Matyu 24:31 - Nobonob Baibel

³¹ Uɗien, trampet gayebeb, da dahilad engel heppi, ag gona, danab ah dahilad da tituanadmi amu aben oh wanppanu, habppanu ele qagmaadna, diin uɗiglag.

Matyu 24:31 ပူးပေါင်းရင်းမြစ်များ

Sam 22:27

Wan oh geha Yawe doona, Nug dim lamidkkulag. Yo, danab ah wan ohppan ag Nug noobppa dup nokkulag.

Sam 67:7

Kayak Nug itittak ena ig mekkom ⌊amunu,⌋ wanppan danab ah oh ag nuhignu ebehilag oh bodoetteb le mekkunu ool daatte!

Sam 81:3

Kalam bau bette haenppa, ag digmena, hobul hekkulagnu, ag trampet iwaleg! Ao, ig hobul kalam kunum bette haenppa hettem ele amu, haen amuppa ele iwaleg!

Eksodas 19:16

Moses nug anam mattie ukke, deɗ ebqak ewam amuppa, buttua hakkaɗ qeeqe, amemɗi awewe, buttuɗai teppu ele qauko igippa daye, trampet iwalak huanak ele dayom. Anam daye, danab ah oh aabppa daappig amu, ag eheɗnab baɗana, beɗulag hahaɗom.

Aisaia 11:12

Naɗi Nug pilak laa, pilak amuam ad elab attan ukkak galaeg daatte, Nug pilak laa amubia galeb daakku. Nug pilak amu anam meeb, pilak amuam danab ah wan atu ohppanu ag anidna, ⌊pilak amuam Naɗi Nug nuhikkud danab ah ag diia ukka laih me dayak danab ah daatteb, Nug ag eɗua diikku ippunadkku⌋. Nug anam ha, Nug Israel danab ah ag diia ukka laih me dayak danab ah wan laalappa daatteb amu, Nug ag eɗua diikku. Ao, Nug Juda danab ah tamtam gona, aabaab daatteb, Nug ag eɗua diikku. Nug nuhikkud danab ah gona aben ohppanab daatteb eɗua diikku.

Aisaia 13:5

Ban danab huu amu ag miagnu ii uɗitteb. Iitta! Ag wan laa umanabnu uɗitteb. Yawe Nug ag onilagppa eum; ag nuhig lat, lat doɗo keeke bia daatteb. Nug Babilonnu oppoɗi bak nau doya, Nug ban danab huu umanabnu amu ag Yawe, nuhig oppoɗi baknu nob nau mettak ⌊Babilon⌋ medappeg, geha ⌊Babilon⌋ eheɗ nau aokkunu onilagppa eum. ⌊Yawe Nug ag onilagppa e, ag uɗitteb, amu oqotti okkai doyak diig am aakku.⌋” Nug anam awa akku.

Aisaia 27:13

Ge, danab trampet okkai iwale, danab dotteb, amubia Yawe Nug heeb, laa kekeɗ ag lamatteg, Asiria wanppa gona qettoɗna daatteb, laa Isip wanppa gona qettoɗna daatteb ele amu, ag appanu eɗun uɗin, Jerusalem appa qaukoppa, qauko amuam Kayaknu tituanak daatte, ag appa Yawe noobppa dup nona Nug binag mekkulag.

Aisaia 42:10

Ag wan atu ohppan danab ah ag Yawenu ahi bau etteg! Ao, ag wan batakppanu ag ahi ettanna, ag Yawe binag meig! Ag danab ag uubppa yu qaɗeppa oitteb, yuppanu keeke oh ele, ag anam heig! Ag danab ah wan miagnu, wan umanu ele, ag oh Yawe binag maknu ahi bau laa etteg!

Aisaia 43:6

Da danab ah ag yawalti uɗitteppanu daatteb, da ag amelagppa, ‘Ag dahilad danab ah paɗadppeg, ag eɗun wanelagppa ukkeg!’ appi dooglag. Amu danab ah yau uɗitteppanu daatteb amu, da ag amelagppa, ‘Ag danab ah dahilad aib aɗualadppig!’ appi dooglag. Da wan ohppa, dahilad danab ah aguppa daatteb ele, da amu amelagppa ag dahilad danab ah omaladppeg, ag eɗun, ahilag wanppa uɗiglagnu appi dooglag.

Aisaia 45:22

Amu ag danab ah oh wan atu ohnu ag padal memananu ag da dim lamiɗna, ehanittak da eppelppanu aweg! Aɗinu? Da aakkuib Kayak daattem. Kayak laal ii daatte.

