Malakai 3:10 - Nobonob Baibel

¹⁰ Amu ee elele da laulppa daakkunu amu, Israel danab ah ag, ag keeke obatak eblaih tanig ele ooppanu obatak laippu amu oh aon, da laulnu ee bakkalenu maknu oo, ag oo amuppa keeke amu oh meig! Ag ma anttak meɗan, anam hekkulag dayeb amu, da hab aabppan itittak ena naɗi madakkul. Da huanaknab madappi, meppeg ambeeb, ag dabmettaglagnu aben elele iitta daakku! Ag anam hena anitteg! Da genab meu heppi beeb anidkkulag!” Yawe Nukka Ɠagattag Oh Ele Nug anam atte.

Malakai 3:10 ပူးပေါင်းရင်းမြစ်များ

Genesis 28:22

Aben da men eppami ele imu amu, am Kayak noobppa dup noa binag mak aben daakku. Amu Kayak Nug aɗi aɗi keeke oh da meɗeb amu, da amunu obatak eblaih tanig ele ooppanu obatak laippu Kayak medakkul,” awa aum.

Genesis 7:11

Haen amuppa Noa nug maɗ 600 dayom. Maɗ 600 dayeye, kalam ebqak aɗit, kalam amunu deɗ 17ppa, gu okkai neene, Kayak Nug he, wan panatte, wan ooppanu le huanak qeppuɗin beegeg, le hiɗ naɗi digma beum.

2 King 7:19

Amge ban daup ikki gemu mauhom amu, nug Elisa nai aumnu, nug nob ma inam aum. “Antte! Yawe Nug habnu od matulatta, ee kuɗum gokkaɗeb neeb mekkeb amu, ig men doɗo nakokppa ee anam ii daden memata,” awa aum. Nug anam a amu, Kayaknu danab Elisa nug ban daup ikki amu amegppa aum. “Genabnab genab, keeke amu geha beeb na amenppa anidkkut, amge na ee amu nakok laa ii lamana,” awa aum.

2 King 7:2

Elisa nug anam a amu, ban daup ikki laa king ehanidtte, nug king ele oh uɗipiɗ, nug Elisa nai amu a doya, nug nob ma inam aum. “Yawe Nug habnu od matulatta, ee kuɗum gokkaɗeb neeb mekkeb amu, ig men doɗo nakokppa ee anam ii daden memata,” awa aum. Nug anam a, Elisa nug danab amu amegppa aum. “Na amu attem, amge da ami am genabnab genab, keeke amu geha beeb na amenppa anidkkut, amge na ee amu nakok laa ii lamana,” awa aum.

1 Stori 26:20

Aria, Lewi buɗubppan mana mettak danab iitta, amu oolagppanu laa ag Kayak laugnu en maknu oo anen anen, amu oo anen anen keeke laala Kayaknu tituanna mettak daappig amu, ag amu gumappig.

Nehemaia 12:44

Haen amuppa amu, laa ag danab laala ee bakkalenu maknu oo gumadkkulagnu tituanadppig. Ag danab ah men doɗo, ee tatam oɗuak, obatak eblaih tanig ele ooppanu obatak laippu ele, ag amu aon uɗin, Kayak medappeg, oo amuppa maadkkulag amu, danab amu ag keeke amu oh gumappig. Kayak Nug Moses ɗo mettom bia danab amu ag danab ah dad ahilkad aab taliliadna daappigppanu ee keeke aon uɗin, Kayak mettaglagnu ag eppelagppa maadppeg, oo amuppa meppeg dayeb, Lewi buɗubppan mana mettak danab, Lewi buɗubppan mana mettak danab iitta ele, ag amuppa ahilkad ee keeke aoglagnu daappig. Ɗo anam ippunattom, amu Juda danab ah oh ag mana mettak danab ag Kayaknu ehanittak ag madappig, Lewi buɗubppan mana mettak danab iitta, ag amu dilag uɗatnu ele oolagppa ena dooppig amunu, ag danab amu uɗat amu gumaglagnu tituanattom.

Nehemaia 12:47

Amu haen Serubabel, amu haen da Nehemaia ele, haen i Juda dilag okkai daamuɗ amu, haen amu ohppa Israel danab ah oh ag ee keeke elele aon uɗin, ahiettak danab, od gumak danab ele mattaeg, ag tutu ii meppig. Israel oh ag anam mattanna, ag ele maha laala Lewi buɗubppan mana mettak danab iitta, ag amu dilagnu otiadna mattaegeg, Lewi buɗub laa amu ag ee amu oppateg ne, mana mettak danab, ag Aron buɗub amu, ag ahilkad maha ele ag madappig.

Nehemaia 13:5

Anam amunu, nug Tobia nug aguppa daakkunu Kayaknu mettid lag, amuppa oo okkai laa mettom. Tatam ag oo amuppa ee aeg main, Kayak mettaglagnu, kalu danab ile muttuɗig enanag bette, Kayaknu mettid lakkanu uɗat haknu keeke laala, ee aeg, wain bau, goɗen elenu obatak eblaih tanig ele ooppanu obatak laippu ele aguppa meppig. Obatak laippu amu, keeke amuam Lewi buɗubppan mana mettak danab iitta dilagnu, ahiettak danab dilagnu, od gumak dilag ele daye, aria maha am ele mana mettak danab dilag dayom, amge gemu Tobia nug aguppa daakkunu dayom.

Sam 37:3

Na Yawenu ootppa genab doonna, ena hee! Na wanppa daanna amu, na oo metta ii uuak kobol atognonana hee!

Sam 78:23

Nug ee habppanu, ahilagppa nekkununab aum. Ao, Nug he, ee habppanu neum.

