Maika 5:13 - Nobonob Baibel

¹³ Da heppi, ahilkad kayak hambuppuak dottolkad adppa hoiyak am nauhak daaglag. Ao, da heppi, men gappi ag oolagppa daatteb ele ag baula ii daamna. Da amu heppi, ag baula keeke ag eppelagppa heppig ele noolagppa dup nona binalag ii memana.

Maika 5:13 ပူးပေါင်းရင်းမြစ်များ

Aisaia 2:8

Am laa ele, nahipad danab ah ag eppelagppa keeke dottolkad kuɗum hadattappig amunu, wan ahilagppa kayak hambuppuak amu ag ambeppig daatteb. Danab ah ag eppelagppa keeke dottolkad heppig amu, ag amu noolagppa dup notteb. Ag eppelag doɗoppa amu heppig amu, ag amu noolagppa dup notteb.

Aisaia 27:9

Yawe Nug anam hekku amunu, amu beeb, Israel wanppa kayak hambuppuak qaɗab laa ena ii daama. Iitta. Oh nauhadna autnanab aon, gappud bia daaglag. Israel wanppa kayak hambuppuak Aserah dabmekkulagnu biidod laa qappak ii daama. Amu qaɗab laa, qaɗab amuppa danab ag kalu danab ile muttuɗig enanag bette ele manatteb amu, kayak hambuppuak dilag qaɗab laa amu ele ii daama. Iitta! ⌊Amu beeb, Israel ag ele oolagppa keeke amu uuppeg amu, Yawe Nug⌋ ib amuppa, Nug Jakop buɗub dilag eheɗ haknu nob nau nuhig ɠagattag naɗippa heeb, iitta mekku. Ao, ag hipuninnu nob nau aolob, amge ag ii aomna.

Esekiel 16:41

Ag lag kuɗum, na appa eheɗ hekkutnu bappaidme amu, ag amu amotppeg eweb, ah laa kuɗumnab amelagppanab na bu mettaglag. Amu da heppi, na baula ib baag ah ii daamna. Na baula danab laa ag na ele niiglagnu men doɗo keeke ii mattamna.

Esekiel 36:25

Ag wan ahilagppanab daappeg, da le oppiaawak ele awen, ahilagppa tauɗppi ag oppiaawak daaglag. Da heppi, dubuttid, da noolppa daakkun elele iitta ahilagppa laa ii daama; ag baula kayak hambuppuak dottolkad noolagppa dup nona binalag ii memana.

Esekiel 37:23

Ag anam daappeg, da ehanadppi, ag tatam kayak hambuppuak dottolkad, amu oh am uɗig wak ele, ag ag noolagppa dup nona binalag meppig, kobol nau digdig laa ele heppig amu, ag baula anam ii hemana. Da ehanadppi, ag baula hipunin ii henana, da ii dimeɗamna. Da heppi, ag oppiaawak daaglag. Ag dahilad danab ah daappeg, da ahilag Kayak daakkul.

Esekiel 6:9

Ag ii mauhppig dilagnu amu, kekeɗ ag aɗualadna diippeg, ag matatun gona, wan laalappa daanna, ag dahilnu dabmekkulag. Ag da ahilag hak nau antten, da ag dimeɗaeg doyen, ag kayak hambuppuak anidna, ag binag mekkulagnu oolag huana heum anttena, da oolppa uug naunab nau doomi dooglag. Ag anam doon, ag eheɗ heppignu, ag kobol laala, da kobol amunu oolppa uuaknab doottem ele, ag amu ele heppignu, ag akka ag ahilagnu eheɗ nau dooglag.

Hosea 10:2

Israel danab ah ag hambuppuak danab ah daatteb; ag eheɗ hetteb amunu, ag bu aoglagoitte; Yawe Nug geha kayak hambuppuak dilag qaɗab loppaɗatta; Nug men gappi ahilag ele maduduɗeb nekkulag.

