Malakai 2:8 - Nobonob Baibel

⁸ Anam, amge ag gemu mana mettak danab daatteb, ag anambia ii hetteb! Ag dahil ib uun malappig. Ag danab ah ippu ii ippuanatteg, ag oolagppa kuɗum ag hipunin hetteb. Ag nug tituana nai qakkak nai, da hei, da Lewi ele hemuɗ amu, ag nai qakkak amu uun, ii dim lamidtteb.” Yawe Nukka Ɠagattag Oh Ele, Nug anam awa atte.

Malakai 2:8 ပူးပေါင်းရင်းမြစ်များ

2 King 16:11

Aakku mana mettak danab Uraia nug dottog, haknu nai amu ele Ahas nug Damaskusnu me ukkom amu antta, nug qaɗab amubia heum. King Ahas nug Damaskusnu eɗua Jerusalem ii ugekke, Uraia nug qaɗab am ha malom.

Nehemaia 13:29

O dahil Kayak, danab ag amu heppig ele, amuppa ag mana mettak danab ag attem attem daaglagnu ii dabmena heeg, dayak amu nahip neekkakppa dubuttid teum daatte. Na he, mana mettak danab, aria Lewi buɗubppan mana mettak danab iitta, na ag ele, ag nug tituanna nai qagappig, amge ag nug tituanak amu oppatppig; amu na ahilag hak amunu daut atikkunu ool ii daatte.

Sam 119:102

Na nakka da ippuniɗme amunu, da nahip ɗo dim lamittaknu ii uumi.

Sam 18:21

Aɗinu? Da Yawe oɗe dim lamidmi. Ao, da Kayak dahil dimettalom amu, da nau helom, amge da kobol eheɗ ii hemi.

Prowerb 12:8

Danab ag laa nug doyak dabmak ena ele, ag nug binag metteb; amge danab nug dabmak kaliaknu kobol hette, laa nuhignu ena iinab dootteb.

Aisaia 30:11

Ag propet ag hetteb ele, ag amu baula aib heppig! Ib ag dim lamidtteb ele, ag ib amu uun, laa aweg! Ag Israel dilag Kayak Oppiaawak Ele baula aib ippunigppig!” aon atteb.

Aisaia 59:13

Hipunin ig hemut am, Ig Yawe waappa daagnignu uut, ig nuhig nai tappaut neum. Ig Nug dim lamidkkunignu amut, amge ig uut, ib laappa gomut. Ig ihinig Kayak dimettamut. Ig danab ah laa ele eheɗ hadata, uug kuɗum mattata, ig laa ag ele amu hekkulagnu eeɗadmut. Ig Kayak waappa daagnignu uut, ig laa ag ig gumigkkulagnu maattom ele amu, ig ag lamadtata, ig laa ag anam hekkulagnu eeɗadmut. Ig oonigppa hambuppuak nai dabmetat, ig amu oɗenigib mattimut.

Aisaia 9:16

Ikki danab ag ib ena, ib tutukku, amu kobol ena ele danab ah ii ippuanatteb, amuppa danab ah ag ib ena apiɗidna ⌊ag padal metteb⌋.

Jeremaia 17:13

O Yawe, naib ig Israel buɗub ehanigppe, ig ena daagnig. Danab ah oh ag ib apiɗidna, na uuidna oitteb ele, ag uɗa nak aoglag. Laa ag na, Yawe, ag ib apiɗidna, na uuidna, oitteb, ag yaak gappudppa dayaya, paha nauhtte, ag amubia nauhkkulag. Aɗinu ag anam nauhkkulag? Ag na Yawe, na keeke ena ohnu diig daattem amu, ag ib apiɗidna, na uuidna oitteb.

Jeremaia 17:5

Yawe inam atte. “Laa nug danab dilag ooppa genab dootte, nug ɠagattag, danab dilagppa aokkunu dabmette, nug da, Yawe, nug da dimeɗa ii dim lamiɗtte amu, nug aakku eheɗ laa awaknu anak waappa daatte.

