Jeremaia 7:26 - Nobonob Baibel

²⁶ Amge Israel ag dahil nai ii dooppig; ag daulag human, nai doon, elele ii dabmedappig. Ag da oɗel dim lamidmananu dabmak ahilag ɠagattag eppe, ag mamelkad aɗi dilag eheɗ hak eɗidna, eheɗ huan heegeg uɗie, gemu ele hetteb.” Yawe Nug da amelppa Israel dilagnu anam aum.

Jeremaia 7:26 ပူးပေါင်းရင်းမြစ်များ

1 King 14:22

Juda danab ah ag Yawenu neekkakppa eheɗ heppig. Ag hipunin hattana, amuppa ag heeg, Yawe Nug ahilagnu oo nauhak laa, oo nauhak amuam dahil dooi laa aomanuppa bette, oo nauhak amu be doyom. Ag mamelkad aɗi anukka hipunin kuɗum heegeg, Yawe anam doyom, amge Rehoboam nug Juda gumom, haen amuppa Juda danab ah ag heeg, Yawe Nug ahilagnu oo nauhak amu huana doyom.

1 King 14:9

Amge na amu, na eheɗ hak huan heme; eheɗ hak nahip am king anukka daappig, amu oolagppa aun laa eheɗ nau heum amu, nahip eheɗ hak am nuhig eɗidtte. Na da dimeɗan autna aon, kayak hambuppuak golppa haatame. Na kobol amu heme, amuppa na he, da oppoɗi bak doottem. Na da na dimunppa meiɗme.

2 King 17:14

Propet aɗi ag anam mattieg dooppig, amge Israel ag Yawenu nai dooglagnu uun, ag Nug oɗe dim lamidmananu dabmak ahilag ɠagattag eppe, ag mamelkad aɗi dilag kobol dim lamidppig. Ag mamelkad aɗi, ag Yawe, ahilag Kayak, ag nuhignu oolagppa genab ii dooppig. Iitta.

2 King 17:15

Israel ag Yawenu ɗo nai, tituanak Yawe he, Nug ag mamelkad aɗi ele ag nug tituanna nai qagappig, ag nai amu, amu nau aomnanu nai nuhig ele oh, Nug ag mattom amu, ag nai amu oh uuppig. Ag gona, kayak hambuppuak, keeke hamu, bau iitta ele, ag ag dim lamadnana, Israel ag akka am keeke hamu, kayak hambuppuak, amubia beppig. Anukka Yawe Nug ag danab ah ag guguattak daatteb, ag amu dilag kobol ii dim lamidmananunab aum, amge Israel ag nai nuhig tappaeg ne, amu henana, ag kobol nau amu dim lamidppig.

2 Stori 30:8

Ag mamelkad aɗi heppig bia amu, ag ahilag dabmak dim lamidkkulagnu wagai meppeg, ɠagattag eppamanu dabmeig! Ag Yawe waappa daaglagnu dabmak aon dayeg! Ag ahan, nuhig mettid lag, Nug lag amu haen oh nuhignu tituana mettak daakkunu tituanom amu, ag amuppa uɗieg! Nug gemu ahilagnu oo nauhak huanaknab dootte amu, oo nauhak amu iitta mekkunu ag Yawe, ahilag Kayak, ag Nug waappa daan, Nug oɗe dim lamitteg!

2 Stori 33:10

Manase nug anam heehe, Yawe Nug Manase, nuhikkud danab ah ele ag nau aomnanu nai ag mattom, amge ag dab-ii-meppig.

2 Stori 33:23

Amon nug mameg heum bia anam heum, amge nug mameg Manase, nug uug nau doya, nukka Yawe noobppa nug onig qe neum, amu Amon nug anam ii heum. Iitta. Nug he, nug beɗuppa aab tuɗittak, okkai dayom.

Nehemaia 9:29

Na ag nau aomnanu dabmettak nai mattana, ag eɗun nahip ɗo waappa daaglagnu ag amelagppa ame, amge ag beɗuppa tak danab dilag kobol dim lamidna, ag nahip haknunab nai ii dim lamidppig. Ɗo nahip, danab nug dim lamidtte ele nug bau daakku amu, ag ɗo amu tippaladna, ii dim lamidna, hipunin heppig. Ag na oɗen dim lamidmananu dabmak ahilag ɠagattag eppe, ag na dimettana, ag dabmak eɗukkunu uun autna aona, ag nahip nai dooglagnu uun, ii dooppig.

