Matyu 11:28 - Nobonob Baibel

²⁸ Jesus Nug anam ana, Nug baula ele aum. “Ag danab oh, ag uɗat okkai henana, keeke uug ele maotteb amu, ag gumiɗna doig! Doppeg, da heppi, ag hik aoglag.

Matyu 11:28 ပူးပေါင်းရင်းမြစ်များ

Job 14:1

Danab oh ag ah oolkadppanu dotteb ele, ag wanppa haen elab ii daatteb. Ao, ag uug kuɗumnab ele maon oitteb.

Job 5:7

Am genab, uug digdig ig danab, ihinigppa betteb am hamu ii betteb; ig heut betteb. Ao, aab ewewe, aeg genabnab pitigna tetteb, nak o laih laih ukkak iitta, genab amubia ig heut, uug ig iqatte.

Sam 116:7

Nug anam he, da dakka da amelppa, da dahilnu inam ami. “Yawe Nug nahip-ppa ena heum amunu, na baula maɗoɗ daye!” Da anam ami.

Sam 32:4

Aɗinu? Tuqan, amun ele na toliɗkkutnu, na eppen da qaɗelppa uug ele me, aam he, wan leppu qaɗaiettom bia dahil ɠagattag iitta meum. Sila.

Sam 38:4

Aɗinu? Da beɗulppa aab okkainab, da eɗilak daatte, amu aab amuam keeke uug nau ele, mawaknu elele iitta, amubia daatte.

Sam 94:13

Na nau hak danab heppe nauhkkulag, amge ag ii nauhppig haenppa, haen amuppa nau hak danab ag heeg, uug digdig nahipad danab ah aqadkkun betteb, amu uug amu nahipad danab ah aqatta aot autanab aomanu, na ehanadttem.

Eklisiastis 1:14

Da keeke oh danab ah ag ⌊beɗu ehanittaknu⌋ aam waappa henan daatteb anatten malami, amu keeke amu ohnab am gaɗappa, unuqagppa ele anttak laippu iitta; amuam danab nug ulah aɗakkunu, ulah dim lamidtte, am amubia.

Eklisiastis 1:8

Keeke oh anamib; danab nug amu ohnu madikkunu elele iitta amunu, keeke oh am bahi yaak megatte. Danab ameg nug neekka, keeke anidkkunu uuak ii dootte. Ge, danab daug nug nai dookkunu uuak ii dootte.

Eklisiastis 4:8

Amuam danab nug tiig laippu laa iitta. Ao, nug nid iitta, awag, amag laa ele iitta. Anam amu, nug am uɗatib hette, nug hamu ii daatte; Nug anam daya haaha, en okkai aotte, amge nug ena ii dootte. Iitta. Nug baubau aokkunu hette. Nug nukka, nug oɗ inam ii medatte. “Da aun nug en imu aokkunu uɗat hettem? Ao, da aunnu uɗatib heinne, gamag ahak nakok aolom, amge da ii aottem?” Nug amu oɗ ii medatte. Kobol amu daatte, amge amu ele am gaɗappa, unuqagppa ele anttak laippu iitta; am kobol guittak ele.

Aisaia 1:4

O gadon! Israel danab ah ag hipunin danab ah daatteb. Ag beɗulagppa aab okkainab ele. Israel anilkad mamelkad ele, ag nau hak danab ah. Kobol diig ena iitta uɗig wak ele Israel beɗulagppa ambeum daatte. Ag Yawe uuidppig oitteb. Ag Yawe, Nug am Israel, ahilag Kayak Oppiaawak Ele amu, ag nuhignu uuaknab doon oitteb. Ag Nug dimettan autna aoppig oitteb.

Aisaia 11:10

Haen amuppa am inam daakku. Jesi buɗub nug geha king daakku. Nug pilak laa, pilak amuam ad elab attan ta ukkak galaeg daatte, nug amubia daakku, amu wanppan huu anen anen ohppan danab ah ag geha nuhigppa uɗin, gumidna dona, nug dooglagnu ba daakku. Nug anam dayebeb, wanppan wan ohppan danab ah ag nug gumidna goppeg, nuhig dayaknu aben am binag amahlak oppiaawak ele daakku.

Aisaia 28:12

Kayak Nug matu wan imu ag mattowa, Nug ag amelagppa inam aum. “Imuam hik awa, oo maɗoɗ ele dayaknu aben laa. Danab ah ag uug dootteb ele, ag uɗin, ippa hik aweg! Imuam oo maɗoɗ ele dayaknu aben.” Nug anam aum, amge Israel danab ah ag nai amu doon dabmekkulagnu uuppig.

