Jeremaia 5:3 - Nobonob Baibel

³ Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

Jeremaia 5:3 ပူးပေါင်းရင်းမြစ်များ

Genesis 19:34

Aria, wagɗe deɗ amuppa aɗeg tatamnu nug makkeg amegppa aum. “Antte! Tumai tuqan da mama ele niimuɗ. Tueb imu i baula hepuɗ, nug wain lab, na nug ele niiglah. Anam heta amu, i nuhigppa nid ele daaɗa, ig aab ikki ihinig humagnig,” awa aum.

1 King 13:33

Keeke amu beum, King Jeroboam nug anttom, amge nug nuhig kobol eheɗ ii uuom. Iitta. Nug baula nukka kayak hambuppuak dilag mettid lag nakokppa ag mana mettak uɗat hekkulagnu, nug danab ah oh dilagppanu mana mettak danab daaglagnu danab diia otiattom. Danab aun nug mana mettak danab daakkunu oo dayom amu, Jeroboam nug danab am uɗat amu hekkunu baɗ mettom.

2 King 1:13

Anam beum amu, king nug ban daup ikki laa, ban danab 50 laa ele, ag Elaiya omalna uɗiglagnu maatte goppig. Amge ban daup ikki ebqak ewam amu nug qauko amuppa ta, Elaiya guguitta ukka, laippun gateg qaun o, amegppa inam aum. “Kayaknu danab, na da dabmeɗan heppe, da ii mauhpan, danab imu ele anamib oo doyak ele oɗ medattem. Ig am nahip maɗi nid.

2 Stori 16:9

Aɗinu? Yawe Nug aun nug Nugib dim lamidkkunu meu ohppa dabmette ele antta, nug ɠagattag medakkunu hanhan danab wanppa oitteb ele neekkadtte. Nug na ele kekeɗ eɗadkkutnu ɠagattag mettalo. Na heme am, na dabmak tutukku iittappa heme amunu, na hanhan ban anidnan daakkut,” awa aum.

2 Stori 28:22

Uug digdig amu be, King Ahas nug doyom, amge uug amu beebe, nug eɗua, Yawe dim ii lamittom. Iitta. Nug tuɗitta, Yawe ippunittomnu oo metta ii uuak kobol dim lamidkkunu uua auta autanab awa oiyom.

Sam 51:6

Na danab ah ag oolag unuqagppa doyak diig genabib daakkunu oot daatte amunu, na da ool unuqagppa, da danab doyak dabmak ena ele, da danab anam daakkulnu ippuniɗkkutnu unuqidttem.

Sam 51:8

Na hipunin dahil uhuqna meɗappe, diig amunu da baula gamag ahak okkai dookkulnu oɗ medattem. Ao, na da bu iume, amge gemu na heppe, da gamag ahak dookkulnu unuqidttem.

Sam 55:20

⌊Da layal, nuhignu amu,⌋ nug laikkud banelag gotte. Nug aɗi hekkunu layag ele nug tituana nai qakkakppa aum amu, nug amunu hamu bia doya, tippala, ii hette.

Prowerb 21:29

Nau hak danab ag oɗe dim lamidmananu, ag ahilag dabmak am ɠagattag eppak daatte; amge genab tutukku hak danab ag aɗi hetteb amu, ag dabmettan autna aotteb.

Prowerb 22:12

Yawe Nug doyak ena atognotte; amge Nug laa nug Yawe ippunittom bia Nug dim lamidkkunu uua hette amu, Nug danab amunu nai he nauhtte.

Prowerb 23:35

Na wain huana lawona, na inam akkut. “Ag da oiɗppig, amge da guittak ii meɗappig. Ao, ag da oiɗppig, amge guittak laa ii doomi. Da ganeb le baula lakkulnu niiaknu uue, eɗuen ahakkul.” Na anam akkut.

Prowerb 27:22

Danab nug ee aeg awa, ganuɗaknu masinppa me ukke, kalu daatte. Anam amge, na danab nug Kayak dab-ii-maama ii dim lamidtte ele, na nug anam bia eheɗ hedakkut dayeb amu; nug nuhig Kayak dab-ii-maama hak kobol ii uuma.

Aisaia 26:11

O Yawe, na nau hak danab ah ele nob nau madakkutnu na eppen humame daattem, amge ag amu ii dabmetteb. Anam amu, na nahipad danab ah ehanadkkutnu yag-nab-bak doottem ippunadppe, nau hak danab ag amu anidna, dabmak eheɗ aoppig dooppeg, uɗalag nekkunu ool daatte! Ge, na heppe, aab aɗu na nahipad kekeɗ dilagnu bappaidme amu, aab aɗu amuam hipunin danab ah ewadkkunu oɗ medattem.

Aisaia 42:25

Israel ag anam heppig amunu, Yawe Nug ahilagnu oo nauhak huanaknab be, Nug he, ban nau ag wanelagppa neum. Ban amuam aab aɗu danab oh diia ewadkkunu hette bia dayom, amge ag nau amu beumnu diig ii dooppig. Ao, ban amuam aab aɗu danab ewa iitta mette bia dayom, amge ag amunu dabmak tutukku ii aoppig.

