Luk 10:20 - Nobonob Baibel

²⁰ Amge ouɗi nau ag nai ahilag dim lamidtteb, ag amunu oolag aib gamag ahom! Iitta. Kayak Nug ag onilag hab aabppa yom, ag amunu maɗoɗppan gamag ahak doyeg!” awa aum.

Luk 10:20 ပူးပေါင်းရင်းမြစ်များ

Sam 69:28

Na heppe, ag tuɗidna bau ii daamnanu oɗ medattem. Ao, na heppe, ag onilkad amu, genab tutukku hak danab onilkad ooppa daamnanu unuqidttem.

Eksodas 32:32

amge gemu da na, na ahilag hipunin amu uhuqna madakkutnu oɗ medattem. Da na anam oɗ medattem, amge na ahilag hipunin amu ii uhuqkkut dayeb amu, na danab ah nahipad onilag yaame, buk amuppa da onil daatte amu, na da onil amu obikkutnu oɗ medattem,” awa aum.

Aisaia 4:3

Amu inam bekku. Danab ah Sion daatteb, aun aɗi ag Jerusalem daatteb, Yawe Nug ag bau daaglagnu tituanattom amu, danab ah laa ag ahilagnu, “Ag am Yawenu oppiaawak ele daatteb,” aon akkulag.

Jeremaia 17:13

O Yawe, naib ig Israel buɗub ehanigppe, ig ena daagnig. Danab ah oh ag ib apiɗidna, na uuidna oitteb ele, ag uɗa nak aoglag. Laa ag na, Yawe, ag ib apiɗidna, na uuidna, oitteb, ag yaak gappudppa dayaya, paha nauhtte, ag amubia nauhkkulag. Aɗinu ag anam nauhkkulag? Ag na Yawe, na keeke ena ohnu diig daattem amu, ag ib apiɗidna, na uuidna oitteb.

Esekiel 13:9

Da propet hambuppuak ag tulegleg hambuppuakppanu maditteb, ag emannu hambuppuak nai ele atteb amu, da ahilag hak amunu eheɗ doyeye ool ii madattem. Ag amu hetteb amunu, da heppi, ag Israel dilag okkai oolagppa baula ii daamna. Da heppi, ag onilkad am buk laa, Israel onilkad amuppa yaak daatte, ag onilkad amuppa ii daamna. Da heppi, Israel danab ah ag gona, diia ukka laih me dayak danab ah wan laappa daappeg ukkeb, eɗua uɗiak haen doob, propet hambuppuak ag eɗun ii uɗimna. Da anam heppi, ag ⌊Israel, ag⌋ dooglag, da am Naɗi Yawe.

Daniel 12:1

Amu haen amuppa Maikel, nug engel naɗi, nug na, Daniel, nug nahipad danab ah ehanadtte amu, nug aha uɗikku. Haen nug aha uɗikku, haen amuppa uug naunab daakku. Uug amubia deɗ laa wanppa ii neum. Uug amu bekku, amge nahipad danab ah oh, onilag bukppa yaak daatte ele, ag oh ehanittak aon, ena daaglag.

Matyu 10:1

Deɗ laa Jesus Nug nuhikkud ippunittak awak danab 12 onilagppa e, ag Nug gumidna uɗippig. Ag uɗieg, Nug ag ouɗi nau lamadkkulagnu, Nug oɗe oh, aria keeke nau danab ah beɗulag heeg nauhom ele bappaladkkulagnu ɠagattag mattom.

Matyu 26:24

Danab Bekkalag da, Kayak nai atte amubianab da mauhkkul, amge danab nug Danab Bekkalag da, kekeɗ eppelagppa meiɗkku amu, nuhignu gadonnab gadon. Nug anig nug ii menulo am ena,” awa aum.

Matyu 27:5

Ag anam aeg amu, Judas nug men doɗo amu Kayaknu mettid lag ooppa mawe ukke, nug ukka, muɗippa aiha mauhom.