Prowerb 29:1

Danab nug oo eɗukkunu daug batak kuɗum awawa, hamu bia doyaya, nug oo eɗumanu dabmak nuhig ɠagattag eppe oitte, nug guittak okkai awa nauhkku; nauhaknu aɗi keeke bette amu, baoliaknu ib laa iitta.

Aisaia 48:4

Da ag, ahilag dabmak am ɠagattag eppom daatte, da ag heppeg, dabmak ahilag eɗukkunu iinab hetteb am doomi. Ahilag dabmak am ɠagattagnab; aen o bras bia.

Aisaia 5:4

Amu muɗi grep nug geha ba, meu ena okkunu da uɗat ena hemi, amge aɗinu muɗi grep ag meulag, meu doɗo naunau ona, lanaknu ena iitta, mua ele oppig? Am keeke laa haknu dayomtai, da keeke amu iite hemi?

Jeremaia 11:8

Da anam hemi, amge ag dahil nai doyaknu uun, ag dab-ii-medappig. Iitta. Ag da oɗel dim lamidmananu dabmak ahilag ɠagattag eppe, ag aɗi eheɗ hekkulagnu oolag dayom amu, ag heppig. Ag nug tituana nai qakkak amu ii dim lamidppig amunu, nug tituana nai qakkak amu ooppa, nai da ag dim lamidkkulagnab ami amu, laa nug nai amu ii dim lamidkku dayeb, nuhigppa aɗi eheɗ laa awaknu anak daatte amu, da hei, eheɗ amu ahilagppa aakku beum.’ ” Yawe Nug anam atte.

Jeremaia 16:12

Ag mamelkad aɗi ag anam heppig, amge ag daatteb amu, ag nau hak amu eɗidna, naunab heppig, gemu ele hetteb. Ag da oɗel dim lamidlob, amge iitta, ag anen anen ag da oɗel dim lamidmananu dabmak ahilag ɠagattag eppe, ahilag dabmak nau dim lamidkkulagnu dabmenan hetteb.

Jeremaia 17:23

Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 22:21

Haen ag, ‘Ig eleleib daattem; uug laa ihinigppa ii bema,’ dabmenan oippig, da, Yawe, da ag nau aomnanu dabmettak nai mattami. Da nai amu ag mattami, amge ag, ‘Ig nahip nai ii doomta!’ aon appig. Ag nid bauppa digmena, da oɗel nakok laa ii dim lamitteg uɗie, gemu ele anamib hetteb.

Jeremaia 25:3

“Anukka Amon bekka Josaia nug Juda dilag king daye, nuhig king dayaknu maɗ 13ppa Yawe Nug digma he, da nuhig nai doomi. Da haen amuppa digmein dooi uɗie, maɗ 22 ukke, gemu am maɗ 23, amu maɗ 23 amu ooppa haen kuɗum Yawe Nug da, Jeremaia, Nug da nai laa meɗe doyeye, da Yawenu nai aɗi doomi amu, da ag amelagppa ami, amge ag daulag ii human dooppig.

Jeremaia 25:7

Yawenu propet laa ag anam aeg, ag Juda, ag ahilag nai ii dooppig, amu gemu Yawe Nug inam atte. ‘Ag Juda, ag dahil nai daulag human ii doyegeg uɗie, gemu ele ii dootteb. Laa amu, ag akka, ag eppelagppa kayak hambuppuak dottolkad hatteg, da oppoɗil be dayeye, ib amuppa ag akka ag heeg, ahilag uug aakku beum daatte,’ awa atte.

Jeremaia 26:5

ag nai dahilad maɗi nid, ag propet, da ag maatti, ahilagppa haen kuɗum uɗin, nai mattieg ag ii dooppig, ag daulag human, amu dilag nai ii dooglag amu,

Jeremaia 29:19

Aɗinu da anam hekkul? Ag Juda danab gemu Jerusalem, amu Juda wan ohppa daatteb ele, ag dahil nai dooglagnu uun, ii dooppig. Da nai amu baubau dahilad maɗi nid, ag propet danab, da ag mattai, ag aon gona appig, amge ag ii dooppig. Ag gemu Juda wanppa daatteb, ag anam heppig, amge ag Juda ag gemu Babilon wanppa diia ukka laih me dayak danab ah daatteb, ag ele dahil nai amu ii dooppig.” Yawe Nug anam awa atte.

Jeremaia 3:13

Da ag keeke laippuib hekkulagnu attem. Ag genab kobol eheɗ heeg, aab ag beɗulagppa daatte miag aig! Ag beɗulagppa aab daattenu diig am inam; ag da Yawe, ahilag Kayak, ag da dimeɗan, dahil nai tappaeg ne, ag kayak hambuppuak laihnu akkan, amu noolagppa dup nona binalag meppig. Ag ad okkai eppelkad bahia ukkak ele oh waalkadppa kobol nau amu henana, ag dahil nai ii dim lamidppig.

