Lewitikas 26:9 - Nobonob Baibel

⁹ Da geha ahilagnu ena heinne, ag nid madappi, danab kuɗum beppeg, amuppa da hei, da ag ele nug tituana nai qakkak hemut amu, nai dahil amu meu okku.

Lewitikas 26:9 ပူးပေါင်းရင်းမြစ်များ

Genesis 1:28

Haatowa amu, Kayak Nug itatata aum. “Aa appatpeɗ, aa buɗulti atu oh tonan malan, daan oiyeg! Oinna, ag keeke oh, doɗ dakkuɗ, aabppanu doɗ, doɗ naunau, kakai, ai oh ele, ag amu oh gumatteg!” awa aum.

Genesis 17:20

Aria, na Ismaelnu ame amu, na ame am da doomi. Da nug ele itidkkul. Da heppi, nug buɗub elab bekku. Danab okkai 12 nug buɗub ooppa bekkulag, amu nug buɗupud ag appatna, huu okkainab, ɠagattag ele daaglag.

Genesis 22:17

amunu, diig amunu da genabnab genab na itidkkul. Da itidppi, na buɗunad ag appatna, abuɗ le ihippa, o hoɗoppai bia kuɗum daaglag. Ag kekeɗ eɗadna, ahilkad aab diiglag,

Genesis 26:4

Abraham nug da oɗel, ɗo iɗu iɗu dahil, dahil haknunab anak ele dim lamittom amunu, da heppi, na buɗunad ag kuɗumnab, hoɗoppai bia daan oippeg, wan imu oh da ag madakkul; amu da heppi, na buɗunppa wan ohppan danab ag itittak ena aoglag,” awa aum.

Genesis 28:14

Na buɗunad ag wan gappud bia appatna, wan aben imuppanu qaban uɗitteppanu daatte, wan kaɗag uɗitteppanu daatte, wan yawalti uɗitteppanu daatte, amu wan yau uɗitteppanu daatte ele aoglag. Aoppeg amu, wan laa ohnu danab ag na, na buɗunadppanu ele itittak ena aoglag.

Genesis 28:3

Da Kayak Nukka Ɠagattag Oh Ele Nug na ititteb, na buɗunad kuɗumnab bena, huu okkai anen anen oh laippu daaglag,

Genesis 48:4

nug nai inam da amelppa aum. ‘Da heppi, na buɗunad kuɗumnab bena, huu okkai anen anen oh laippu daaglag. Wan imu amu, da na buɗunad madappi, ahilag wan hanhan daakku.’ Nug anam awa, da amelppa aum.

Genesis 6:18

Amge da heppi, na ele nug tituanɗa nai qakkagnih ⌊amunu, diig amunu⌋, na, ah nahip, amu na begapad, ag waalkad ele amu, ag uub ooppa nokkulag.

1 King 3:8

Da, nahip maɗi nid, da gemu danab ah ameg imu oolagppa iikku daattem. Ag am nahipad, na ag nahipad tituanadme daatteb. Ag am huanaknab, ebaqaknu elele iitta.

2 King 13:23

Amge Yawe Nug Israel dilagnu oo bodoette enanag maɗoɗ ele hak kobol dim lamitta, Nug ahilagnu ele oo bodoetta le meum. Nug nug tituana nai qakkak anukka Abraham, Aisak, Jakop ele heppig amu, Nug amu dabmeum amunu, Nug Israel ehanatta, Nug ag eheɗ ii hatta, Israel Nug noobppa daatteb amu lamatteb, laih gokkulagnu Nug oo ii dayom. Iitta. Tatam, gemu ⌊nai imu yaak haenppa⌋ ele, anamib.

Nehemaia 2:20

Ag anam appig, amge da ag amelagppa ami. “Kayak hab attan daatte, Nug ehanigkku. Nug ehanikkeb, ig uɗat imu malagnig. Ig am nuhikkud maɗi nid, amu ig uɗat imu digmeta hekkunig, amge ag, ag appalag diig am Jerusalem iitta. Laa amu, ag, o ag mamelkad, o ag dokkialkad, o ag memetalkad anukkanu ele ag ippa ii daappig amunu, imuam ahilag keeke iitta,” awe ami.

Nehemaia 9:23

Ge, na hee, ig mamenkad aɗi ag huana appategeg, ag bekkalkad am huanak, hoɗoppai dilag ebqak bia daaeg, wan laa, na wan amu ag mamelkad aɗi mattan, ag gona aon daaglagnu ame amu, na diie, wan amuppa goppig.

Sam 107:38

Nug ag itatta autanab awe, ag baelkadppa kuɗum ele daappig. Ahilkad makau ele abategeg, kuɗumnab daappig.

Sam 89:3

Na ame. “Da danab laa epeɗimi ele amu, da hei, da nug ele nug tituanɗa, nai qakkamuɗ. Yo, da dahil maɗi nid Dawit, da nug amegppa keeke laa hekkulnu dahil nai ɠagattag qetten ami.

