Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Jeremaia 50:14 - Nobonob Baibel

14 Ag kekeɗ, ag lat pimaltteb ele, ag Babilon talilidna daan, nug ele ban hekkulagnu babaitteg! Babilon danab ah ag Yawe, nuhigppa hipunin heppig amunu, ag Babilon dilag kekeɗ ag lat doɗo eheɗ ewatteg! Ag laippu laippu aib eppig. Ag kuɗum, eheɗnab ewatteg!

အခန်းကိုကြည့်ပါ။ ကော်ပီ




Jeremaia 50:14
21 ပူးပေါင်းရင်းမြစ်များ  

Ag anam aben aon daaegeg, Joap nug noobppa, dimugppa ele ban haknu dayom antta, nug Israel daup ena enaib laa otiatte, ag nug ele ag Aram dilag daup ele ban hekkulagnu aum.


Da hipunin na, nahip-ppanab hemi. Ge, da nahip neekkakppa eheɗ hemi. ⌊Amu genab, da hipunin laa dilagppa hein, ahilagnu eheɗ hemi, amge diigppanab⌋ da hipunin nahip-ppa hemi. Ge, da nahip neekkakppa eheɗ hemi. Da hipunin hemi amunu, na Kayak, haen na dahilnu, “Na hipunin heme,” attem am, na tutukkuib attem. Yo, haen na da hettoɗiakppa meiɗna, na kobol tutukkuib hettem.


“Ag toettan daanna, keeke imu anidna doyeg! Qauko laappa oqotti naɗinab daatte. Oqotti amuam danab ah kuɗum huanak qagmena, muttub qena, oqotti okkai hetteb, amubia daatte. Ao, ag toettan daan, keeke doyeg! Oqotti okkainab wan atu oh oolagppa daatte. Oqotti amuam ban danab kuɗum huanak ban hekkulagnu uɗin qagmetteb, amubia daatte. Yawe Nukka Ɠagattag Oh Ele, Nug nuhikkud ban danab ag ban hekkulagnu qagmaadtte.


Ahilag lat aeg am aeg hawaɗnab, ahilag lat am omanak daaglag. Ahilkad hos am ag baelag di ɠagattag, men bia; panakkunu ele iitta. Ahilkad bannu karis am huan, pahanab gokkulag, bannu karisnu wil itoɗiak am ulah kilibob itoɗiaya gotte, amubia itoɗikku.


Ag Isip daup dilag hos, ag huan qaiettan, ban hekkulagnu ukkeg! Ag ban danab ag bannu karis lamadtteb ele, ag ahilkad bannu karis huana lamatteg! Ag daup baelagppa oin, ban hetteb ele, ag Kus danab, ag Put danab guppiɗ maotteb ele, ag Lidia danab latppa ban hetteb ele amu, ag oh ahan, laippuppa tappa ukkak hena, ban hekkulagnu ukkeg!


Da, Jeremaia, da Yawe Nug nai awa ukkak danab laa nug wanppan wan laalappa danab amelagppa nai ab dooglagnu me ukkom doomi. Danab Yawe me ukkom ele amu, nug nai imu ab dooglagnu me ukkom. “Ag laa ag Esau buɗub, am Edom aakku, ag ag ele banelag gokkulagnu qagmeig! Ge, ag ban hekkulagnu aheg!” Yawe Nug anam akkunu me ukkom.


“Yawe Nukka Ɠagattag Oh Ele, Nug inam atte. ‘Antteg! Da heppi, Elam daup latppa ban hetteb, ahilag ɠagattagppa Elam ɠagattag daatte amu, da heppi, ag oh mauhppeg, Elam am gai-iitta daakku.


Amu Yawe Nug atte, “Ag kekeɗ ag dahiladnab danab ah eheɗ hattana, ahilag keeke aon gotteb ele, ag amunu oolag gamag ahatte. Makau balat, mameg qakkaknu muɗi uhuqe, enanag dootte bia, ag dahilad danab ah dilagppa eheɗ heppignu enanag dootteb. Ag hos dawai enanag doyaya, huana gaatte bia, ag gamag ahak doon etteb.


Amu Yawe Nug atte. “Babilon ag da, Yawe, Israel dilag Kayak Oppiaawak Ele, ag da oɗel tappaeg neum amunu, kekeɗ ag laa appeg, latppa ban hetteb ag uɗin, Babilon aqeg! Ag Babilon talilidna daanna heppeg, Babilon laippu laa aib oola ukkom. Babilon danab ah ag eheɗ heppig amunu, ag nob matteg! Ag eheɗ digdig heppig, amubia ahilagppa heig!