Eklisiastis 11:3

Lombigppa gu huana daatte dayeb, gu wanppa nette; ad laa qiia ukka wanppa niitte amu, ad amu qiia ukka dayomppa aakku niitte. Am yau uɗitteppanu ad qiia ukka niitte amu, yawalti uɗitteppanu aakku niitte. Yawalti uɗitteppanu ad qiia ukka niitte amu, yau uɗitteppanu aakku niitte.

Esekiel 34:26

Da ag, amu aben oh dahil qauko Sion talilittak daatteb ele itadppi, ena daaglag. Da heppi, gu nuhig haenppa elele neeb, itittak ena ele aakkuib daaglag.

Esekiel 44:30

Ag Israel ag ahilag ee tatam oɗutte amu, amuppanu enanag daatte, ee amuam mana mettak danab dilag daakku, amu ag aɗi keeke ag aon, da Kayak, dahil daakkunu hamu meɗatteb amu, keeke amu oh ele mana mettak danab dilag daakku. Aria, ag ee aeg ganuɗaknu menppa metteb ele, ag meppeg ganuɗebeb, plaua neebeb, ag plaua tatam nette aon, mana mettak danab matteg! Ag amu hekkulagnu diig am, ag aun aɗi ag amu hekkulag amu, da anttena, da itittak ena ag, am ag baelkadppa ele madakkul.

Hosea 2:21

Amu Yawe Nug atte. “Deɗ amuppa, geha da heppi, gu neebeb, wan bauɗkku.

Joel 2:19

Yawe Nug anam dookku amunu, Nug nuhikkud danab ah amelagppa inam akku. “Da heppi, ee, wain bau, olip goɗen ele elelenab daappeg, ag ee elelenab lakkulag. Haen laala da hei, danab ah wanppan wan laalappanu ag, ag Israel ahilagnu, ‘Keeke hamunab,’ dooppig amu, da baula anam ii hepa; iitta.

Joel 2:24

Nug anam gu he neum amunu, ee aeg mumuɗaknu abenppa ee aelkad qagmak okkainab daaglag. Am grep leppu, olip goɗen ele danab meu titiegeg, hinaippa notte amu, leppu amu ambeeb, hanak am ambaknab daaglag.

Lewitikas 26:10

Geha ag ee huana ele daan lanan, ee meu maɗ tumai ukkomnu amu agappeg ukkeb, aben dayeb, meu bau amu doa aben aokku.

Lewitikas 26:3

Ag ɗo dahil dim lamidna, ag haknunab anak dahil pehettak dabmettan dim lamiɗkkulag dayeb amu,

Lewitikas 27:30

Wanppan kehte, o ad meute laa obatak eblaih tanig ele ooppanu obatak laippu am Yawenu. Yawe Nug amunu nuhignu tituanak daatte anidtte.

Hagai 2:19

Ag ee aeg, ee tumu keeke, iitta ele. Ag muɗi grep, ad fig, ad pomigranet, olip ad ele eppan, meu ii aoppig, amge da gemu digmein, itittak ena madakkul,” awa atte.

Namba 18:21

Anam amu, da Israel danab ah, ag ahilkad keeke ohnu obatak eblaih tanig ele ooppanu obatak laippu, da Lewi buɗubppan mana mettak danab iitta, da ag madattem. Lewi buɗubppan mana mettak danab iitta, ag dahil mettid haknu peh lag danab ah appa qagmetteb ele, ag amuppa uɗat hetteb, amu uɗat amunu nob, daden mattaglagnu, da ɗo iikku mettem. Amuam ag aulag bia daakku.

Matyu 6:33

Amge tatam ag Kayaknu ɗo maɗoɗnu, amu genab tutukku kobol ele hekkulagnu anuqak dooppeg, geha Nug keeke amu oh ele ag madakku.

Duteronomi 12:6

Am Yawe Nug aben laa ag Nug noobppa dup nona binag mekkulagnu ippuanatteb amu, ag manaknu ofa, mana mettak laala, keeke obatak eblaih tanig ele ooppanu obatak laippu Kayak mettak, keeke Kayak hamu ɗo mettak, nai genab ana qakkaknu ofa, amu laippu dayaknu ofa, makau, amu sipsip ele nalkad ⌊dawai⌋ tatamnu ele oh, ag aben amuppa Yawenu akkan wakkulag.

Duteronomi 14:22

Am ag ahilag keh keeke, obatak eblaih tanig ele ooppanu obatak laippu amu otippeg dayaɗ! Keeke obatak eblaih tanig ele amu ee awak maɗ laippu amuppan ag anam hekkulag.

Duteronomi 14:29

Amu Lewi buɗub, ag aulag wan iitta ele, ag oolagppa daatteb, aria danab ag wan laihnu danab daatteb, nid ag mamelkad mauhppig daatteb, amu ah qab ag appalkadppa daatteb, ag ele oh uɗin daan, ag lappeg, oolag aɗakkunu, ag ee amu bakkalen lakka mekkulag. Ag anam heppeg, Yawe, ahilag Kayak, Nug ag aɗi hekkulag am itidkku.

Duteronomi 28:12

⌊Gu am Yawe eppegppa daatte, Nug aakku he nette.⌋ Ag Nug oɗe dim lamidppeg amu, Nug gu hanebppa heeb nekku. Keeke ena ena oh, am Yawe eppegppa daatte. Ag Nug oɗe dooglag amu, Nug geha ag uɗat oh ag eppelagppa hetteb amu, Nug amunu itadkku. Ag wan laappan danab lon mattaglag, amge ag ahilagppan lon ii aomna.