Jon 14:23 - Nobonob Baibel

²³ Judas laa amu nug anam a, Jesus Nug aum. “Danab laa nug dahilnu oo mauhak dootte dayeb, nug dahil nai ele dim lamidkku. Aria, danab amunu amu da Mamel Nug nuhignu oo mauhkku. Amu da Nug ele, i nuhigppa nepuɗ, ig oh laippu, danab ewam lag laippuppa daatteb, amubia haen oh daagnig.

Jon 14:23 ပူးပေါင်းရင်းမြစ်များ

Genesis 1:26

Kayak Nug anam ha, ena anattowa, Nug aum. “Ig danab ag wan, amu wanppan keeke oh, doɗ dakkuɗ, aabppanu doɗ, doɗ laa ag oolag wan qeeqe oitteb, kakai, ai oh ele, ag keeke amu oh gumadkkulagnu, ig danab ig bia hetu! Ig daattem bia amu, ag amubia dayeg!” awa aum.

Genesis 11:7

Am anam daatte amunu, ig nota hepput, ag nai laippu ii mattinna, dimppa ag akka akka nai ahilag ii doomna,” awa aum.

Sam 90:1

O Naɗi, anukkanab uɗie uɗie, gemu ele amu, na ihinig ena dayaknu aben bia dayeye daattem!

Sam 91:1

Laa nug Kayak Attannab Laa Oh Eɗattak guppiɗ dimugppa daatte amu, nug Kayak Nukka Ɠagattag Oh Ele, nug nuhig dabmettak waappa daakku.

Aisaia 57:15

Aɗinu? Yawe, Nug attannab dayaya, keeke laa ohnab eɗadtte, Nug hanhan daatte, nug onig am oppiaawak ele amu, Nug atte. “Da aben attan, aben oppiaawak ele, da amuppa daattem, amge da danab aun laa, nug nukka nuhignu, ‘Da am danab ena, onil okkai ele,’ ii dabmette, nug nukka nug onig qe nette amu, da danab amu ele daattep. Da danab nug nukka nug onig qe nette amu, da nug ooppa ɠagattag qedakkulnu, da anam hettem. Ao, da danab nug nukka nuhignu, ‘Da am danab ena, onil okkai ele,’ ii dabmette amu, da nug nuhig ouɗippa ɠagattag qedakkulnu, da anam hettem.

Jon 10:30

Da Mamel ele amu i am laippu,” awa aum.

Jon 14:15

Am ag dahilnu oolag mauhtte dayeb, ag dahil haknunab anak dim lamadkkulag.

Jon 14:17

Nug am Kayak Ouɗi; doyak diig genabib diig. Wanppan danab ah wannu kobol dim lamidtteb ele, ag Nug aoglagnu am elele iitta. Aɗinu? Ag Nug ii anidtteb, amu ag ele Nug ii dootteb. Amge ag da ele geha iikku daatteb, ag am Nug dootteb, Nug ag ele daatteb, dimppa Nug ag oolagppa ele daakku.

Jon 14:21

Am aun laa nug dahil haknunab anak awa dim lamadtte ele, nug aakkuib am dahilnu oo mauhtte. Am aun nug dahilnu oo mauhtte amu, Mame Nug ele nuhignu oo mauhkku. Da ele nuhignu ool mauhebeb, da nug da diil miag atiak nug ippunidkkul,” awa aum.

Jon 14:24

Laa nug dahilnu oo ii mauhtte ele, nug nai dahil ele dim ii lamidtte. Am ag dootteb, nai amuam dahil iitta. Nai amuam Mame, Nug da meiɗe uɗimi ele, am nuhig nai.

Jon 15:10

Da Mamenu haknunab anak dim lamittette, nuhig oo mauhak ooppa daattem, amubia ag dahil haknunab dim lamidkkulag amu, ag haen oh dahil oo mauhak ooppa daaglag.

