Jeremaia 50:2 - Nobonob Baibel

² “Ag laa wanppan wan ohppa danab ah dooglagnu nai laa imu appeg doyeg! Ao, danab nug danab ah laa ag anidna, dabmak aon, at amu gumidna wakkulagnu nug pilak laa qabatte, ag anam hena, nai imu appeg doyeg! Ag nai huppu nakok laa aib uuppig! Ohnab appeg doyeg! Ag inam aig! ‘Kekeɗ ag Babilon eɗadppeg, Babilon ag eppelagppa daakku. Kekeɗ ag heppeg, Babilon dilag kayak Bel nug uɗa nekku. Babilon dilag kayak Marduk, nug baɗak eheɗ nau dookku. Babilon danab ah dilag kayak hambuppuak dottolkad am uɗa nak nau dooglag. Dottolkad amu, ag am baɗak eheɗ nau dooglag.

Jeremaia 50:2 ပူးပေါင်းရင်းမြစ်များ

Sam 64:9

Anam beeb, laa oh ag Kayaknu ebehilag oh bodoetta le mekku. Ao, ag Kayak Nug keeke okkai okkai heumnu, ag laa amelagppa amunu mattiglag. Ge, ag amunu dabmena autna aoglag.

Sam 96:3

Ag nuhig binag amahlak oppiaawak elenu amu, ag wanppan wan ohnu danab ah oh amelagppa mehuqeg! Ao, ag nuhig hak enanagnu huu ohppa appeg doyeg!

Sam 97:7

Amu danab ah ag kayak hambuppuak dottolkad noolagppa dup nona binalag metteb ele, ag uɗa nak dooglag. Ao, danab ah oh ag ahilag kayak hambuppuak binalag metteb, ⌊ag uɗalag nekku⌋. Ag kayak hambuppuak oh, ag Nug noobppa dup nona binag meig!

Aisaia 12:4

Haen amuppa ag gamalag aheb, geha ahi inam ettan akkulag. “Ag Yawe onig attan humeg! Ag Nug unuqitteg! Ag danab ah wan ohppa amelagppa keeke ena oh Nug heumnu appeg doyeg! Nug laa oh eɗattak, attannab daatte amu, ag danab ah oh amelagppa aig!

Aisaia 13:2

Ag qauko laa igippa ad iitta ele, ag amuppa tena, ban danab ag ban hekkulagnu pilak laa qabappeg dayaɗ! Ao, ag baalag okkaippa ⌊daup ag uɗin, qagmekkulagnu⌋ huana eig! Ag eppelagppa ippunadppeg, ag gona ban hena, ag aab okkai laa ⌊Babilon⌋, appan danab ag dada danab daatteb amu, ban danab ag gona, aab okkai amunu od aoglagnu ban heig!

Aisaia 21:9

⌊Nug anam awowa, nug neekke ukke, keeke laa antta eum.⌋ “Antteg! Da danab doɗ attan daan uɗitteb anadttem. Ag hos attan aɗit aɗit daan uɗitteb,” awa aum. ⌊Amu laa nug oɗmak he, laa⌋ nug nob ma, inam aum. “Babilon na qa nauhom. Babilon aakku na qa nauhom. Ahilkad kayak hambuppuak dottolkad amu oh wanppa nena qena, oh aoɗadppig!” awa aum.

Aisaia 37:19

Genab, ag wan amu ohppan kayak am akkaeg, aab aɗuppa teeg ewatte, iitta meppig, amge ag amu heppignu diig am, kayak amu, ag am kayak genab iitta; ag am men, ad ele hoiyak aakkuib. Danab ag kayak amu eppelagppa heppig.

Aisaia 39:1

Haen amuppa Baladan bekka, Merodak Baladan, nug Babilon dilag king dayom. Nug king dayaya, nug Hesekaia oɗe ma, eɗua ena daye doyom amunu, nug nuhikkud danab laa ag pas laala, keeke ena laa ele ag aon gona, nuhig daakkunu Hesekaia hamu mettaglagnu maatte goppig.

Aisaia 46:1

Babilon dilag kayak onig Bel, nug genab daalo, nug dup nolo. Babilon dilag kayak laa onig Nebo, nug genab daalo, nug gomela daalo. Danab ag dottolti aon, laih gokkulagnu uɗatnu doɗ gomeppa maatteg daattep. Danab ag kayak hambuppuak aɗit amu dottolti, ag keeke amu doɗ bahilag yaatte ele gomelagppa meeg maotteb.

Aisaia 48:20

⌊Yawe Nug atte.⌋ “Ag Babilonnu ahan ukkeg! Ao, ag Babilon oolagppanu ahan, oolna ukkeg! Ag gonana, ag, ‘Yawe Nug ig Jakop buɗub, nuhikkud maɗi nid maɗi ah ele, Nug ig laa eppelagppa dayaknu qagaiettakppanu eɗua uhuqak ha mekkom,’ mattinna eig! Ag wan atu ohppan danab ah dooglagnu nai amu appeg doyeg!