Aisaia 66:2

Da keeke amu oh hattami amunu, ag beppig daatteb.” Yawe Nug anam atte. Amu Yawe imu ele atte. “Aun laa nug nukka nug onig qe ne, nug nug binag ii mette, nug dahil nai dim lamidkkunu dabmak tippalmanu baɗatte amu, da nuhignu enanagnab doottem.

Jeremaia 31:25

Aɗinu? Da heppi, danab ag beɗulag bodoedatte ele, ag ɠagattag aoglag. Da heppi, danab ag gai-iittanab daatteb ele, ag eɗun, ena daaglag.

Jeremaia 35:16

Rekap bekka Jonadap buɗub ag mamelag anukkanu, ag nuhig haknunab anak dim lamitteg uɗie, gemu ele hetteb, amge Israel danab ah, Juda danab ah ele, ag dahil nai ii dim lamittegeg uɗie, gemu ele ii dim lamidtteb.” ’ ” Da Yawe da anam attem.

Jeremaia 6:16

Yawe Nug inam atte. “Da ami. ‘Ag ib oɗatleppa daanna, ag pehettan neegna antteg! Ag, “Ig alankad ib attenppa oippig? Ib atten am ib ena?” ag oɗmak amu heig! Ag oɗ mattan, ib atten am ib ena doon, ag amuppa oinna, ag maɗoɗ aoglag,’ ami. Da anam ami, amge ag uuppig. Ag, ‘Ig ib amuppa ii oimta,’ appig.

Matyu 11:29

Ag gugappan tuqai dahil aon gukkalagppa mewona, ag dahilppa dabmak aweg! Aɗinu? Da am wagai mak danab iitta, amu da am oo doyak ele. Ag anam henana, ag oolagppa uug iitta oiglag.

Matyu 23:4

Ag keeke uug ele itan, danab gukkalkadppa mattaeg maotteb, amge ag akka ag eppelag doɗo laa uug amu maoglagnu nakok ii meeg otte.

Jon 6:37

Amu danab ah aun Mame Nug da meɗatte ele, ag oh dahilppa dokkulag, am aun nug dahilppa dotte amu, da nug ii geɗidpa.

Jon 7:37

Hobul amu malaknu deɗ beum, deɗ amuam hobul amunu naɗinab amu, haen amuppa Jesus Nug hibaitta, baag okkaippa ewa aum. “Danab laa nug le baag diieb amu, nug da gumiɗa uɗia, le lanaɗ!

Aposel 15:10

Ig anam anidttem, amge ag iitta aɗi ag Juda dilag ɗo oh dim lamidkkulagnu atteb, amuppa ag keeke uug ele aon, Kristen qaɗelagppa mena hetteb. Anukka ig mamenkad amu ig ele uug amu mawaknu amu elele iitta. Ag aɗinu Kayak ma anttak anam mettaglagnu hetteb.

Aposel 20:35

Da Naɗi Jesusnu nai laa dabmeinne, da ehanittak kobol amuppa amu, da ag danab ah, keeke iitta, hamu daatteb, ig ag ehanadkkunignu daattem amu, da kobol amuppa ag ehanadkkulagnu ib ippunadmi. Jesusnu nai amuam inam. ‘Danab nug danab laa keeke metta, itittak ena aotte, itittak amuam danab nug keeke awa, itittak ena aotte, itittak amu eɗidtte.’ ”

Galesia 5:1

Kristus Nug ig ɗonu maniguittak hippalikkakppanu uhuqikkom, ig uhuqak aot daattem, ig begbeg maɗi nid ii daattem amunu, ag ahan ɠagattag dayeg! Ag ɗonu maniguittakppa baula aib daappig.

2 Tesalonaika 1:7

Nug ag uug dootteb ele amu, haen ena matta, Nug ig ele haen ena megakku. Naɗi Jesus eɗua, aab aɗu amu engel ɠagattag nuhikkud ele ag hab attannu miag atiak nekkulag, haen amuppa Kayak Nug kobol amu hekku.

Hibru 4:1

Aria, Kayaknu hik awaknu nai, nug amunu nai qakka aum amu, nai amu gemu ele daatte amunu, danab laa ag oolagppanu nug hik awak amu etta ii aomanu amu, ig dabmeta autta aotu!

Revelesen 22:17

Amu Kayak Ouɗi amu Sipsip Nag wau, aa attep. “Na do!” Am aun nug nai amu doya nug, “Na do!” anaɗ! Am laa ele, laa nug le baag diieb, am nug doaɗ! Am laa nug bauklel le lakkunu oo hette ele amu, nug doa, bauklel le lanaɗ! Kayak Nug le amu hamu medatte.