Jon 16:27

Iitta! Mame Nug nukka ahilagnu oo mauhtte. Aɗinu? Ag dahilnu oolag mauhtte, amu ag ele da am Kayak toppanu uɗimi oolagppa genab dootteb.

Jon 6:56

Aun nug da teppul tiil ele latte amu, nug dahilppa daatte, da ele nuhigppa daattem.

Jon 8:51

Da genabnab genab ag amelagppa attem, laa nug dahil ippunittak nai awa dim lamidkku dayeb amu, nug iinab mauhma,” awa aum.

Jon 8:52

Awa a amu ag Nug amegppa appig. “Gemu ig genab doottem, na ootppa hahail ele! Abraham nug mauhom, amu propet ele mauhppig, amge na attem, ‘Laa nug nahip nai awa dim lamidkku dayeb, nug am iinab mauhma.’

2 Korint 6:16

Ig Kayaknu mettid lag amu kayak hambuppuak dottolkad ele ouaqadkkunigte? Amu oh am iitta! Ag dootteb Kayak bauklel ele nuhig mettid lag amu igib iikku. Anukka Kayak Nug nuhikkud danab ah dilagnu inam aum. “Geha da ag ele oh daatta, ag oolagppa oikkul. Da ahilag Kayak daakkul, ag am dahilad danab ah daaglag.”

Epesus 3:17

ag ahilag ooppa genab doyakppa Kristus Nug ag oolagppa daakkunu, amu Kayaknu oo mauhak ag ɠagattag aqeb, ad diɗi nug wan aɗe ad ɠagattag daatte, amubia ag ɠagattag daaglagnu unuqidttem.

1 Jon 2:24

Ag digmakppa nai dooppig amu, ag oolagppa ɠagattag aɗan dayeg! Amu ag digmakppa nai dooppig ag oolagppa daakku dayeb amu, ag haen oh Mame Bekka, amu Mame ele laippu daaglag.

1 Jon 2:5

Amge aun laa nug nuhig nai dim lamidtte amu, Kayaknu oo mauhak am genab ambak nuhigppa daatte. Amuppa ig doottem, ig nuhigppa daattem.

1 Jon 4:4

O nid naunau dahilad, ag am Kayaknu amunu, ag propet hambuppuak eɗadppig. Aɗinu? Laa ag oolagppa daatte amu, Nug onig, ɠagattag ele am wan imuppan okkai eɗittak.

1 Jon 5:3

Ig Kayaknu oonig mauhtte dayeb, ig nuhig haknunab anak dim lamidkkunig. Amuam oo mauhaknu diig aakku. Amu nuhig haknunab anak am uug iitta.

2 Jon 1:6

Oo mauhak kobol dim lamittak am inam; ig nuhig haknunab anak dim lamidkkunig. Amu ag digmakppa dooppig amubia, nuhig haknunab anak am, ag oo mauhak doon oiyeg!

Revelesen 21:22

Amu da aab okkai amuppa Kayaknu mettid lag ii anidmi. Aɗinu? Naɗi Kayak Nukka Ɠagattag Oh Ele amu Sipsip Nag ele aa aakkuib aab amuppanu Kayaknu mettid lag daattep.

Revelesen 21:3

Anam daye amu, da nai mattiak baag okkai sia king ⌊anuqak,⌋ amuppanu laa inam a doomi. “Gemu Kayak laug danab oolagppa daatte! Nug ag ele daaglag. Ag nuhig danab daaglag. Kayak Nug ag ele daaglag, amu Nug Kayak ahilag daakku.

Revelesen 22:3

Amu keeke oh, Kayak Nug amunu oo iinab dayom ele amu, Kayak Nug heeb, iitta mekkulag; keeke amu baula ii daamna. Kayak amu Sipsip Nag ele, ahilah sia king aab amuppa daakku. Dayeb, Kayaknu maɗi nid ag Nug waappa daan Nug oɗe dim lamidkkulag.