Luk 9:26 - Nobonob Baibel

²⁶ Amu danab nug dahilnu, dahil nainu ele uɗa neeb, dimppa Danab Bekkalag da, da dahil binag amahlak oppiaawak ele, Kayaknu binag amahlak oppiaawak ele, amu nuhikkud engel oppiaawak ele dilag binag amahlak oppiaawak eleppa eɗue uɗikkul, haen amuppa danab amunu da ele uɗal nekku,” awa aum.

Luk 9:26 ပူးပေါင်းရင်းမြစ်များ

Aisaia 53:3

Danab ah ag nuhignu ena iinab doon, ag nug guhuɗidppig. Nug bau dayaya, nug oo doyak huanaknab doyaya, guittak huanak ele doyom. Danab ah ag laa, ag nug nakok laa anidkkulagnu oolag iinab hette amu, ag Yawenu maɗi nidnu ena iinab dooppig. Ig nug binag nakok laa ii mettamut.

Daniel 7:10

Le noa gotte, amubia Nug dayomppa aab aɗu le bia, noa ukkom. Engel tausen gane ag Nug ehanidna daaegeg, milion gane ag Nug noobppa daappig. Nug he, laa ag hettoɗiakppa epeɗiak danab daaglagnu daappig ele, ag heɗep nena daaegeg, ⌊ag epeɗiak uɗat hekkulagnu⌋ laa buk kolattom. ⌊Buk amuppa danab ah ag attem attem wanppa daanna heppignu nai am daatte.⌋

Matyu 16:27

Danab Bekkalag da, da Mamelnu binag amahlak oppiaawak ele uɗippi, engel ele uɗignig, amu haen amuppa da danab ah dilag hak, amu nob eɗue madakkul.

Matyu 25:31

Jesus Nug anam ana Nug nai tuɗitta aum. “Dimppa haen Danab Bekkalag da, da binal amahlak oppiaawak ele uɗippi, engel oh ele uɗignig, haen amuppa da sia king binag amahlak oppiaawak ele dahilppa daakkul.

Matyu 26:64

Nug anam a amu, Jesus Nug oɗeppa awa aum. “Na ame. Amge da ag amelagppa attem. Dimppa Danab Bekkalag da, da Kayak Ɠagattag Oh Ele eppeg naɗiap-ppa daabppi aniɗna, amu ele ag lombig hab waappa daatteb, da lombig amuppa dayeye uɗippippi aniɗkkulag,” awa aum.

Mak 8:38

Aria, danab laa nug danab Kayak uuna, kobol eheɗ laala dim lamadtteb ele, ag hipunin kuɗum laa hetteb ele amu, nug ag oolagppa oiyaya, nug dahilnu, dahil nainu ele uɗa neeb, dimppa Danab Bekkalag da, da Kayaknu binag amahlak oppiaawak ele, amu nuhikkud engel oppiaawak ele eɗut uɗit, haen amuppa danab amunu da ele uɗal nekku,” awa aum.

Jon 12:43

Ag danab ag binalag mekkulagnu oolag mauhttom. Kayak Nug ag binalag mekkunu amu, ag amunu oolag ii mauhom.

Jon 5:44

Ag am lailkad dilagppa binalag okkai aoglagnu hetteb, amge binalag laa, Kayak toppanu uɗitte ele, ag amu aoglagnu ii hetteb amunu, ag attem hena, oolagppa genab dooglag?

Aposel 10:22

ag nug amegppa appig. “Kornilius, nug ban daup 100 dilag ikki daatte, nug he ig uɗimut! Nug am genab tutukku hak danab. Nug Kayaknu ebehi oh bodoetta le mette. Juda danab ah oh ag nuhignu ena elele dootteb. Amu Kayaknu engel oppiaawak laa na, Kornilius amegppa nahipnu, na Kornilius laugppa gona, na nai laala appe nug dookkunu aum amunu nug he, ig uɗimut,” aon appig.

Rom 1:16

Da Jesusnu Nai Enanu amu, da uɗa nak ii doottem. Aɗinu? Nai amuam Kayaknu ɠagattag, amu Kayak Nug amuppa danab aun aɗi ag oolagppa genab dootteb ele, Nug ag eɗua diitte; Juda ag tatam ⌊nai amu⌋ doyegeg, iitta aɗi ag aakku geha dootteb.

2 Korint 12:10

Anam amunu haen da Kristusnu uɗat hekkulnu amu da ɠagattag iitta, haen da Kristusnu uɗat hettem, danab ag amunu da eheɗ heiɗtteb, haen da Kristusnu uɗat hettem, da amunu uug digdig da beɗulppa doottem, amu haen da Kristusnu uɗat hettem, danab ag amunu heeg, da eheɗ daattem ele amu, da haen amuppa oolppa enanagnab doottem. Ao, haen da ɠagattag iitta daattem amu, haen amuppaib aakku da ɠagattagnab daattem.