Jeremaia 32:23

Na ag mattae, ag wan amuppa uɗin, danab daappig eppelagppanu aoppig, amge ag na oɗen ii dim lamidppig, nahip ɗo ele dim ii lamidppig. Ag na aɗi hekkulagnunab ame amu, ag ii heppig amunu, na uug nau imu ahilagppa hee beum.

Jeremaia 34:14

“Maɗ eblaih laippu ele ukkeb, maɗ eblaih aɗitppa Hibru danab, o Hibru ah auntai nug he, nug ag oolagppanu laa waappa nuhig maɗi nid daatte amu, ag anen anen ag danab ah amubia uhuqadppeg, ag ag waalkadppa, ahilkad maɗi nid tuɗidna aib daappig. Ag uhuqak dayeg! Danab o ah amubia ag maɗ eblaih laippu ele ahilkad maɗi nid daan, ahilag uɗat hekkulag, amge maɗ eblaih aɗitppa ag tuɗidna ahilkad maɗi nid ii daamna. Ag uhuqak aon, hamu daaglag, amu ag laa ag uhuqadkkulagoitte ami. Da anam ami, amge ag mamelkad aɗi ag da oɗel ii dooppig. Ag daulag human, nai doon, elele ii dabmedappig.

Jeremaia 35:15

Da haen kuɗum dahilad maɗi nid, ag propet amu, da ag maatti, ag gona, ag Israel, ag amelagppa inam appig. ‘Ag anen anen ag nau hak ahilag uun, ii henana, ag ena hak henana, ag kayak laa dim lamadna, waappa daan, ag oɗelag dim lamidkkulagnu aib heppig. Ag amu hekkulag dayeb amu, ag haen elab wan imuppa, da wan imu ag mamelkad aɗi mattami amu, ag wan imuppa haen elab daaglag.’ Da propet oɗelagppa haen kuɗum anam ami, amge ag daulag human, nai dahil ii dabmedappig. Ag dahil nai ii dooppig.

Jeremaia 35:17

Ag amu hetteb amunu, da, Yawe, da am Kayak Dakka Ɠagattag Oh Ele, da Israel dilag Kayak, da attem. “Doyeg! Da heppi, uug naunab oh, amu da Jerusalem danab ah oh dilagppa, amu Juda danab ah laa oh ele dilagppa bekkunu ami amu, uug amu oh am bekkulag. Da ag amelagppa nai mattimi, amge ag daulag ii human dooppig. Da ag onilagppa emi, amge ag nai nob laa ii meɗappig.” Da Kayak, da anam awe attem.

Jeremaia 44:16

“Na, ‘Da Yawe oɗe awen, iikku ag amelagppa madittem,’ ana, nai ig amenigppa mattie doomut amu, ig daunig humat, nai amu ii doomta.

Jeremaia 5:3

Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

Jeremaia 6:10

Yawe Nug anam a, da, Jeremaia, da ami. “Da aun amegppa Kayaknu nau aomnanu dabmettak nai appi dookku? Aun nug daug huma dookku. Ag nai dooglagnu uuppig amunu, ag dooglagnu elele iitta. Yawenu nainu amu, ag oolagppa uuaknab dootteb. Ag Yawe nainu gamag ahak nakok laa ii dootteb.

Jeremaia 6:17

Amu da aɗi uɗitte anttak danab ehanadkkulnu maatte, da, ‘Danab amu ag trampet iwalppeg, ag doyeg!’ ami, amge danab amu ag trampet iwalegeg, ag dooglagnu uuppig. Ag, ‘Ig ii doomta,’ appig.

Jeremaia 7:24

Da anam ag amelagppa ami, amge ag dahil nai ii dooppig; ag daulag human nai doon, elele ii dabmedappig. Iitta. Ag da oɗel dim lamidmananu dabmak ahilag ɠagattag eppe, ag oolagppa ahilag dabmak nau atten dayom amu, ag amu dim lamidppig. Ag da ii dim lamiɗppig. Iitta. Ag gomelag da meɗan goppig.

Jeremaia 9:13

⌊Oɗmak anam bekku amu, haen amuppa⌋ Yawe Nug inam akku. “Dahil ɗo, da miagib ag mattami amu, ag ɗo amu dimettan uun, ɗo laa dim lamidppig. Ag da oɗel ii dim lamidna, dahil ɗo ele dim ii lamidppig.

