Luk 1:17 - Nobonob Baibel

¹⁷ Nug Kayaknu propet Elaiyanu hak ɠagattag, ebehi ele, nug amubia awa, Naɗi noob awa, anuqa ukka heeb, danab ag ahilkad nid naunau ele oo mak daaglag. Nug heeb amu, nai tappe nak danab ag oolag eɗueb, ag genab tutukku hak danab dilag doyak dabmak ena ele aon daaglag. Nug heeb, danab ah kuɗum Naɗi uɗikkunu babaittak daaglag,” awa aum.

Luk 1:17 ပူးပေါင်းရင်းမြစ်များ

1 King 17:1

Elaiya nug am propet laa. Nug appag diig am aab onig Tisbe. Aab amuam Gileat wanppa dayom. Haen laappa Elaiya nug King Ahap gumitta ukka, amegppa inam aum. “Yawe, ig Israel, ihinig Kayak, da nuhig maɗi nid daattem, amu Nug genab bau daatte, genab amubia amu, geha gu, baito ele maɗ laala wanppa baula ii nema. Anam dayebeb ukkeb, geha da appi, amu nekku,” awa aum.

1 King 18:18

Nug anam oɗ mette, Elaiya nug Ahap aum, nug amu nob ma inam aum. “Da iitta, da Israel uug laa ii mattami, amge na, amu na mamen ele, aa, amu aa baelti ele, ag Israel uug mattaegeg uɗie, gemu ele hetteb. Aɗinu? Ag Yawenu haknunab nai tappaeg ne, ag kayak hambuppuak Bal iɗu iɗu noolagppa dup nona binalag meegeg uɗie, gemu ele hetteb.

1 King 21:20

Elaiya nug Yawe nai aum amu awa, nug Ahap gumitta ukkom. Ukka te amu, haen Ahap nug Elaiya antta, nug inam amegppa aum. “Kekeɗ dahil na, na eɗun dahilppa bemete?” awa aum. Awa a amu, Elaiya nug aum. “Ao, da na maditte uɗimi. Aɗinu? Na kobol eheɗib nahip ɠagattag ohppa hekkutnu dabmenan oittem. Yawe Nug nuhig neekkakppa kobol amunu am nauib dootte.

2 King 1:16

Elaiya nug ukka ta, king amegppa nai imu mattia aum. “Yawe Nug inam atte. ‘Na aɗinu danab otiatte, ag Ekron dilag kayak Balsebup oɗ mettaglagnu goppig? Israel dilagppa amu, Kayak laa, na Nug oɗ medakkutnu iite daatte? Na amu heme amunu, na geha niittemppa, anam niikkut. Na geha bau eɗun, ena ii daamna. Iitta. Genab, geha na mauhkkut,’ ” awa aum.

1 Stori 29:18

O Yawe, ig mamenkad aɗi, Abraham, Aisak, Israel ele dilag Kayak, na heppe, nahipad danab ah ag hanhan, alet ele oolag enappa, oo qak iitta eleppa keeke na mettaglagnu, na heppe, ag nahipib dabmena oo metta ii uuak kobol dim lamidkkulagnu dabmak aɗan oiglagnu oɗ medattem.

2 Stori 29:36

Hesekaia, danab ah oh ele ag eɗun, Yawe waappa daaglagnu dabmeppig, ag Nug laugppa amu hena, Nug laugppa doɗ manadna, Nug medappig amu, ag keeke amu oh paha heppig, ag qinonob ii heppig amunu, Kayak ehanatte, ag amu heppignu gamag ahak okkai dooppig.

Sam 10:17

O Yawe, na daɗek danab ah, na ahilag oo hak amu, na amu doottem. Ao, na ag ahilag unuqittak doona, ɠagattag madattem.

Sam 111:10

Danab nug Yawenu ebehi oh bodoetta le mette ele amu, danab amu nug digma, doyak dabmak ena ele aokkunu hette. Ao, danab ah oh ag Yawenu oo yaak nai ɗo bia dim lamidtteb ele amu, ag diignu doyak tutukku ele. Ag Nug binag hanhan meig!

Sam 78:8

Am ag mamelkad aɗi bia ii hemana. Ao, ag alalkad ag oolag ɠagattag eppe, nai tappaeg ne, ii dim lamidppig. Ag oolagppa Kayak, nuhigib ii dabmena, oo metta ii uuak kobol ii dim lamidppig. Ao, ag Nugib dim lamidkkulagnu oo metta ii uuak kobol ii dim lamidppig.

Aisaia 29:24

Laa ag dabmak tutukku iitta ele ag diignu doyak tutukku aoglag. Amu laa ag dahil nai dim lamidkkulagnu uug doon nai heppig amu, ag da oɗel aon, dim lamidkkulag.” Yawe Nug anam atte.

Amos 4:12

Yawe Nug anam ana amu, Nug ele atte. “O Israel danab ah, ag anam aakku heegeg uɗie, gemu ele hetteb amunu, da bu okkai ag madakkul. Ge, da bu okkai madakkul amunu, O Israel danab ah, ag da, da ahilag Kayak, ag da uɗal tekkulagnu babaitteg!” awa atte.