Aisaia 48:6

Da keeke digdig bekku amu, da ii bak haenppa ai dooppig. Ao, da ai doyeg beppig amu, ag amelagppa anadppig amunu, ‘Yawe Nug amu ii heum,’ akkulagnu iite uuglag? Ge, ag nai genab, ‘Yawe Nug amu bekkulagnu ana, he beppig,’ iite akkulag?” ⌊Yawe Nug anam ana mala, Nug nai tuɗitta atte.⌋ “Gemu da digmein, keeke bau, keeke laa ag ii dootteb, da amu appi dooglag. Ao, da keeke lokkumak daatte amu, da amunu appi dooglag.

Jeremaia 10:11

Ag Israel danab ah, ag wanppan wan anen anen ohppan danab ah inam appeg dooglag. “Kayak hambuppuak ag bappaladtteb, ag hab, wan ele ii heppig. Ag ii heppig, amu ag wanppanu qettoɗkkulag.”

Jeremaia 10:15

Ag am keeke diig iitta, keeke hamu. Danab aon aon aqaglagnu keeke. Ahilag bu awak haenppa, Yawe Nug kayak hambuppuak dottolkad amu hettoɗiatteb, ag oh padal mekkulag.

Jeremaia 31:10

Danab ah wanppan wan ohppanu ag daulag human, Yawe aɗi atte amu doyeg! Ag doon, amu appeg, danab ah wan laalappa daatteb ag doon autna aoglag. Nug Israel danab ah matatun goppig ele eɗua diia, laippu qagmaadkku, aon appeg doyeg! Yo, Nug sipsip gumak danab laa sipsip nuhikkud dabmadatte bia ag dabmadakku.

Jeremaia 4:16

Amu Yawe Nug atte. “Ag wanppan wan ohppa danab ah amelagppa inam appeg doyeg! Ge, Jerusalem appa ag appeg doyeg! ‘Wan umanu daup ag uɗitteb. Ag Juda dilag aab oh eɗadkkulagnu dabmenana, ag bannu ewak aakku etteb.

Jeremaia 4:6

Ag laa ag ib epponaknu at ib daugppa, o qauko igippa metteb ele, ag danab ah ag Sion ukkak ib anidkkulagnu at amu qappeg! Ag Juda danab ah ⌊Sion nakok guguittak daatteb,⌋ ag paha aab ahilag anen anenppanu, ag ena daaglagnu, ⌊ag aab amuppa⌋ paha oolna ukkeg!” Yawe Nug da anam akkulnu amelppa aum. Yawe Nug anam da amelppa ana malowa, Nug nai tuɗitta aum. “Juda danab ah, ag amu hekkulag diig am inam. Da hei, laa yawalti uɗitteppanu nug eheɗ hadakkunu uɗitte. Nug keeke kuɗum loppaɗeb nauhkkulag ⌊amunu ag padal mena autna aomnanu, ag anam ooleg⌋!” Yawe Nug anam da amelppa aum.

Jeremaia 46:14

“Jeremaia na nai imu Isip wanppa appa mehuqppe doyeg! Appa na Mikdol, Mempis, Tapanes ele Isip danab ah ag dooglagnu appe doyeg! ‘O Isip danab ah ban wan atu ag talilidna daatteb ele amuppa daatte. Appan danab ah qep elabppa mauhtteb amunu, ag Isip dilag daup ag ahan, ag ban hekkulagnu, abenppa gona daan, ag babaitteg!

Jeremaia 50:46

Kekeɗ ag ban hena, Babilon eɗadppeg, ag eppelagppa daappeg, haen amuppa wan atu ohppan danab ah ag doon, ottaikkulag. Babilon danab ah ag haen amuppa eheɗ gaaglag, amu danab wanppan wan laala ag gayak amu dooglag.

Jeremaia 51:12

Ag Babilon aqaglagnu pilak humeig! Meitta dayak danab laa otiatteg! Aɗi uɗitte anttak danab ag abenlagppa matteg! Lokkuma dayaya, aha ban haknu dabmak babaitteg! Aɗinu? Yawe Nug Babilon dilagnu aɗi hekkunu dabmeum am, Nug hekku. Ao, Nug Babilon danab ah dilagnu aɗi bekkunu ɗo nai mattiom amu, Nug heeb bekku.

Jeremaia 51:27

Daup ag anidna uɗin, Babilon ele ban hekkulagnu ag pilak qabappeg, attan dayaɗ! Ao, daup ag doon, Babilon ele ban hekkulagnu ag trampet wan atu kuɗumppa iwaleg! Heppeg, wanppan wan laalanu danab ag Babilon ele ban hekkulagnu babaitteg! Ao, ɗo maɗoɗ imu ag ban hekkulag; Ararat danab, Mini danab, am Askenas danab ele. Appan danab ag ahappeg, Babilon ele ban hekkulagnu ag nai meppeg ukkeb doyeg! Laa nug daup huanak Babilon ele ban hekkulagnu dilag okkai daakkunu otieg! Heppeg, bannu hos huanaknab, ag tap-lokus huanak daatteb bia daan, daup ag hos amu attan oin, ban hetteb ele ag goppeg, Babilon ele ban heig!

