Jeremaia 5:17 - Nobonob Baibel

¹⁷ Wan amuppan danab ag uɗin, datta ee ahilag, ma lakka mak ele lae nekkulag. Ao, ahilag makau, sipsip ele ag aqan lae nekkulag. Ag ahilag grep meu, wain, ad fig meu ele ag lae nekkulag. Ge, ag ahilkad nid, nid ahin ele aqaglag. Ag Israel, ag aab ɠagattag aɗ ele ooppa daan, ‘Ippa ig enaib daagnig,’ atteb, amge kekeɗ amu ag uɗin qep elabppa heppeg, aab amu oh nauhkkulag.

Jeremaia 5:17 ပူးပေါင်းရင်းမြစ်များ

Aisaia 62:8

Yawe Nug nuhig ɠagattagppa nuhig nai ɠagattag qetta, Juda danab ah amelagppa inam aum. “Da heppi, ahilag kekeɗ ag baula uɗin, ahilag ee aeg ii lamana. Ge, da heppi, wan laihnu danab ag baula uɗin wain bau, ag amu aoglagnu uɗat okkai heppig amu, ag baula uɗin, amu ii lamana.

Aisaia 62:9

Amu ag Juda, ag ee meu amu awona, ag lakkulag. Ag lanana, ag Yawe binag mekkulag. Ge, ag Juda, ag grep meu amu aona, dahil mettid lag, amuppa ag lakkulag.” Yawe Nug anam atte.

Aisaia 65:22

⌊Gemu haen kuɗum kekeɗ ag uɗin, ahilag keeke aotteb, amge⌋ haen amuppa da heppi, ag laulkad buuppeg, laa ag uɗin amuppa ii daamna. Da heppi, ag keeke ebappeg, laa ag uɗin ii lamana. Aɗinu? ⌊Da ag ehanadkkul.⌋ Amu dahilad danab ah ag ad haen elab daatteb bia daaglag. Ao, danab ah da ag tituanadmi amu, ag aɗi keeke ag eppelagppa hetteb ele amu, ag uɗat amunu meunu haen elabnab oolag gamag ahakku.

Jeremaia 1:15

Aɗinu? Da Yawe, da attem. Da wan laalappan huu Yawalti uɗitteppanu daatteb amu, da ag onilagppa ekkul. Da heppi, ahilkad king, daup ele ag uɗin, ag Jerusalem, Juda dilag aab laala ele ban henan, ag eɗadkkulag. Ag eɗadna malona, ahilkad king ag Jerusalemnu aɗ odppa ahilkad sia king qappaladna, ag aguppa daaglag.

Jeremaia 25:37

Yawe Nug ⌊nau hak huanak antta,⌋ oo huanaknab nauhom amunu, Nug heeb, wan enanag ahilag, appa ag maɗoɗ daappig ele amu, wan amuam nauhakib daakku.

Jeremaia 4:26

Da neekki ukke, wan dad enanag dayom, wan amuam gemu atu taɗak antten, aab oh nauhattak aakkuib ele anadmi. Keeke oh anam nauib daaegeg anidminu diig am, Yawe, Nug ig hipunin heutut antte, nuhig oo nauhak huanaknab, amuppa uug amu oh beum.

Jeremaia 4:7

Yawe Nug anam a, da, Jeremaia, da Juda danab ah amelagppa ami. “Laa amu uɗitte amu, nug am laion laa nug teɗ nuhigppan aha, doɗ aqeeb mauhkkulagnu oitte bia uɗitte. Ao, laa nug wan kuɗum he nauhtteb ele, nug uɗikkun aakku ahom. Nug heeb, ag Juda, ag ahilag wan am nauhaknab daakkunu ahom. Ao, nug heeb, ahilkad aab kuɗum am nauhakib daaglag. Danab ah laa appa ii daamna. Iitta.

Jeremaia 5:18

Dahilad danab ah, ahilagppa anam bekku, amge da heppi, haen amuppa kekeɗ ag ag ohnab aqappeg ii mauhmana.

Jeremaia 50:17

Israel am sipsip ag oolna, matatun gona daatteb bia daatteb. Laion nug sipsip lamatte gona, tamtam daatteb, Israel ag amubia daatteb. Tatam Asiria dilag king nug uɗia, doɗ layag qe mauhe latte bia heeg, Israel nauhom. Dimnab amu, Babilon dilag king Nebukatnesar nug uɗia, nug Juda danab ah he nauhna autna aoppig,” awa atte.

Jeremaia 50:7

Ahilag kekeɗ ag anadna, ag doɗ nau sipsip qa latte, amubia ag eheɗ hadappig. Kekeɗ ag amu henana, ag appig. ‘Israel ag Yawe, ahilag ehanittak genab, Israel mamelkad aɗi dilag keeke ena bekkunu dabmak aɗa oiyaknu diig ele, ag nuhigppa hipunin heppig amunu, “Ig Israel eheɗ hadattem amu, ig beɗunigppa amunu aab laa iitta,” ’ ” aon appig.

Jeremaia 8:13

Yawe Nug atte. “Da heppi, ahilag ee meu ii oma. Grep muɗippa meu laa ii daama. Ad fig uɗug bunaɗppeg, meu ii oma. Da aɗi keeke Juda danab ah mattami amu, da ag eppelagppanu eɗuen hiɗakkul.

