Jon 4:14 - Nobonob Baibel

¹⁴ amge laa nug le da medattem ele imu, nug amu lakku amu, nug baula le baag ii diima. Iitta. Le da medakkul ele imu am, le moɗ bia nug ooppa baaba daakku. Anam haen oh qeppuɗia baaba, nug bauklel hanhannu medakku,” awa aum.

Jon 4:14 ပူးပေါင်းရင်းမြစ်များ

Aisaia 49:10

Ag gobeppeg, enug ii aqama; le baalag ele ii diima. Atu taɗaknu aam gakkaɗak ele ii aqama. Aɗinu? Laa ag oo madatte amu, Nug ag ulum madatta, Nug ag le qeppuɗia betteppa omalatta gokku.

Aisaia 55:1

Yawe atte. “Oe! Ag aun aɗi, ag le baalag diitte, ag leppa uɗin le laig! Ao, ag aun aɗi oh ag men doɗo iitta ele, ag amunu aib dabmeppig; ee ippa ina daattede, ag uɗin laig! Ge, ag men doɗo iitta ele, ag uɗin, wain, huh ele hamu aon laig!

Aisaia 58:11

Ag amu hekkulagnu dayeb amu, Yawe Nug ulum matta, atu taɗak gakkaɗak nau eleppa Nug le, ee keeke, ag bau daaglagnu laa ele madakku. Nug ag beɗulag ele ɠagattag madakku. Nug amu heeb, ag dad le elelenab aotte bia daaglag. Ag le qeppuɗia bette, deɗ laa ii qaɗaiedatte amu, ag le amubia daaglag.

Jeremaia 2:13

Aɗinu? Danab ah dahilad, ag hipunin ib aɗit iikku heppig. Laa ag da, da am le bauklel diig amu, ag da uuiɗna, piɗe wana oitteb. Aria, laa amu, ag akka ag le aoglagnu wan moɗ buuppig. Ag amuppa le aoglagnu simen aɗappig, amge simen am aoɗom, le moɗ amuppa le daakkunu elele iitta.

Jeremaia 31:25

Aɗinu? Da heppi, danab ag beɗulag bodoedatte ele, ag ɠagattag aoglag. Da heppi, danab ag gai-iittanab daatteb ele, ag eɗun, ena daaglag.

Esekiel 47:9

Le imu adeppa adeppa gotte amu, doɗ, kakai ele huanaknab aguppa daaglag. Le imuam Mauhak Leppa ugakka heeb, le amu eɗua ena daakku amunu, appa ele kakai huanak daaglag. Anam amunu, le imu adeppa adeppa gotte amu, keeke oh bau huanak daaglag.

Lewitikas 11:36

Keeke amu oh Kayaknu neekkakppa dubuttid ele daatteb, amge doɗ amunu laa mauhom, gaɗa le moɗppa noa qeum dayeb, o le qeppuɗia bakppa noa qeum dayeb amu, le amu Kayaknu neekkakppa dubuttid ii daama. Amge, aun laa nug doɗ gaɗa amu awa, laih mette amu, nug am Kayak ele ouqa dayaknu elele iitta daakku.

Matyu 25:46

Aria, danab amu ag gona, haen ohnu nau awak abenppa daaglag, amge genab tutukku hak danab ag bauklel hanhannu aon daaglag,” awa aum.

Matyu 5:6

Danab aun aɗi ag Kayak noobppa genab tutukku daaglagnu oolagppa enug qak bia dootteb ele amu, ag itittak ena aoppig daatteb. Aɗinu? Ag amu ambak aoglag.

Jon 10:10

Yabhok danab nug yab awak, qe mauhak, amu keeke he nauhak, nug amunuib uɗitte, amge da uɗimi ele imu amu, da ag bau dayak enanag ambaknab madakkulnu uɗimi.

Jon 11:26

danab oh ag bau daan, dahilnu oolagppa genab dootteb ele ag mauhakppa hanhan iinab daamna. Na nai amu ootppa genab doottemte?” awa aum.

Jon 4:10

Ah anam a amu, Jesus oɗeppa awa aum. “Na Kayak Nug ɗo medakkunu hette doolom, amu na danab aun Nug nahipnu, ‘Na le aon doppe lai!’ aum ele, na Nug ele doolom amu, na Nug amegppa appe, Nug na le bauklel ele mettalo,” awa aum.

