Josua 24:15 - Nobonob Baibel

¹⁵ Anam, amge ag Yawe waappa daan, Nug oɗe dim lamidkkulagnu oolag ii daatte dayeb, ag gemu aun dim lamidkkulagnu amu dabmak aweg! Ag mamelkad aɗi Mesopatemia daanna, kayak laala waalagpa daan, oɗe dim lamidppig, amute, o iitta, Amo danab, wan ag amuppa gemu daatteb ele, ahilag kayak waalagppa daan binalag mekkulagtai. Ag amu hekkulagtai, amge da, da baeladppa ele amu, ig Yawe waappa daatta, Nug oɗe dim lamidkkunig,” awa aum.

Josua 24:15 ပူးပေါင်းရင်းမြစ်များ

Genesis 18:19

Aɗinu? Da Abraham doottem, nug, nug bekkod, nug laugppanu ele, ag da, Yawe, ag dahil ib dim lamidkkulagnu ippunadkku. Ippuanatteb, ag kobol tutukku, amu nai doya mala hettoɗia epeɗia elele mettak kobol ele dim lamidkkulag amunu, da nuhigppa aɗi hekkulnu nai ain qakkami amu, da amu hekkul,” awa aum.

Genesis 35:2

Kayak Nug anam a amu, Jakop nug nuhikkud daup amelagppa aum. “Ag laa dilag kayak hambuppuak ahilag oh ig ele daamnanu hena, ag oppiak daaglagnu hena, ag lamen ihak ele takkeg!

1 King 18:21

Am Elaiya nug aha, Israel danab ah gumatta wana, nug amelagppa aum. “Ag danab ah, ag ahilag dabmak am ib piɗe piɗenu. Ag ib aɗitnu dabmak ele. Haen gane laa ele ukkeb, ag geha ahilag dabmak ib laippu ele daaglag? Amu Yawe, Nug Kayak genab daatte dayeb amu, ag nugib dim lamidkkulag. Amu Bal nug Kayak genab daatte dayeb amu, ag Bal nugib dim lamidkkulag,” awa aum. Amge danab ah ag nai amu nob laa ii meppig. Iitta.

1 Stori 1:14

Jebus danab, Amo danab, Girgas danab,

Sam 101:2

Da na noomppa nahip neekkakppa da oolppa kaliak laa iitta ele oikkulnu wagai mein hekkul. Na ganeb dahilppa uɗikkut? Da daattemppa amu, da na noomppa danab ooppa kaliak laa iitta ele daakkulnu oolppa dabmein oikkul.

Sam 119:106

Da nahip ɗo, ag genab tutukkuib amu, da ɗo amu dim lamidkkulnu nai ɠagattag qetten ami. Da amu ain, da amuib hekkulnu baula ɠagattag ami.

Eksodas 23:2

Danab kuɗum ag kobol eheɗ hekkulagnu dayeb amu, ag laa ag ahilag kobol amu aib dim lamidppig! Aria, haen danab kuɗum ag hettoɗiakppa ahan, nai doya mala hettoɗia epeɗia elele mettaknu kobol heppeg na qekkunu nai kuɗum madippeg amu, ag laa, ag amu dilag nai am aib dim lamidppig! ⌊Iitta. Ag nai tutukku aakkuib mattieg!⌋

Eksodas 23:24

Ag amu dilag kayak hambuppuak noolagppa aib dup nona binalag meppig. Ag kayak hambuppuaknu dabmak ele aib dim lamidppig. Ag kayak hambuppuak dottolkad aoɗna, maduduɗadna, heppeg nauhppeg, men gappi ele heppeg nauheg!

