Maika 7:3 - Nobonob Baibel

³ Wan imuppan danab ag eppelag laih laih ohppa eheɗ hekkulagnu doon autna aotteb. Danab okkai ag laa ag ag lokkumakppa eheɗ haknu ehanittak madappeg, ib amuppaib ag ehanadkkulagnu atteb. Ao, epeɗiak danab ag lokkumakppa eheɗ haknu ehanittak aon, ag laa ehanittak amu mettom amegppa, “Na am tutukku heme; na eheɗ laa ii heme,” hambuppun atteb. Genab, danab ag ɠagattag okkai ele ag aɗi keeke aoglagnu oolag hette, ag aoglagnu anan heeg ukke, aakku aotteb. Danab okkai amu oh ag eheɗ anam hekkulagnu nai qakkan oitteb.

Maika 7:3 ပူးပေါင်းရင်းမြစ်များ

Prowerb 16:30

Laa nug amegppa amuhpapaɗ qette amu, nug kobol eheɗ, tutukku iitta laa hekkunu maittak aotte. Ao, laa nug layag guhuɗitta, oɗe qamuttak oitte amu, nug eheɗ laa hekkunu dabmak awa male, ɠagattag eppom daatte.

Prowerb 17:23

Nau hak danab nug lokkumakppa eheɗ haknu ehanittak aotte; nug hettoɗiak haenppa nai doya mala hettoɗia epeɗia elele mettak elele ii bemanu anam hette.

Aisaia 1:23

Jerusalem, nahipad ikki danab ag am tappe nak danab. Ag yabhok danab ele layam batappig. Nahipad ikki danab ag lokkumakppa eheɗ haknu ehanittak aoglagnu oolag huana hette. Ao, nahipad ikki danab ag keeke ahilag daakkunu hamu mettak aoglagnu wagai metteb. Ag hettoɗiakppa nid ag mamelkad mauhppig ii ehanadtteb. Ag ah qab, ag amu dilag uug ele anidna, tutukku mettan ii ehanadtteb.

Aisaia 26:21

Aɗinu? Antteg! Yawe, Nug wanppan danab ah ag nau heppignu nob naunu bu madakkunu, Nug nuhig aben hab aabppa daatte amu uua, Nug nette. Amu wan nug geha danab tiilag danab laa aqappig, tiilag amu tuɗitta, ii lokkumadma. Iitta. Wan nug geha kobol nau amu oh danab ag heppig, am amu oh heeb, miag atiglag.

Aisaia 3:5

Am danab anen anen ag lailkad dilagnu oo doyak iinab doomna. Iitta! Danab laa nug layag gai-iitta ele, nug nuhigppa eheɗ hekku. Danab laa am danab laa ele nug qekkulag. Ao, ag anen anen ag lailkad, mudippan laippu, eheɗ hattaglag. Nid bau ag danab kaino dilagnu, ag am binalag ele ii doona, ag oɗelag ii dim lamidmana. Amu danab laa ag dabmak nau beɗulagppa ambak ele, ag am danab dabmak ena ele, ag amu dilagnu ag binalag ele ii doona, aon aon aqaglag.

Aisaia 32:7

Danab nau nug nau hak kobol dim lamidkkunu hette. Nug eheɗ hekkunu lokkumakppa dabmaama, maittak eheɗ awa, daɗek danab heeb nauhkkulagnu hik qeeqe dabmette. Daɗek danab ag eheɗ laa ii heppig, ag tutukkuib henan daaegeg, danab nau nug heeb nauhkkulagnu anam hette.

Aisaia 5:23

Amu hettoɗiak dilag okkai danab ag danab eheɗ heppig ele eppelagppanu lokkumakppa eheɗ haknu ehanittak laa ag aon heeg, laa eheɗ heppig ag hamu gotteb ele, ahilagnu am gadonnab gadon. Ao, hettoɗiak dilag okkai danab ag laa eheɗ heppig amu, ag ii epeɗina heeg, hamu gotteb, amge danab ag eheɗ ii heppig ele, ag nob madatteb, hettoɗiak dilag okkai amu, ahilagnu gadonnab! ⌊Ag padal mekkulag.⌋

Jeremaia 3:5

Gemu na ihinignu oot nauhom daatte amu, oo nauhak amuam hanhan anamib daakkute? Ao, na ihinignu oppoɗin beum, amu nahip oppoɗi bak amuam haen ohib daakkute? Na nahip oo nauhak amu iite tuqan aomna?’ Ag anam atteb, amge ag eheɗ hak huanak tuɗidib hetteb.” Yawe Nug anam atte.

Jeremaia 4:22

Amu Yawe Nug atte. “⌊Imu bekkunu diig am,⌋ dahilad danab ah ag da dab-ii-meɗan ii dim lamiɗtteb ele. Ag da ii dooiɗtteb. Ag nid naunau, kaaka hetteb bia hetteb. Ag diignu doyak tutukku laa iitta. Ag eheɗ hekkulagnu doon autna aotteb. Ag ena hekkulagnu ib ii dootteb,” awa atte.