Jon 4:11

Jesus Nug anam a amu, ah nug aum. “Danab Naɗi, na le itakkutnu hanak iitta, am le moɗ imu ele umanab unuqagnab daatte amunu, na le bauklel ele amu adeppanu aokkut?

Jon 4:13

Ah anam a amu, Jesus oɗeppa awa aum. “Danab oh ag le moɗ imuppanu le latteb ele, ag le lappeg, haen oh le baalag baula diikku,

Jon 4:36

Am laa nug meu aotte amu, nug nuhig uɗat nob awawa, nug danab laala bauklel hanhannu aoglagnu ehanadtte. Ehanadtte amunu, ee eppak danab, amu meu awak danab ele aa oh oolah gamag ahakku.

Jon 6:27

Ag ee aon lappeg, beɗulag ɠagattag qeeb, wan imuppaib ena daaglagnu aib anuqak dooppig. Iitta. Ag Kayak nai aon dabmenan, bauklel hanhannu aoglagnu anuqak doyeg! Mama Kayak Nug da ag amu madakkulnu ɠagattag meɗom amunu amu, Danab Bekkalag da, da ag madakkulnu elele,” awa aum.

Jon 6:35

Aon aeg amu Jesus Nug aum. “Bauklelnu bret am da. Danab nug dahilppa dotte amu, nug enug qak baula ii dooma. Am danab nug dahilnu ooppa genab dootte amu, nug le baag diiak baula ii dooma.

Jon 6:58

Bret imu amu ag mamelkad aɗi maana lappig, amge dimppa mauhppig, am amubia iitta. Bret imu am hab aabppanu neum, am aun nug bret imu latte amu, nug haen oh bau daakku,” awa aum.

Jon 7:37

Hobul amu malaknu deɗ beum, deɗ amuam hobul amunu naɗinab amu, haen amuppa Jesus Nug hibaitta, baag okkaippa ewa aum. “Danab laa nug le baag diieb amu, nug da gumiɗa uɗia, le lanaɗ!

Rom 5:21

amunu, hipunin nug he, mauhak danab tonattom daatte, amubia Kayaknu ehanittak okkai hamu mettak, amuam he, ihinig Naɗi Jesus Kristus, nuhigppa danab ag genab tutukku hak danab bena, bauklel hanhannu aotteb.

Rom 6:23

Hipuninnu nob am mauhak, amge Kayak Nug ig ihinig Naɗi, Kristus Jesusnu uɗatppa bauklel hanhannu ihinig daakkunu hamu megatte.

2 Korint 1:22

Nug ig nuhignab daattemnu epponak keeke nuhig ihinigppa mewowa, ig keeke Nug megakkun babaittom amu genab aognignu amu doognignu, Nug nuhig Ouɗi, keeke lonnu onig awak bia, ig oonigppa meum.

Epesus 4:30

Ag Kayak Ouɗi oo uug aib medappig. Aɗinu? Ag Nug aoppig oitteb amunu, dimppa qagaiettakppanu eɗua uhuqak awaknu deɗppa Kayak Nug uhuqak amu madakkunu, nuhig Ouɗi, epponak keeke bia, ahilagppa daatte.

1 Pita 1:22

Ag gemu ag doyak diig genabib dim lamidtteb, amuppa ag danab oolag ihan oppiak daatteb amunu, ag oo mauhak kobol genabppa ag lailkad dilagnu oolag mauhtte. Ag anam daatteb, amge ag tuɗidna, ag lailkad dilagnu oolkad unuqagppanu oo mauhaknab doyeg!

1 Jon 5:20

Ao ig ele doottem, Kayak Bekka Nug uɗia, ig Mame genab, Nug doognignu diignu doyak tutukku mekkom. Amu laa, Kayak Nug am genab diig, amu ig nuhigppa daattem, amu ig Nug Bekka Jesus Kristus, nuhigppa ele daattem. Kayak Nug am Kayak genab, Nug bauklel hanhannu diig ele.

Revelesen 7:16

Anam amunu, ag geha baula enug ii aqama, le ele baalag ii diima. Aamnu gakkaɗak, aria gakkaɗak nau laala ele ii aqama.

Revelesen 7:17

Aɗinu? Sipsip Nag Nug gamagppa sia king ⌊anuqak⌋ guguittak daatte amu, Nug ahilag gumak danab ena dayaya, geha gumattebeb gona, moɗ laappa, le qeppuɗia bette ele, amuppa ag bauklel le aoglag. Amu Kayak nug geha amelag leb oh amelagppanu obikku,” awa aum.