Aisaia 48:4

Da ag, ahilag dabmak am ɠagattag eppom daatte, da ag heppeg, dabmak ahilag eɗukkunu iinab hetteb am doomi. Ahilag dabmak am ɠagattagnab; aen o bras bia.

Aisaia 9:13

Anam bekku, amge Israel danab ah ag amu anidna, amuppa oolag eɗueb, laa ag bu madakku ele gumidna iinab gomana. Ag eɗun, Yawe Nukka Ɠagattag Oh Ele, Nug anidna dim lamidkkulagnu ii mattimna.

Jeremaia 15:7

Danab nug ulah ee aeg dappunkkeg iwale ukkaknu uɗat hette, amubia ikki danab dilag qagmak aben aab okkai odppa daatte, da appa heppi, Juda danab ah ag ahilag wanppa ii daamna; ag umanab gona, diia ukka laih me dayak danab ah daaglag. Ag oolag eɗueb, da oɗel dim lamittaknu uun oitteb amunu, da heppi, ag oolagppa guittak doon, ag ele nauhkkulag.

Jeremaia 17:23

Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

Jeremaia 19:15

“Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.

Jeremaia 2:30

Da ag Israel ag oolag eɗukkunu bu mattami, amge ag oolag eɗukkunu uuppig. Ag laion doɗ laa aqe mauhtteb, amubia ag qep elabppa dahil propet aqaeg mauhppig.

Jeremaia 3:3

Ag amu heegeg uɗie, gemu ele hetteb amunu, da hei, gu ii nette. Ge, ag amu heegeg uɗie, gemu ele hetteb amunu, da hei, aam haenppanu gu laa ii nette. Ag eheɗ hetteb, amge ag hamu bia dootteb. Ag ib baag ah nug kobol nau hette, amge nug amunu hamu bia doya, uɗa nak nakok laa ii dootte, ag amubia hetteb.

Jeremaia 32:19

Amu na doyak dabmak ena okkai ele nahip-ppa, ɠagattag okkai nahip-ppa ele kobol danab haknu elele iitta hettem. Na danab oh neekkadna, ag aɗi aɗi hetteb amu, na ahilag hak amuppa na ag epeɗiadna, nob eleleib madattem. Laa na ahilag hak anidna, na nob ena madattem, laa na ahilag hak anidna, na nob nau madattem.

Jeremaia 35:13

“Da, Yawe Dakka Ɠagattag Oh Ele, da Israel dilag Kayak, da inam attem. ‘Jeremaia, na ahan gona, Jerusalem danab ah, Juda danab ah laa oh ele amelagppa inam appe doyeg! “Ag kaya imuppa ippunittak aon, dahil nai dim lamidkkulagnu dabmak iite aoglag?

Jeremaia 44:10

Juda danab ah tatamnu amu, ag nau amu henana, ag amu dabmenan, “Ig nau hemut,” ii anana, akka akka ag onilag qeeg ii ne, gemu ag Isip ippa ina daatteb ele, ag ele anam ii hetteb. Anukka, haen amuppa Juda ag ebehilag oh dahilnu bodoetta le ii meum, gemu ele ag ippa ina Isip daatteb amu, ag ebehilag oh dahilnu bodoetta le ii mette. Anukka, haen amuppa Juda danab ah ele ag dahil ɗo, dahil nai laa ele, da ag am ag mamelkad aɗi ele mattami amu, ag amu ii dim lamidppig, ag gemu Isip ippa ina daatteb amu, ag ele ii dim lamidtteb,’ ” awa atte.

Jeremaia 7:26

Amge Israel ag dahil nai ii dooppig; ag daulag human, nai doon, elele ii dabmedappig. Ag da oɗel dim lamidmananu dabmak ahilag ɠagattag eppe, ag mamelkad aɗi dilag eheɗ hak eɗidna, eheɗ huan heegeg uɗie, gemu ele hetteb.” Yawe Nug da amelppa Israel dilagnu anam aum.

Jeremaia 7:28

Anam amunu, na ag amelagppa inam appe doyeg! ‘Juda danab ah, ag Yawe, ahilag Kayak, ag Nug oɗe ii dim lamittegeg uɗie, gemu ele ii dim lamidtteb. Nug ag daulag bate, ag daug batak amu ii dabmeppig, ii dim lamidppig. Ag oolagppa doyak diig genabib ii daatte. Ao, ag oɗelagppa doyak diig genabibppanu nai laa ii bette.’ ” Yawe Nug da amelppa anam aum.

Jeremaia 8:5

Anam amunu aɗinu Juda danab ah ag ib eheɗ aon gonana, ag eɗun, dahilppa uɗiglagnu uutteb? Ao, aɗinu Jerusalem danab ah ag hanhan da dimeɗona kayak hambuppuak laala dim lamadna, ag eɗun, dahilppa uɗiglagnu uun, ii uɗitteb? Ag hambuppuak kayak aɗualadna, uuattak uun autna aotteb. Ag eɗun, dahilppa uɗiaknu uun, ii uɗitteb.