Jeremaia 8:10

Ag dahil nai geɗidna, ii dim lamidtteb amunu, da heppi, kekeɗ ag uɗin eɗadna, danab laa ag ahilag wan, ah ele diippeg, ahilkad daaglag. Aɗinu da anam hekkul? Juda danab ah oh, danab onig iitta, danab onig okkai ele, ag oh baubau awaknu hik aqeeqe oitteb. Ao, propet danab, mana mettak danab ele ag hambuppuak kobol dim lamidtteb.

Esekiel 22:12

Ag Jerusalem danab ah, ag oolagppan laa ag laa men doɗo mattaeg, ag laa aqaeg mauhtteb. Ag Jerusalem danab ah, ag lailkad lon mattan, ag lonnu intres digdig aotteb. Ge, ag gane medappig, amu eɗittak laa eɗun aotteb. Ag Jerusalem danab ah, ag mudippan laippu ele keeke lokkumakppa awaknu duttuna hak kobolppa ag eppelagppanu men doɗo keeke aotteb; amuppa ag keeke ii aolob aotteb. Ge, ag Jerusalem danab ah, ag dahilnu daulag atiom oitteb.’ ” Naɗi Yawe Nug anam atte.

Esekiel 22:27

Doɗ wulp ag doɗ laa qena latteb, amubia Israel dilag okkai ag danab ah eheɗ hatteg nauhtteb. Ag men doɗo, wan keeke, ahilag iitta, amge ag aoglagnu danab aqaeg mauheg, ahilag keeke aotteb.

Esekiel 22:6

O Jerusalem danab ah, ag antteg! Ahilkad anuqak danab ag ag oolagppa daatteb amu, ag danab okkai, ɠagattag ele. Ag anam daatteb, amge ag ahilag ɠagattagppa heeg, danab laa hamu mauhtteb.

Esekiel 34:21

Ag sipsip ɠagattag ele ag laa ɠagattag elele iitta duttunadna ehalattegeg laih watteb, qeqeɗilagppa ele laa gai-iitta yaalattegeg, uma gona daatteb.

Esekiel 9:9

Da anam ai, Nug nob ma, da amelppa aum. “Israel wanppan danab ah, Juda wanppan danab ah ele ag hipunin okkainab heppig daatteb. Juda wan ohppa layag duug wak kobol am ambak daatte. Ge, aab okkai imuppa nai doya mala hettoɗia epeɗia elele mettak ii dim lamittak kobol am ambak aakku daatte. Amunu diig am, Israel ag atteb. ‘Yawe Nug wan imu uua, ippa ii daatte. Ig hettem amu, Nug ii anidtte,’ aon atteb.

Hosea 4:18

Israel danab ag wain ahilag laeg iitta mette me, ag tuɗidna, kayak hambuppuak laulagppa kayak hambuppuak noolagppa dup nona binalag menana, ag ib baag ah appa uɗat hetteb ele niitteb. Ge, Israel dilag ikki danab ag uɗa nak kobolnu enaib dootteb.

Hosea 7:3

Am danab ah ag ahilag kobol nau heegeg, king nug amunu enanagnab dootte; anuqak danab ag ele danab ah dilag hambuppuaknu enanagnab dootteb.

Amos 5:12

Aɗinu? Da ahilag tappe naknu ebqak okkai amu, da doottem. Ao, da ahilag hipunin, ag am eheɗ nau amu, da amu ele doottem. Amuam ag genab tutukku hak danab ele kekeɗ madatteb. Ao, ag lokkumakppa eheɗ haknu ehanittak aotteb. Ge, ag ele hettoɗiakppa daɗek danab dilagnu nai doya mala hettoɗia epeɗia elele mettak kobol ii dim lamidtteb.

Maika 2:8

⌊amge⌋ dahilad danab ag tumai bia digmen ahan, dahil kekeɗ bia daan hetteb. Ag hak ahilag am inam. Ban danab ag banppanu eɗun uɗin, ibppa danab ah ag uug laa bekkunu ii dabmena oiyegeg, amu dilag keeke wagai mena, yab aotteb amu, ag amubia hetteb.

Maika 3:11

Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb.

Maika 3:2

Amge ag, ag keeke enanu nau ninig ele doon, keeke naunu amu, ag oolag mauhtte. Ag am danab nug doɗ gaɗa doɗ beɗuppan aagtte, amubia ag dahilad danab ah eheɗ nau madatteb. Ao, ag danab nug teppu ebehippanu hihia aotte, ag amubia dahilad danab ah eheɗ nau madatteb.

Matyu 26:15

Nug ukka oɗ meum. “Da Jesus ag eppelagppa meppi amu, ag aɗi meɗaglag,” awa oɗ meum. Nug anam a amu ag silwa men doɗo 30 mettaglagnu ebqeppig.

1 Korint 4:5

Epeɗiak uɗat amu ig gemu ii gumattem amunu, haen gamag imuppa ig anam ii hemata. Ag Naɗi uɗikkunu haen ameg meig! Nug uɗia, keeke oh gatatuppa lokkumak daatteb amu heeb, amahlakppa miag atippeg, aria Nug ele heeb, danab ag diig aɗinu keeke laala heppig amu, danab oh dilag dabmak amu miag bekku. Haen amuppa geha Kayak Nug ig danab oh laib laib ihinig haknu nob tutukku megakku.