Jon 1:14 - Nobonob Baibel

¹⁴ Am Kristus, onig laa Nai Kayak Ippunigtte, Nug danab beɗu awa, ig oonigppa dayom. Ig oonigppa dayeye, ig nuhig binag amahlak oppiaawak ele anidmut. Binag amahlak oppiaawak ele amuam laa Nug Kayak Bekka laippunab daatte, Nug Kayak, nuhigppanu uɗiom amu, am nuhig aakku. Doyak diig genabib, amu ehanittak okkai hamu mettak kobol ele, amuam nuhigppa ambaknab ele daatte.

Jon 1:14 ပူးပေါင်းရင်းမြစ်များ

Sam 2:7

Amu king amu, Yawe tituana, Sion appa meum ele, nug atte. “Da ɗo laa Yawe meum daatte amu, da amunu appi dooglag. Nug da amelppa inam aum. ‘Na am da Bekkal; gemu amu, da na Mamen bemi daattem.

Sam 45:2

Danab laala ag iɗulag tuqak ele, amge na ag oh eɗadttem. Na nai ena, nai ubuhi ele, nai maɗoɗ ele, na nai amu oɗenppa madittem. Na anam hettem amunu, Kayak Nug tuɗid ele na itidtte.

Sam 85:9

Genab, binag amahlak oppiaawak ele nuhig ihinig wan imuppa daakkunu, Nug danab ah ag nuhignu ebehilag oh bodoetta le mette ele padal ii memananu ehanadtte.

Aisaia 40:5

Ag anam heppeg, geha Yawenu binag amahlak oppiaawak ele am miag atia dayebeb, danab ah oh ele anidkkulag.” Yawe Nug anam mattiom daatte amunu, am anam bekku.

Aisaia 53:2

Ee qaɗu yuɗ gai-iitta wanppanu bette, amubia Yawenu maɗi nid Nug noobppa ena meum. Ao, nug diɗi laa wan qaɗaiettakppa bette, amubia Yawenu maɗi nid nug Yawe noobppa ba, ena meum. Danab kuɗum ag danab laa, nug beɗu enanag, anttaknu ena ele amu, ag amu anidna, “Ihinig okkai aakku,” doon, ag nug dim lamidtteb, amge Yawenu maɗi nid, nug anambia iitta. Ao, danab kuɗum ag laa nug beɗu enanag, diig amunu ag, “Ig danab amu nug ihinig okkai daakkunu oonig daatte,” atteb, amge Yawenu maɗi nid nug amubia ii dayom. Iitta.

Aisaia 7:14

Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

Esekiel 37:27

Anam dayeb, dahil dayaknu aben ag oolagppa daakku. Dayebeb, da ahilag Kayak daakkul, ag dahilad danab ah daaglag.

Matyu 1:16

Jakop bekka am Josep. Josep amu, nug Maria gamu. Maria nug Jesus menuom. Jesus Nug am Kristus.

Luk 2:11

Gemu deɗ imuppa Dawitnu aabppa, am Betlehem amu, appa ah laa nid awom. Nid amu Nug danab dilag Padal ii maknu ehanittak daatte; Nug amu Naɗi, Kristus.

Luk 2:7

nug nid naanaeg, am nid danab, nug Nug menuom. Menua, niiak lag ambeum amunu, nug bekka lamen elabppa ehakka, doɗ dilag ee lanak taɗaɗ ooppa me niiom.

Luk 9:32

Jesus Nug Moses Elaiya ele nai mattiegeg am Pita nug laikuɗ ele ag amelag uug mette, niiglagnu heppig amge ag niin autna ii aoppig. Iitta. Ag anam daaeg ukke, amelag eɗua obate, ag Jesus binag amahlak oppiaawak ele, amu danab aɗit aa Jesus ele hippaidna daaegeg am anadppig.

Jon 1:1

Kayak Nug keeke oh digma heum, haen amu ii nak amu Kristus, Nug onig laa Nai Kayak Ippunigtte, Nug dayom. Nug Kayak noobppa dayom amge anamib iitta, Nug ele Kayak dayom.

Jon 11:40

A am Jesus Nug aum. “Da tatam na amenppa imu ami. ‘Na ootppa genab dookkut amu, na Kayak ebehi gemu anidkkut,’ ” awa aum.

Jon 14:6

A amu, Jesus Nug nob ma aum. “Da am ⌊Kayak gumitta ukkaknu⌋ ib. Laa ele amu, da am doyak diig genabibnu diig, amu da bau dayaknu diig ele. Danab nug Kayak gumitta gokkunu amu, daib nug ehanidppi gokkunu elele daattem.

Jon 14:9

Pilip anam a amu, Jesus aum. “Pilip, haen elabnab da ag ele daamut, am na iite dooiɗttem? Danab nug da aniɗtte amu, nug Mama anidtte. Am aɗinu na Mama anidkkutnu oɗ meɗattem?

