb ii dootteb ele ouaqata ippuanatta, mattia aum. “Kayaknu ɗo maɗoɗ am danab laa, nug wit aeg ena dad okkai nuhigppa tauɗom, amubia daatte.

Matyu 13:31

Jesus Nug anam ana amu Nug keeke danab ag dootteb ii dootteb ele ouaqata ippunittak nai baula ele inam aum. “Kayaknu ɗo maɗoɗ amu mastet aeg, danab laa nug awa, dad nuhigppa eppom bia.

Matyu 13:38

Aria, dad okkai amu wan atu oh ippunigtte. Ee aeg ena amu Kayaknu ɗo maɗoɗnu danab. Aria, gikkiɗah nau amu Satannu danab.

Matyu 13:47

Aria laa amu, Kayaknu ɗo maɗoɗ am uhui ag le amegppa eeg no, kakai digdignu noppig, am amubia.

Matyu 20:1

Aria, Jesus Nug nai tuɗitta aum. “Kayaknu ɗo maɗoɗ am imubia. Danab nug wan okkai ele, nug buttuanab aha, ee oɗiak abenppa maɗi nid nuhig uɗat hekkulagnu anadkkunu ukka, nug laa ag deɗ amuppa uɗat aoglagnu daaegeg anatta, nug ag nuhig grep dadppa uɗat hekkulagnu diiom.

Matyu 22:2

“Kayaknu ɗo maɗoɗ nug am imubia. King laa nug bekka ah aokkunu heehe, danab okkai amu nug ee naɗi heum.

Matyu 25:7

Baag laa anam doona, ah makkun eblaih tanig ele amu ag oh ahan, lam ahilag bappaidppig.

Matyu 3:2

Nug nai mehuqaqa inam aum. “Kayaknu ɗo maɗoɗ aakku miag doum daatte amunu, ag oolag eɗuaɗ!” awa aum.

Matyu 5:16

Amubia ag dahilad daatteb ele, laala ag ahilag kobol ena anidna, ag ag Mamelag, hab attan daatte amu, Nug binag mekkulagnu, ag ahilag amahlak danab amelagppa amahalaɗ!

Matyu 9:15

Ag Jesus amegppa anam appig amu, Jesus Nug aum. “Da am danab nug ah aotte bia. Aria, dahil ippunittak awak danab, ag am da lailad. Amu ig doottem, ewau matulak haen am oo gamag ahak ele amunu, danab nug ah aotte, nug daatte haenppa, nug laikkud ag uug doonna, ee ohnu kud mena daaglagnu am iitta. Ag oolag gamag ahak ele amunu, ag ee ii uumna, ag lakkulag. Anam aakku daatte, amge deɗ laa dimppa ag lailag, ah awom ele amu, nug laih ukkeb, haen amuppa ag oolag uug ele amunu, haen amuppa ag ee ohnu kud mena daaglag. Amu da ami, amubia. Da am danab ah aotte bia. Dahil ippunittak awak danab ag am da lailad bia. Da gemu ag ele daattem amunu, ag ee ohnu kud mena daaglagnu elele iitta. Dimppa da goppi, ag anam hekkulag,” awa aum.

Jon 18:3

Amunu Judas nug Rom dilag ban danab laala, amu daup ag Kayaknu mettid lag gumappig ele, ag oolagppanu mana mettak danab okkai amu ɗo gumak danab-Parasia ele ag laala heeg goppig ele amu, Judas nug ag oh ib ippuanatte, aben amuppa uɗippig. Ag amahlak, hul amu ban haknu keeke ele aon goppig.

Jon 3:29

Amunu amu da am nid baunu kadoi bia. Nid bau nug ah aotte amu, ah amuam nuhigib, amge kadoi nuhig nug layag ah aotte doya, maɗoɗppan gamag ahak dootte. Nid baunu kadoi nug maɗoɗppan gamag ahak amu dootte, amubia da Jesusnu oolppa maɗoɗppan gamag ahak okkainab doottem.