Jeremaia 51:31

Nai awa ukkak danab laa nug layag dim lamitta uɗieb, nug dimugppa laa ele uɗikku. Danab anam kuɗum uɗin, ban attem attem gotte Babilon dilag king amegppa appeg dookkunu uɗiglag, amge ag oh nai laippuib appeg dookku. Ag inam akkulag. “Kekeɗ ag Babilon aab eɗitteg, Babilon aab okkai oh ag eppelagppa daatte.

Jeremaia 51:44

Am Yawe Nug atte. “Da Babilon dilag kayak Bel bu medakkul. Da bu medappi, nug aɗi aɗi toppua ukkom ele amu baheb, eɗua bekku. Gemu wan laappan danab huanak ag Bel noobppa dup nona binag mekkulagnu gotteb, amge da Bel bu medappi, danab ah ag amu ii hemana. Da heppi, Babilon aabnu aɗ na qekku,” awa atte.

Jeremaia 51:47

Amu Yawe Nug atte. “Aɗinu ag anam ii amana? Haen laa genabnab genab uɗikku, am haen amuppa da Babilon dilag kayak dottolkad bu madakkul. Babilon danab ah oh ag uɗa nak nau guittak ele doon, Babilon danab ah huanaknab mauhkkulag.

Jeremaia 51:52

Ag anam doon atteb, amge Yawe Nug atte. “Haen laa uɗitte, amu haen amuppa da Babilon dilag kayak dottolkad bu madakkul. Da amu heppi, Babilon wanppa danab ah guittak okkai aon, ag aiqakkaglag.

Jeremaia 51:8

Amge Babilon na qa, aoɗa nauhkku. Babilon guittak amu aokku amunu, ag Babilonnu mahieg! Ag marasin laa awa, guittak okkai doomanu metteg! Nug eɗua ena daakkutai.

Jeremaia 52:31

Aria, Nebukatnesar nug Juda dilag king Jehoiakin awa, Babilon wanppa ukka laih me dayak danab daakkunu ukkom, maɗ amuppan digma ukke, maɗ 36 uue, maɗ 37 ooppa danab onig Ewil Merodak nug Babilon dilag king abenab awom. Nug awa, nug he, ag Juda dilag king Jehoiakin maniguittakppanu aon meeg, dimittim uɗiom. King Ewil Merodak nug maɗ amuppa kalam 12ppa, deɗ 25ppa anam heum.

Jeremaia 6:18

Juda, ag amu heppig amunu, wanppan wan laala ohppan danab ah, ag nai imu doyeg! Ao, ag laa, ag aɗi heehe anttomnu mattiak danab aɗi, ag neegna antteg! Ag neegna doon, Juda dilagppa aɗi bekku antteg!

Daniel 1:2

Nebukatnesar, nuhikkud daup ele ag anam heeg, Naɗi Nug he, ag Juda dilag king Jehoiakim aoeg, nug Nebukatnesar eppegppa daye, Nebukatnesar nug Kayaknu mettid lagppan keeke laala ele diiom. Keeke amu nug awa ukka, nuhig kayaknu mettid lag Babilon wanppa daatte, amuppa, en maknu oo, nug appa meum. ⌊Nug keeke awa Babilon ukka, Nug Jehoiakim, Juda laala ele diia, ag Babilon wanppa diia ukka laih me dayak danab ah daaglagnu ukkom.⌋

Daniel 3:14

Ag omaladna uɗieg, Nebukatnesar nug nid ewam amu amelagppa aum. “Satrak, Mesak, Abetnego, laa ag ahilagnu ag am dahil kayak noolagppa dup nona binalag ii metteb, ag dottog golppa hak da qappami amu, ag dottog amu noobppa ele dup nona binag ii metteb aeg doomi. Ag atteb am genabte o genab iittate?

Sepanaia 2:11

Yawe Nug heeb, Moap, Amon ele dilag kayak hambuppuak oh ag padal mekkulag amunu, Moap danab ah, Amon danab ah ele ag Yawenu ebehilag oh bodoetta le mekku. Yawe Nug anam ha maleb, wanppan wan ohppan danab ah ag ahilag wanppa Yawe noobppa dup nona Nug binag mekkulag.

Revelesen 18:2

Nug na, baag okkaippanab ewa aum. “Aab okkai Babilon onig, ɠagattag ele aakku na qeum! Aakku na qeum! Nug aakku ouɗi nau daaglagnu abenlag daatte. Ao, nug am ouɗi nau oh dayaknu aben. Ge, nug am ai ii lanaknu epeɗiak daatteb, amuam ai danab nug ahilagnu ooppa uuaknab dootte, am amu dilag aben daatte.