Jeremaia 8:16

Kekeɗ ag uɗin, Dan appa daaegeg, danab nug hos noobppa nokoɗu qe doya, hos miag daatte dootte, amubia ig kekeɗ ag miag daatteb doottem. Danab nug hos dawai gaye, danab doya ottaitte, amubia ig Juda danab ah ohnab ottaittem. Kekeɗ ag wan imu oh, aɗi keeke wan imuppa daatte, ag diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb. Ao, ag wan imunu aab okkai oh, danab ah appa daatteb ele amu, ag amu oh diippeg, ahilag daaglagnu, ag amu ohnu aɗi hekkulagnu oolag daatte hekkulagnuib uɗitteb.’ Juda danab ah ag anam akkulag,” awa atte.

Gayak Nai 2:12

Nid naunau ag anilkad oɗ mattan, “Ee adeppa daatte?” aon atteb. Ge, ag danab qep elabppa guittak okkai awa, ameg qittintte, amubia ag aab okkainu ibppa ag amelag qittine, ag anilkad aɗalattegeg, eppelagppa aakku mauhadtteb.

Gayak Nai 2:2

Naɗi Nug oo gai-iitta doya oo metta ehanittak kobol ii dabmaama, Juda danab ah ii ehanattom; iitta, Nug he, kekeɗ ag uɗin, Juda danab ah, ahilkad keeke ele danab ee toppua ukke nauhtte bia hatteg nauhppig. Yawe Nug ⌊Juda dilag eheɗ haknu oppoɗi be⌋ he, kekeɗ ag Juda dilag ban haknu aben ɠagattag heeg nauhppig. Ao, Nug he, kekeɗ ag heeg, Juda uɗa nak aoeg, ahilag ɗo maɗoɗ am binag ele iinab daye, Juda dilag anuqak danab ele ag anamib, binalag ele iinab daatteb.

Esekiel 36:4

Kekeɗ ag anam heppig amunu, Israel dilag qauko, ag Naɗi Yawenu nai doyeg! Ge, Naɗi Yawe Nug ag qauko okkai, qauko nakok, oolnu noak okkai, oolnu noak nakok, aab hele-ettak daatteb, aab laala ele, wan laala ag talilidna daatteb dilag ban danab ahilagppa oinna, keeke akkan gonana, aon aon aqappig ele amu, Nug ag ohnu nai imu atte amu, ag doyeg!

Hosea 2:12

Nug laa ag nug ele niippig, ag nug nob mettanna, grep dad, ad fignu dad ele medappignu aum, amu diig amunu da geha nuhig grep dad, ad fignu dad ele heppi nauhkkulag. Ao, da geha heppi, muɗi qaun ele huananab teguadkkulag, doɗ dakkuɗ aakkuib ag meulkad lakkulag.

Hosea 8:14

Da, Yawe, da Israel danab ah hattami, amge ag dahilnu daulag atie, ag king laulkad okkai okkai buualadppig daatteb. Juda danab ah ag ⌊kekeɗnu baɗan,⌋ ag aab kuɗumppa aɗ keeke heppig. Ag anam heppig, amge da heppi, aab dittia, ahilkad aab okkai, amu ahilkad aab okkai aɗ ɠagattagnab ele eokku.” Yawe Nug anam awa atte.

Joel 2:3

Amu tap-lokus amu ag ukkaegeg, aab ewak keeke ewe, iitta mette, amubia aɗi keeke ag gokkulagppa daatte, ag keeke amu heeg, keeke aab ewak bia daatteb. Ao, ag gotteb baelagppa amu, aab ewa dittia huan attannab taata, keeke ewe iitta mette, amubia daatte. Tap-lokus ag gonana, wan ag gokkulagppa daatte, amuam wan atu enanag, dad Iden bia, amge tap amu gotteb baelagppa, keeke laa ii daatte; atu taɗaknab bia. Keeke laa ii uueg daatte; iitta.

Lewitikas 26:16

da geha ag bu madakkul. Da heppi, ahilagppa baɗak eheɗ nau laippun ahatte amu, ahilagppa bekku. Oɗe, danab beɗu he nauhtte, amu geha ag aqakku. Am geha beɗu gakkaɗak nau, danab ameg he nauhtte, am danab qe, nug qinonob mauhtte, beɗu gakkaɗak amu ag aqakku. Ag ee eppaglag, amge ag hamu hekkulag. Aɗinu? Kekeɗ ag uɗin, aon lakkulag.

Sepanaia 3:6

Amu Yawe Nug atte. “Da wanppan wan kuɗum hei, nauhna autna aoppig daatteb. Ao, da hei, ahilag ban haknu aben ɠagattag ele nauhppig. Da hei, ahilag aab okkainu ib amu, danab ah laa ag appa ii oitteb. Ao, da hei, appa auntai laa ii noa gotte. Ahilkad aab am nauhak daatteb. Danab o ah laa appa bau ii daatte.

Malakai 1:4

Esau buɗub, ag Edom wanppa daatteb, ag inam akkulagtai, “Kayak Nug ihinig wan he nauhom, amge ig nauhom am baula buugnig.” Ag anam akkulagtai, amge Yawe Nukka Ɠagattag Oh Ele Nug inam atte. “Ag ahilag wan heppeg ena daakkunu hekkulagtai, amge da eɗue loppaɗppi nekku! Da anam heppi, laa ag ahilag wan, ag amunu, nau hak danab ah dilag wan, anana, ag Esau buɗub dilagnu ele, danab ah Yawe Nug ahilagnu hanhan oppoɗi bak dootte, akkulag,” awa atte.

Duteronomi 28:33

Wan laappan danab ag ii doyadtteb ele, ag geha, ag Israel ag uɗat naɗi hena, keh ebatteb amu, wan laappan danab, ag ag ii doyadttem ele, ag lakkulag. Ag Israel, ag geha danab amu waalagppa daappeg, ag eheɗ nau hadappeppeg, ag bau dayak haen ahilag ohppa anamib daaglag.