Aposel 20:8

Amu lam kuɗum lag oo attan, ig qagmeta daamut ele, amuppa eoppig.

1 Korint 11:2

Ag hanhan dahil dabmetteb, nai da ag amelagppa attem ele amu, ag tutukku aon aɗatteb amunu, da ag onilag humattem.

2 Korint 11:2

Kayak Nug ig danab ihinignu huana dabmaama, Nug nukka ig nuhignu tituanikkom, amubia da ele ahilagnu anamib dabmettem. Ao, da ah makkun, oiyak nuhig oppiakib, nug mameg danab laanu ah daakkunu nug baeg aɗatte bia, da ag oppiak amubia daabppeg, ag Kristus medakkulnu hettem.

2 Timoti 4:8

amu gemu nob ena da aokkulnu amu, Kayak Nug aakku meum daatte. Nob ena amu Naɗi, Nug danab ah tutukkuib epeɗiadtte ele, Nug eɗua hibaittaknu deɗppa da meɗakku. Amge dakkaib iitta. Aun laa oh ag Nug eɗua uɗikkunu tappaɗidna daatteb ele, Nug ag ele madakku.

Taitus 2:13

Ig anam oitta, ig Jesus eɗua uɗiaknu deɗ okkai amu uɗikkunu dabmak aɗat ameg meta daattem. Deɗ amuppa amu Jesus Kristus, Nug am ihinig Kayak Naɗi, Padal ii maknu ehanittak ihinig ele daatte amu, Nug binag amahlak oppiaawak ele miag atiak uɗikku.

Revelesen 14:4

Danab amu ag ah ele gappai kobolppa ag akka ag dubuttid ii medappig; ag oppiak daatteb. Ag Sipsip Nag aben ohppa gotte amu, ag Nug dim lamidtteb. Amu Kayak Nug danab amu wanppanu danab ah oh oolagppanu hipuninnu qagaiettakppanu eɗua uhuqe, ag ee meu tatam eɗua, ofa Kayak medakkunu daatte, ag amubia ofa Kayak, Sipsip nag ele mataknu daatteb.

Revelesen 19:7

Gemu ig maɗoɗppan gamag ahak doot, binag amahlak oppiaawak metu! Aɗinu? Sipsip Nag Nug nuhig ah aokkunu haen aakku beum, amu ah nuhig nug ha, nug amunu babaittak daatte.

Revelesen 21:2

Anam amu, da aab okkai, am Jerusalem bau Kayaknu tituanak daatte, aab amuam hab aabppa, Kayak toppanu neene anidmi. Nug am ah bau nug danab aokkunu bala mettom, amubia.

Revelesen 21:9

Anam a amu, engel eblaih aɗit ele ag tappiɗ eblaih aɗit ele aɗualadppig, amuppa keeke naunab danab he nauhaknu eblaih aɗit ambak ele, ag oolagppanu laippu laa nug doa, da amelppa aum. “Na do! Da ah makkun bau Sipsip Nag wau ippunidkkul,” awa aum.

Revelesen 4:5

Daaegeg amu sia king ⌊anuqak⌋, amuppanu amemɗi digma amahala ugekke, hakkaɗ diigppa qeeqe, hakkaɗ qa aɗeɗe ele neum. Lam eblaih aɗit ele ag sia king ⌊anuqak⌋ noobppa eonna daappig. Lam amu ag am Kayak Ouɗi, kobol ena oh nuhigppa ambak daatte ele, am Nug ippunigtte.

Revelesen 8:10

Aria, engel ebqak 3 nug trampet nuhig iwale amu hoɗoppai okkai laa, hul diditte bia ewawa, habppanu auta na qeum. Hoɗoppai amuam le okkai gotteppa, amu le qeppuɗia bak ele, le amunu wanppan ameg laippuppa na qe; aɗit laappa am iitta.