Jeremaia 7:29 - Nobonob Baibel

²⁹ Amu Yawe Nug atte. “Ag Juda, ag ikkilag uɗug otaɗna, buɗippeg ukkaɗ! Ag qauko attannab, igippa keeke laa ii daatte, ag amuppa tena, appa ag nai oo doyak ele mattieg! Aɗinu? Da Yawe, da ag gemu daatteb, ag dahil oppoɗi bak waappa daatteb, da ag dimatte, ag geɗadmi,” awa atte.

Jeremaia 7:29 ပူးပေါင်းရင်းမြစ်များ

2 King 17:20

Anam amunu aakku, Yawe Nug Israel buɗub oh geɗattom. Nug eheɗ matta he, kekeɗ ag uɗin, Israel dilag keeke yab akkan goppig. Amge Israel ag kobol nau hak ii uuppig amunu, Yawe Nug he, ag gona, Nug noobppa ii daappig.

Job 1:20

Danab amu oh ag uɗin dona, Job amegppa amu ohnu aeg doya, nug aha, lamen elab pattiɗa, ikki uɗug hoye ukke, nug dup noa, gateg qaun o, gomela, iɗu wanppa ma, nug Kayak binag ma,

Aisaia 22:12

Uug imu bak haenppa Naɗi, Nug Yawe Nukka Ɠagattag Oh Ele, Nug ag haen amuppa ⌊eheɗ heppignu⌋ ag oo doyak doon gaan, ag ikkilag uɗug oh otaɗna, ag lamen heɗiag ele takkadkkulagnu amelagppa akku.

Jeremaia 12:7

Gadon, da dahilad danab ah, ag da eppel ooppa daatteb amu, da ag dimatten uuadkkul. Da ahilagnu ool mauhtte, amge da uuadppi, ag kekeɗ eppelagppa daaglag.

Jeremaia 14:19

O Yawe, na Juda danab ah geɗadna malamete? Na Sion danab ah dilagnu ena iinab doottemte? Na guittak nau mekke, ig eɗut ena daagnignu ib laa iittanu diig dookkulnu oɗ medattem. Ig maɗoɗ ele daagnignu oonig dayom, amge ena laa ihinigppa ii beum. Ao, ig eɗut ena daagnignu haen daakkunu oonig dayom, amge baɗak eheɗ nau ele aakkuib beum daatte.

Jeremaia 16:6

Danab onig ele, danab onig iitta ele Juda wan ohppa mauhkkulag. Laa ag danab ah mauhkkulag ii boumadmana, Ag mauhak dilagnu ii mahina, oo doyak kobol laala ele amu dilagnu ii hemana.

Jeremaia 3:2

Ag Juda danab ah ag qauko ikkilkad ohppa neegna, ahilag hak antteg! Ib baag ah nug aben ohppa danab kuɗum ele niitteb, amubia ag Juda ag qauko ohppa kayak hambuppuak noolagppa dup nona binalag meegeg uɗie, gemu ele hetteb. Ag danab nau, nug laanu keeke yab aokkunu ib meitta daatte bia, ag kayak hambuppuak digdig aoglagnu heegeg uɗie, gemu ele hetteb. Ag kayak hambuppuak noolagppa dup noa binag mak kobol, amuam gappai kobolbia, ag kobol amu henana, ag nau hak kobol digdig laa ele heegeg uɗie, gemu ele hetteb amunu, ag kobol amu hettebppa, ag amuppa heeg, wan am dubuttid tak ele daatte.

Jeremaia 3:21

Qauko ikkilkadppa qanak baag laa doyeg! Baag amuam Israel danab ah ag kobol eheɗ dim lamidna, kaliak henana, ag Yawe, ahilag Kayak daulag atiom dootteb amunu, ag gaanna, Nug oo doyakppa unuqidtteb.

Jeremaia 47:5

Uug amu beebeb, danab ah Gasa daatteb doon, ag ikkilag uɗug hoiglag. Ao, danab ah Askelon daatteb, ag oɗelag qamuttak daaglag. O Pilistia oɗo yaak danab, ag uɗem naɗippa daatteb, ag akka ag ⌊ahilag kayak hambuppuak ag ag dabmattaglagnu ag⌋ beɗulag guittak medatteb; amu haen gane laa ele ukkeb, ag amu uuglag?

Jeremaia 48:37

Kekeɗ heppeg, Moap ag uug okkainab anidna, ag ikkilag uɗug hoin, akkaɗilag ele hoin aoglag. Ag ⌊ahilkad kayak hambuppuak ag ag dabmadakkunu, ag⌋ oh eppelkad guittak madappeg, ag lamen heɗiag ele takkaglag.

Jeremaia 6:30

Gadon, Yawe Nug Juda danab ah geɗadkku amunu, laa ag ahilagnu, “Silwa laa dubuttid ele, danab silwa amuppa uɗat laa hekkunu elele iitta amunu nug geɗidkku amu, Juda danab ah ag amubia daatteb,” akkulag.

