Maika 3:5 - Nobonob Baibel

⁵ Amu Yawe Nug inam atte. “Propet hambuppuak ag dahilad danab ah ib eheɗ ippunadtteb. Laa nug propet hambuppuak ee madette, ag nug maɗoɗ daakkunu atteb. Amge laa nug ee ii madakku dayeb amu, ag uug nau, mauhak keeke, danab amu, nuhigppa bekkunu atteb.

Maika 3:5 ပူးပေါင်းရင်းမြစ်များ

Prowerb 28:21

Laanu diig iittappa ena doya, laanu diig iittappa eheɗ doyak kobol am ena iitta; amge epeɗiak danab laala ag lokkumakppa eheɗ haknu ehanittak huppu nakoknab aona, ag kobol eheɗ aakku hetteb.

Aisaia 3:12

Juda danab ah, ag am dahilad danab ah, ⌊amu ahilagnu gadonnab⌋. Nid bau ag ahilag okkai danab daan, eheɗ hadatteb. Ah ele ahan, ag gumadnana daatteb. O Juda danab ah, ag am dahilad danab ah ele, ahilag okkai ag ib eheɗppa omaladna gotteb. Ag ib nau kuɗumppa ag kaboliadtteb.

Jeremaia 23:27

Ag mamelkad aɗi ag kayak hambuppuak Bal dim lamidkkulag hena, da dim lamiɗak uuppig, amubia propet hambuppuak ag tul niiak anidtteb ele, ag amunu mattiegeg, laa dootteb amu, ag ib amuppa dahilad danab ah ag dahilnu daulag atikkunu oolag yaaglagnu hetteb.

Jeremaia 23:32

Genab, da propet hambuppuak, ag akka tulegleg hambuppuakppa keeke anidna, dimppa aɗi bekkunu nai maditteb, da amu dilag haknu eheɗ doyeye ool ii madattem. Ag tulegleg hambuppuak anidna, danab ah amelagppa mattinna, nai amuppa ag danab ah omalatteg, ib eheɗppa gotteb. Ag hambuppuak nau amu maditteb, amge da maadppi gokkulagnu onilagppa ii emi. Da ag amu hekkulagnu ii tituanadmi. Ag eheɗ heegeg, Juda danab ah ag ehanittak nakok laa iinab aotteb.” Yawe Nug anam awa atte.

Jeremaia 6:14

Ag dokta nug danab beɗuppa guittak okkainab awom antta, hamu bia doya, itak nakoknabib qataqette, ag dahil danab ah dilagppa anam hetteb. Ag, ‘Ig maɗoɗib daagnig, ig maɗoɗib daagnig,’ anan daatteb, amge maɗoɗ laa ii daatte.

Jeremaia 6:4

Kekeɗ dilag okkai ag daup ahilkad amelagppa akkulag. ‘Ag ban hekkulagnu babaitteg! Ahappeg, ig aam ameg tutukkuppa ban hekkunig!’ akkulag. Ag anam akkulag, amge haen ukkeb, ag eɗun, akkulag. ‘Ihinignu am gadon. Aɗinu? Haen malom. Gemunu amahlak iitta mette. Ao, uudoum, gatatu nekkunu hette.

Gayak Nai 2:14

Ag Israel, ahilag propet ag tulegleg laala anidppig, amge tulegleg amuam hambuppuak; laa ehanidkkunu elele iitta. Ao, ag Juda danab ah ag hipunin henana, ag bu okkai aoglagnu aakku oippig, amge propet ag, ag Juda bu amu, amuam wan laappa diia ukka laih me dayak danab ah daaglagnu, ag bu amu ii aomnanu ippu ii ippunadppig. Nai ag madappig ele amu; nai amuam nai hambuppuak. Nai amuam ag omalatte, ag ib apiɗidna, eheɗ goppig.

Esekiel 13:9

Da propet hambuppuak ag tulegleg hambuppuakppanu maditteb, ag emannu hambuppuak nai ele atteb amu, da ahilag hak amunu eheɗ doyeye ool ii madattem. Ag amu hetteb amunu, da heppi, ag Israel dilag okkai oolagppa baula ii daamna. Da heppi, ag onilkad am buk laa, Israel onilkad amuppa yaak daatte, ag onilkad amuppa ii daamna. Da heppi, Israel danab ah ag gona, diia ukka laih me dayak danab ah wan laappa daappeg ukkeb, eɗua uɗiak haen doob, propet hambuppuak ag eɗun ii uɗimna. Da anam heppi, ag ⌊Israel, ag⌋ dooglag, da am Naɗi Yawe.

Hosea 4:5

Ag amunppa, tuqanppa ele taataɗ qedatteb, amu propet ag ele anamib hetteb amunu, da geha ag Israel, da ahilag wan heppi nauhkku.

Joel 3:9

Laa nai imu ag wanppan wan ohppan danab ah amelagppa inam appeg doyeg! “Ag ban hekkulagnu babaitteg! Ag appeg, ban danab aheg! Ahan, ag ban haknu aben gukkuidna gona, ag ban hekkulagnu bappaidna dayeg!

Maika 2:11

Propet danab nau laa, nug hambuppuak danab nug uɗia, ‘Da dimppa aɗi bekkunu nai ainne, ag le ɠagattag aon lanan, oo gamag ahakib dooglagnu ippu ippunadppi doon dim lamidkkulagnu uɗie hettem,’ akku dayeb amu, nug am propet danab ahilagnu elelenab.” Yawe Nug anam atte.

Maika 3:11

Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb.

Malakai 2:8

Anam, amge ag gemu mana mettak danab daatteb, ag anambia ii hetteb! Ag dahil ib uun malappig. Ag danab ah ippu ii ippuanatteg, ag oolagppa kuɗum ag hipunin hetteb. Ag nug tituana nai qakkak nai, da hei, da Lewi ele hemuɗ amu, ag nai qakkak amu uun, ii dim lamidtteb.” Yawe Nukka Ɠagattag Oh Ele, Nug anam awa atte.

Matyu 15:14

Amubia amu ɗo gumak danab-Parasia, ahilag ippunittak am iitta mekku amunu, ag ahilagnu aib uug aqom. Ɗo gumak danab-Parasia ag danab ah omaladtteb, amge ag amelag gaɗuom. Am ameg gaɗuak laa, nug laa, nug ele ameg gaɗuak ele, nug ib ippunitteb amu, aa oh moɗppa neya qekkulah,” awa aum.

Matyu 7:15

Ag propet hambuppuak dilag dabmeig! Propet hambuppuak ag, ‘Da Kayak ippu ippunadttem,’ aon atteb, amge amuam nai hambuppuak. Propet hambuppuak ag wulp sipsip emala lakkunu, sipsip gaɗa awa ma, sipsip oolagppa oitte, ag amubia oitteb.

Rom 16:18

Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.