Jeremaia 51:6 - Nobonob Baibel

⁶ Ag wan laappan danab Babilon daatteb ag, ag Babilon uun ooleg! Ag mauhmananu ag Babilon uun, oolna laih ukkeg! Babilon hipunin heppig, diig amunu ag nauhkkulag. Ag nauhkkulag amunu, ag laa ag appa daappeg, Babilon ag ahilag hipuninnu nob amu aoppeg, ag laa ag ele Babilon beɗulagppa ag nob amu aon nauhmananu, ag appa aib daappig. Babilon danab ah ag hipunin heegeg uɗie, gemu ele heegeg, Yawe Nug eheɗ hak amunu nob tutukku madakkunu haen uɗiom daatte amunu, kekeɗ ag heppeg, Babilon nauhkku.

Jeremaia 51:6 ပူးပေါင်းရင်းမြစ်များ

Sam 94:1

O Yawe, na danab ah aun aɗi ag eheɗ hetteb ele, na ag heppignu nob tutukku bu mattaknu Kayak daattem. O Kayak, na nahip hak ɠagattag amu epponna, danab ah eheɗ hetteb amu, na ag heppignu nob tutukku bu madakkutnu oɗ medattem.

Prowerb 13:20

Aun nug danab doyak dabmak ena ele oitte, nug doyak dabmak ena ele awa oitte; amge aun nug danab ag Kayak dab-ii-menan ii dim lamitteb ele oitteb, nug nau anidkku.

Aisaia 48:20

⌊Yawe Nug atte.⌋ “Ag Babilonnu ahan ukkeg! Ao, ag Babilon oolagppanu ahan, oolna ukkeg! Ag gonana, ag, ‘Yawe Nug ig Jakop buɗub, nuhikkud maɗi nid maɗi ah ele, Nug ig laa eppelagppa dayaknu qagaiettakppanu eɗua uhuqak ha mekkom,’ mattinna eig! Ag wan atu ohppan danab ah dooglagnu nai amu appeg doyeg!

Aisaia 63:4

Aɗinu da anam hemi? Danab aun aɗi ag eheɗ heppig ele amu, ahilag nob tutukku mattaknu deɗ uɗia malom. Ao, da danab ah ⌊dahilad⌋ qagaiettakppanu eɗua uhuqak hein madakkulnu haen aakku ba malom.

Jeremaia 25:14

Da heppi, wan laala, ahilkad king ebehilkad okkai ele ag gona heppeg, Babilon danab ah ag ahilkad begbeg maɗi nid daaglag. Da heppi, Babilon ag heppig bia, ag eppelagppa aɗi aɗi heppig bia ahilagppa bekku,’ awa atte.” Yawe Nug da Jeremaia, nug da amelppa anam aum.

Jeremaia 25:16

Da ag hipunin heegeg, oppoɗil be, bu madakkul maidmi; bu mattak amuam ban. Anam amunu, da heppi, ban ahilagppa beeb, ag nauhkkulag, danab wain huana lawowa, spak ma, taataɗ qettak oiyaya, kaaka ha nauhtte, amubia ag nauhkkulag,” awa aum.

Jeremaia 27:7

Wanppan wan oh ag nug waappa maɗi nid daan, nuhig uɗat hekkulag; nug bekka, nuhignu ele anamib daanna; nug alag, nuhignu ele anamib daaglag. Aria, anam dayebeb ukkeb, Nebukatnesar alagnu haenppa Babilon bu awak haen beeb, wanppan wan anen anen kuɗum, ahilkad king ɠagattag ele ag ahan heppeg, Babilon ag waalagppa daaglag.

Jeremaia 46:10

Ag amu hekkulag, amge aun laa ag eɗadkkulag amu, keeke amuam Kayak, Nug Yawe Nukka Ɠagattag Oh Ele, amuam Nug eppegppa daatte. Deɗ amuam Yawe nob tutukku eɗua mettaknu deɗ. Ao, nuhikkud kekeɗ dilagppa Nug nob tutukku eɗua madakku. Danab nug ee, o le elelenab lana male, oo dittiom, amubia danab mauhadppeppeg, elele metteb, ban iitta mekku. Aɗinu? Danab nug doɗ kuɗum aqe mauheg, tiilag gokkaɗe, mana Yawe medatte, amubia Kayak, Nug Yawe Nukka Ɠagattag Oh Ele Nug heeb, yawalti uɗitteppanu, Yupretis le guguittak appa danab kuɗumnab mauhkkulag.

Jeremaia 48:6

Ag Moap, ag ahan ooleg! Ag mauhmananu ag ahan oolna, atu taɗakppa lokkumna dayeg!

Jeremaia 50:15

Ag talilidna daanna, ban hekkulagnu baalag okkaippa eig! Ag amu hena, ban heppeg, Babilon ag eppelagppa daakku. Ag heppeg, bannu lag attan ta ukkak menppa hak heppig am nena qeppeg, aabnu aɗ ele na qekku. Yawe Nug ag ahilag eheɗ haknu nob tutukku madatte amunu, ag kekeɗ, ag nob tutukku amu, Babilon laa dilagppa eheɗ heppig, amubia ag Babilon matteg!

Jeremaia 50:28

Babilon dilag uug awak haen digma beebeb, Israel danab ah laa ag Babilonnu ahan, eɗun oolna Israel wanppa gona, Sion appa ag Yawe, Nug ig Israel, ihinig Kayak, ag Nug Babilon dilag daup anukka nug laug heeg nauhom, gemu Nug kobol nau amu heppignu nob aakku mattomnu madippeg doyeg!