Jeremaia 18:15

Dahilad danab ah ag ele anam bia alet dabmeɗan oilob, amge iitta, ag dahilnu daulag atiom. Ag ahan, kalu danab ile muttuɗig enanag bette manan, kayak hambuppuak madatteb. Kayak hambuppuak amu ag heeg, dahilad danab ah ag nena qena daatteb. Ao, kayak hambuppuak ag heeg, dahilad danab ah ag kobol ena, anukka ippunittak amu aoppig amu, ag ib amuppa elele ii oitteb. Ag heeg, dahilad danab ah ag ib ena apiɗidna oitteb. Ao, ag ib nauppa oinna, ib enappa ii oitteb.

Jeremaia 2:8

Mana mettak danab ag da Yawe, ag dahilnu ii dabmeppig. Ao, danab ag danab ah laa dahil ɗo ippunadtteb ele, ag da ii dooiɗppig. Ikki danab ag da dimeɗan, dahil nai tappaeg neum. Propet danab ag Bal dabmenan, nug onigppa ahilag nai mehuqppig. Ag Bal, kayak hambuppuak laa ele, amu dottolkad dabmenana, dim lamadppig.

Esekiel 22:26

Okkai danab ag anam heeg, mana mettak danab ag ɗo dabmena, ii dim lamidtteb. Ag amu hena, ag keeke dahilnu tituanak daatteb heeg, dahil neekkakppa dahil keeke amu ag dubuttid tak daatteb. Ag keeke dahilnu tituanak daatteb, ag keeke amu, keeke dahilnu tituanak ii daatteb ele amu, ag keeke aɗit amunu keeke laippu bia dootteb. Keeke laala, amuam keeke dahil neekkakppa dubuttid ele daatteb, amu keeke laala dahil neekkakppa dubuttid iitta ele daatteb amu, ag keeke amunu laippu bia doon, ag amunu danab ah ippunadtteb. Ag dahil Sabat, da Sabat dahilnu ag ɗo mattami amu, ag doonna, ɗo amu ii dim lamidna, dahil Sabatnu am hamu dootteb amunu, aabppan danab ah ag dahilnu hamu dootteb, ag da ii dim lamiɗtteb.

Esekiel 44:10

Haen Israel danab ag ib apiɗidna, uuiɗna matatun oiyegeg, Lewi buɗub laa ag ele uuiɗna, umanab gona, kayak hambuppuak noolagppa dup nona binalag meppig ele, Lewi buɗub amu ag hipunin heppignu bu aoglagnu daatteb amunu, ag bu amu aoglag. Ii qe-eɗidmana.

Esekiel 44:12

amge ag kayak hambuppuak noolagppa dup nona binalag menana, danab ah amu anam ele hekkulagnu ehanadppig, diig amunu Israel ag nena qena, hipunin heppig amunu, da Naɗi Yawe, da eppel hume, dahil nai ɠagattag qetten, ag hipunin heppig amunu, ag amunu bu aoglagnu ain malami.” Naɗi Yawe Nug anam atte.

Esekiel 44:7

Ag kobol eheɗ kuɗum, da kobol amunu uuaknab doottem, ag amu henana, ag wan laihnu danab, ag oolag babaittak iitta, beɗulag gaɗa otaɗak iitta ele, ag danab amu omaladna, mettid lag dahilppa goppig. Ag omaladna wana, haen amuppa ag ele doɗ main, da meɗappig amunu, kobol amuppa ag heeg, da laul dubuttid tak ele dayom. Ag amu henan, ag dahil nug tituana nai qakkak ig hemut ele amu, ag nai amu tippalppig.

Hosea 4:6

Dahilad danab ah ag da ii dooiɗtteb amunu, laa ag heeg nauhtteb. Mana mettak danab ag, ag da dooiɗaknu uuppig amunu, gemu da ag, ag dahilad mana mettak danab daaglagnu geɗadttem. Ge, ag da, Kayak, ahilag Kayak, ag dahil ɗo nai ii dabmeppig amunu, da geha nid naunau ahilkad ii dabmadapa.

Lewitikas 21:15

Nug ah laa amubia ii aokku dayeb amu, amuppa nug heeb, nug buɗub ag dahil neekkakppa ag oolagppa dubuttid teum daatte daaglag, amu diig amunu nug nuhig huu, Israel danab ah, nug amuppanu ah laa danab laa ele ii niipiɗ aokkuoitte. Da am Yawe. Da hei, nug dahilnu, oppiaawak ele daatte,” awa aum.