Matyu 11:14

amu ag nai amu oolagppa genab dootteb dayeb, ag imu oolagppa genab dooglag. Elaiya uɗikkun appig amu Jon aakku.

Matyu 3:3

Anukka propet Aisaia nug Jonnu inam mattia aum. “Nug am baag laa atu taɗakppa dayaya, nai inam ewa atte. ‘Ag Naɗi uɗikkunu ib babaitteg! Ao, ag ib tutukku, tak nak iitta ele nuhignu babaitteg!’ ” Aisaia nug Jonnu anam aum.

Matyu 3:4

Amu Jon nug lamen kamel uɗigppa hak ma, nug imuagppa matagiɗ doɗ gaɗappa hak ele tagattom. Nuhig ee am atuppanu uppuh leppu, tap-lokus ele.

Luk 1:16

Dimppa nug heeb, Israel danab kuɗum ag Naɗi, ahilag Kayak, ag nuhig kobol dim lamidkkulagnu dabmebeppeg, ag oolag eɗukku.

Luk 1:76

Sekaraia nug anam ana, nug nai baula tuɗitta aum. “O nid dahil, na Naɗinu ib bappaidkkutnu, na Kayak, Nug danab nuhikkud hipunin uhuqa mettak ibppa eɗua diikkunu ippunadkkutnu amu na Naɗi noob aon, anuqna gokkut amunu ag nahipnu, ‘Nug am Kayak Attannab Laa Oh Eɗattaknu propet,’ aon akkulag

Jon 1:13

Ag tiig makkulakppa o beɗunu kobolppa, o danabnu dabmakppa Kayak bekkod ii beppig. Iitta! Kayak Nug he, ag Nug bekkod beppig.

Jon 1:34

Da Jesusnu amu beum anidmi, amu da nuhignu da iikku attem, Nug am Kayak Bekka.” Jon anam aum.

Jon 3:28

Ag akka ele anukka da inam mattiyi doon malappig. ‘Da am Kristus iitta, amge Kayak da meiɗe, da nuhig ib bappaidkkulnu anuqe uɗimi.’

Aposel 10:33

Nug anam a amu da paha hei, danab laala na omaidkkulagnu ukkaeg, am na ena hena uɗime. Aria, ig oh Kayak noobppa inam daatta amu, Naɗi nuhig nai oh Nug na appe doognignu a doome ele amu, na appe doognignu daattem.” Kornilius nug Pita amegppa anam aum.

Rom 9:23

Nug amu heumnu diig am, amuppa Nug laa Nug ahilagnu oo gai-iita doya oo metta ehanittak kobol dim lamittom, Nug ag anukka Nug ele daaglagnu tituanattom amu, Nug nuhig binag amahlak oppiaawak okkainab ele ippuanattom.

Kolosi 1:12

ag ig Mamenig amegppa, “Ena heme,” akkulag. Aɗinu? Nug he, ag keeke oh, Nug ag aoglagnu tituanom amu, ag amu aoglagnu elele daatteb. Ao, geha ag, amu Kayaknu danab ah oppiaawak ele laa ele, ig oh nuhig ɗo maɗoɗ, amahlak ele ooppa daattem amu, ig oh ele aognig.

2 Timoti 2:21

Amunu amubia danab laippu laa nug kobol nau oh amu lamitte ukke, nug oppiaawak daatte dayeb amu, nug am tappiɗ, nuhignu enanag dootteb, amubia nug Kayak amegppa enanag daakku; nuhig uɗat hekkunu elele. Nug aɗi uɗat ena oh hekkunu babaittak daakku.

1 Pita 2:9

Amge ag Kristen danab ah amu, ag gatatuppa daaegeg, Kayak Nug diia amahlak enappa maattom, ag Nug ahilagppa ena heum, ag amu miag atiglagnu Nug ag tituanatte daanna, ag am mana mettak danab, king ele daatteb, ag am danab ah Kayaknu ɗo maɗoɗppa daatteb, ag danab ah nuhikkudnab ele daatteb.

1 Jon 2:28

Ao, nid naunau dahilad, haen Nug miag atieb, ig ɠagattag daagnignu, ig uɗa nak ele ii aomtanu amu, ag Nug ele laippu dayeg!

Revelesen 20:4

Amu da sia king laala anadmi. Kayak Nug laala ag hettoɗiakppa danab ah epeɗiadkkulagnu uɗat mattom ele amu, ag sia king laala amuppa daappig. Daaegeg amu da laala ag Jesusnu oolagppa genab doonna, Nug onignu madippig, ag Kayak nai ɠagattag aɗappig amunu ag baalag otaɗppig ele amu, da ag dottolag anadmi. Danab amu ag doɗ dakkuɗ dottog noobppa ii dup nona binag meppig; ag uɗalkadppa eppelkadppa ele nuhig epponak keeke ii aoppig. Danab amu ag eɗun hippaidna bauklel aona, Kristus ele gumak uɗat maɗ 1,000 henan daappig.

1 Samuel 7:5

Israel ag anam heeg, Samuel ag aab onig Mispa, appa gokkulagnu anana, nug ag amelagppa aum. “Mispa appa da Yawe ag ehanadkkunu unuqidkkul,” awa aum.