Jon 17:22

Na binag amahlak oppiaawak ele da meɗame amu, da na ele i laippu daattep, amubia dahilad imu ag oolag laippu daaglagnu, da binag amahlak oppiaawak ele, da ag mattami.

Jon 17:24

Mame, danab na da meɗame amu, haen da binag amahlak oppiaawak ele daakkul, haen amuppa ag da ele aben amuppa daagnignu ool daatte. Ag da binag amahlak oppiaawak ele anukka wan ii dayomppa na dahilnu oot mauhom, gemu ele oot mauhtte amunu, na da meɗame amu, ag amu anidkkulagnu ool daatte.

Jon 18:37

Jesus anam a amu, Pailat nug Jesus amegppa aum. “Na anam attem amunu, na aakku king daattem,” awa aum. Nug anam a amu, Jesus Nug aum. “Na dahilnu, ‘Na am king daattem,’ mattina attem amu na tutukku attem. Da anil nug da doyak diig genabib mehuqeqe oikkulnu menuiɗom. Ge, diig amunu da wanppa uɗimi. Laa oh ag doyak diig genabib dim lamidtteb amu, ag dahil nai dootteb,” awa aum.

Jon 2:11

Aria, Jesus Nug amu heum amu, amuppa Nug Kayak dabmettaknu kobol danab haknu elele iitta, kobol amu hekkunu digma heum. Nug Galilinu aab Kana appa anam ha, amuppa Nug Nug binag amahlak oppiaawak ele he miag atie, nuhikkud ippunittak awak danab ag nuhignu oolagppa genab dooppig.

Jon 3:16

Kayak Nug wanppan danab ah dilagnu oo huana mauhom amunu, Nug Bekka laippunab me uɗiom. Nug me uɗiom amunu, aun nug nuhignu ooppa genab dootte ele, nug padal ii mema. Iitta! Nug bauklel hanhannu aokku.

Jon 3:18

Am aun nug nuhignu ooppa genab dootte amu, nug nob nau awaknu hettoɗiakppa ii daatte, amge aun nug nuhignu ooppa genab ii dootte amu, nug aakku nob nau awaknu hettoɗiakppa teum daatte. Aɗinu? Nug Kayak Bekka laippunab, nug nuhignu ooppa genab ii doyom.

Jon 6:51

Bret bauklel ele hab aabppanu uɗiom am da. Am laa nug bret imu latte amu, nug bauklel hanhan daakku. Amu ele bret da wanppan danab ah bauklel daaglagnu madakkul ele imuam, da beɗul,” awa aum.

Jon 8:32

Ag geha doyak diig genabib dooglag, amu doyak diig genabib amu heeb, ag uhuqak enappa daaglag,” awa aum.

Aposel 13:33

amu haen Nug he, Jesus eɗua hibaittom, amuppa Nug ig, danab amu bekkalkad, Nug ihinignu aakku he, nai amu meu oum. Amuam nai Sam aɗitppa daatte bia. Nai amuam inam. ‘Na am da Bekkal; gemu amu, da na Mamen bemi daattem.’

Rom 8:3

Amu inam. Ig oonig alag nug he, ɗonu ɠagattag am gai-iitta dayom amunu, ɗo nug heeb, ig ena bekkunignu elele iittanab, amge keeke ɗo nug hekkunu elele iitta amu, keeke amu Kayak nukka heum. Kayak Nug nukka Nug Bekka me uɗia, danab beum. Nug beɗu am, ig hipunin danab, ig beɗunig bia tagittom, amge Nug am hipunin laa iitta. Amu Jesus Nug ib etta hipunin haknu ofa dayeb, amuppa Kayak Nug ihinig hipunin uhuqa megakkunu, Nug Jesus me uɗiom. Ib amuppa amu, Kayak Nug danab ah ag hipunin waappa ii daamnanu heum.

Rom 9:5

Kayaknu danab anukkanu amu, ag am Israel danab memetalkadnab. Amu Kristus ele amu, Nug danab daakkunu, Nug Israel buɗulagppa doum. Nug am Nug Kayak, keeke oh dilag ikki daatte. Ig Nug binag hanhan metu! Genab.

1 Korint 15:47

Adam tatamnu amu, Kayak Nug wan awa danab amu heum. Adam dimnu amu hab aabppanu uɗiom.

2 Korint 12:9

amge Nug da amelppa inam aum. “Dahil ehanittak okkai hamu medattem ele, amuppaib na elele daattem. Aɗinu? Dahil ɠagattag am danab ag gai-iitta daatteb ele, ag ɠagattag aon daaglagnu daatteb amu, dahil ɠagattag ahilagppa aakku uɗat enanagnab hette.” Naɗi Nug anam aum amunu, da ɠagattag iittanu ool uug ii daatte. Iitta! Da amunu Kristusnu ɠagattag aakkuib dahilppa daakkunu maɗoɗppan gamag ahakib doyeye, aɗi keeke da hekkulnu da gai-iitta daattem amu, da amunu onil humakkul.