Sepanaia 3:4

Propet danab Jerusalem daatteb ele ag am beɗuppa tak danab daatteb. Ao, ag hambuppuak kobolppa keeke ag oolag hette ele, ag amu aotteb. Mana mettak danab Jerusalemnu ag kobol eheɗ heegeg, Kayaknu mettid lag, nuhig neekkakppa am dubuttid teum daatte. Ge, ag hambuppunna, Kayaknu ɗo inam inam ippunigtte atteb, amge Kayaknu ɗo anam ii ippunigtte.

Malakai 1:6

Yawe Nukka Ɠagattag Oh Ele Nug mana mettak danab amelagppa atte. “Nid danab nug mameg binag mette; maɗi nid laa nug okkai nuhig noobppa bodoettak daatte. Da am ag mamelag, amge ag da binal ii metteb. Ao, da am ahilag okkai, amge ag dahilnu ena elele ii dootteb. Ag mana mettak danab ag da onilnu, keeke hamununab, dootteb. Ag anam dootteb, amge ag da amelppa atteb. ‘Ig ib adekkuppa na oninnu, keeke hamunab doottem?’ aon atteb.

Malakai 2:5

Amu Yawe Nukka Ɠagattag Oh Ele Nug atte. “Da hei, da Lewi ele i nug tituana nai qakkak hemuɗnu diig am, nug nai amu dim lamidkku dayeb, nug bau, maɗoɗ ele daakku. Anam amu, ⌊nug dim lamittom amunu,⌋ da keeke aɗit amu nug mettami. Nug tituana nai qakkak amuam, Lewi nug dahilnu ebehi oh bodoetta le mekkunu dayom, amu Lewi anam heum. Nug da onilnu ebehi oh bodoetta le meum.

Namba 25:12

Amunu na nug amegppa da nug ele maɗoɗ daagnihnu, da heppi, da nug ele nug tituana nai qakkak laa hekkunih appe doyaɗ! Amu nug tituana nai qakkak amuam geha iinab iitta mema,

Namba 25:13

amu tituanak amuam iikku. Nug danab ah ag da, Kayak, da diilnu eheɗ doomnanu yag-nab-bak doya heum amu, nug anam heumppa nug Israel danab ah dilag eheɗ haknu nob nau iitta mekkunu he elele mettom amunu, nug, amu nug buɗub ele, ag geha hanhan mana mettak danab daaglagib,” awa aum.

Rom 14:21

Amu kobol elele haknu am inam. Na doɗ teppu lappe, na layap nug na anitta na qekku dayeb, na aib doɗ teppu lame. Amu wainnu ele anam dayeb amu, na aib lame, o keeke laa ele anam dayeb amu na aib heme.

Hibru 3:12

O lailad, ag lailag laa ag oolagppanu nug dabmak nau, amu ooppa genab doyak ele iitta, amubia oiyaya, Kayak bauklel dimettamanu, ag dabmena autna aweg!

1 Samuel 2:17

Aa anam heyaya daadpiɗ, amge Yawe Nug kobol amunu ena ii doyom. Iitta. Nuhig neekkakppa amuam hipunin okkainab. Aɗinu? Doɗ ittag Yawenu amu, nid aɗit amu aa mana mettak amunu, aa keeke hamu bia doopiɗ.

1 Samuel 2:24

O da bekkalaɗ, aa hettep am nau. Aa nau am aib hepiɗ. Genab, nai ag aeg doomi, Yawenu danab ah oh ele dootteb amu, nai amuam ena iitta.

1 Samuel 2:30

Amge na anam hettem amunu, Yawe, Israel dilag Kayak, Nug inam atte. ‘Anukka da ag Aron buɗub laa, ag na mamen anukka tiigppan uɗiak, ag haen oh da noolppa dahil ɗo maɗoɗ uɗat hekkulagnu nai qakken ami, amge gemu da nai imu attem. Ag amubia iinab hemana. Aɗinu? Aun aɗi ag da binal tutukku metteb amu, da ag binalag madakkul, amge aun aɗi ag dahilnu keeke hamu bia dootteb amu, da heppi, ag honopnab nokkulag.