Mak 14:41 - Nobonob Baibel

⁴¹ Aria, haen ewam batak nug eɗua ukka, ag niiegeg anatta amu Nug ag amelagppa aum. “Ag iite ahappig? Ag tuɗidna niin, hik ele aottebte? Aakku elele! Haen aakku doum. Danab nug Danab Bekkalag da, hipunin danab eppelagppa meiɗkkunu haen aakku doum.

Mak 14:41 ပူးပေါင်းရင်းမြစ်များ

1 King 18:27

Aam ameg tutukkuppa amu, Elaiya nug awa awa aqa aum. “Bal nug am kayak, amunu ag huan baalag okkaippa unuqitteg! Aɗinu? Bal nug genab kayak daatte dayeb amu, nug keeke laanu dabma dayayatai, ag ii doyadtte. O nug moɗppa ukkomtai. O amu ele iitta dayeb amu, nug aab laappa uma ukkomtai. O iitta, nug niia gad meumtai amunu, ag nug maɗ edappeg ahaɗ!” awa aum.

1 King 22:15

Mikaia nug anam a, aa king daapiɗppa teeh, King Ahap nug Mikaia oɗ mettom. “Mikaia, ig aab Ramot, Gileat wanppanu banelag gota, aab amu ele ban hekkunigte, o iitta, ig iitai gomata?” awa oɗ mettom. Nug anam oɗ mette, Mikaia nug ⌊baag danab daugppa dootte, nug danab amu nug doyaya, nai genab ii maditte, Mikaia baag amuppa⌋ nob ma aum. “Ag aab Ramot, Gileat wanppanu banelag gona, ban hena, genabnab genab aab amu na geha aokkut. Yawe Nug geha na ehanitteb, Aram eɗadkkut,” awa aum.

2 King 3:13

Ag nona, nuhigppa teeg amu, Elisa nug Israel dilag king amu antta, nug amegppa inam aum. “Na aɗinu da gumiɗna uɗime? Na mamennu propet nug anukka gumatta gottom, am na aninnu propet nug anukka gumatta gottom amu, na amu gumadna golom,” awa aum. Elisa nug anam a amu, Israel dilag king nug Elisa amegppa aum. “Na amubia amananu oɗ medattem. Aɗinu? Yawe Nug nukka ig king ewam imu Moap dilag king eppegppa meikka qagmeikkom,” awa aum.

Eklisiastis 11:9

O nid bau, na nid bau daattem, haen imuppa na oot gamag ahaɗ! Ao, na ootppa aɗi aɗi hena, gamag ahak dookkutnu anidttem ele amu, na amu hekkut. Na ootppa attem attem hekkutnu doottem, na amenppa attem attem hekkutnu anidttem amu, na amu dim lamidkkut; amge dabme! Kayak Nug na aɗi aɗi hekkut amu, Nug na amunu epeɗidkku.

Esekiel 20:39

O ag Israel danab ah, ahilagnu amu Naɗi Yawe, Nug inam atte. “Ag anen anen ohnab, ag gemu gona, ahilag kayak hambuppuak noolagppa dup nona binalag mattaglag, amge qinob dimppa amu, ag genabnab dahil nai doon, ag baula ahilkad kayak hambuppuak noolagppa dup nona binalag ii memana, ahilag daakkunu keeke ele ii mattamna. Ag amu oh ii heppeg, amu haen amuppa da onil oppiaawak ele laa dilag neekkakppa hamu bia ii daama,” awa atte.

Matyu 26:2

“Ag dootteb, deɗ aɗit uueb, Pasowanu Hobulnu ee lanaknu haen ana bekku amu ag Danab Bekkalag da kekeɗ eppelagppa meiɗna, ag ad emaitakppa atuliɗkkulag,” awa aum.

Mak 14:10

Aria, haen amuppa ippunittak awak danab 12, ag oolagppan laa, nug onig Judas Iskariot, nug mana mettak danab okkai gumatta ukka, Jesus ag eppelagppa mekkunu aum.