Galesia 4:4

Am anam daye ukkom, amge haen Kayak aum amu elele mette, Kayak Nug Bekka me ne, ah nug menue, Nug ɗo waappa ba dayom.

Epesus 3:8

Da am Kayaknu danab ah oppiaawak ele laa oh noolagppa keeke hamunab daattem, amge Kayak Nug ehanittak okkai hamu meɗa, Nug da iitta aɗi noolagppa Kristusnu keeke ena ohnu, danab nug amu antta dookkunu elele iitta, nai amu mehuqkkulnu meiɗom.

Kolosi 1:19

Aɗinu? Kayak oo niiom bia Nug he, Kayak attemnab daatte, nuhigppa aɗi kobol keeke ambak daatte ele, amu oh amu anamib aakku Jesus nuhigppa anam dayom.

Kolosi 2:3

Nuhigppaib doyak dabmak ena ele oh, amu doyak oh ele lokkuma daatte.

Kolosi 2:9

Ag Kristen, ag amu dabmettaglagnu diig amu, Kayak Nug attemnab daatte, nuhigppa aɗi kobol keeke ambak daatte ele amu, amu oh Jesus Kristus nuhigppa aakku dayeye, Nug ele am danab daatte.

1 Timoti 3:16

Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.

Hibru 1:3

Aam lettod ye, amahlak amia ukke, danab ah anidtteb, amubia Kayak Bekka Nug Kayak binag amahlak oppiaawak ele he, danab ah anidtteb, amu Nug Mameg daatte, amubianab daatte. Nug keeke oh nuhig naippa ɠagattag aqadtte. Nug nuhig mauhakppa Nug danab dilag hipunin uhuqa mattaknu ib ooɗom. Nug ib amu ooɗowa, Nug eɗua hab aabppa ta, Nug Kayak, Nug dagom onig ɠagattag ele, Nug Nug eppeg naɗiap-ppa daatte.

Hibru 1:5

Kayak Nug engel dilag inam iinab aum. “Na am da Bekkal, gemu da na Mamen bemi daattem.” Iitta. Laa amu Kayak Nug engel laippu laa nuhignu, “Da nug Mameg daakkul; nug da Bekkal daakku,” ii aum amunu, ig nai amuppa Jesus Nug engel eɗadtte anidttem.

Hibru 10:5

Amunu haen Kristus Nug wanppa uɗia, Nug Kayak amegppa aum. “O Kayak, na ootppa keeke anuqak am, danab ah ag ofa iɗu iɗu na mettaglagnu ii daatte. Ao, danab ag nahip qaɗabppa manaknu ofa, ib etta hipunin haknu ofa ele na mettaglagnu amu, na amunu ootppa keeke anuqak ii doottem. Iitta. Na keeke amu ag abenlag aokkunu amu, na da beɗul imu bappaidna meɗame.

Hibru 2:11

Laa amu, Jesus Nug he, danab oppiaawak betteb. Amu danab oppiaawak betteb ele, ag Nug ele oh am Mamelag laippu waappa daatteb amunu, Jesus Nug amu dilagnu, “Da lailad,” akkunu Nug uɗa ii nette.

Hibru 5:5

Amu Kristus Nug ele am anam. Nug nukka binag amu awa, mana mettak ikki danab ii beum. Iitta! Kayak Nug Nug amegppa aum. “Na am da Bekkal. Gemu da na Mamen bemi daattem,” awa aum.

1 Jon 4:14

Mame Nug Bekka, wan imuppan danab oh eɗua diiadkkunu me uɗiom, amu ig Nug Bekka anidta, ig amunu iikku madittem.

1 Jon 4:9

Kayak Nug Bekka laippunab, ig nuhigppa bauklel aognignu wanppa me uɗiom amunu, amuppa amu Kayak Nug ihinignu oo mauhak dootte ig ippunikkom.

2 Jon 1:7

Am hambuppuak danab kuɗum, ag Jesus Kristus Nug danab beɗu ii awa uɗiom maditteb ele amu, ag ihinigppanu qatin gona wan imuppa oitteb. Danab amu ag am hambuppuak danab, ag Kristusnu kekeɗ.

Revelesen 19:13

Nug lamen elab, tiig laaittak ele meum. Nug onig amu Kayak Nai.

Revelesen 21:3

Anam daye amu, da nai mattiak baag okkai sia king ⌊anuqak,⌋ amuppanu laa inam a doomi. “Gemu Kayak laug danab oolagppa daatte! Nug ag ele daaglag. Ag nuhig danab daaglag. Kayak Nug ag ele daaglag, amu Nug Kayak ahilag daakku.