Galesia 6:14

Amge da keeke laa binag ii mepa. Iitta. Da Naɗi Jesus Kristus, Nug ad emaitakppa mauhom, da nuhig uɗat amu oh aakkuib da binag mekkul. Kristusnu ad emaitaknu ɠagattagppa amu, wan imuppan kobol da ii toniɗtteb. Da ele, da kobol amu dim lamidttem.

1 Timoti 5:21

Kayak, Kristus Jesus, amu Kayaknu engel oh ele noolagppa da tutukku na amenppa iikku attem. Na uɗat amu tutukku atogno! Na atognonana, na ameg laa dilagppa nai bodoettak anana, ameg laa dilagppa nai ɠagattag aib mattime; na laanu ena doon, laanu ena iitta doon, aɗi keeke laa aib heme!

2 Timoti 1:12

Diig amunu amu da uug imu maottem, amge da amunu uɗal ii nette. Aɗinu? Da nuhignu oolppa genab doottem amunu, da keeke Nug da meɗom amu, Nug tutukku atognobob, haen oh dayeb ukkeb, Nug eɗua uɗikku haenppa batakkunu doottem.

2 Timoti 2:12

Ig uug maognignu ɠagattag daattem dayeb; ig Nug ele keeke oh gumadkkunig. Ig Nug dimettagnig dayeb; Nug ig ele dimegakku.

Hibru 11:26

Nug nob ena, butti aɗi Kayak medakku amunuib dabmeum amunu, nug Kristus onigppa uɗa nak aokkunu ena doya, Isip enubnu amu, nug keeke hamu doyom.

Hibru 13:13

amunu ig ele aab okkainu aɗ dimittim nuhigppa gota, Nug uɗa nak guittak ele Nug mawom bia maotu!

Jut 1:14

Enok, nug am Adamnu buɗub buɗub uɗiak eblaih aɗit ele batak amu, nug danab laa amelagppa propet nai danab nau imu dilag mehuqa inam aum. “Antteg! Naɗi amu nuhikkud engel kuɗumnab, ebaqaknu elele iitta uɗitteb. Nug hettoɗiakppa, wanppan danab ah oh epeɗiaknu, Nug heeb, danab ag nuhignu, hak nuhignu ele uuak danab daan, ag Kayaknu, hak nuhignu ele uuak kobol dim lamidna, Kayaknu, hak nuhignu ele uuak kobol nau heppig miag atiak dooglagnu, hipunin danab Kayaknu, hak nuhignu ele uuak danab daan, ag nai nau oh Kayaknu madippig, ag amu miag atiak dooglagnu, Kayak amu nuhikkud engel ele uɗitteb.”

Revelesen 1:7

Antteg! Nug eɗua lombigppa nekku. Danab oh ag Nug anidkkulag. Yo, danab ag Nug qetti banppa atulppig ele, ag ele Nug anidkkulag. Amu wan ohppan danab ag Nug anidna, ag nuhignu mahiak okkai hekkulag. Ao, keeke amu anam bekku. Genab.

Revelesen 20:11

Da amu anttena amu, da imu ele anidmi. Da sia king okkainab, hakkab ele, amuppa Kayak Nug heɗep na dayeye anidmi. Wan imu, hab ele nug noobppanu ooleh, aben laa aa daaglahnu ii dayom.

Revelesen 21:8

Amge laa ag baɗanna, akka ahilagnu dabmena hak kobol dim lamidna, laa ag oolagppa genab doyak iitta, laa ag kobol nau uɗig wak hetteb ele, laa ag danab aqaeg mauhtteb, laa ag gappai kobol hetteb, laa ag baɗ mak danab, laa ag dup noa kayak hambuppuak binag mak danab, amu nai hambuppuak danab oh ele, amu oh aab ameg kalu laa huana eotte onig salpa eotteppa, ag amuppa aben aoglag. Amuam mauhak ebqak 2 aakku,” awa aum.

Revelesen 3:5

Aun laa nug ban eɗidkku amu, nug danab ag lamen hakkab tagappig ele, nug ag oolagppa ele daya, lamen hakkab ele tagakku. Da nug onig buk laa, amuam buk onig Bauklel Awe Onig Yaaknu Buk, buk amuppanu ii obipa. Iitta! Da nug da Mamel noobppa, amu engel noolagppa ele nug onig miag akkul.