Eksodas 1:7

amge Israel danab ah ag buɗub buɗub doodo, nid huana menuadna, appatna, kuɗumnab daappig! Genab, ag appatna, huu ɠagattagnab bena, wan ag daappig ele oh tonappig.

Eksodas 2:25

Kayak Nug amu dabmaama, Israel neekkatta, ⌊ag naunab daaegeg antta,⌋ Nug ahilagnu oo doye, ⌊Nug ag ehanadkkunu dabmeum⌋.

Eksodas 6:4

⌊Ag da dooiɗkkulagnu amu, da onil Kayak Nukka Ɠagattag Oh Ele ippuanatten,⌋ da hei, da ag ele nug tituanta nai qakkamut. Nug tituana nai qakkak nai dahil amuppa amu, geha da Kanan wan ag madakkulnu ami. Haen ag appa daappig amu, ag wan amuppa aab aon daappig, amge wan amu ahilag iitta. Ag am wan laihnu danab ah.

Aisaia 55:3

⌊O dahilad danab ah,⌋ ag daulag human, da dooiɗna, ag dahilppa uɗieg! Ag bau daaglagnu amu, ag dahilppa doig! Ag anam heppeg, geha da Yawe, da Dawitnu oo mauhaknab doyen dim lamidkkulnu dahil nai ain qakkami amu, da ahilagnu oo mauhaknab amuib dim lamidkkulnu heppi, da ag ele ig nug tituanta nai qagapput, nai qakkak amuam iitta ii mema.

Jeremaia 23:3

Am da hei, danab ah dahilad ag wan laalappa gona, danab ah amu oolagppa oɗo yaak daatteb amu, geha da dakka danab ah dahilad amu ag huu ameg nakok daatteb, da ag qagmaadkkul. Da geha ag diie, omaladppi, ag eɗun wan ahilagppa uɗin daanna, am geha ag kuɗum menuadna, ag appatna, ag kuɗumnab daaglag.

Jeremaia 23:4

Amu da Yawe, da geha gumak danab huu bau laa otiadppi, ag geha danab ah dahilad, ag sipsip bia amu, ag ag ena gumadkkulag. Ag ena gumadppeppeg, ag keeke laanu ii baɗamna. Keeke laa heeb, ag baɗak eheɗ nau ii doomna. Am geha ag oolagppa laippu laa ii padal mema; iitta,” awa atte.

Jeremaia 33:3

‘Juda danab ah, ag da unuqiɗppeg, da unuqittak ahilag nob matten, da keeke okkainab, ag ii dootteb ele, danab ah ag ahilag dabmakppa mattin anidkkulagnu elele iitta, da keeke okkainab amu ag ippunadkkul,’ ” awe attem.

Esekiel 16:62

Haen amuppa da heppi, i nug tituanɗa nai qakkagnih, amu haen amuppa da dahil nai ɠagattag qetten akkul amunu, na dookkut, da am Yawe.

Esekiel 36:9

Aɗinu? Ag qauko, da ahilagnu dabmettem; da ag ena neekkadkkul. Danab ag ahilag wan buunna, ee eppaglag.

Lewitikas 26:15

ag dahil ɗo iɗu iɗu uun, ɗo amunu oolagppa ena iinab dooglag dayeb, ag dahil nai haknunab attem amu dim ii lamidna amu, ag nug tituana nai qakkak am tippalkkulag. Ag keeke amu hekkulag dayeb amu,

Duteronomi 28:11

Yawe Nug ag wan madakkunu ag mamelkad aɗi amelagppa anam hekkunu nuhig nai ɠagattag qetta aum, amuppa keeke ena ena ma madakku. Amuam nid naunau kuɗum, doɗ manan kuɗum, amu keh iɗu iɗu kuɗum ele madakku.

Duteronomi 28:4

Yawe Nug itittak ena matteb, ag nid kuɗum ele daan, ahilkad dad ele, am ee okkai okkulag. Yawe Nug heeb, ahilkad makau huana menuadppeg, sipsip meeme ele am anamib ele daaglag.

Duteronomi 7:13

Nug ag ahilagnu oo mauheb, ag itatta heeb, ag appatna, kuɗum bekkulag. Nug geha heeb, ag nid naunau kuɗum ele daappeg, Nug heeb, wan ahilag ittag ele dayebeb, doɗ ele ag mattoi ii daamna. Haen ag wan Nug ag mamelkad aɗi madakkununab nuhig nai ɠagattag qetta aum ele, amuppa nona amu, ag en kuɗum ele daaglag: amuam ee aeg, wain bau, olip goɗen, amu makau, sipsip, meeme ele, ag amu kuɗum ele daaglag.

Hibru 8:9

Nug tituana nai qakkak bau amu, da tatam ag mamelkad aɗi anukka haen da eppelag aɗen omalatti, Isip wan uun, ahan goppig ele, haen amuppa da ag ele nug tituanta nai qakkamut, am amubia iitta. Haen amuppa amu, ag nug tituana nai qakkak nai dahil ii dim lamidppig amunu, da dimattami.’ Naɗi anam awa atte.”