Esekiel 2:4

Israel danab ah ag hib guitta qak danab ah; dabmak ahilag ele ɠagattag eppom daatte. Ag anam daatteb, amge da na Israel danab ah dahilad nai madakkutnu meidttem. Da na ag amelagppa nai appe dooglagnu appi doon, na, ‘Naɗi Yawe Nug inam atte,’ ag amelagppa awona, tuɗidna, na keeke oh da na ippunidkkul ag amelagppa a!

Esekiel 24:13

Jerusalem danab ah, ag kobol nau heppig; ag gappai heeb baknu kobol dim lamidppig. Anam amu, da heppi, ag oppiaawak daaglagnu hemi, amge ag uun, dubuttid ele daaglagnu heppig. Anam amunu, ag bu awak iitta eleppa oppiaawak baula ii daamna. Iitta. Da ahilagnu oppoɗi bak doottem, amu da bu eheɗ madappi ukkeb, gogppa teeb, dahil oppoɗi bak oug meeb, ag oppiaawak daaglag.

Daniel 9:13

Moses ɗoppa yom bianab uug naunab amu oh ihinigppa beum, amge ig na ihinignu oot gai-iitta doon oot mekkan ehanigkkutnu ig ihinig hipunin ii dimettat, ig na Yawe, na ihinig Kayak, ig nahip doyak diig genabib ii dabmetat dim lamidmut.

Lewitikas 26:23

Da anam heppi, bu awak amuppa ag oolag ii eɗueb, ag tolittak dahil ii dabmettan, ag tuɗidna, dahil kekeɗ daaglag dayeb amu,

Amos 4:10

Yawe Nug anam ana amu, Nug atte. “Da anukka Isip danab ah uug naunab aqadkkunu hei aqom amu, da uug amuib ag Israel, ag aqadkkunu hei aqom. Ao, da hei, ban ahe, ahilkad nid bau ag banppa daan, qep elabppa mauhegeg, kekeɗ ag ag Israel, ahilkad bannu hos ele diin aqatteg mauhppig. Ge, da hei, anam be, danab, hos ele gaɗalkad beɗaegeg, uɗig nau ahilag haen tutu dayaknu aab kalappigppa dayom. Keeke amu oh ahilagppa beum, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:11

Yawe Nug anam ana amu, Nug ele atte. “Da hei, ag oolagppan laa ag Sodom, Gomora danab padal meppig, amubia padal meppig. Ge, ag am aab bau maha laa, danab nug aab maha amu ewebeb, eɗua aotte, tuɗitta ii eotte, ag amubia daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:6

Amu Yawe Nug atte. “Da hei, ag aab okkai ohppa ee iitta daappig. Ao, aab naunau ohppa ag bret iitta daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:8

Gu ii nedeppa amu, appa le iitta daye, danab ah ag beɗulag gai-iitta daye, ag ahan qiin ona, qiin donana, aab laappa le mattin goppig; amge ag le lakkulagnu elele ii aoppig. Da hei, ag Israel, ag ahilagppa anam beum, amge ag eɗun dim lamiɗkkulagnu da gumiɗna ii uɗippig,” awa atte.

Amos 4:9

Yawe Nug anam ana amu, Nug atte. “Haen kuɗum da hei, ahilkad dadppa, ahilkad grep dadppa ele eenu oɗe ba, ahilkad ee amu he nauhom. Ao, da hei, ahilag dadppan keeke oɗenu nauhppig. Da hei, tap-lokus ag uɗin, ad fig, ad olip ahilkad ele heeg nauhppig; da amu hemi, amge ag eɗun, da dim lamiɗkkulagnu da gumiɗna ii uɗippig,” awa atte.

Sepanaia 3:7

Amu da Jerusalem danab ah amelagppa ami. ‘⌊Ag uug digdig da laa dilagppa hemi anidppig amunu,⌋ gemu ag Jerusalem danab ah, ag dahilnu ebehilag oh bodoetta le mekkunu doottem. Ao, ⌊ag anidna,⌋ gemu ag daug batak nai dahil doon, dim lamidkkulag ⌊amunu, da baula bu madakkulnu ii hepa⌋ doottem,’ ami. Amge iitta. Jerusalem danab ah ag anam heppiglob amu, ahilag aab nauhkkunu ii daama. Ge, dahil bu oh ahilagppa taknu ii daama. Anam, amge ag tuɗidna hipunin hekkulagnu oolag huana dayom. Ao, ag buttua ukka tueb batak hewona, tueb ukka buttua aam bette batak amuib henan daappig,” awa atte.

Rom 2:2

Na nakka na anam epeɗiak pehettak ii hettem, amge ig doottem, Kayak Nug anam ii hette. Nug danab kobol nau anam hetteb ele amu, Nug ag nob nau tutukkuib, doyak diig genabib ippunigtte bia madatte

Hibru 12:9

Amu ag imu ele antteg! Ig oh mamenkad wan imuppanu amu, ag ig ena bekkunignu toligna, bu iqaeg, ig ag hepppignu ahilagnu ena elele doomut. Anam amunu, ig Mamenig hab aabppa daatte ele amu, ig Nug waappanab daatu! Ig anam daatta, bauklel aognig.