Jeremaia 50:31

Yawe, Nug Yawe Nukka Ɠagattag Oh Ele, Nug atte. “Babilon, ag am beɗuppa tak danab, amge da ahilag hak amunu eheɗ doyeye ool ii madattem. Aɗinu? Ahilag bu awak haen aakku uɗiom daatte.

Jeremaia 50:8

Amu Yawe atte. “Ag anam eheɗ hattana appig, amge O dahilad danab ah, ⌊da Babilon bu madakkul amunu,⌋ ag ahan, Babilon wanppanu ooleg! Ag Babilon wanppa aib daappig! Ag meeme dawai, sipsip laa diin, laih gotteb bia hena, ag ahan ukkeg!

Jeremaia 51:11

Ag lat doɗo babaitteg! Ahilag guppiɗ human aɗeg! Babilon ag heeg, Yawenu mettid lag nauhom amunu, Yawe Nug Babilon eheɗ hak amunu nob tutukku madakku. Yawe Nug heeb, Babilon nauhkkunu maittak awom daatte. Amunu Nug Midia dilag king Babilon ele ban hekkulagnu dabmak matta he, ag hekkulagnu yag bak dootteb.

Jeremaia 51:36

Anam amunu, Yawe Nug atte. “Ag Juda, ag antteg! Babilon ahilagnu eheɗ heppig amunu, da ag Juda, da ag ehanadkkul. Da Babilon uug naunab madakkul. Da heppi, Babilon dilag le okkai am qaɗaiedakku. Ao, da heppi, le Babilon ag appa le lanaknu aotteb amu, le amu ele qaɗaiettaglag.

Jeremaia 51:45

Yawe atte. “O Juda danab ah, dahilad danab ah, ag ahan, Babilon uun uɗieg! Ag mauhmananu ag am ooleg!” awa atte. Yawe Nug Babilon dilag eheɗ haknu oo huanak nauhe, Babilon bu eheɗ madakkunu hette amunu, ag ele bu amu aomnanu ag ooleg!

Jeremaia 51:50

Babilon nob aoglag amunu, ag Israel danab ah ag qep elabppa ii mauhppig ele, ag Babilon uun ukkeg! Ag hamu hamu appa aib daappig! Ag umanab wan laappa daatteb, amge ag Yawe dabmetteg! Ag Jerusalemnu dabmenan oiyeg!

Jeremaia 51:56

Keeke he nauhak danab ag Babilon ele ban hekkulag. Kekeɗ amu ag Babilon daup eɗadppeg, ag eppelagppa daaglag. Kekeɗ ag Babilon daup dilag lat qiialadkkulag. Aɗinu amu bekku? Yawe Nug am Kayak Nug danab ah hipunin hetteb ele nob madatte amunu, Nug Babilon eheɗ heppig, Nug ag eheɗ amunu nob elele ag madakku

Jeremaia 51:9

⌊Amu danab laa ag akkulag.⌋ “Ig hepput, Babilon ena daalo, amge elele iitta. Nug eɗua ena daakkunu ib laa iitta. Babilonnu bu awak am okkainab. Ge, bu amuam okkai naɗi amunu, ig Babilon uuta, ig eɗut anen anen ig wanenigppa gota daatu!” aon akkulag.

Gayak Nai 3:64

O Yawe, laa ag amu hetteb amunu, na ag dahilppa eheɗ hettebnu nob elele ag madakkutnu oɗ madattem.

Namba 16:26

Nug Israel danab ah amelagppa aum. “Ag danab nau imu dilag peh lag awaidna, laih piɗe dayeg! Ahilag keeke laippu laa aibnab lauɗidppig. Ag hipunin heppig, ag amunu mauhkkulag. Ag uuadna ii gokkulag, o iitta ag ahilkad keeke laa lauɗidkkulag dayeb amu, ag ele mauhkkulag,” awa aum.

Duteronomi 32:25

Dimittim amu, ahilkad kekeɗ ag qep elabppa aqaglag. Ag laulkadppa daanna, ag eheɗ nau baɗaglag. Danab bau, ah bau ele ag mauhkkulag. Ao, nid yuɗ, kaino ele oh ag mauhkkulag.

Duteronomi 32:41

Da qep elab dahil, qep amuam amemɗi laippun yaatte bia danab ah aqadtte amu, da qep amunu aeg hoikkul dayeb, amu da qep amuppa danab ah bu madakkul dayeb, da inam hekkul. Da dahil kekeɗ dilag eheɗ haknu nob tutukku qep amuppa madakkul. Ao, da laa ag dahilnu nau ninig ele dootteb amu, da ahilag eheɗ haknu nob elele madakkul.

Duteronomi 32:43

Ag wanppan wan anen anennu danab ah oh, ag Yawenu danab ah ele maɗoɗppan gamag ahak doyeg! Aɗinu? Nug laa ag nuhig maɗi nid guittak madappig ele, Nug amunu nob tutukku madakku. Nug kekeɗ nuhikkud dilag eheɗ haknu nob tutukku madakku; amu Nug ele danab ah nuhikkud dilag eheɗ haknu nob nau tiigppa iitta mekkunu heeb elele metteb, Nug heeb, nuhig wan ele eɗua, nuhig neekkakppa oppiaawak daakkunu hekku.

1 Timoti 5:22

Na danab laa paha aon, tamaniak ikki daakkunu eppen qaɗeppa aib meme. Na laa ag hipunin hetteb ele amu, na ag ele hipunin aib heppig! Na nakka beɗun atognonana, oppiak daye!

Revelesen 16:19

Mim ne amu, aab okkai amu nug obate, maha ewam bate, aria atu atu dilag aab okkai ag nena qeppig. Haen amuppa ele amu aab okkai Babilon onig, ɠagattag ele nug Kayak daugppa do, Nug nuhig oppoɗi bak okkainab kap-ppa wain bia mette, Babilon laum.