Jeremaia 4:9 - Nobonob Baibel

⁹ Da anam ai, Yawe Nug aum. “Laa uɗitte ele, nug uɗieb, deɗ amuppa ag Juda, ag ahilag king, ehanittak anuqak danab laa oh ele ag baɗan, gai-iitta daaglag. Mana mettak danab ag anidna, ameg iɗuak dooglag, amu propet danab ag dabmak huanaknab aoglag,” awa aum.

Jeremaia 4:9 ပူးပေါင်းရင်းမြစ်များ

2 King 25:4

Juda ag anam eheɗ daaegeg, Babilon ag aab okkainu aɗ aakku heeg, giɗo naɗi dayom. Giɗo naɗi daye, Juda dilag daup Jerusalem daappig ele ag ⌊Sedekaia ele⌋ tuqan amuppa kingnu dadppa wana gona, aabnu aɗ laih laih doa qal mettak daapiɗ odppa wana, dimittim gona, ag oolna, atu onig Araba, appa gokkulagnu goppig. Babilon ag aab talilidna daappig, amge Juda dilag daup ag ib amu anidna, oolna goppig.

Sam 102:4

Dahil uttu taub am oɗe ele, gikkiɗah le iittanu qaɗaiedatte bia daatte amunu, da ee laa lakkulnu enug ii iwe ii lattem.

Aisaia 19:16

Amu haen amuppa Yawe Nukka Ɠagattag Oh Ele, Nug Isip danab ag bu aqebeb, ag ah ɠagattag iitta daatteb bia daan, ag eheɗ baɗan, hahaɗkkulag.

Aisaia 19:3

Isip danab ah ag anam henana, dabmak kuɗum aoppeg, ag oolag na qeebeb, da geha heppi, Isip dilag maittak keeke laala hekkulagnu kaboliak dayeb, ag anam daanna, ag geha ahilkad kayak hambuppuak dottolkad ag ehanadkkulagnu oɗ mattanna, ag gona, mauhak ele gamag danab, mauhak ele mattiak danab ele gumadna gona, dabmak ahilag aoglagnu ele oɗ mattaglag.

Aisaia 28:19

Haen adekkuppa uug nau, okkai amu uɗikku amu, uug amuam ag diia auta aokku. Amu uug amu haen kuɗumnab amun, tuqan ele anidkkulagib.” Naɗi Yawe Nug anam atte. Amu aun aɗi ag nai imu doon, diignu doyak tutukku aoglag amu, ag aakku eheɗ nau baɗan daaglag.

Jeremaia 2:26

Amu Israel oh ag uɗa nak nau guittak eleppa daatteb. Haen polis ag yab danab aɗaeg, uɗa nak nau guittak ele dootte, uɗa nak ahilagppa anamib daatte. Ag, ahilag king, ahilag ehanittak anuqak danab, ahilkad mana mettak danab, amu ahilkad propet danab ele, ag oh anamib.

Jeremaia 25:34

Ag gumak danab, ag danab sipsip gumadtte bia ag gumak danab daanna, danab ah gumadtteb, ag eheɗ gaanna, mahieg! Ao, ag gumak danab, ag danab sipsip gumadtte bia daan, ag danab ah gumadtteb amu, ag gappudppa niin, beɗulag itoɗinna dayeg! Aɗinu? Danab ag doɗ kuɗum aqaeg mauhtteb bia, kekeɗ ag banppa ag aqappeg mauhkkulagnu haen aakku beum daatte. Ao, ag aakku hinai enanag na qa aoɗtte, ag amubia daaglag.

Jeremaia 37:19

Propet laa ag dimppa aɗi bekkunu nai genab iitta mattina, ag na amenppa, ‘Babilon ag uɗin, na nittaglagnu, wan imuppan danab ah ele aqaglagnu ban ii hemana,’ appig amu, ag gemu adeppa daatteb?

Jeremaia 48:41

Kekeɗ ag uɗin, Keriot eɗadna, wan amuppan aab aɗ ɠagattagnab ele aoppeg, Keriot danab ah ag eppelagppa daaglag. Amu beeb, deɗ amuppa Moapnu daup ag ah nid aokkunu hette bia daaglag.

Jeremaia 5:31

Kobol naunab nau ag hetteb am inam. Propet danab ag doonna, propet nai hambuppuak maditteb. Mana mettak danab ag akka, ahilag dabmak dim lamidna, danab ah gumadtteb. Propet, mana mettak danab ele ag anam aakku hetteb, amge dahilad danab ah ag kobol amunu oolag mauhtte. Anam, amge ib amu batakppa ag attem anidkkulag?” awa atte.

Jeremaia 52:7

Juda ag anam eheɗ daaegeg, Babilon ag aab okkainu aɗ aakku heeg, giɗo naɗi dayom. Giɗo naɗi daye, Juda dilag daup Jerusalem daappig ele ag ⌊Sedekaia ele⌋ tuqan amuppa kingnu dadppa wana gona, aab okkainu aɗ laih laih doa qal mettak daapiɗ odppa wana, dimittim gona, ag oolna, atu Araba, ag appa gokkulagnu goppig. Babilon ag aab talilidna daappig, amge Juda dilag daup ag ib amu anidna, oolna goppig.

Aposel 13:41

‘O ag awa awa qettak danab, ag anidna, dabmak kuɗum aonna, mauheg! Aɗinu? Nahip haenppa da keeke laa, danab laa nug na amenppa anam bia ab doolom amu, na ootppa genab ii doolom, amge da hekkul.’ ” Pol nug anam aum.