Daup amu ag lat, ban ele aɗaglag. Ag laa guittak mettaglagnu uug laa ii doomna. Ag laa dilagnu oo gai-iitta doya oo matta ehanittaknu kobol nakok laa dim ii lamidmana. Ag hos attan daanna oippeppeg, oqotti ahilag am yu heehe, oqotti otte amubia. O Babilon danab ah, ag ag ele ban hena aqaglagnu ag huu men uɗiglagnu bappaidkkulag.


Ahilag kekeɗ ag anadna, ag doɗ nau sipsip qa latte, amubia ag eheɗ hadappig. Kekeɗ ag amu henana, ag appig. ‘Israel ag Yawe, ahilag ehanittak genab, Israel mamelkad aɗi dilag keeke ena bekkunu dabmak aɗa oiyaknu diig ele, ag nuhigppa hipunin heppig amunu, “Ig Israel eheɗ hadattem amu, ig beɗunigppa amunu aab laa iitta,” ’ ” aon appig.


Aɗinu ag oolkkulag? Da heppi, huu okkainab, ɠagattag ele laala yawalti uɗitteppanu daatteb, ag ahan qagmena, ag Babilon ele ban hekkulagnu uɗiglag. Ag yawalti uɗitteppanu uɗin, Babilon ele ban hekkulagnu aben aon, keeke bappaidna, ag Babilon eɗidkkulag. Ag lat doɗo ekkulag amu, lat doɗo amu oh daup dabmak enanag ele bia daaglag. Laippu laa hamu ii goma. Iitta. Oh am Babilon daup aqaglag.


Da heppi, wan laihnu daup ag Babilon gona, ag danab ulah ee aeg dappunkkeg iwale ukkaknu uɗat hette bia Babilon heppeg, nauhakib daakku. Ag Babilon heppeg nauhkku, haen amuppa ag Babilon talilidna daanna, ban hekkulag.


Daup ag anidna uɗin, Babilon ele ban hekkulagnu ag pilak qabappeg, attan dayaɗ! Ao, daup ag doon, Babilon ele ban hekkulagnu ag trampet wan atu kuɗumppa iwaleg! Heppeg, wanppan wan laalanu danab ag Babilon ele ban hekkulagnu babaitteg! Ao, ɗo maɗoɗ imu ag ban hekkulag; Ararat danab, Mini danab, am Askenas danab ele. Appan danab ag ahappeg, Babilon ele ban hekkulagnu ag nai meppeg ukkeb doyeg! Laa nug daup huanak Babilon ele ban hekkulagnu dilag okkai daakkunu otieg! Heppeg, bannu hos huanaknab, ag tap-lokus huanak daatteb bia daan, daup ag hos amu attan oin, ban hetteb ele ag goppeg, Babilon ele ban heig!


Anam amunu, Babilon dilag daup ag lat ahilkad omanadmananu, ag ahilkad ban hak lamen ɠagattag takkaladmananu, ag kekeɗ ag paha ban heig! Ag kekeɗ ag Babilon dilag nid bau aqeg! Aib uuadppeg daappig! Ag kekeɗ, ag Babilon dilag daup ohnab aqappeg, padal meig!


Lebanon appa na laa guittak nau mauhnoak mettak kobol heme, amu diig amunu na nauhkkut. Ao, appa na doɗ ge iitta hamu hamu aqadme, amu diig amunu na baɗak eheɗ nau dookkut. Aɗinu? Na danab aqatte, ag tiilag ne, na wan, aab ele hatte nauheg, danab ah appa daappig ele padal meppig.


Ag amu hekkulagnu diig am, na ban hena, wanppan wan kuɗumnu danab ah dilag keeke aome amunu, wan amuppanu danab ah laa ii mauhppig amu, ag ban hena, nahip keeke eɗun aoglag. Na danab ah kuɗumnab aqe mauhatteg, na hee, ahilag wan, aab keeke ele nauhak daappig amunu, ⌊ag nahip-ppa anam hekkulag⌋.


Nug iɗuppa onig laa nai tonakppa yaappig. Onig amuam inam. “Aab okkai Babilon onig, ɠagattag ele, nug am ib baag ah, amu wanppanu keeke nau digdig, Kayak Nug amunu ooppa uuaknab dootte, am amu oh anilag aakku.”


Jesi nug anam aum amunu, Dawit nug wagɗe buttuanab aha, nid laa sipsip gumaknu amegppa a gumattette, nug mameg aum bia nug ee awa, Israel dilag ban abenppa ukkom. Israel ban danab ag ban hekkulagnu ahan, ban haknu abenppanab gonana, ahilag ban hak ehanidkkunu ewak heegeg, haen amuppanab Dawit ukka teum.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