Mak 14:18

Aria, ag gona tena, balalppa ee lanana, Jesus Nug aum. “Da genab ag amelagppa attem. Ag oolagppanu laippu laa, nug da ele geha iikku ee lattep amu, nug da kekeɗ eppelagppa meiɗkku,” awa aum.

Mak 14:35

Nug anam awona amu Nug nakok laa ele wana ukka, appa Nug laippun gateg qaun o, gomela, iɗu wanppa ma, haen nau amu ii anidkkunu inam unuqittom.

Mak 14:40

Unuqittowa amu Nug eɗua ukka, ippunittak awak danab ag amelag eheɗ neum amunu ag niiegeg anatte, ag Nug amegppa nai laa akkulagnu ii dooppig.

Mak 14:42

Ahappeg gotu! Ag aakkud antteg! Danab nug da kekeɗ eppelagppa meiɗkku ele amu, nug aakku uɗitte,” awa aum.

Mak 7:9

Jesus Nug anam ana amu, Nug nai baula tuɗitta aum. “Ag ahilag dabmak anukkanu dim lamidkkulagnu, Kayaknu ɗo tabappeg nekkunu doon autna aotteb.

Mak 9:31

Aɗinu? Nug nuhikkud ippunittak awak danab nuhignu inam ippuanattatta aum. “Danab Bekkalag da amu, laa nug geha da danab eppelagppa meiɗeb, ag heppeg da mauhkkul. Mauhoya amu deɗ ewamppa da eɗuen hippaidkkul,” awa aum.

Jon 12:23

Aeh amu Jesus Nug amelahppa aum. “Danab Bekkalag da, da binal amahlak oppiaawak ele aokkulnu haen aakku uɗiom.

Jon 12:27

Jesus Nug nai amu awona, Nug nai tuɗitta aum. “Da oolppa dabmak kuɗumnab aottem. Da, ‘Mame, na haen imunu mua nau imu heppe da ii anidpa,’ akkulte? Iitta! Da uɗat imu hekkulnu uɗimi,” awa aum.

Jon 17:1

Jesus nai mattiowa, Nug ameg huma, hab attan neekka dayaya, unuqitta aum. “O Mame, haen aakku uɗiom. Da am na bekkat. Da danab ah na meɗame ele, da ag bauklel hanhannu madakkulnu, na da danab ah oh dilag ikkilag daakkulnu ɠagattag meɗame amunu, da na binan amahlak oppiaawak ele na medakkulnu, na da binal amahlak oppiaawak ele meɗakkutnu oɗ medattem.

Jon 7:30

Jesus Nug anam a, ag Nug aɗaglagnu heppig, amge nuhig haen ii malom amunu, laippu laa nug Jesus ii aɗom.

Jon 8:20

Nug nai amuam Kayaknu mettid lag nuhig tomppan keeke oh ele ooppa, men doɗonu kunup guguittak dayaya ippuanattom, amge Nug mauhkkunu haen ii malom amunu, laa Jesus aɗakkun ii heum.

Aposel 7:52

Amu propet aun laa dayom, ag mamelkad aɗi ag nug eheɗ iite hedappig? Laa iitta. Anukka propet ag Genab Tutukku Hak Danab uɗikkunu nai amu mehuqegeg, ag mamelkad aɗi ag ag aqatteg mauhppig. Aria, Genab Tutukku Hak Danab Nug uɗie, ag gemu daatteb amu, ag Nug aon, kekeɗ eppelagppa mena heeg, Nug mauhom.

Ikki Danab 10:14

Ag gona, kayak ag ag ahilag kayak daaglagnu tituanadppig ele, ag amu dilagnu gayeg! Heppeg, kayak amu ag ehanadppeg, ag kekeɗ eppelagppa gemu daaegeg, eheɗ hattaegeg, uug nau dootteb amu, ag eppelagppa baula aib daappig!” awa aum.