Kolosi 3:9 - Nobonob Baibel

⁹ Amu ag lailkad aib buppualadppig. Aɗinu? Ag oolag alagnu kobol oh am uuna,

Kolosi 3:9 ပူးပေါင်းရင်းမြစ်များ

Prowerb 13:5

Genab tutukku hak danab ag hambuppuak kobolnu ag oolagppa nau ninig ele dootteb; amge nau hak danab ag uɗa nak kobol, amu uɗa nak nau guittak ele kobol hetteb.

Aisaia 63:8

Yawe Nug nuhikkud danab ah dilagnu, Nug aum. “Genab, danab ah imuam dahilad. Ag am da bekkalad, ag da ii buppuiɗmana,” awa aum. Nug anam aum amunu, Nug ahilag Padal ii maknu ehanittak beum.

Lewitikas 19:11

Ag aib yab heppig. Ag aib nai hambubuppig. Ag aib lailkad dilagppa ameg qakkak kobol heppig.

Sepanaia 3:13

Israel oɗo yaak danab ah daaglag amu, ag eheɗ ii hemana; ag hambuppuak nai ii mattimna, layag laa ele ii buppuidmana. Aɗinu? Ag sipsip ee lawona niitteb, amubia ag daanna, ag uug laa ii doomna; laa heeb, ii baɗamna.” Yawe Nug anam awa atte.

Sekaraia 8:16

Amu Nug ele atte. “Amge ag Israel danab ah, ag imu hekkulagoitte. Ag akka ag ihuhun mattin, ag nai genabib akka akka ahilagppa mattieg! Ag aib nug buppuidppig. Hettoɗiakppa amu, ag nai doya mala hettoɗia epeɗia elele mettak kobol dim lamitteg!

Jon 8:44

Ag mamelag am Satan; ag nug bekkod daatteb amunu, ag mamelag oo niitte amu, ag dim lamidkkulagnu wagai metteb. Nug wannu digmak haenppanu danab aqe mauhtteb. Ag mamelag nug doyak diig genabib ii dim lamidtte. Aɗinu? Doyak diig genabib amu nuhigppa ii daatte. Nug hambuppuak nai mattiaya amu, nug nuhig diig aakkuib dim lamidtte. Aɗinu? Nug nai hambuppuak maditte, nug nai hambuppuak mamegnab ele daatte.

Rom 6:6

Amu ig doottem, ig oonig alag, ihinig oiyak alag amuppa beum ele, nuhig ɠagattag ig duttunigmanu, ig ele hipuninnu begbeg maɗi nid ii daamtanu, Kristus ad emaitakppa mauhom, haen amuppa ihinig oiyak alag am ele appa Nug ele mauhom.

Epesus 4:22

Anam amunu, ag nai aoppig bia, ag oolag alag, nug dabmak eheɗ awa, kobol nau digdig hekkunu dabmaama, mauhkkunu hette ele, nug he, ag matu nuhig dabmak dim lamidppig ele amu, ag oiyak amu uueg!

Epesus 4:25

Ag kobol hambuppuak uueg! Ag nai genabib laa amelagppa mattieg! Aɗinu? Ig am beɗu laippunu laih kuɗum daattem.

Kolosi 3:8

amge ag Jesus ele bau hippaidppig, ag kobol amu oh uuppig amunu, ag gemu oo nauhak kobol, oppoɗi be ameg kokoɗ eppak kobol, oo aeg bak kobol, baeg qak kobol, amu nai nau mattiak kobol ele, ag kobol amu oh ele agappeg ukkeg!

1 Timoti 1:10

am laa ag ewau pakkun gappai hetteb dilagnu, am laa ag danab danab o ah ah ele gappai hetteb dilagnu, am laa ag danab laa yabhok hippaladna dadennu maadtteb dilagnu, am laa ag nai hambuppuak danab dilagnu, am laa ag hettoɗiakppa hambuppunna, “Genab iikku attem,” aon atteb dilagnu, amu laa ag keeke laala amubia, keeke amu oh am ippunittak nai genab ena elenu kekeɗ daatte, danab ag amu hetteb ele amu, ɗo nug danab amu dilagnu daatte.

Revelesen 21:27

Amu keeke oppiak iitta ele aab okkai amuppa ii noma. Laa kobol nau digdig, Kayak nug kobol amunu ooppa uuaknab dootte, amu hambuppuak kobol hette ele amu, nug ele iitta. Am laa ag onilag Sipsip Nagnu buk, amuam buk onig Bauklel Awe Onig Yaaknu Buk, buk amuppa ag onilag yaak daatte ele amu, ag aakkuib aab okkai amuppa nokkulag.

Revelesen 21:8

Amge laa ag baɗanna, akka ahilagnu dabmena hak kobol dim lamidna, laa ag oolagppa genab doyak iitta, laa ag kobol nau uɗig wak hetteb ele, laa ag danab aqaeg mauhtteb, laa ag gappai kobol hetteb, laa ag baɗ mak danab, laa ag dup noa kayak hambuppuak binag mak danab, amu nai hambuppuak danab oh ele, amu oh aab ameg kalu laa huana eotte onig salpa eotteppa, ag amuppa aben aoglag. Amuam mauhak ebqak 2 aakku,” awa aum.

Revelesen 22:15

Amge baɗ mak danab, gappai danab, qe mauhak danab, kayak hambuppuak binag mak danab ele, amu laa oh ag hambuppuak kobol oolag mettan hetteb ele, ag Kayaknu aab okkai dimittim qai bia daaglag.