Maika 4:8 - Nobonob Baibel8 Amu aab okkai Jerusalemnu amu, aab amuam lag attan ta ukkak menppa hak sipsip gumak danab nug aguppa ta, sipsip ena daaglagnu neegtte ele amubia daakku. Ao, Sion am ban haknu aben ɠagattag, Israel ag aguppa ena daaglagnu bia daakku. Aab am anambia daakku amu, Yawe Nug heeb, danab ah gumattaknu ehah Jerusalem appa king beɗuppa daakku. Ao, king Jerusalem appa ana daakku. အခန်းကိုကြည့်ပါ။ |
Maika 4:8
23 ပူးပေါင်းရင်းမြစ်များ
Daug amu laihppan ukkak am Usai bekka Palal nug eɗua babaittom. Laih nug babaittom am lag attan ta ukkak menppa hak laa, king laug enanagnab aben attan dayom, lag amu guguittak, amu king laug haɗap laa, kingnu gumak danab appa daappig ele guguittak, appa digmeum. Nug babaittomppanu Paros bekka Pedaia, amu Kayaknu mettid lagnu maɗi nid ele, ag tuɗidna, aɗnu laih amu eɗun bappaidppig. Ag babaitteg ukke ukke, aɗ kaɗag uɗitteppanu daatte, aɗ amuppa od onig Le Awaknu Od, ag amuppa batappig. Lag attan ta ukkak menppa hak, lag amu ag batappigppa guguittak daatte. Kayaknu mettid lagnu maɗi nid, ag am qauko nakok onig Opel, ag amuppa daappig.
Da geha Israel danab ah dilagppa da epeɗiak danab bau, ahilag hak tutukku ele anukka daappig bia madappi, ahilkad epeɗiak danab daaglag. Da ahilkad ulum mettak danab ele digmakppa daappig, amubia heppi bekkulag. Da anam heppi, amu geha laa ag Jerusalem, nahipnu inam akkulag. ‘Aab okkai amuam Kayaknu oo metta ii uuak kobol dim lamittaknu aab okkai,’ amu ‘Nai doya mala hettoɗia epeɗia elele mettaknu aab okkai’ ele aon akkulag.” Kayak Nug anam atte.
Nug wan buue be, men oh akke ukke, muɗi grep eppeg enaib epeɗia eppom. Dad amu gamagppa nug neekkeb ukkeb, aɗi uɗitte anttaknu lag attan ta ukkak menppa hak laa heum. Amu nug dad ooppa nug grep meu tappa leppu awaknu aben laa heum. Nug keeke amu oh ha malowa, nug “Muɗi grep dahil imu geha meulag ena, ubuhi ele daaglag,” dabmeum. Nug anam dabmeum, amge anam iitta. Muɗi grep amu meu ena ii oppig, meulag doɗo naunau oppig; lanaknu am mua ele, ena iitta.
Baeg wan tabatte, wan aab aɗuppa ewom, aen ele qataqak am king laala ag laippu daaglagnu hekkulag, amge laippunab ii daamna ippunigtte, haen ag amu henan daappeg, haen amuppa Kayak hab attan daatte, Nug ɗo maɗoɗ laa daakkunu heeb, ɗo maɗoɗ amuam hanhan daakku. Ɗo maɗoɗ laa wan atu gumaglagnu ahan, ɗo maɗoɗ amu eɗidna ii aomna. Ɗo maɗoɗ amuam ɗo maɗoɗ oh heeb, iitta mekkulag, amge ɗo maɗoɗ amuam hanhan daakku.
Yawe Nug tuɗitta atte. “O Jakop buɗub, genab da ⌊ag bu madakkul, amge dimppa da⌋ ag oh qagmaadppi, ag eɗun daaglag. Ao, da genab heppi, Israel danab ah ag oɗo yaak daaglag amu, ag eɗun laippu daaglag. Da am sipsip gumak danab sipsip aɗ ooppa qagmaadtte bia, da Israel danab ah qagmaadkkul. Ao, sipsip gumak danab nug gikkiɗah dad okkai sipsip gikkiɗah lattebppa, nug appa qagmaadtte bia, da Israel danab ah qagmaadkkul. Da anam heppi, ⌊dahilad⌋ danab ah ag appatppeg, wan imu ambak daakku.
Yawe Nug inam atte. “Da geha heppi, ban haknu karis ag baula Israel appa ii daamna. Ao, da heppi, hos banppanu ag Jerusalem appa baula ii daamna. Ge, da geha ban haknu lat heppi qiiadkkulag. Amu king ahilag Nug geha heeb, wanppan wan ohppa ag ban kobol uuna, ag maɗoɗ ele daappeg, ahilag king nug geha danab ah wan atu ohppanu gumadkku. Yo, Nug geha le naɗi Yupretis appanu digma ukka, wan batakppa ele gumadkku.
O Israel danab ah, ag diia ukka laih me dayak danab ah daatteb, ag ena bekkulagnu dabmak aɗan oiglagnu elele amunu, ag eɗun, ahilag aab aɗ ɠagattagnab ele, ag amuppa uɗieg! Da ag amelagppa attem. Ag uug maoppig, amge da geha heppi, ag bu laippu aoppig dayeb amu, ag keeke ena aɗit aoglag. O ag bu aɗit aoppig dayeb amu, ag keeke ena waɗele aoglag. Da heppi, ag anam anamib aoglag.
Danab ah ag Sion appa daatteb, ag oolag huana gamag ahaɗ! Yo, danab ah ag Jerusalem daatteb, ag oolag gamag aheb, huana eig! Antteg! King ahilag Nug ahilagppa aakku uɗitte. Nug genab tutukku hak kobol haaha, nug danab ah ehanatteb, padal ii memananu kobol ele dim lamitta haaha uɗitte. Nug nukka Nug onig qe ne, ⌊Nug danab onig iitta bia,⌋ Nug donki laa attan dayaya uɗitte. Yo, Nug donki nag laa ⌊nakok okkai meum⌋ attan dayaya uɗitte.
Jesus baula ele amelagppa aum. “Ag keeke danab ag dootteb ii dootteb ele ouaqata ippuanittak nai imu baula doyeg! Danab laa nug wan ele amu, nug grep dad eppowa, aɗ ita, dad ooppa amu nug grep meu tappa leppu awaknu aben laa ha, nug neekkeb ukkeb aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab, dimppa ag dad amunu meu laih mettaglagnu ag eppelagppa mewowa, nug aha, atu laih umanab ukkom.
Jesus Nug anam awowa amu Nug digma, keeke danab ag dootteb ii dootteb ele ouaqata ippuanittak nai laala inam aum. “Danab laa nug grep dad eppowa, aɗ ita, dad ooppa grep meu tappa leppu awaknu aben laa ha, nug neekkeb ukkeb, aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab eppelagppa mewowa, nug aha, atu laih umanab ukkom.
Gemu Nug attannab, laa oh eɗattak daatte; Nug laa gumak uɗat anuqak hetteb, laa ag gumak uɗat ɠagattag ele hetteb, laa ag gumak uɗat okkainab hetteb, laa ag gumak uɗat okkai hetteb, aria laa ag onilkad ele, Nug amu oh eɗadtte. Gemu haen imuppa Nug anam daatte, wan haen malak dimppa ele anamib daakku.
ကြော်ငြာတွေ