Jeremaia 51:50 - Nobonob Baibel

⁵⁰ Babilon nob aoglag amunu, ag Israel danab ah ag qep elabppa ii mauhppig ele, ag Babilon uun ukkeg! Ag hamu hamu appa aib daappig! Ag umanab wan laappa daatteb, amge ag Yawe dabmetteg! Ag Jerusalemnu dabmenan oiyeg!

Jeremaia 51:50 ပူးပေါင်းရင်းမြစ်များ

Sam 122:6

O danab ah, ag maɗoɗ Jerusalem ippa daakkunu unuqitteg! Ge, da danab ah oh ag Jerusalemnu oolag mauhtte ele, da ag ena daaglagnu ool daatte.

Aisaia 48:20

⌊Yawe Nug atte.⌋ “Ag Babilonnu ahan ukkeg! Ao, ag Babilon oolagppanu ahan, oolna ukkeg! Ag gonana, ag, ‘Yawe Nug ig Jakop buɗub, nuhikkud maɗi nid maɗi ah ele, Nug ig laa eppelagppa dayaknu qagaiettakppanu eɗua uhuqak ha mekkom,’ mattinna eig! Ag wan atu ohppan danab ah dooglagnu nai amu appeg doyeg!

Aisaia 51:11

Anam amu, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.

Aisaia 52:2

Ag Juda danab ah, ag gappudppan aheg! Ag ahan, ag abenlagppanab dayeg! Ao, ag Juda danab ah, laa ag aɗalatte, ag nug eppegppa daatteb ele amu, ag sen ag baalagppa qakkak daatte uhuqna, qakkak iitta oiyeg!

Jeremaia 31:21

O Israel danab ah, ⌊ag eɗun, ahilag wanppa uɗiglagnu amu,⌋ ag ib atten atten aon uɗiglagnu ele, ag ib amu giginppa at maadna, pilak human galatteg! Ag ib attem attem aon oiglag amu, ag amu dabmena autna aweg! O Israel danab ah, ag ahan, eɗun ahilag aab anen anenppa uɗiglag.

Jeremaia 44:28

Laib laibib ag qep elabppa ii mauhna, eɗun Juda wanppa gokkulag. Anam beeb, Juda danab ah oɗo yaak daan, uɗin Isip wanppa oitteb ele, ag ahilag nai am ɠagattag daakku, o dahil nai am ɠagattag daakku, ag amu dooglag,” awa atte.

Jeremaia 50:8

Amu Yawe atte. “Ag anam eheɗ hattana appig, amge O dahilad danab ah, ⌊da Babilon bu madakkul amunu,⌋ ag ahan, Babilon wanppanu ooleg! Ag Babilon wanppa aib daappig! Ag meeme dawai, sipsip laa diin, laih gotteb bia hena, ag ahan ukkeg!

Jeremaia 51:45

Yawe atte. “O Juda danab ah, dahilad danab ah, ag ahan, Babilon uun uɗieg! Ag mauhmananu ag am ooleg!” awa atte. Yawe Nug Babilon dilag eheɗ haknu oo huanak nauhe, Babilon bu eheɗ madakkunu hette amunu, ag ele bu amu aomnanu ag ooleg!

Jeremaia 51:6

Ag wan laappan danab Babilon daatteb ag, ag Babilon uun ooleg! Ag mauhmananu ag Babilon uun, oolna laih ukkeg! Babilon hipunin heppig, diig amunu ag nauhkkulag. Ag nauhkkulag amunu, ag laa ag appa daappeg, Babilon ag ahilag hipuninnu nob amu aoppeg, ag laa ag ele Babilon beɗulagppa ag nob amu aon nauhmananu, ag appa aib daappig. Babilon danab ah ag hipunin heegeg uɗie, gemu ele heegeg, Yawe Nug eheɗ hak amunu nob tutukku madakkunu haen uɗiom daatte amunu, kekeɗ ag heppeg, Babilon nauhkku.

Esekiel 6:9

Ag ii mauhppig dilagnu amu, kekeɗ ag aɗualadna diippeg, ag matatun gona, wan laalappa daanna, ag dahilnu dabmekkulag. Ag da ahilag hak nau antten, da ag dimeɗaeg doyen, ag kayak hambuppuak anidna, ag binag mekkulagnu oolag huana heum anttena, da oolppa uug naunab nau doomi dooglag. Ag anam doon, ag eheɗ heppignu, ag kobol laala, da kobol amunu oolppa uuaknab doottem ele, ag amu ele heppignu, ag akka ag ahilagnu eheɗ nau dooglag.

Daniel 6:11

Amu danab okkai laa amu ag oh ahan, ameg laippu daan wana, Daniel nug Kayak unuqittatta, ehanittak medakkunu oɗ mettom anidppig.

Revelesen 18:4

Amu da baula baag laa hab aabppanu doomi, amu nug inam aum. “Dahilad danab ah ag nug ooppanu uɗin, dimittim ippa doig! Iitta dayeb, ag nug ouqeppeg, ag nug ele nuhig hipuninppa daaglag, nuhig hipunin nob nau amu, ag nug ele aoglag.