Esekiel 12:2

“Danab bekka, na nai tappe nak danab ah oolagppa daattem. Danab ah amu ag amelag ele, amge ag keeke ii anidtteb. Ag daulag ele, amge ag nai ii dootteb, Aɗinu? Ag am nai tappe nak danab ah daatteb.

Esekiel 12:3

Ag anam daatteb amunu, O danab bekka, danab ah amu ag uug naunab genab bekkunu daatte dooglagnu, na wan laappa gona, wan amuppa diia ukka laih me dayak danab dayaknu ⌊ippu hena⌋, na amunppa keeke na gona, appa daakkutnu aon gokkut ele battamppa inan, danab ah amu, ag na anidppeppeg, na daattemppanu ahan, na laih gokkut. Na anam heppe, ag dooglagtai, o iitta. Aɗinu? Ag am nai tappe nak danab ah daatteb.

Esekiel 20:30

Naɗi Yawe Nug nai anam mattia, Nug nai tuɗitta atte. “Anam amunu, na Israel danab ah amelagppa inam appe doyeg! Naɗi Yawe Nug inam atte. ‘Ag gemu daatteb amu, ag, amu ag mamelkad aɗi ag hipunin henan, dahil neekkakppa ag oolagppa dubuttid teum ele daappig amu, ag amubia hekkulagte? Ag mamelkad aɗi ag kayak hambuppuak dottolkad uɗig wak ele dilagnu oo hak nau dooppig, ag ele anamib hekkulagte?

Daniel 9:6

Amu nahipad maɗi nid, ag propet, na maatte uɗin, na oninppa nahip nai madippig amu, ag nahip nai ihinkad king, ihinkad danab okkai, ig mamenkad aɗi, amu Israel wanppan danab ah oh ele amelagppa appig, amge ig nai amu doognignu uumut. Ig ii dabmemut.

Hosea 11:7

Danab ah dahilad ag da dimeɗan, kayak hambuppuak laala dim lamadkkulagnu dabmak aoeg ɠagattag eppom daatte. Propet ag Israel ag eɗun dagattolppa uɗiglagnu onilagppa etteb, amge laippu laa da binal mekkunu ii hette.

Sekaraia 7:11

Yawe Nug anam atte, amge ag mamelkad aɗi ag nuhig nai dabmettaglagnu uuppig. Ag ahilag dabmak ɠagattag eppe, ag Yawe dimettan, ag danab nug nai doomanu nug daug eppeg doɗoppa itutte, amubia ag Yawenu nai doyaknu uuppig.

Malakai 3:7

Am ag mamelkad aɗi ag dahil ɗo dimettan, dim ii lamidppig, ag ele anam hetteb. Gemu ag dahilppa eɗun uɗippeg, da ag ahilagppa eɗue wakkul.” Yawe Nukka Ɠagattag Oh Ele Nug anam atte. Nug anam atte, amge ag Nug oɗ medatteb. “Ig attem heta, nahip-ppa eɗut wakkunig?” aon atteb.

Matyu 21:38

Nug me ukkom, amge haen dad uɗat danab ag nid amu anidna, akka akka nai mattina appig. ‘Nid imu nug dimppa mamegnu keeke oh aokku amunu, ahappeg, ig qepput mauheb, ig dad nuhig imu aotu!’ aon appig.

Matyu 23:32

Ag alalkad kobol hedappig amu, ag amuib hena gog metteg!

Aposel 7:51

Aria, Israel ag am tappe nak danab, ag oolag, daulag ele am ituak, iitta aɗi danab bia amunu, ag mamelkad aɗi heppig amubia, ag hanhan Kayak Ouɗi dimedatteb.

Rom 2:5

Kayak Nug na oot eɗukkunu oo daatte, amge na nakka na he nahip dabmak am ɠagattag eppak daye, na oot ii eɗutte. Kobol amuppa amu na nakka eheɗ hak nahip-ppa na Kayaknu oppoɗi bak na nidakkunu huana aakku qagmettem. Yo, deɗ laa Kayaknu oppoɗi bak miag atieb, Kayak Nug nuhig kobol tutukkuppa na epeɗitteb amu na geha nob nau aokkut.

Duteronomi 8:20

Ag Yawe, ahilag Kayak, Nug ii dim lamidkkulag dayeb amu, Yawe Nug danab ah wan ag madakkunu hedeppa daatteb, Nug ag heeb nauhkkulag bia heeb, ag Israel, ag padal mena, iitta mekkulag.