Aisaia 49:18

Ag Juda, ag amelag human, laih laih neegna, ag bekkalkad oh ag qagmena, eɗun ahilagppa uɗippeg anadkkulag! Da Yawe, da attem. Da genab bau daattem, genab amubia amu, nid ahilkad ag ah nug bala enanag me, beɗunu neekkak enanag daatte amu, nid ahilkad ag ahilagppa amubia daaglag. Ao, ah nug danab aokkunu haaha, beɗu bappaidtte amu, nid naunau ag ahilagppa bala anam bia daaglag.

Aisaia 60:4

Juda danab ah, ag amelag human, laih laih neekkeg! Ahilkad laa ag qagmena, ag gukkuadna uɗiglag. Ag bekkalkad umanabnu uɗiglag. Laa ag aɗelkad eppelagppa mawadna uɗiglag.

Daniel 7:2

Nug inam yom. “Da, Daniel, da tuqan tulegleg laa antten, tulegleg amuppa da neekki ukke, ulah waɗele, am yau, yawalti, qaban, kaɗag ele, ag oh uɗin iwalegeg, yu naɗi koɗkoɗ eheɗ qeum.

Sekaraia 14:5

Oolnu noak amuam ukka, Asal batakku amunu, ag Juda danab ah ⌊diia ii ukkak ele,⌋ ag oolnu noak amuppa oolna gokkulag; anukka ag Juda dilag king Usianu haenppa mim ne oolppig, amubia ag oolna gokkulag. Amu dimppa amu Yawe, dahil Kayak, Nug uɗikku; Nug nuhikkud, ag nuhignu tituanak daatteb amu, Nug ag oh ele uɗiglag.

Sekaraia 2:6

Amu Yawe Nug atte. “Ag Israel danab ah, kekeɗ ag heeg, ag matatun gona, laih laih daatteb ele amu, ag eɗun uɗieg! Ag yawalti uɗitteppanu uɗieg! Aɗinu? Da hei, ag ulah waɗele uɗittebppanu, amuam kaɗag, yau, qaban, yawalti ele amu, ag aben amu ohppa matatun gona daatteb, ⌊amge ehanittak dahilppa ag aben amu ohppanu ahan, eɗun uɗieg!⌋” awa atte.

Sekaraia 6:5

Da oɗ mettai, nug da amelppa aum. “Imuam hab aabppanu ouɗi waɗele. Ag Naɗi, Nug wan atu ohppanu Naɗi amu, ag Nug noobppa daatteb. Ag ahan, nuhig uɗat hekkulagnu gotteb.

Sekaraia 9:10

Yawe Nug inam atte. “Da geha heppi, ban haknu karis ag baula Israel appa ii daamna. Ao, da heppi, hos banppanu ag Jerusalem appa baula ii daamna. Ge, da geha ban haknu lat heppi qiiadkkulag. Amu king ahilag Nug geha heeb, wanppan wan ohppa ag ban kobol uuna, ag maɗoɗ ele daappeg, ahilag king nug geha danab ah wan atu ohppanu gumadkku. Yo, Nug geha le naɗi Yupretis appanu digma ukka, wan batakppa ele gumadkku.

Sekaraia 9:14

Yawe Nug nuhikkud danab ah dilagppa tula ba boppalatteb, nuhig lat doɗo oh pahanab, amemɗi pahaedatte bia gokkulag. Naɗi Yawe Nug trampet iwala, Nug ulah kilibob, atu taɗak yau uɗitteppanu daatte, appanu huana uɗitte, amubia Nug nuhikkud kekeɗ ele ban hekkulagnu gokku.

Matyu 13:41

Danab Bekkalag da, da dahilad engel heppi, ag gona, danab Kayaknu ɗo maɗoɗ ooppa daatteb ele, ag oolagppanu wannu etetuab nau, ig eeɗigtteb ele, amu oh amu aria danab ag kobol eheɗ hetteb ele, ag qagmaadna diin,

Matyu 24:22

Anam daatte amunu, Kayak Nug haen amu tutu daakkunu, haen amu ii okkullo, danab ah oh padal melob, amge Kayak nug nuhikkud tituanattom ele, Nug amu dilag dabma, haen tutu okkulkku.

Matyu 24:24

Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta.

Matyu 24:32

Nai amunu amu ag ad fignu kobol dabmena dabmak aweg! Ag ad fig nug uɗug bau bekkunu digma haultte anidna amu, ag haen amuppa, ‘Aam haen aakku digmette,’ aon atteb.

Matyu 25:31

Jesus Nug anam ana Nug nai tuɗitta aum. “Dimppa haen Danab Bekkalag da, da binal amahlak oppiaawak ele uɗippi, engel oh ele uɗignig, haen amuppa da sia king binag amahlak oppiaawak ele dahilppa daakkul.

Matyu 28:18

Anam heegeg, Jesus Nug ag gumatta doa, amelagppa aum. “Kayak Nug da keeke oh wanppanu, habppanu ele ikkilag daakkulnu meiɗom

Mak 13:27

Da uɗien, da dahilad engel heppi, ag gona, danab ah dahilad da tituanadmi amu aben oh wanppanu, habppanu ele qagmaadna, diin uɗiglag.

