Lewitikas 21:7 - Nobonob Baibel

⁷ Am mana mettak danab ag ib baag ah laa, ah amu nug nuhig hak amuppa amu dahil neekkakppa nug ooppa dubuttid teum daatte ele, amu ag ah amu ii aoglagoitte. Ag ah laa, nuhig ewau matulak awak otaɗak ele amu, ag nug ele ii aoglagoitte. Amunu diig am, mana mettak danab ag Kayaknu oppiaawak ele daatteb.

Lewitikas 21:7 ပူးပေါင်းရင်းမြစ်များ

Genesis 38:24

Aria, kalam ewam keeke dimppa, danab laa nug Juda amegppa aum. “Na ahipan Tamar nug ib baag ah hette bia danab laa ele oiyya, oo noum,” awa aum. Awa a, Juda nug aum. “Ag aon dona, dimittim aab aɗuppa manappeg mauhaɗ!” awa aum.

Aisaia 50:1

Yawe Nug atte. “Danab laa nug wau nuhigppa eheɗ heum doya he, aha gotte amu, da amubia hemi amunu, ag gona, wan laappa maɗi nid daattebte? Iitta! O iitta, danab laa nug laa eppegppanu lon awa, eɗua medakkunu elele iitta amunu, lon mameg nug danab lon awom wau, bekkod ele laanu maɗi nid daaglagnu me, daden mette ele amu, da anam bia hemi amunu, laa ag Juda, ag ag diiadna goppigte? Iitta! Amu ohnu am iittanab iitta! Ag hipunin heppig amunu, ag laa eppegppa daatteb. Ag hipunin heppig amunu, ag gona, diia ukka laih me dayak danab ah wan laappa daatteb.

Esekiel 44:22

Mana mettak danab ag ah laa, gamu lamittom, o mana mettak danab iitta laa mauhe, wau hamu daatte ele amu, ag ah amu ii aomna. Iitta. Mana mettak danab ag Israel buɗubppan ah danab laa ele ii niipiɗ, o mana mettak danab laa mauhe, wau hamu daatte, ag ah amu aakkuib diiglag.

Lewitikas 21:8

Ag laa amu, ag mana mettak danab ag ahilag doɗ manan Kayak medatteb amunu, ag ahilagnu, ag am Kayaknu oppiaawak ele daatteb doyeg! ⌊Yawe Nug amunu inam aum.⌋ ‘Ag mana mettak danab dilagnu, “Ag Kayaknu oppiaawak ele daatteb,” dabmenana oiglagoitte! Aɗinu? Da, Yawe, da oppiaawak dayeye, da hei, ag dahilad danab ah, ag dahilnu, oppiaawak daatteb.’

1 Timoti 3:11

Amu ag waalkad ele ag ah danab laa ag ahilagnu ena elele dooglagnu elele daanna, ag baeg qak nai ele aib madippig. Ag tutukku oinna, amu ag hambuppuak kobol laa ele ii hemana.