Pilipai 4:3

Amu Sisigos, na oo metta ii uuak kobol dim lamidttem, amu da na amenppa attem,. Na ah aɗit amu, aa Nai Ena mehuqak uɗat haknu da ehaniɗeh, ig oh heut ukkom amunu, na aa ehanatna autna awe! Ah aɗit amu aa Klemen, amu dahilad uɗat laippu laa oh ele, Kayak Nug ag oh ag onilkad buk laa, amuam buk onig Bauklel Awa Onig Yaaknu buk, Nug buk amuppa ag onilkad yom ele amu, aa ag ele Kayaknu uɗat amu ɠagattag heppig.

Hibru 12:23

Amu ag Kayak bekkod tatamnu, Kayak Nug ag onilag matu hab aabppa yom daatteb, ag amu dilag qagmak naɗi amuppa wappig. Ag Kayak, Nug am danab oh epeɗiadtte ele amu, Nug gukkuidna wappig. Amu ag danab anukkanu, Kayak Nug ahilagnu, “Genab tutukku hak danab,” aum, ag mauhadna hab aabppa elelenab daatteb ele amu, ag gemu daatteb, ag oolagppa genab dootteb ele, ag amu gumadna, ahilagppa teppig.

Revelesen 13:8

Danab ag wanppa daatteb ele amu, ag oh nug noobppa dup nona binag menana unuqidkkulag. Yo, danab ah oh, ag onilag Sipsip Nag mauhom ele amu nuhig buk laa, onig Bauklel Awe Onig Yaaknu Buk, buk amuppa ii yaak amu, ag oh doɗ dakkuɗ noobppa dup nona binag mekkulag. Sipsip Nag mauhom ele amu, Kayak Nug anukkanab, wan digma heum haenppa, Nug anam mauhkkunu dabmeum.

Revelesen 17:8

Na doɗ dakkuɗ anidme amu, nug tatam dayom am gemu nug ii daatte, amge dimppa nug moɗ oɗe noa ukka batak iitta eleppanu bekku. Ba amu nug geha padal mekku. Wanppanu danab ah laala ag buk laa, amuam buk onig Bauklel Awe Onig Yaaknu Buk, Kayak Nug wan digma heum, haen amuppa ag onilkad buk amuppa ii yaak ele, ag doɗ dakkuɗnu ottaina dabmak kuɗum aoglag. Aɗinu? Anukka nug dayom, gemu ii daatte dimppa nug moɗppanu bekku.

Revelesen 20:12

Da aakku danab mauhadppig, okkai nakok ele oh, Nug noobppa hippaidna daaegeg anadmi. Nug buk laala kolattom amu buk laa, amuam buk onig Bauklel Awe Onig Yaaknu Buk, Nug buk amu ele kolom. Danab mauhadppig amu ag aɗi heppig, buk laalappa epeɗiaknu amu yaak niitte amuppa epeɗiattom. Amu oh ag aɗi heppig amuppa epeɗiattom.

Revelesen 20:15

Aun laa nug onig buk laappa, amuam buk onig Bauklel Awa Onig Yaaknu buk, nug onig buk amuppa ii yaak amu, laa nug nug aab amegppa buɗie noum.

Revelesen 21:27

Amu keeke oppiak iitta ele aab okkai amuppa ii noma. Laa kobol nau digdig, Kayak nug kobol amunu ooppa uuaknab dootte, amu hambuppuak kobol hette ele amu, nug ele iitta. Am laa ag onilag Sipsip Nagnu buk, amuam buk onig Bauklel Awe Onig Yaaknu Buk, buk amuppa ag onilag yaak daatte ele amu, ag aakkuib aab okkai amuppa nokkulag.

Revelesen 3:5

Aun laa nug ban eɗidkku amu, nug danab ag lamen hakkab tagappig ele, nug ag oolagppa ele daya, lamen hakkab ele tagakku. Da nug onig buk laa, amuam buk onig Bauklel Awe Onig Yaaknu Buk, buk amuppanu ii obipa. Iitta! Da nug da Mamel noobppa, amu engel noolagppa ele nug onig miag akkul.