Jeremaia 9:10

Amu da, Jeremaia, da ami. “O gadon, Juda wanppa qauko nauhppig daatteb amunu, da gaye, mahiak ele hekkul. Ao, atu taɗakppa gikkiɗah dad ele anamib amunu, da nai oo doyak ele madikkul. Wan am hele-ettak daatte, danab ah appa ele ii oitteb. Appa makau daanna, gikkiɗah lanana ii gaatteb. Ai ag appanu oolna, hagagaɗna goppig. Doɗ laa ele ii daatteb. Ag oh oolna goppig. Amu diig amunu da kobol beum, da amunu gaye, mahiak ele hekkul,” awe ami.

Jeremaia 9:16

Da heppi, kekeɗ ag uɗin eɗadna heppeg, Juda danab ah ag wan laala, ag, amu ag mamelkad aɗi ele ag wan amu ii dooppig amu, ag wan amuppa, doɗ oolna, matatun gona, piɗe piɗe mauhnoak daatteb, Juda danab ah ag appa anam daaglag. Amu da heppi, kekeɗ ag lamadnana aqappeg, Juda danab ah ag padal mena autna aoglag,” awa atte.

Gayak Nai 5:22

Aɗinu? Antte! Na ig uuigna aut autnanab aome. Ge, na oo nauhak huanaknab ihinignu doome.

Esekiel 19:1

Amu Yawe Nug da, Esekiel, da amelppa aum. “Na nai oo doyak ele imu Israel dilag anuqak danab dilagnu ahiettak imu ette! ‘Ag anilag nug am laion laa oh oolagppa laion anilagnab bia dayom. Nug laion bau oolagppa dayaya, nug nakkud atognoattette, ag okkai meppig.

Esekiel 28:12

“Danab bekka, na Tair dilag kingnu nai oo doyak ele imu nug amegppa akkutnu bappaidna, na, ‘Naɗi Yawe Nug inam atte,’ awona, na imu appe doyaɗ! ‘Tatam na laa ag aɗi oiyak, aɗi dayak, aɗi kobol keeke am oppiaawak ele anidkkulagnu, na amunu antte oo maittaknu danab daame. Nahip doyak dabmak ena ele am ambaknab dayom, amu nahip iɗu tuqak am oppiaawaknab ele.

Amos 5:1

O Israel danab ah, da nai oo doyak ele butti aɗi ahilagppa bekku amu, da amunu madippi, ag doyeg!

Maika 1:16

⌊O gadon,⌋ ag Israel, ag ahilkad nid naunau, ahilagnu ag enanagnab dootteb, amge ag nid ahilkad dilagnu oolagppa uug naunab nau doon, ag mahina, aakku ikkilag uɗug ohnab otaɗatteg! Ao, ag uug naunab doon, ag mahin, ikkilkad uɗug oh otaɗna aon, ag ai walsa igippa uɗig laa iitta, ag amubia dayeg! Aɗinu? Kekeɗ ag nid naunau ahilkad diin gona, ag wan laappa diia ukka laih me dayak danab ah daaglagnu maadppeg daaglag,” awa atte.

Matyu 12:39

Aeg am Nug nob ma aum. “Ag danab nau. Ag Kayak uuna, kobol laala dim lamadtteb ele. Ag da Kayak dabmettaknu kobol danab haknu elele iitta heppi anidkkulagnu atteb, amge da laa ii hepa. Propet Jona, nuhigppa aɗi beum aakkuib ag ippunadkkul.

Matyu 16:4

Ag danab nau. Ag Kayak uuna, kobol laala dim lamadtteb ele. Ag da Kayak dabmettaknu kobol danab haknu elele iitta heppi anidkkulagnu atteb, amge da laa ii hepa. Jona nuhigppa aɗi beum aakkuib ag ippunadkkul.” Jesus anam awowa, Nug uuatta ukkom.

Matyu 23:36

Da genab ag amelagppa attem. Keeke imu oh am danab ah gemu daatteb ele dilagppa bekku.

Matyu 3:7

Layattette amu, ɗo gumak danab-Parasia, ɗo gumak danab-Sadyusi ele ag layattak aoglagnu kuɗum ukkaeg, Jon nug ag anatta, nug ag amelagppa inam aum. “Ag am danab nau, mat nau bia. Aun nug nau aomnanu nai ag amelagppa mattie, ag Kayaknu oppoɗi bak uɗitte ele ii aqamanu uɗippig?

Aposel 2:40

Am Pita nug nau aomnanu dabmettak nai kuɗum laa ele nai mattiaya unuqattatta amelagppa inam aum. “Ag lailkad ag kobol nau hetteb, amubia ag aib heppig. Iitta! Ag oolag eɗueb, Kayaknu ehanittak aweg!” awa aum.

Duteronomi 32:5

Amge Israel danab ah ag nuhignu amu, ag Nug dimettan, ii dim lamidna oitteb. Ge, ag anam hena oinna, ag genab nuhig nid daattebte? Iitta! Ag hambuppuak hak danab, ag kobol kaliak amu dim lamidtteb.