Hosea 14:3

Asiria ag ig ehanigkkulagnu elele iitta. Ao, ig ban haknu hosppa ban hetata, ena daagnignu ii dabmemata. Ig keeke dottolkad eppenigppa hak, ig amu dilagnu baula, ‘Am ihinig kayak,’ ii amata. Aɗinu? Na aakkuib nid anilkad mamelkad iitta dilagnu oot bodoetta, le mette.” Ag anam aig!

Hosea 14:8

O Israel, ag dottolkad eppelagppa hak, ag amu dilagnu awaidna dayeg! Da aakkuib, ag dabmadette atognoadttem. Da am ad pain ena laa bia, ⌊ag da waalppa ena daaglagnu elele⌋. Ahilag meu wak am dahilppanu ahilagppa uɗitte.” Yawe Nug anam atte.

Nahum 1:14

Yawe Nug haknunab anak imu Niniwenu aum. “Ag buɗulkad laa, ag onilkad tuɗid ele daakkunu am laa ii daama. Da ahilkad kayak hambuppuak adppa hoiyak, kayak hambuppuak gol o silwappa hak ele, dottolkad amu ag ahilkad kayak hambuppuak dilag mettid lagppa daatteb amu, da heppi, ag nauhkkulag. Ag Niniwe, ag am danab ah ahilag kobol uɗig wak ele amunu, ag aguppa niiglagnu da ahilag moɗ bappaidkkul” awa atte.

Sepanaia 1:4

Amu Yawe Nug inam atte. “Da danab ah Jerusalem daatteb, Juda danab laa oh ele bu okkai madakkul. Ao, da heppi, auntai laa nug kayak hambuppuak Bal noobppa dup noa binag mette, aria Bal dottog, nug noobppa dup noa binag mak hekkunu keeke oh ele amu, amunu keeke laa nakok laa ii daama. Da kayak hambuppuak dilag mana mettak danab aqappi mauhkkulag. Ao, da amu heppi, danab ah laa ag amu dilagnu baula ii dabmemana, ag daulagppa ele ii daama; ag wanppa ii daappig bia daakku.

Sekaraia 13:2

Yawe Nukka Ɠagattag Oh Ele Nug atte. “Deɗ amuppa da heppi, Juda wanppa danab o ah laippu laa nug kayak hambuppuak noobppa dup noa binag ii mema. Diig amunu amu, danab ah ag kayak hambuppuak laippu laa onignu ii dabmemana; oh am daulag atikku. Da heppi, propet ouɗi nau dilag ehanittakppa uɗat hetteb, amunu laippu laa, amu ouɗi nau amu oolagppanu laippu laa ele Juda wanppa iinab daama.

Revelesen 9:20

Danab laa oh, daup amu ag keeke nau amuppa ii aqaeg mauhppig ele amu, ag oolag ii eɗue, eppelagppa keeke laala hadappig amu ag ii uuppig. Iitta. Ag tuɗidna, kayak hambuppuak dottolkad golppa, silwappa, brasppa, menppa amu adppa ele eppelagppa hadappig amu, ag amu noolkadppa dup nona, binalkad meppig. Kayak hambuppuak dottolkad amu ag ii neegtteb, ag nai ii dootteb, amu ag ele oiglagnu elele iitta. Aria, ag ouɗi nau binalag mak kobol ahilag ele ii uuppig.

Ikki Danab 18:17

Aakku lokkumakppa atu italak danab tanig ele ag tena, nug humidna, ag kayak hambuppuak dottog adppa hoiyak, lamen enanag-epod, kayak hambuppuak dottolkad danab ag laulkadppa maatteg daatteb, amu kayak hambuppuak dottog silwappaib hak amu ele agappig. Ag amu heegeg amu, mana mettak danab amu, aria ban danab 600, ag bannu keeke ahilkad aɗan daappig amu, ag oh aɗnu odppa daappig.