Eksodas 34:15

Amge ag tutukku dabmeig! Ag danab ah wan ag gemu gona aoglagnu hetteb, ag aguppa daatteb amu, ag Israel, ag danab ah amu ele aib nug tituanppig! Danab ah amu ag kayak hambuppuak noolagppa dup nona binalag metteb amunu, ag danab amu ele nug tituankkulag dayeb, haen danab amu ag ahilkad kayak hambuppuak noolagppa dup nona binalag menana, ag doɗ ele main ag mattaglag, kobol amuam dahil neekkakppa gappai aɗa oiyak kobol bia daatte amu, ag amu henana, haen amuppa ag Israel, ag ag ele oh laippu qagmena, geha ag doɗ main, kayak hambuppuak mettaglag, amu ag oh teppu amu lakkulagnu appeg, ag gona, ag ele teppu amu lakkulag. ⌊Amu amuppa ag kayak hambuppuak noolagppa dup nona binalag mekkulag amunu, ag aibnab ag ele nug tituanak heppig.⌋

Esekiel 20:39

O ag Israel danab ah, ahilagnu amu Naɗi Yawe, Nug inam atte. “Ag anen anen ohnab, ag gemu gona, ahilag kayak hambuppuak noolagppa dup nona binalag mattaglag, amge qinob dimppa amu, ag genabnab dahil nai doon, ag baula ahilkad kayak hambuppuak noolagppa dup nona binalag ii memana, ahilag daakkunu keeke ele ii mattamna. Ag amu oh ii heppeg, amu haen amuppa da onil oppiaawak ele laa dilag neekkakppa hamu bia ii daama,” awa atte.

Daniel 3:18

⌊Ihinig Kayak Nug amu hekkunu elele⌋ amge, O king, Nug amu ii hekku dayeb, amuam ihinig dabmak heeb, ii eɗuma. Ig na imu dookkutnu oonig daatte. Ig nahipad kayak noolagppa dup nota binalag ii memata; dottog golppa hak, na qappame amu, ig amu ele noobppa dup nota binag ii memata,” aon appig.

Lewitikas 14:42

Anam hewona amu, ag men baula men tatamnu amu abenppa mekkulagnu aon mewona, ag gilil qaɗeppa simen gililppa laittaknu laidkkulagoitte.

Maika 4:5

Anam amunu, danab ah wan atu laih ohnu, ag ahilkad kayak hambuppuak onigppa oiglagnu oolag heeb, anam oiglag, amge ig Yawe, ihinig Kayak, ig Nug onigppa hanhan oignig.

Aposel 11:23

Haen nug Antiok ukka teum amu, nug danab ah ag Kayaknu ehanittak okkai hamu mettak, ag ehanittak amu aoeg, ag oolagppa uɗat heehe, ag Kayak dim lamidppig antta amu, nug oo gamag ahe, dabmak aoglagnu, ag hanhan ag oolag Naɗiib mettan oiglagnu ɠagattag aqom.

Duteronomi 13:7

Kayak amuam danab ag wan amuppa talilidna daaglag, laa ag guguittak daaglag, laa uma daaglag, am amu dilag kayak.

Duteronomi 29:18

Ag anam anadppig amunu, ag oolagppan laa, am danab laate, o ah laate, o aab ikki laate, o Israel dilag huu okkai laate, amunu laa nug Yawe, ihinig Kayak, nug Nug dimetta, laihnu danab amu dilag kayak hambuppuak noolagppa dup noa binag mak kobol hemanu dabmeig! Ge, diɗi laa keeke nau aɗit he bettep, laa am uud tiig mua nau ele, laa am uud ad tiig mua ele, diɗi amu keeke amu he beya, keeke heeh nauhtteb, amubia kobol nau ahilagppa bemanu ag dabmeig!

Josua 24:16

Josua nug anam aum, amu danab ah ag nob mena appig. “Ig Yawe uuidta, kayak laa waalagppa daata, ag oɗelag iinab dim lamadmata.

Ikki Danab 6:10

Da ag amelagppa ami. “Da am Yawe, ahilag Kayak. Ag Amo danab, gemu ag ahilag wanppa daatteb ele amu, ag amu dilag kayak noolagppa dup noa binag mak kobol ii hekkulagoitte,” ami, amge ag da ii dooiɗppig.’ ” Propet nug Kayak nai amu, danab ah amelagppa aum.