Luk 24:47

Amge laa ele ippunigtte. Amuam Kristus Nug hibaitteb, ⌊nuhikkud danab⌋ ag Kristus onigppa wan atu ohppanu danab ah amelagppa ag Kayak Nug danab ah dilag hipunin uhuqa madakkunu, ag oolag eɗuglagnu mehuqkkulagoitte. Ag uɗat amu Jerusalem digmekkulag. Kayak nai anam ippunigtte.

Jon 11:52

Amu ele nug Jesus, Juda dilagib mauhkkunu ii aum. Iitta. Nug Jesus mauhkku, amuppa Kayaknu danab ah atu ohppa daatteb amu, Nug ag oh diia qagmaatteb, ag oh laippu daaglagnu aum.

Rom 10:18

Amge da oɗ mettem. Israel danab amu ag nai iite dooppig? Yo, ⌊Kayak nai atte, amubia⌋ ag dooppig. ⌊Nai amuam inam.⌋ “Keeke amu oh baalag am wan atu ohppa ukka malom daatte. Yo, ahilag nai amu wan oh tualom daatte.”

Epesus 1:10

Nug oo niitte am inam. Nug ulum aɗebeb, Nug haen epeɗiom ele amu uɗieb, keeke hab attannu, wanppanu ele amu Nug oh qagmaatteb, Kristus waappaib daappeg, Kristus Nug keeke amu oh ikkilag daakku.

Duteronomi 30:4

Am ag laih uma umanab diia ukka laih me dayak danab ah daaglagtai, me Yawe, ahilag Kayak, Nug ag qagmatta, eɗua diia uɗikku.

Duteronomi 4:32

Ag anukkanabnu uɗiak, gemu batak dabmena antteg! Ge! Kayak Nug danab ah hattom haenppa uɗia, gemu batak, ag haen amu oh dabmenan antteg! Ag anam hewona, ag gona, keeke oh hab waappanu, amu wanppanu ele antteg! Ag amu henana, ag kobol naɗi okkai, Kayak Nug ihinignu heum ele amu, kobol amubia laa haen laappa, o aben laappa beumte, o iittate, ag amu antteg!

1 Tesalonaika 4:16

Aɗinu? Haen amuppa danab ah ag haknunab laa anaknu ewak, engel okkainu ewak, amu Kayaknu trampet ele gayak doobppeg, Naɗi Nug hab aabppanu neeb, danab ag Kristusnu oolagppa genab dooppig ele amu, ag tatam eɗun hippaidkkulag.

2 Tesalonaika 2:1

Aria Jesus Kristus, ihinig Naɗi, Nug eɗua uɗieb, ig oh Nug noobppa qagmeta, Nug ele daagnignu, O lainkad, ag keeke amunu dabmekkulagnu iikku attem.

Hibru 12:19

Qauko amuppa trampet huana iwalak dayom, amu Israel ag amu oh doon anidppig. Ag qauko amuppa amu oh doon anidna, ag ele Kayak baag doon, ag baɗana Moses amegppa inam appig. “Ig baula baag amu doyak uuttem,” aon appig.

Revelesen 1:20

Na da eppel naɗiap-ppa hoɗoppai eblaih aɗit ele anidme, lam maknu balal eblaih aɗit ele, ele anidme amu, amunu diig am inam. Hoɗoppai eblaih aɗit ele am Kristen tamaniak eblaih aɗit ele, amu dilag ikki danab. Lam maknu balal eblaih aɗit, amuam Kristen tamaniak eblaih aɗit amu aakku,” awa aum.

Revelesen 11:15

Aria, engel ebqak 7 nug trampet nuhig iwale amu hab aab appa da laa baalag okkaippa inam aeg doomi. “Wan ohppan gumak uɗat aakku eɗua, ihinig Naɗi, amu laa Nug danab ah dilag Padal ii maknu ehanittak daakkunu tituanom, am Kristus, Nug ele eppelahppa daatte. Naɗi Nug hanhan uɗat amu hekku,” aon appig.

Revelesen 7:1

Da keeke amu anttoya, da engel waɗele laa, ag wan daug laih laih waɗele amuppa hippaidna, ulah waɗele ippulag aben abenppa uɗippeg, yuppa ulah daamanu, wanppa ulah daamanu, ad amu keeke laala oh ulah aomnanu, ag ulah ippulag oh oo neppig ele anidmi.

Revelesen 8:2

Amu dimppa da engel eblaih aɗit, Kayak noobppa hippaidna daatteb ele amu, da ag anadmi; ag trampet eblaih aɗit ele aakku mattaeg aoppig.